1 KURINTUS 9 - Kenyah New Testament

Puyan penyukat ngan puyan gayeng Lawa Injil

¹ Moʹ abeʹ keʹ ca kelunan iaʹ muga tekaʹ mudip tupe? Moʹ abeʹ keʹ te ca kelunan lawa Injil tupe? Moʹ abeʹ keʹ lepa taʹan Yesus, Tuhan le tupe? Moʹ abeʹ kem dini diaʹ badaʹ uban nceʹ pegayeng me Tuhan tupe?

² Naʹ pe kelunan diaʹ ca abeʹ un putuk akeʹ ca lawa Injil, tekep ikem ke alaʹ akeʹ. Moʹ puyan pengudip kem iaʹ pebulung dalem Tuhan iaʹ badaʹ kumpin seʹ keʹ ca lawa Injil.

³ Tegoʹ dulu pekabi akeʹ, pekini dau heʹ nyekang makeʹ:

⁴ Moʹ abeʹ keʹ sukat alaʹ penguman ngan tisep suaʹ gayeng ngkeʹ tupe?

⁵ Moʹ abeʹ keʹ sukat uyan kuaʹ baʹan puyan lawa Injil diaʹ ca, ngan diaʹ cenganak laki Tuhan, ngan Peterus tupe, sulo ngkin leto iaʹ ngelan Tuhan serengan ngan nceʹ masat?

⁶ Bang ameʹ dua Barnabas tuaʹ le iaʹ tekep ke mita penguman mameʹ tengen tupe?

⁷ Kempi un sedadu iaʹ ke mita penguman mia tengen tupe? Aheʹ iaʹ un pula buaʹ anggur ngan abeʹ e sukat uman buʹan ne tupe? Aheʹ iaʹ petubo ca aba pakan ne ngan abeʹ e sukat alaʹ telang iteʹ de tupe?

⁸ Seʹ keʹ alaʹ kata cen puyan kelunan ne ini. Abeʹ e bang pekina tuaʹ le, moʹ Katuk Adet Musa un pekuaʹ dau ngan ini lete.

⁹ Ilu baca dalem Katuk Adet Musa, un dau ue: “Ayen ncem meka paʹ sapi dalau ue mihik padai gandum ne.” Lan ne Allah iaʹ petawai sapi,

¹⁰ abeʹ e pekimet ilu dalau ue pekina dau tupe? Atek sihoʹ neng ilu ne dau surat ini. Uban kelunan iaʹ nugan kuaʹ kelunan iaʹ majau, tekep re pegayeng mentung nebelum ke alaʹ tulat pada ʹo.

¹¹ Ameʹ lepa mula beneʹ udip berua neng ahang ikem. Kumpin, salaʹ bioʹ taʹin buk meʹ alaʹ cen ikem suaʹ inu ameʹ ke kanan kusun tanaʹ ini ʹo tupe?

¹² Buk kelunan diaʹ ca senteng nyat pekini neng ikem, nco ameʹ pe un penyukat ina ne. Un sepuʹo, abeʹ meʹ kanan penyukat ina, di lareʹ ameʹ nengayet dalem mung naʹan, apan meʹ abeʹ un mempeng kenai asat Denga Injil Keristus.

¹³ Tisen te ikem uban kelunan diaʹ pegayeng neng Umaʹ Palan Allah ne, sukat alaʹ penguman nte cen Umaʹ Palan Allah ina lete. Ngan kelunan diaʹ pubo padung liwa sukat alaʹ tulat cen patai liwa ina lete.

¹⁴ Pekina lete Tuhan lepa cuk ilu apan kelunan iaʹ badaʹ Denga Injil, tekep pe ida alaʹ pengudip de cen Denga Injil ina.

¹⁵ Un sepuʹo abeʹ awai heʹ kanan ca penyukat ina are lepe. Laʹa abeʹ keʹ un nyurat surat ini apan nceʹ ke cuk ikem uyan pekina neng akeʹ. Ceng to heʹ matai lien neng ʹo puyan pengebangen nceʹ ketai nuyan isiu pelo-lo.

¹⁶ Puyan nceʹ pedenga Denga Injil, abeʹ e nuyan ukoʹ keʹ ke bangen tekaʹ. Abeʹ keʹ senteng muau dau iaʹ cuk akeʹ. Siʹau pe akeʹ buk keʹ abeʹ un pedenga Denga Injil ini.

