1 PETERUS 4 - Kenyah New Testament

Pekaliu puyan penyaheʹ

¹ Moʹ Keristus ban sihoʹ tuyen neng usa ha, tiga hem alaʹ kimet koʹ baʹan ia are, ke ngepali penawai hem. Moʹ aheʹ iaʹ ngihen tuyen neng usa ha, seʹ e pekenaʹ neng uyan penyalaʹ,

² apan ne ceng dadoʹ udip kem kusun tanaʹ ini, abeʹ kem bayaʹ asam pengubaʹ usa kelunan, di lareʹ bayaʹ pengubaʹ kimet Allah.

³ Moʹ sukat majan ne ikem lepa penco pemuyan adet dulu diaʹ muau Tuhan, udip kem dalau hem ban mudip dalem puyan pemung nyelem, ngan asam pengubaʹ usa, mabuk, ngan penta neng iaʹ jaʹat, ngan betisep, ngan ngelan palaʹ uyat.

⁴ Naʹkini dulu diaʹ muau neng Tuhan tai maru tekaʹ kimet de, moʹ abeʹ ne ikem tai pemung ngan nte neng udip iaʹ lajam, ngan palaʹ nta neng iaʹ jaʹat. Ina ukoʹ de ngejaʹat dau neng ikem.

⁵ Un sepuʹo abeʹ de senteng are ke mipa Allah, iaʹ tenup ke pebetep ukum neng mung kelunan diaʹ mudip ngan diaʹ matai ʹo.

⁶ Ina ukoʹ le ban badaʹ Denga Injil palaʹ diaʹ matai tegoʹ de mudip are. Naʹ pe ida ban sihoʹ ukum ne gusa re dalau re mudip kusun tanaʹ are, senteng nte mudip bayaʹ layen Allah dalem berua re kuʹun Denga Injil ini.

Kanan pengencai Allah

⁷ Lepa nyeng ne ketai kuʹo mung udip ini. Ina ukoʹ tiga hem mencam le mapo usa hem, ngan jagaʹ kimet cem, apan ncem telit kaʹ lemameʹ.

⁸ Un puyan iaʹ ading ading neng mung diaʹ ca, iaʹ ina malaʹ ne lan lan tekaʹ neng ikem selepeʹ, moʹ malaʹ ina senteng nge mempeng kadoʹ penyalaʹ.

⁹ Tiga hem selama alaʹ ikem neng amin ncem selepeʹ, ngan abeʹ un kuheng dau.

¹⁰ Singket usa le un pengencai cen Allah. Tiga le kanan ne, ngan pawat bang nge me dulu, koʹ baʹan ca usa iaʹ mencam petubo gayeng Allah, iaʹ kanan naʹan naʹan pengencai ie.

¹¹ Buk aheʹ iaʹ penco tiraʹ, ayen isiu ue sekipaʹ ngan tiraʹ Allah. Aheʹ iaʹ petubo dulu, tiga ha kanan pengali iaʹ Allah ban naʹ mia, apan neng singket singket naʹan ne ilu pempau Allah, ban kuʹun Yesus Keristus iaʹ un mung serema peniga ngan penyukat pa pa majan. Amin.

Penuyen iaʹ tekep neng udip Keristin

¹² Ahaʹ cenganak diaʹ akeʹ malaʹ, ayen ncem bingaʹ neng penuyen iaʹ nai ten ikem naʹkini, koʹ baʹan neng ca puyan iaʹ bulen nai sihoʹ ikem.

¹³ Di lareʹ pa mpi hem tisen pebeka dalem penuyen Keristus, bangen le ikem, apan tai sukung tekaʹ bangen ncem tegoʹ serema peniga ha kenai luhaʹ ʹo.

¹⁴ Buk dulu pejaʹat dau neng ikem suaʹ ngadan Keristus, bangen le saheʹ kem. Moʹ pekini ban sen puyan ina: Berua peniga, iaʹ ina Berua Allah, un ne ngelineʹ neng ikem.

¹⁵ Ayen buhaʹ ca usa neng ahang ikem tisen tekaʹ tuyen moʹ ban kuʹun lematai, ngan ngelau, ngan uyan jaʹat, ngan nekelet puyan dulu.

¹⁶ Un sepuʹo buk kem sihoʹ tuyen moʹ suaʹ kem Keristin, ayen saʹe, di lareʹ man ngadan Keristus ina hem pempau Allah.

¹⁷ Abeʹ ne tuket neng puyan Allah ke peteneng ukum, ading ading nge me pengamin ne tengen. Buk puyan peteneng ukum ina ke nading neng ilu, ke kumpin ne ketai umpeng nte diaʹ abeʹ un ngelan Denga Injil iaʹ cen Allah ina ʹo?

¹⁸ Koʹ baʹan dau Kitap Tuhan: “Buk ne ida diaʹ teneng, tusa ke alaʹ pengudip dalem Tuhan, Ke kumpin ne santet de diaʹ muau neng Allah laʹa, ngan diaʹ sangan penyalaʹ ʹo tupe?”

¹⁹ Moʹ ban pekina, mung diaʹ tisen tuyen bayaʹ ban pengubaʹ kimet Allah, tiga re tudep neng pemuyan tiga cen puyan nte napi berua re palaʹ Tuhan Allah iaʹ ban nyelung ida, moʹ abeʹ e lepo dau tuket te.