1 KURINTUS 3 - Kenyah New Testament

Diaʹ pubo gayeng Tuhan

¹ Ahaʹ cenganak cenganak keʹ, cen naʹa abeʹ keʹ senteng ke pisiu ikem koʹ baʹan kelunan diaʹ sangan kuʹun Berua Tuhan are, di lareʹ koʹ baʹan palaʹ kelunan diaʹ un penyaheʹ usun tanaʹ are, iaʹ ina koʹ baʹan penyaheʹ anak dumit are dalem Keristus.

² Dalau ina bang telang iteʹ le iaʹ akeʹ naʹ mikem, moʹ abeʹ kem senteng ke uman kanen diaʹ mahing lepe. Ngan pekina pe pabeʹ naʹkini.

³ Ban ne caʹ dalem penyaheʹ usun tanaʹ lepe ikem. Buk un lepe ketiʹet ngan punan tiraʹ neng ahang ikem, moʹ abeʹ seʹ kem dalem penyaheʹ usun tanaʹ lepe ina, mentung ngkem bayaʹ layan kelunan kusun tanaʹ ini?

⁴ Buk un ca usa neng ahang ikem ke pisiu kuma ha: “Akeʹ iaʹ anun Paulus,” ngan un dau iaʹ ca pelaʹa: “Akeʹ iaʹ anun Apulus,” moʹ abeʹ seʹ kem kelunan dalem penyaheʹ usun tanaʹ lepe ina tupe?

⁵ Apulus ina, aheʹ e tupe? Ngan Paulus ina, aheʹ e tupe? Ameʹ dini bang ulaʹ Tuhan Allah tuaʹ le. Kuʹun meʹ kem ngelan Tuhan. Ngan lepa ne Tuhan petulat gayeng mameʹ singket usa meʹ. Singket usa meʹ dua lete iaʹ ke ti gayeng iaʹ Tuhan ban petulat mameʹ.

⁶ Akeʹ iaʹ nai mula beneʹ dalem kimet cem. Ngan Apulus iaʹ mesup pe. Un sepuʹo Allah iaʹ ke pudip pe.

⁷ Tuman ina, kelunan iaʹ mula ha ngan iaʹ mesup pe, abeʹ e inu. Pit bang Allah le iaʹ atek idi, iaʹ senteng ke pudip pe.

⁸ Un iaʹ mula ha ngan iaʹ mesup pe pekuaʹ lete ida. Un sepuʹo singket usa re ke alaʹ bang nte cen Tuhan Allah bayaʹ ban gayeng nte tengen.

⁹ Ban ne ameʹ dini iaʹ pemung pegayeng me Allah. Allah iaʹ un pula ina, ngan ikem iaʹ pula ha ina. Pekina pe buk le pekata ha laʹa, ikem ne iaʹ koʹ baʹan ca amin are, ngan Allah iaʹ un amin ina.

¹⁰ Akeʹ iaʹ koʹ baʹan ca tukeng amin are. Man pengencam iaʹ Allah lebang mencai makeʹ, sulo heʹ peteneng tentan ne. Uʹo ina nai ca tukeng laʹa medeng amin neng usun ne. Un sepuʹo tekep de singket usa re pekimet tiga tiga kumpin puyan nte ke uyan ne neng usun ne.

¹¹ Uban Tuhan Allah iaʹ lepa nyalet tentan. Yesus Keristus tengen le iaʹ tentan ina. Ca kelunan pe abeʹ un senteng ke uyan tentan diaʹ ca laʹa.

¹² Un palai kelunan ke medeng amin neng usun tentan ina man mas, man pirak, ngan pekina pe man batu iaʹ tiga. Un pe diaʹ kanan kayu, udu maʹang, ngan pekina pe jami padai.

¹³ Un sepuʹo mung puyan peniga gayeng kelunan ke luhaʹ tegoʹ tau kenai Keristus ʹo. Uban luten tau ina iaʹ ke peluhaʹ singket naʹan gayeng kelunan. Moʹ luten ina ke ten ne, ngan badaʹ kumpin seʹ ban peniga gayeng nte ne iaʹ lan.

¹⁴ Buk inu iaʹ lepa nedeng kuʹun ca kelunan neng usun tentan ina abeʹ un ketai tutung kuʹun luten, kelunan ina lete iaʹ ke alaʹ bang nge ʹo.

¹⁵ Un sepuʹo buk puyan gayeng ca kelunan ketai tutung, atek bura ne bang ban gayeng kelunan pekina. Un sepuʹo ia tengen le iaʹ ke tisen puyan iaʹ ke pudip ia, koʹ baʹan un te ia kelap dalau baha luten.

¹⁶ Tisen te ikem, ikem iaʹ amin palan Allah, ngan Berua Allah iaʹ ngelineʹ dalem ikem.

¹⁷ Tuman ina, buk aheʹ iaʹ ke ngejaʹat amin palan Allah ina, pekina lete Allah ke ngejaʹat ia. Moʹ amin palan Allah ina buheʹ. Ngan ikem lete iaʹ amin palan ina.

¹⁸ Ayen ca kelunan ke pelingu usa ha tengen. Buk aheʹ neng ahang ikem iaʹ ke pata kimet te bayaʹ layan dulu kusun tanaʹ ini, sulo ho kuma ha ia ca kelunan iaʹ tudi, iaʹ tekep pe kelunan ina ke alaʹ kimet iaʹ apaʹ, apan ne ke tudi lan.

¹⁹ Moʹ puyan iaʹ dulu naʹ tudi kusun tanaʹ ini, idi iaʹ Allah kuma apaʹ. Koʹ baʹan dau dalem Kitap: “Allah iaʹ meput kelunan diaʹ tudi man pengencam nte tengen.”

²⁰ Un ca jo ho laʹa dalem Kitap kuma ha: “Tuhan tengen iaʹ tisen puyan kimet kelunan diaʹ tudi abeʹ de un semantet.”

²¹ Tuman ina, abeʹ e tekep kelunan aheʹ aheʹ pe ketai jum neng puyan pemuyan kelunan. Lan lete mung inu anun ncem,

²² koʹ baʹan Paulus, Apulus, Peterus, ngan tanaʹ ini, ngan puyan pengudip, ngan puyan patai, ngan puyan iaʹ naʹkini, pekina pe iaʹ ke nai bayaʹ ʹo, mung dini iaʹ anun ncem,

²³ ngan ikem iaʹ anun Keristus, ngan Keristus iaʹ anun Allah.