¹⁷ Moʹ buk keʹ ngkang gayeng ini ngan pengubaʹ kimet ceʹ tengen, tuman nceʹ ke pekimet gaji lete. Un sepuʹo akeʹ ti ie moʹ kuʹun dau iaʹ cuk akeʹ are. Atek Tuhan Allah iaʹ petapi gayeng ini palaʹ akeʹ, ina ukoʹ keʹ ngkang nge.

¹⁸ Tuman ina, inu suaʹ akeʹ ke alaʹ tupe? Bang ini le, ban un ca awang iaʹ ukoʹ keʹ ke pedenga Denga Injil mentung ngkeʹ abeʹ un nyat suaʹ kidi, ngan abeʹ keʹ kanan penyukat ceʹ kuʹun gayeng Denga Injil ina.

¹⁹ Lan akeʹ ca kelunan iaʹ muga tekaʹ mudip. Abeʹ keʹ ulaʹ kelunan mele aheʹ pe. Un sepuʹo akeʹ ngulaʹ usa heʹ palaʹ kelunan mung, apan nceʹ sukat alaʹ kelunan lapa kadoʹ me Tuhan.

²⁰ Dalau heʹ un neng ahang kelunan Yahudi, akeʹ mudip koʹ baʹan seʹ kelunan Yahudi are lete, apan nceʹ sukat ke alaʹ kelunan Yahudi ne. Naʹ pe usa heʹ tengen abeʹ un tahaʹ ntaʹ Katuk Adet Musa, dalau heʹ pegayeng neng ahang kelunan diaʹ pekina, akeʹ mudip koʹ baʹan seʹ keʹ un tahaʹ ntaʹ Katuk Adet Musa lete, apan nceʹ sukat ke alaʹ kelunan dina.

²¹ Pekina lete dalau heʹ un neng ahang dulu diaʹ ca, akeʹ mudip koʹ baʹan dulu diaʹ ca diaʹ tahaʹ awang neng adet Yahudi, apan nceʹ sukat alaʹ dulu diaʹ ca dina. Abeʹ keʹ muau dau Katuk Adet Tuhan Allah, moʹ atek tahaʹ ntaʹ Katuk Adet Keristus ne akeʹ.

²² Neng ahang kelunan iaʹ lemaʹ pengelan, akeʹ nuyan lemaʹ koʹ baʹan ida lete, apan nceʹ sukat alaʹ kelunan diaʹ lemaʹ dina. Ngan puyan pekina akeʹ lepa nuyan mung naʹan palaʹ kelunan mung, apan nceʹ sukat pudip palai kelunan, mele inu inu senganan le kanan.

²³ Mung puyan dina akeʹ uyan tuman ban Denga Injil ina, apan nceʹ ke kahum pemung dalem peniga ha.

²⁴ Buk le pekata kelunan diaʹ pasa taket, tisen te ikem, mung nte ngasa, un sepuʹo bang ca le iaʹ alaʹ bang iaʹ un usun. Ngasa ne ikem koʹ baʹan kelunan iaʹ nengayet ke alaʹ bang.

²⁵ Mung kelunan diaʹ malai penta lepa pekalai puyan mapo usa re ngan tangen tangen seʹ puyan nte. Ida uyan pekina apan nte ke alaʹ tapung paren iaʹ laho jaʹat, un sepuʹo ilu dini iaʹ pekalai puyan mapo usa le ngan tangen seʹ, apan le ke alaʹ ca naʹan tapung iaʹ ke un pa abeʹ bayaʹ.

²⁶ Ina ukoʹ keʹ ngasa pejo ketai heʹ palaʹ bulan janan ini. Alaʹ ca kata laʹa koʹ baʹan kelunan iaʹ malai penta pesagun, abeʹ keʹ nyagun kawang bareng.

²⁷ Akeʹ ngahing usa heʹ ngan petunuk usa heʹ neng singket naʹan, moʹ keʹ malap ketai, uʹo lepa heʹ pekatuk kelunan diaʹ ca, Laki iaʹ ngkang penta ini ke nyekang dau neng akeʹ.