1 KURINTUS 15 - Kenyah New Testament

Puyan Keristus numpak mudip

¹ Kimet ceʹ naʹkini cenganak cenganak keʹ, ubaʹ keʹ petawai ikem neng Denga Injil iaʹ akeʹ badaʹ mikem are. Ikem lepa alaʹ a, neng idi lete pengelan ncem salet pedeng.

² Denga Injil ina ne tiraʹ iaʹ akeʹ badaʹ mikem are. Kuʹun Denga Injil ina un puyan iaʹ pudip ikem, ahaʹ ikem pali ngkang nge buk ke are tepa pengelan ncem.

³ Dau iaʹ akeʹ pelawa mikem are, ia ne iaʹ akeʹ lepa alaʹ lete, ca puyan iaʹ atek bioʹ, iaʹ ina Keristus ban matai tuman penyalaʹ le, bayaʹ dau Kitap.

⁴ Dulu masek ia dalem liang, sulo neng iaʹ ketelu tau ue kenai ie numpak mudip laʹa bayaʹ dau Kitap.

⁵ Nai ie luhaʹ palaʹ Peterus, uʹo ina palaʹ puloʹ dua usa diaʹ lawa Injil dina.

⁶ Uʹo ina nai kun ne luhaʹ palaʹ suheʹ lema ato kelunan diaʹ cenganak le tegoʹ ca liwai ie. Kadoʹ lepe ida dina iaʹ un mudip pabeʹ naʹkini. Selu un pe palai mida lepa matai ne.

⁷ Uʹo ina kun ne luhaʹ palaʹ Yakup, sulo nai ie luhaʹ palaʹ mung diaʹ lawa Injil diaʹ ca.

⁸ Ketai kebayaʹ a, nai ie luhaʹ palaʹ akeʹ lete, iaʹ koʹ baʹan anak uno are.

⁹ Akeʹ iaʹ pelapa iʹut neng ahang mung diaʹ lawa Injil dina. Tekaʹ keʹ, abeʹ e tekep ke pisiu akeʹ ca lawa Injil, moʹ keʹ petaru Mpun Tuhan Allah are.

¹⁰ Un sepuʹo puyan iaʹ nuyan neng akeʹ naʹkini un nuyan kuʹun pengelesau Allah iaʹ ia lebang naʹ milu. Ngan pengelesau iaʹ ia naʹ makeʹ, abeʹ e tai bura tuaʹ le, di lareʹ akeʹ iaʹ tangen pegayeng lapa neng ʹo puyan lawa Injil diaʹ ca. Iaʹ lan ne, abeʹ e puyan pemuyan nceʹ tengen, di lareʹ pengelesau Allah iaʹ ia lebang naʹ milu iaʹ pegayeng ngan nceʹ.

¹¹ Ban ne pekina ne, inu pia akeʹ, inu pe ida diaʹ badaʹ Denga Injil mikem, ia te ameʹ badaʹ, ia te ikem ngelan pe.

Puyan ilu numpak mudip

¹² Lan ne ilu pedenga puyan Keristus numpak mudip cen patai. Moʹ inu palai mikem kuma ha abeʹ un puyan diaʹ lepa matai ke numpak mudip laʹa?

¹³ Buk ke lan pekina, abeʹ ne Keristus numpak mudip cen patai.

¹⁴ Buk Keristus abeʹ un numpak mudip cen patai, pelo-lo ne tiraʹ meʹ, ngan pekina pe pelo-lo ne pengelan ncem.

¹⁵ Tekinco cen ina pelaʹa, luhaʹ ban meʹ lemalo badaʹ tugen neng Allah moʹ meʹ kuma ia beteʹ Keristus cen patai. Di lareʹ abeʹ e beteʹ ia buk lan dau iaʹ kuma kelunan diaʹ lepa matai abeʹ un numpak mudip laʹa.

¹⁶ Moʹ buk lan ne diaʹ lepa matai abeʹ un numpak mudip laʹa, abeʹ ne Keristus numpak mudip buk pekina.

¹⁷ Ngan buk Keristus abeʹ un numpak mudip cen patai are, tai panyi-anyi ne puyan pengelan ncem, ngan petem pe ikem lenca dalem penyalaʹ kem.

¹⁸ Pekina pe mung kelunan diaʹ lepa matai ngan ngelan Keristus dina, lepa tasaʹ de.

¹⁹ Buk kaʹ dalem udip ini tuaʹ le ilu un tebelum neng Keristus, siʹau pe ilu iaʹ kelesau neng ʹo mung dulu diaʹ ca kusun tanaʹ ini.

²⁰ Di lareʹ lan lete Keristus lepa beteʹ cen patai, nuyan kedatung neng tuket Allah iaʹ ke beteʹ mung kelunan iaʹ luntoʹ dalem patai.

