1 KURINTUS 4 - Kenyah New Testament

Diaʹ lawa Keristus

¹ Tuman ina tekep kem naʹ ameʹ seleket ulaʹ Keristus, iaʹ Allah cuk ke petubo katuk ke iaʹ telit ngan iaʹ linget.

² Ca puyan iaʹ bioʹ iaʹ tekep me kelunan iaʹ petubo gayeng, iaʹ ina semamet bayaʹ dau tuʹa ha.

³ Telit akeʹ ca uhat puk pe abeʹ keʹ ketai inu buk kem ke pebetep dau neng akeʹ, pekina pe buk dulu ke pebetep dau neng akeʹ. Abeʹ keʹ senteng ke pebetep dau neng akeʹ tengen.

⁴ Inu pia dema tekaʹ penawai heʹ, abeʹ puyan ina ke badaʹ akeʹ buheʹ cen penyalaʹ. Tuhan tengen le iaʹ mencam ke pebetep dau neng akeʹ.

⁵ Tuman ina, abeʹ kem tekep ke pebetep dau neng kelunan aheʹ aheʹ pe nekena neng tau ue iaʹ tekep. Puyan iaʹ ke pebetep dau neng kebayaʹ a ʹo, abeʹ e nai luhaʹ pa ke kenai Tuhan ʹo. Puyan iaʹ kelunan nyuhuk dalau ntem, idi Tuhan ke peluhaʹ palaʹ iaʹ dema. Tuhan ke pungkaʹ puyan sedep iaʹ un suhuk dalem kimet kelunan. Dalau ina Tuhan Allah ke pada kelunan, singket usa re, bayaʹ ban puyan nte iaʹ tekep.

⁶ Tuman ikem, cenganak cenganak keʹ, ina ukoʹ keʹ ke pesihoʹ puyan dina neng ameʹ dua Apulus. Akeʹ alaʹ kata neng ameʹ dua, apan ncem senteng ke pekalai neng sen isiu iaʹ kuma ha: “Ayen tai duncau neng jo Kitap,” apan ncem are selepeʹ neng kelunan, ngan balang dau neng diaʹ ca, mentung ngkem muau dau neng diaʹ ca.

⁷ Aheʹ iaʹ ngempau ngadan ncem neng ngadan nte diaʹ ca dina tupe? Mung inu iaʹ un neng ikem, Tuhan iaʹ ban naʹ a mikem. Buk lan ne pekina, moʹ inu hem jum neng puyan pengencai Allah tupe koʹ baʹan ban penalan ncem tengen are?

⁸ Lepa beso ne ikem baʹan ncem. Ngan pekina pe ikem lepa kayaʹ baʹan ncem, ngan senteng ke ngkang ikem tengen. Inu baʹin meʹ ke pepo ngan ncem. Ina pengubaʹ keʹ, buk lan ncem ke ngkang pengaren apan meʹ senteng ke ngkang pengaren pemung ngan ncem.

⁹ Kaʹ kimet ceʹ, Allah iaʹ naʹ ameʹ diaʹ lawa Injil dini tahaʹ bayaʹ lan, koʹ baʹan puyan dulu tai ngkin salut kena re ke lematai ida. Moʹ ameʹ dini ke sen penaʹat dulu kusun tanaʹ ini. Ngan pekina pe melikat mile ameʹ.

¹⁰ Ameʹ dini seleket kelunan diaʹ apaʹ ban tuman Keristus, un sepuʹo ikem diaʹ kelunan tudi dalem Keristus. Ameʹ dini iaʹ lemaʹ, ngan ikem iaʹ pali. Muau dulu neng ameʹ, un sepuʹo ikem iaʹ dulu ke nyelama.

¹¹ Pabeʹ naʹkini ameʹ ne iaʹ laʹu ngan muhang, ngan gelam meʹ jaʹat. Muʹo pincaʹ ne ameʹ ngan abeʹ un tuman ukoʹ meʹ ngelineʹ.

¹² Nyara ameʹ pegayeng mita penguman mameʹ tengen. Tunoʹ dulu, ameʹ mipa man puyan peniga. Buk dulu pejaʹat ameʹ, bang pedenaʹ tawai le ameʹ.

¹³ Buk dulu nyakit ameʹ, bang nyat lesau ne ameʹ neng ida. Ameʹ ne iaʹ seleket nek kusun tanaʹ ini, ngan lebawai dalem penaʹat dulu mung, pa abeʹ naʹkini.

¹⁴ Akeʹ nyurat ini, abeʹ e ban nceʹ ubaʹ ke pesaʹe ikem, di lareʹ seʹ keʹ ubaʹ ke pekatuk ikem, koʹ baʹan anak penyelum ngkeʹ are.

¹⁵ Kenuen pe puloʹ ibu kadoʹ guru diaʹ ke pekatuk ikem neng pengudip kem dalem Keristus, un sepuʹo abeʹ amai hem kadoʹ. Neng puyan pengudip kem dalem Keristus Yesus, bang akeʹ le iaʹ amai hem tuman denga Injil ina.

¹⁶ Tuman ina heʹ nyat ikem bayaʹ seʹ puyan nceʹ.

¹⁷ Tuman ina heʹ cuk Timutius nai palaʹ ikem, ban ne ia iaʹ anak keʹ iaʹ akeʹ malaʹ dalem Tuhan, ngan ia iaʹ atek semamet. Ia iaʹ ke cuk ikem petawai neng sen katuk ngan neng puyan pengudip le dalem Keristus Yesus, pekuaʹ koʹ baʹan nceʹ pekatuk dulu kempi kempi dalem singket Mpun.

¹⁸ Palai mikem diaʹ mpau kimet kuma ha abeʹ keʹ kenai naʹat ikem laʹa.

¹⁹ Buk ke pengubaʹ Tuhan, kenai lete akeʹ palaʹ ikem laho. Dalau ina heʹ ke ngetisen puyan penyukat kelunan diaʹ mpau penawai dina, abeʹ e bang isiu paʹ de tuaʹ le.

²⁰ Puyan pengaren Allah neng ilu kelunan abeʹ e ca puyan isiu tuaʹ le, di lareʹ ca puyan penyukat le.

²¹ Inu iaʹ pengubaʹ kem tupe? Kumpin, un tekep keʹ kenai ngkin peta uai palaʹ ikem mo, buk ke are ngan kimet malaʹ ngan denaʹ saheʹ?