1 KURINTUS 6 - Kenyah New Testament

Puyan pesakat neng ahang diaʹ pecenganak dalem Tuhan

¹ Kumpin ne puyan ncem buk ca usa ke pesakat ngan cenganak ke dalem Tuhan? Moʹ inu ue tai ngkin isiu ina palaʹ kelunan diaʹ abeʹ un ngelan Tuhan ke pebetep dau neng ina? Moʹ inu ue abeʹ un napi tawai ie palaʹ kelunan diaʹ anun Tuhan Allah, ngan cuk ida pebetep dau neng puyan ina?

² Moʹ inu hem abeʹ un tisen tupe? atek kelunan diaʹ anun Tuhan Allah lete iaʹ ke pebetep dau kusun tanaʹ ini bayaʹ. Buk ke pekina, ikem diaʹ ke pebetep dau neng usun tanaʹ ini, moʹ inu hem abeʹ un senteng ke pebetep dau neng puyan iaʹ iʹut tupe?

³ Moʹ inu hem abeʹ un tisen tupe? atek ilu lete iaʹ ke pebetep dau neng melikat ʹo, nco pelaʹa neng puyan pengudip le naʹkini.

⁴ Tuman ina, kumpin kaʹ kimet cem buk puyan pesakat kenai beteʹ neng ahang ikem? Un ncem ketai ngkin puyan ina palaʹ kelunan iaʹ abeʹ un ngadan dalem Mpun, ngan cuk ia ke pebetep dau neng puyan ina mikem mo?

⁵ Atek ca penyaʹe-aʹe puyan ina. Abeʹ un kasip ca kelunan iaʹ tudi un dalem Mpun ncem, iaʹ senteng ke pebetep dau neng puyan pesakat neng ahang diaʹ cenganak le dalem Tuhan.

⁶ Di lareʹ moʹ inu hem pedayo cenganak kem tai ngkin puyan pesakat ina palaʹ ladung dulu diaʹ pebetep dau, ngan napi tawai ie palaʹ diaʹ abeʹ un ngelan Tuhan, ngan cuk ida pebetep dau neng puyan ina mikem?

⁷ Iaʹ atek lan ne puyan pesakat neng ahang ikem ina iaʹ ke pesupeʹ ikem lan. Pulang tiga hem ngihen buk dulu ngejaʹat ikem, ngan ngelau ikem, neng ʹo hem ke uyan iaʹ salaʹ.

⁸ Un sepuʹo ikem tengen iaʹ uyan salaʹ neng ahang ikem selepeʹ. Ikem iaʹ ngelau ikem selepeʹ, ngan mincaʹ cenganak kem loʹ.

⁹ Tisen te ikem tupe? kelunan diaʹ uyan jaʹat, nyahut de ke kahum dalem peniga pengaren Allah ne. Ayen ncem lemalo usa hem tengen. Kelunan diaʹ pemung kena re ke pepeto, pekina pe diaʹ ngelan uyat, pekina pe diaʹ petaro, pekina pe leto diaʹ taro neng leto, pekina pe laki diaʹ taro neng laki,

¹⁰ pekina pe diaʹ bekelau, ngan kelunan tutun, ngan diaʹ mabuk, ngan diaʹ pejaʹat dulu, ngan diaʹ ngelunyeʹ dulu, mung dina abeʹ de ke kahum neng puyan pengaren Allah ke ngaren ilu kelunan ʹo.

¹¹ Cen naʹaʹ un palai neng ahang ikem diaʹ pekina puyan nte, un sepuʹo lepa ne Allah muheʹ ikem cen penyalaʹ, ngan ia iaʹ lepa nengen ikem neng iaʹ buheʹ, ngan ia iaʹ peteneng ikem ngan ne kuʹun pemuyan Tuhan Yesus Keristus, ngan pemuyan Berua Tuhan iaʹ un ilu.

Kanan ne usa hem man peluhaʹ serema peniga Allah

¹² Un dau palai kuma ha: “Abeʹ un ca palan iaʹ ke mulen akeʹ ke uyan ca inu laʹa.” Lan lete diaʹ pekina, un sepuʹo abeʹ e mung puyan dina ke ngkin peniga mikem. Sukat ceʹ pisiu kuma ha: “Abeʹ un ca palan iaʹ ke mulen akeʹ uyan ca inu laʹa,” un sepuʹo abeʹ keʹ dayo ca puyan inu ke uyan akeʹ ulaʹ a.

¹³ Un dau palai laʹa kuma ha: “Penguman iaʹ utung batek, ngan batek iaʹ utung penguman.” Ahaʹ lan lete diaʹ pekina, un sepuʹo dua dina ketai salai kuʹun Allah ʹo. Usa le kelunan abeʹ e tekep ke uyan puyan petaro, di lareʹ usa le kelunan tekep ukoʹ senganan Tuhan. Ngan laʹa Tuhan iaʹ tekep ke kanan usa kelunan.

¹⁴ Allah lepa beteʹ Tuhan cen patai, ngan ia lete iaʹ ke beteʹ ilu man puyan nyingan ne ina lete ʹo.

¹⁵ Un te ikem tisen uban usa hem mung, kudaʹ sangat te nuyan dalem usa Keristus. Kumpin baʹan ncem, sukat le ke ngkin sangat Keristus ina tai pemung ngan leto pedayang? Nyahut te ke pekina ne.

¹⁶ Un te ikem tisen buk ca laki tai pemung ngan leto pedayang ke nuyan ca usa le. Luhaʹ lan dau Kitap Tuhan kuma ha: “Ida dua dina ke nuyan ca usa le.”

¹⁷ Un sepuʹo kelunan iaʹ tunuk palaʹ Tuhan ketai nuyan ca le berua pemung ngan ne.

¹⁸ Kelap ne cen puyan petaro. Singket naʹan penyalaʹ diaʹ ca iaʹ kelunan uyan, abeʹ e sihoʹ usa ha tengen koʹ baʹan ini are. Un sepuʹo kelunan iaʹ pemung nyelem ina, ia ne iaʹ uyan penyalaʹ neng usa ha tengen.

¹⁹ Abeʹ kem tisen tupe? usa hem ina iaʹ atek amin palan Berua Buheʹ. Tuhan Allah lepa naʹ a mikem, apan ne mudip dalem usa hem. Abeʹ kem un ikem tengen, un sepuʹo ikem diaʹ anun Allah.

²⁰ Allah lepa naʹ ca suaʹ iaʹ bioʹ tuman ikem. Tuman ina, tiga hem kanan usa hem ca senganan man ncem peluhaʹ serema peniga Tuhan Allah.