²¹ Cen naʹaʹ nai puyan patai kuʹun ca kelunan, pekina pe puyan numpak mudip cen patai nai kuʹun ca kelunan lete.

²² Koʹ baʹan mung kelunan ke matai moʹ de pebulung ngan Adem, pekina lete mung kelunan nte ke tisen puyan iaʹ ke pebeteʹ ida cen patai moʹ de pebulung ngan Keristus.

²³ Un sepuʹo singket singket le bayaʹ ban teneng tuk ke ne, iaʹ ading nge Keristus beteʹ, uʹo ina mung diaʹ anun Keristus tegoʹ ke kenai ie ʹo.

²⁴ Dalau ina kenai pengelepa kajan udip ini. Keristus ke pesupeʹ mung diaʹ paren bali, ngan diaʹ paren kelunan, ngan penyukat diaʹ ca, penco naʹ puyan pengaren bioʹ palaʹ Allah iaʹ Amai Bioʹ.

²⁵ Moʹ abeʹ senteng are Keristus ke ngkang pengaren, pa Allah ke nyuluk mung bunoʹ o kentaʹ taket te.

²⁶ Un bunoʹ iaʹ kebayaʹ a iaʹ ketai supeʹ, iaʹ ina patai.

²⁷ Moʹ un dau dalem Kitap kuma ha: “Allah iaʹ nyuluk mung inu kentaʹ taket te.” Ahaʹ, luhaʹ sen isiu iaʹ kuma “mung inu” abeʹ e ngahum Allah tengen, moʹ ia iaʹ nyuluk mung inu kentaʹ Keristus.

²⁸ Un sepuʹo tegoʹ mung inu lepa tai kentaʹ pengaren Keristus ina, sulo ia tengen, iaʹ Anak ina, ke nyuluk usa ha tengen kentaʹ Allah, iaʹ lepa naʹ mung inu kentaʹ ia are, apan ketai daʹam puyan pengaren Allah ke ngaren mung inu ne.

²⁹ Kumpin puyan ne buk diaʹ lepa matai dina abeʹ un kenai numpak mudip laʹa tupe? Buk ke lan koʹ baʹan dau dulu diaʹ pekina dau, moʹ inu kelunan sihoʹ batis tuman diaʹ lepa matai tupe? Inu bang re ke nebelum kidi tupe? Moʹ inu re alaʹ batis tuman diaʹ lepa matai tupe?

³⁰ Kumpin ne puyan ameʹ dini, tuman inu ameʹ taru lemuto tupe?

³¹ Ahaʹ cenganak, singket tau ne akeʹ nengayet neng puyan patai. Akeʹ pekini dau moʹ tekaʹ keʹ selum tuman ikem, tuman puyan pengudip le iaʹ pebulung kaʹ dalem Keristus Yesus, Tuhan le.

³² Akeʹ pekata dau, kenuen pe akeʹ payoʹ ngan “pun diaʹ minget” kaʹ Ipesus ini, koʹ baʹan kelayen kelunan, inu bang nge makeʹ tupe? Un sepuʹo buk kelunan matai abeʹ un ke numpak mudip laʹa, talan pe alaʹ dau dulu iaʹ kuma: “Baka, uman ngan nisep, moʹ nempam ke matai ne ilu ʹo.”

³³ Ayen ncem tai lingu: “Tuyang iaʹ jaʹat ke ngejaʹat saheʹ iaʹ tiga.”

³⁴ Meteʹ ne kimet teneng, ngan pekenaʹ puyan salaʹ. Dau heʹ ini ne nuyan penyaʹe mikem: palai mikem abeʹ un tisen Allah lepe.

Layen usa tegoʹ numpak mudip mading

³⁵ Masaʹ ca usa ke lemutu kuma ha: “Kumpin puyan kelunan matai kenai numpak mudip tupe? Ngan layen kumpin ne usa re tupe?

³⁶ Dau apaʹ! Inu iaʹ ikoʹ mula dalem tanaʹ, abeʹ e nai mudip buk ke abeʹ un matai ading.

³⁷ Iaʹ ikoʹ mula ina, mele padai taʹin, mele ca naʹan luang taʹin, bang luang tuaʹ le, abeʹ e layen inan iaʹ kenai luhaʹ bayaʹ a.

³⁸ Allah iaʹ naʹ usa mading me luang ina, melai inu layen usa iaʹ Allah ubaʹ ke naʹ mia. Palaʹ singket luang ia ke naʹ usa iaʹ marung mia.

³⁹ Laʹa abeʹ e mung diaʹ ngelaset un tepatung neng ca le layen usa re. Un ca naʹan layen usa kelunan, ca naʹan pe pun, ca naʹan pe sui, ngan ca naʹan pe atuk.

⁴⁰ Laʹa un layen usa iaʹ marung neng langit, pekina pe un layen usa iaʹ marung neng tanaʹ ini pe. Un puyan peniga iaʹ marung neng inu diaʹ kaʹ langit, ngan ca naʹan puyan peniga iaʹ marung neng inu iaʹ kusun tanaʹ ini.

