1 KURINTUS 12 - Kenyah New Testament

Pencai cen Berua Buheʹ

¹ Dau heʹ laʹa cenganak cenganak keʹ neng puyan iaʹ Berua Tuhan ke mencai milu. Kimet ceʹ ubaʹ ikem ngetisen kidi.

² Tisen te ikem dalau hem un adet puʹun are, un bali uyat iaʹ ameng iaʹ lemuto pedancun ikem.

³ Moʹ ina, tekep ikem iaʹ tisen moʹ kelunan aheʹ iaʹ pisiu seluhan Berua Tuhan Allah ina, abeʹ e senteng pisiu: “Pesataʹ ne Yesus.” Laʹa abeʹ un aheʹ iaʹ senteng pisiu: “Yesus ina Tuhan” buk Berua Buheʹ abeʹ un mampin ia.

⁴ Un naʹan naʹan pencai iaʹ Berua Tuhan mencai milu, un sepuʹo Berua ina loʹ lete iaʹ mencai dina mung.

⁵ Laʹa un pe naʹan naʹan janan le pegayeng me Tuhan, un sepuʹo Tuhan ina loʹ lete iaʹ ngkang gayeng ina.

⁶ Laʹa un naʹan naʹan senganan man le ke pegayeng me Allah, un sepuʹo Allah loʹ lete iaʹ naʹ senganan me singket usa iaʹ pegayeng mia.

⁷ Neng singket usa le un ca puyan iaʹ badaʹ ban Berua Tuhan un nengangan ke pawat bang nge tipo Mpun diaʹ ngelan Tuhan.

⁸ Moʹ neng ca usa un Berua Tuhan iaʹ naʹ ca isiu iaʹ tudi. Ngan neng diaʹ ca Berua Tuhan ina loʹ lete iaʹ naʹ ca isiu penisen.

⁹ Berua Tuhan loʹ lete iaʹ naʹ ca puyan pengelan me ca usa, mentung nge naʹ penyukat ke paget kelunan me diaʹ ca.

¹⁰ Berua Tuhan ina iaʹ naʹ penyukat uyan puyan nyingan me ca usa, ngan neng diaʹ ca un pencai man ne pisiu seluhan isiu Allah, ngan neng diaʹ ca laʹa un penyukat man ne senteng nugen iaʹ tekajaʹ puyan pencai iaʹ nai cen Berua Tuhan ngan pencai iaʹ nai cen bali. Neng ca usa laʹa ia naʹ penyukat man ne ke pisiu isiu bulen. Pekina pe neng diaʹ ca ia naʹ penyukat man ne ke petisen ilu neng sen isiu bulen are.

¹¹ Un sepuʹo mung puyan ina iaʹ nuyan kuʹun Berua iaʹ bang ca le ina. Ca naʹan pencai ia naʹ me singket usa le bayaʹ ban pengubaʹ a tengen.

Ca le usa, kadoʹ diaʹ sangat te

¹² Bang ca le usa ne Keristus, koʹ baʹan usa kelunan. Naʹ pe sangat te kadoʹ, usa ha ca tuaʹ le, kenuen pe kadoʹ naʹan tulat dalem me.

¹³ Kuaʹ baʹan puyan usa lete ilu mung. Ikem lepoʹ Yahudi, pekina pe ikem diaʹ tahaʹ awang lepoʹ Yahudi, pekina pe kelunan ulaʹ, ngan diaʹ muga tekaʹ mudip, ilu mung ban sihoʹ ngebatis kuʹun Berua Tuhan, ketai nuyan ca usa tuaʹ le. Ngan Berua Tuhan loʹ lete iaʹ nuyan milu seleket telang sio iaʹ ilu senteng nisep.

¹⁴ Moʹ usa ina, abeʹ e nuyan ca le sangat te, di lareʹ kadoʹ.

¹⁵ Buk taket iaʹ kuma ha: “Akeʹ, abeʹ keʹ ca ujoʹ. Moʹ ina abeʹ keʹ kahum neng usa.” Abeʹ e pesau neng usa tuman dau ina ne.

¹⁶ Laʹa buk telinga iaʹ kuma ha: “Akeʹ, abeʹ keʹ ca mata. Moʹ ina abeʹ keʹ kahum neng usa.” Abeʹ e pesau neng usa tuman dau ina ne.

¹⁷ Buk mung usa ina nuyan ca mata le, kempi ie ke kenahan ʹo tupe? Ngan buk ke nuyan ca telinga tuaʹ le, kempi ie ke madek ʹo tupe?

¹⁸ Un sepuʹo iaʹ lan ne, Allah lepa metuk singket naʹan sangat neng ca usa, marung bayaʹ pengubaʹ a.

¹⁹ Buk ke nuyan ca sangat tuaʹ le, usa ha abeʹ un.

²⁰ Iaʹ lan ne, kadoʹ naʹan sangat nuyan ca le usa.

²¹ Ban ne pekina, abeʹ senteng mata kuma ha neng ujoʹ: “Abeʹ keʹ pesingo neng ikoʹ.” Pekina pe abeʹ senteng ulu kuma ha neng taket: “Abeʹ keʹ pesingo neng ikoʹ.”

²² Di lareʹ mung sangat le iaʹ lemaʹ seʹ dalem usa le, abeʹ senteng are un.

²³ Ngan sangat usa le diaʹ ilu kuma ha abeʹ un inu ne, ilu nubo tiga ne. Pekina pe sangat le diaʹ ilu kuma iaʹ abeʹ un tiga seʹ ina, ilu pegelam nte ngan tiga lan,

²⁴ lapa neng ʹo sangat diaʹ ilu kuma tiga. Allah tengen iaʹ peteneng usa kelunan ngan puyan selama neng palai sangat usa diaʹ tepet neng selama.

²⁵ Un pekina puyan ne apan abeʹ un tai pasi dalem usa, un sepuʹo mung naʹan sangat te ke mepo ida peselepeʹ.

²⁶ Buk ca sangat te un tekaʹ sakit, mung sangat te diaʹ ca pekuaʹ ketisen tekaʹ sakit lete. Buk ca sangat dina ketai pejung, mung sangat dina kuaʹ un bangen.

²⁷ Pekina te ikem mung diaʹ usa Keristus, ngan singket cem iaʹ sangat te.

²⁸ Pekina lete puyan le dalem Mpun, moʹ Tuhan Allah iaʹ pempun ilu neng ca tuaʹ le, ading nge diaʹ lawa Injil, kedua ha diaʹ pegawa Allah, iaʹ ketelu ue diaʹ guru Injil, uʹo ina diaʹ uyan puyan nyingan, uʹo ina pelaʹa diaʹ un penyukat ke paget kelunan, ngan mepo kelunan, ngan diaʹ senteng peteneng gayeng, ngan diaʹ pisiu isiu bulen.

²⁹ Abeʹ e mung nte lawa Injil, buk are diaʹ pegawa Allah, buk are diaʹ guru Injil. Abeʹ de mung un penyukat sukat uyan puyan nyingan,

³⁰ pekina pe paget kelunan sakit, ngan pisiu isiu bulen, ngan petisen ilu neng sen isiu bulen are.

³¹ Un sepuʹo naten ne ikem mita pencai iaʹ bioʹ bang nge. Ca janan iaʹ lapa tiga neng ʹo taten ina, pekini ie: