1 PETERUS 5 - Kenyah New Testament

Mpun dumba Allah

¹ Ini ca katuk keʹ me mung diaʹ tuʹa Mpun diaʹ un ngan ncem, moʹ akeʹ pe ca tuʹa Mpun pekuaʹ ngan ncem. Akeʹ iaʹ badaʹ tugen neng penuyen Keristus, ngan kahum pe akeʹ dalem serema peniga iaʹ kenai luhaʹ ʹo.

² Pengenyat ceʹ neng ikem: manan ne Mpun dumba iaʹ Allah naʹ mikem. Petubo ne ida man pengejaya hem bayaʹ pengubaʹ Allah. Abeʹ e ngan taten tekaʹ kimet cem. Ngkang gayeng ngkem ngan tekaʹ tangen tawai hem, ngan ayen ti ie ngan kimet iaʹ ubaʹ mita bang.

³ Ayen ncem ngempau usa hem neng diaʹ ikem petubo, di lareʹ tiga hem nuyan ca kata me Mpun dumba dina.

⁴ Midan kenai iaʹ Pengebioʹ Manan Dumba ina luhaʹ ʹo, ikem ke alaʹ bang peniga iaʹ menyerema pabeʹ bayaʹ.

⁵ Pekina pe ikem demanai, tiga hem tunuk palaʹ diaʹ lataʹ. Tiga hem mung man tekaʹ libaʹ kimet cem mepo ngan petubo ikem selepeʹ. Koʹ baʹan dau Kitap Tuhan: “Allah ke nyekang diaʹ balang tawai, un sepuʹo ia ke naʹ pengelesau ue ngan lebang palaʹ diaʹ libaʹ kimet.”

⁶ Ina ukoʹ o tiga hem ngelibaʹ kimet cem kentaʹ ujoʹ Allah iaʹ bioʹ penyukat ina, apan ne ke ngempau ikem tegoʹ tuket te ʹo.

⁷ Pelek ne mung tekaʹ pengejanga tawai hem palaʹ ia, moʹ ia le iaʹ nyingo ikem.

⁸ Jagaʹ ne kimet cem, ngan tiga hem lemuto tenup tekaʹ, moʹ un bunoʹ kem Bali Jaʹat ina, koʹ baʹan ca lencau iaʹ lemuto nyanam ngan ngahang mita aheʹ iaʹ senteng ia ke nyeloʹ.

⁹ Salet le ikem dalem pengelan ncem, ngan nyekang ne ia. Moʹ tisen te ikem ban mung cenganak kem dalem Tuhan, iaʹ un pa libut usun tanaʹ ini, nco pe ida sihoʹ tuyen koʹ baʹan ikem lete.

¹⁰ Moʹ tai lepa hem tisen tekaʹ sihoʹ tuyen iaʹ abeʹ un majan, Allah tengen iaʹ ke pedaʹam udip kem, ngan ke pedengkep ikem, ngan ke ngepali ikem, ngan ke nyalet ikem ʹo. Allah iaʹ atek puʹun mung pengelesau iaʹ mengin ikem ke pebeka dalem peniga Keristus iaʹ menyerema pa pa majan.

¹¹ Palaʹ ia ne ketai penyukat pa pa majan ʹo. Amin.

Nyaheʹ ne

¹² Akeʹ uyan surat iaʹ buʹet ini palaʹ ikem man ujoʹ Suanus, moʹ keʹ kuma ia ca cenganak le iaʹ semamet. Kimet ceʹ ubaʹ ke petangen ikem, ngan badaʹ ban ini iaʹ lan lan ne pengelesau Allah. Tiga hem salet nekejeng kidi.

¹³ Un Mpun cenganak kem kaʹ lepoʹ Babil, iaʹ Allah ban lemileʹ koʹ baʹan ikem are, badaʹ tiga saheʹ palaʹ ikem. Pekina pe cen anak keʹ Markus.

¹⁴ Tiga hem nyelama ikem selepeʹ, man puyan paʹoʹ ukoʹ baʹan iaʹ tekep diseʹ ilu diaʹ pecenganak are. Awaʹ pe udip iaʹ tadan ke un ngan ncem mung diaʹ ban pebeka dalem Keristus. 14