⁴¹ Ca naʹan pe puyan peniga mata tau, ngan ca naʹan pe puyan peniga bulan, ngan ca naʹan pe puyan peniga betuʹen. Neng ahang betuʹen diaʹ kadoʹ, un kadoʹ naʹan puyan peniga re.

⁴² Pekina lete puyan dalau diaʹ matai kenai numpak mudip laʹa ʹo. Moʹ dalau ban masek ida, un puyan iaʹ ketai madam, kenai ie beteʹ neng puyan iaʹ abeʹ un tisen ketai madam ʹo.

⁴³ Seleket le mula ha neng puyan jaʹat ngan lemaʹ; tegoʹ Tuhan pebeteʹ e un iaʹ tiga ngan pali ne diseʹ e.

⁴⁴ Ilu masek tepatung usa, Tuhan ke pebeteʹ e ngan tepatung puyan berua. Ilu malai tepatung iaʹ marung neng usa. Un lete tepatung iaʹ marung neng puyan berua le.

⁴⁵ Moʹ un dau Kitap kuma ha: “Kelunan iaʹ ading, iaʹ ina Adem, nuyan ca usa iaʹ mudip.” Di lareʹ Adem iaʹ kebayaʹ lan nuyan atek Berua iaʹ ke pudip.

⁴⁶ Abeʹ e puyan berua iaʹ un ading ne, di lareʹ puyan tepatung usa iaʹ ading nge, uʹo ina le puyan berua ina.

⁴⁷ Adem iaʹ ading are, ban nuyan man seluhan tanaʹ. Adem iaʹ kedua are, ban nai cen surga ne.

⁴⁸ Mung kelunan diaʹ mudip kusun tanaʹ ini un layen koʹ baʹan layen ia iaʹ nuyan tanaʹ are. Pekina lete mung kelunan iaʹ un udip cen surga un layen koʹ baʹan ia iaʹ lepa nai cen surga are.

⁴⁹ Kuaʹ baʹan puyan le kanan seʹ layen laki iaʹ nuyan tanaʹ are, ilu ke kanan seʹ layen Laki iaʹ cen surga lete.

⁵⁰ Un iaʹ baʹan nceʹ ne cenganak cenganak, pekini sen ne: usa iaʹ tepatung ngan dahaʹ, abeʹ e senteng alaʹ tulat dalem puyan pengaren Allah ke ngaren kelunan. Ngan inu iaʹ laho tai mada, abeʹ e senteng ke nganun iaʹ abeʹ un tisen ketai madam ina.

⁵¹ Nawai tiga ne, akeʹ badaʹ mikem ca isiu iaʹ linget neng dulu: abeʹ mung le ke matai.

⁵² Un sepuʹo mung le pe pekaliu ʹo dalau ceng kecet, dalau kiep mata, tegoʹ dau tuyau iaʹ ke ngebayaʹ lan. Moʹ tegoʹ tekepip ina ke nuyau, mung kelunan matai ke numpak mudip neng puyan iaʹ abeʹ un tisen ketai jaʹat, ngan ilu mung ke pekaliu le ʹo.

⁵³ Moʹ puyan iaʹ ketai jaʹat ini, abeʹ e senteng are ke kanan puyan iaʹ abeʹ un tisen ketai jaʹat ina. Ngan puyan iaʹ ke matai ini, atek ke kanan puyan iaʹ abeʹ un tisen ketai matai.

⁵⁴ Ban ne pekina, dalau iaʹ jaʹat ini lepa kanan iaʹ abeʹ un tisen ketai jaʹat, ngan puyan iaʹ ke matai ini lepa kanan puyan iaʹ abeʹ un tisen ketai matai, tegoʹ ina lete atek tai palup ne dau Kitap iaʹ kuma ha: “Puyan iaʹ un usun lepa nyupeʹ puyan matai.”

⁵⁵ “E patai, kempi puyan ncoʹ un usun? E patai, kempi ne tahat coʹ laʹa?”

⁵⁶ Moʹ puyan patai un tahat man ne ngejaʹat ilu kuʹun penyalaʹ le, ngan penyalaʹ ina un penyukat te kuʹun Katuk Adet.

⁵⁷ Un sepuʹo ilu nyuaʹ tiga saheʹ palaʹ Allah iaʹ naʹ puyan iaʹ un usun milu kuʹun Tuhan le Yesus Keristus.

⁵⁸ Tuman ina cenganak cenganak iaʹ akeʹ malaʹ, nengayet cem tudep ngan temek lemuto-uto. Lemuto sanget cem pegayeng me Tuhan, moʹ kem tisen penyanget cem abeʹ e pelo-lo buk ke sanget dalem gayeng Tuhan.