1 KURINTUS 5 - Kenyah New Testament

Puyan petaro dalem Mpun diaʹ ngelan Tuhan

¹ Iaʹ atek lan ne, un nceʹ kenahan dau denga un puyan petaro neng ahang ikem. Ca puyan petaro iaʹ pasak jaʹat neng ʹo pemuyan kelunan diaʹ abeʹ un ngelan Tuhan. Moʹ adeʹ ca kelunan petaro ngan ueʹ amung nge tengen!

² Moʹ caʹ mpau kimet cem, tekep kem bihe. Ngan kelunan iaʹ uyan puyan ina are, tiga hem sau ia cen Mpun ngkem.

³ Telit akeʹ, naʹ pe usa heʹ coʹ neng ikem, un sepuʹo berua heʹ un ngan ncem seleket usa heʹ un ngan ncem. Dalem ngadan Tuhan le Yesus, lepa ne akeʹ pebetep ukum me laki iaʹ uyan puyan iaʹ pasak jaʹat idai, seleket usa heʹ pemung un ngan ncem.

⁴ Tegoʹ kem pempun, akeʹ ke un ngan ncem dalem puyan berua heʹ kuʹun nyingan Tuhan le Yesus iaʹ un pemung ngan le,

⁵ tiga hem mencai kelunan ina me Sitan iaʹ ke nasaʹ usa ha, apan berua ha ke tisen puyan iaʹ ke pudip ia tegoʹ Tau Tuhan kenai ʹo.

⁶ Salaʹ puyan ncem moʹ o mpau kimet cem. Lepa ne ikem tisen neng jo isiu iaʹ kuma ha: “Kediʹut de ala lamut senteng nge pebanga ca keluʹung untat iaʹ bioʹ.”

⁷ Tiga hem pet ala lamut iaʹ puʹun, iaʹ ina penyalaʹ, apan ncem ke nuyan ca keluʹung untat iaʹ buheʹ. Moʹ keʹ ngelan ikem iaʹ buheʹ pekina, ngan abeʹ un pekelet ngan ala lamut. Koʹ baʹan puyan kelunan Yahudi cen naʹaʹ ke petenup ke uman Bunut Paska are, naʹkini Keristus, anak dumba iaʹ atek liwa Paska milu, ngan lepa ne dulu mencai ia.

⁸ Tuman ina, tiga le bangen nai uman bunut le, abeʹ e ca ruti iaʹ pejugau ngan ala lamut iaʹ puʹun un, iaʹ ina ala lamut penyalaʹ ngan puyan iaʹ jaʹat, di lareʹ ca ruti iaʹ abeʹ un ala lamut, iaʹ ina kimet iaʹ dema ngan puyan bayaʹ katuk iaʹ telit.

⁹ Neng surat ceʹ iaʹ ading nte, un dau heʹ, ayen ncem tai pejahi ngan kelunan diaʹ petaro.

¹⁰ Ngan isiu heʹ ina, abeʹ e sihoʹ neng kelunan diaʹ abeʹ un ngelan Tuhan le, koʹ baʹan diaʹ petaro neng ahang ida, pekina pe diaʹ tutun, ngan diaʹ bekelau, ngan diaʹ ngelan uyat. Buk kem ke ngerada ida lan, atek kem ketai kelap ngan tai kawang cen usun tanaʹ ini.

¹¹ Sen isiu heʹ ina are, ayen tai pekejahi ngan kelunan iaʹ badaʹ ia iaʹ cenganak le dalem Tuhan iaʹ caʹ un puyan petaro, pekina pe tutun, ngan ngelan uyat, ngan pejaʹat dulu, mabuk, ngan pekina pe ngelau. Ayen peletoʹ kem tai pemung uman ngan kelunan diaʹ pekina.

^12-13 Abeʹ e gayeng ngkeʹ iaʹ ke pebetep dau neng kelunan diaʹ tahaʹ awang neng Mpun diaʹ ngelan Tuhan. Un sepuʹo Allah iaʹ ke pebetep dau mida ʹo. Di lareʹ tekep lete ikem ke pebetep dau neng kelunan dalem Mpun ncem tengen. Koʹ baʹan dau Kitap iaʹ kuma ha: “Sau ne kelunan iaʹ jaʹat cen Mpun ncem.”