1 PETERUS 3 - Kenyah New Testament

Diaʹ pepeto

¹ Pekina lete mung ngkem leto diaʹ un laki, tiga hem tunuk palaʹ laki hem, apan ne buk un laki diaʹ muau neng tiraʹ Tuhan, senteng nge tai pihit un pengelan kuʹun ban penyaheʹ kem leto. Abeʹ kem titin pisiu ida man ca luʹung tiraʹ pe,

² buk de taʹan diseʹ puyan penyaheʹ kem iaʹ buheʹ ngan temek bayaʹ Allah.

³ Ayen ncem kanan gelam iaʹ tai pasak seʹ, man ncem keniga diseʹ usa hem koʹ baʹan anyam puk, ngan gelam gelam mat, ngan naʹan naʹan sapai iaʹ tiga.

⁴ Di lareʹ iaʹ keniga diseʹ usa hem, tekep pe luhaʹ cen penyaheʹ tiga hem, ina ne gelam ngkem iaʹ abeʹ un ketai mubo, iaʹ ina cen baloʹ kimet iaʹ denaʹ seʹ ngan lemaʹ. Ina iaʹ atek tiga neng penaʹat Allah.

⁵ Moʹ mung leto diaʹ temek bayaʹ Allah cen naʹaʹ, diaʹ un tebelum neng ia, pekina seʹ de keniga diseʹ usa re: iaʹ ina ida tunuk palaʹ laki re tengen.

⁶ Koʹ baʹan Sara iaʹ bayaʹ dau katuk Ibrahim, ia ngamai ie. Ikem dini ne mela Sara buk kem kanan penyaheʹ tiga ngan denaʹ, ngan abeʹ kem mentam.

⁷ Pekina lete mung ngkem laki diaʹ un leto, tiga hem pemung mudip ngan leto hem, dalem iaʹ temek ngan denaʹ saheʹ, moʹ leto ne lemaʹ luhan nte neng ʹo laki. Ina ukoʹ kem petubo ida ngan selama, moʹ kuaʹ kem pemung ke alaʹ pengencai udip cen Allah, idi temameʹ kem abeʹ un tai pempeng.

Taru nai kuʹun pemuyan iaʹ teneng

⁸ Kebayaʹ a: tiga ca le kimet cem, ngan ca le tekaʹ penawai hem, ngan malaʹ ikem selepeʹ dalem ngkem pecenganak ngan tiga saheʹ, ngan libaʹ kimet neng ikem selepeʹ.

⁹ Ayen ncem nyuaʹ iaʹ jaʹat man iaʹ jaʹat, pekina pe nyuaʹ tunoʹ man tunoʹ, di lareʹ nyuaʹ man peniga. Moʹ ca peniga iaʹ Allah petuket ke naʹ mikem, ina ukoʹ o ban mengin ikem.

¹⁰ Moʹ pekini dau Kitap Tuhan: “Buk aheʹ iaʹ ubaʹ ke mudip saheʹ, ngan ngawaʹ ubaʹ ke tisen iaʹ tiga ngajan udip pe re; Tiga ha pekenaʹ pisiu iaʹ jaʹat, ngan pekenaʹ pisiu iaʹ palo.

¹¹ Atek ke ke nyalaʹ usa ha cen iaʹ jaʹat, sulo tai uyan iaʹ tiga, ngan mita udip iaʹ tadan, ngan puai ie.

¹² Moʹ Tuhan lemuto naʹat aheʹ diaʹ teneng. Lemuto ho ngeringa dau temameʹ de. Un sepuʹo Tuhan nyekang aheʹ diaʹ uyan jaʹat.”

¹³ Aheʹ iaʹ ke ngejaʹat ikem buk kem tangen uyan tiga tupe?

¹⁴ Naʹ pe ikem sihoʹ tuyen kuʹun puyan ncem iaʹ teneng, bangen le saheʹ kem. Ayen takut dulu, ngan ayen ncem tai iʹut tawai.

¹⁵ Un sepuʹo nyalet ne Keristus dalem penawai hem, iaʹ atek Tuʹa penina hem. Tiga hem tenup lemuto ke mipa me aheʹ aheʹ iaʹ lemutu sen neng tebelum iaʹ un neng ikem.

¹⁶ Ngan tiga hem mipa ha ngan lemaʹ dau ngan selama dau. Tiga ha lemuto dema tekaʹ kimet dalem penawai hem, apan buk dulu ke pejaʹat ikem moʹ kem mudip bayaʹ Keristus, ketai saʹe re ke pejaʹat ikem moʹ pemuyan ncem tiga.

¹⁷ Buk kem sihoʹ penuyen suaʹ puyan ncem iaʹ tiga moʹ o bayaʹ pengubaʹ Allah, ina iaʹ atek tiga neng ʹo hem sihoʹ penuyen suaʹ kem ban uyan jaʹat.

¹⁸ Moʹ Keristus tengen iaʹ ban matai suaʹ ilu, iaʹ lepa tisen matai ca liwai lan lan tuman penyalaʹ. Iaʹ ina ca kelunan iaʹ teneng matai suaʹ diaʹ abeʹ un teneng, apan ne ke ngkin ilu palaʹ Allah. Lan te dulu lematai ia neng usa ha, un sepuʹo neng berua ha un penyukat iaʹ pudip ia.

¹⁹ Dalem berua ha ina, tai ie badaʹ denga ha palaʹ mung berua iaʹ peput dalem sepin,

²⁰ berua diaʹ ban muau neng Allah cen naʹaʹ, dalau Allah ngedadoʹ kimet te tegoʹ udip Nuh, ngajan ne uyan kapen sungai are. Kediʹut de le diaʹ kedalem kapen ina diaʹ mudip cen sungai ina, bang aya usa le ida.

²¹ Man sungai ina le ke alaʹ kata neng puyan batis iaʹ pudip ilu dalem Tuhan naʹkini: sen ne, abeʹ e ntoʹ man le muheʹ sau ano usa le, di lareʹ man tiraʹ le petuket bayaʹ Allah cen tekaʹ kimet dalem penawai le iaʹ tiga. Batis ina iaʹ pudip ikem kuʹun puyan Yesus Keristus ngeliwet mudip cen patai ie,

²² iaʹ lepa tai kaʹ surga tahaʹ taʹu Allah. Cen ina ha ngkang perinta neng mung melikat, mung diaʹ paren, ngan mung penyukat surga.