1 KURINTUS 11 - Kenyah New Testament

¹ Tiga hem bayaʹ ban puyan nceʹ, kuaʹ baʹan akeʹ bayaʹ ban puyan Keristus.

Puyan napung ulu dalau le lemameʹ

² Akeʹ pada te ikem moʹ kem petawai akeʹ lemuto, ngan bayaʹ dau katuk iaʹ akeʹ ban naʹ mikem are.

³ Un sepuʹo ubaʹ keʹ ikem ngetisen ban iaʹ paren neng singket laki, ina Keristus, ngan laki iaʹ paren neng leto ho, ngan Allah iaʹ paren neng Keristus.

⁴ Moʹ ban pekina, laki iaʹ mpi iaʹ lemameʹ Tuhan, pekin ape iaʹ badaʹ tiraʹ a dalau mpun le lemameʹ peging kep ulu ue, seʹ e taro neng Keristus iaʹ paren ne.

⁵ Laʹa leto iaʹ mpi iaʹ lemameʹ Tuhan, pekina pe iaʹ badaʹ tiraʹ a dalau mpun le lemameʹ ngan abeʹ e mekep ulu ue, seʹ e taro neng laki ie iaʹ paren ne. Moʹ kaʹ lepoʹ Kurintus puyan leto iaʹ pekina abeʹ e tekajaʹ ngan puyan leto iaʹ nguluk puk ke.

⁶ Moʹ buk leto abeʹ un mekep ulu ue, talan pia lemutun puk ke. Lan te un saʹe tekaʹ leto iaʹ lemutun puk ke, pekina pe iaʹ nguluk ulu ue, ina ukoʹ tekep pia mekep ulu ue.

⁷ Abeʹ e tekep iaʹ laki ke mekep ulu ue moʹ ia iaʹ ke nukak layan lingai ngan pengaren Allah. Un sepuʹo leto iaʹ ke nukak layan pengaren laki.

⁸ Moʹ abeʹ e Allah uyan laki cen leto, di lareʹ cen laki Allah ban uyan leto.

⁹ Laʹa abeʹ e Allah uyan laki utung leto, di lareʹ leto iaʹ nuyan utung laki.

¹⁰ Laʹa ban un diaʹ melikat dalau mpun le lemameʹ, ina tuman tekep ne leto mekep ulu ue, moʹ o ke badaʹ puyan ne tunuk pengaren laki ie.

¹¹ Naʹ pia pekina neng puyan pengudip le dalem Tuhan, leto kedatung neng laki pekuaʹ koʹ baʹan laki kedatung neng iaʹ leto.

¹² Naʹ pe Allah uyan leto cen laki cen naʹaʹ are, leto iaʹ nganak laki. Un sepuʹo mung nge cen Allah.

¹³ Tiga ne ikem tengen le pekimet te. Kumpin, ke un tekep ca leto lemameʹ palaʹ Allah dalau mpun le lemameʹ buk ke abeʹ un mekep ulu ue tupe?

¹⁴ Moʹ abeʹ kelayen adet cem tengen ke pekatuk ikem ban puk dadoʹ neng laki ke un taro neng ia tupe?

¹⁵ Un sepuʹo buk dadoʹ diseʹ puk ca leto, un ina ke nuyan puyan tiga mia. Moʹ puk ke ne ca pencai mia man mekep ulu ue.

¹⁶ Un sepuʹo buk aheʹ kelunan ubaʹ ke paseʹ neng ini, abeʹ meʹ tisen adet diaʹ ca dalau mpun le lemameʹ, pekina pe mung Mpun iaʹ anun Allah.

Bunut Tuhan

¹⁷ Dalau heʹ naʹ katuk ini, abeʹ keʹ pada ikem. Moʹ puyan ncem nai pempun sebayang, abeʹ e uyan tiga, bang uyan jaʹat le.

¹⁸ Iaʹ ading nge akeʹ kenahan moʹ dalau hem pempun lemameʹ, un luhaʹ paseʹ neng ahang ikem. Akeʹ ngelan lete dau palai ina.

¹⁹ (Puyan paseʹ abeʹ senteng are nai luhaʹ neng ahang ikem apan kelunan diaʹ telit ke luhaʹ lan.)

²⁰ Dalau hem nai pempun, abeʹ e Bunut Tuhan iaʹ ikem pemung uman.

²¹ Moʹ dalau hem uman ina, singket cem busek uman neng ata ha tengen, pa ban un palai laʹu, un palai mabuk.

²² Moʹ abeʹ un amin ncem tengen kukoʹ kem uman ngan nisep tupe? Seʹ kem petaro Mpun Allah ini, ngan ke pesaʹe kelunan diaʹ kasip. Inu iaʹ ikem ke kuma akeʹ ke pisiu ikem neng puyan ini tupe? Kumpin, akeʹ ke pada ikem tupe? Nyahut ceʹ are ke pada ikem ne.

²³ Moʹ katuk iaʹ akeʹ lepa alaʹ cen Tuhan, ina lete iaʹ akeʹ naʹ mikem, iaʹ ina, tegoʹ alem iaʹ dulu ke mencai Tuhan Yesus, kun ne alaʹ ruti,

²⁴ sulo ho nyuaʹ tiga saheʹ palaʹ Allah, sulo ho pepiding pepiding nge mentung dau ue: “Ini ne usa heʹ, iaʹ pencai tuman ikem. Uyan ne ini man ncem petawai neng akeʹ.”

²⁵ Pekina lete puyan ne alaʹ sawan ukoʹ nisep uʹo lepa re uman, mentung dau ue: “Sawan ini ne tuket iaʹ Allah uyan mading, iaʹ ke pedapit neng kelunan man dahaʹ keʹ. Mele midan ncem nisep pe, tiga hem nisep pe man ncem petawai neng akeʹ.”

²⁶ Moʹ singket liwai hem uman ruti ini ngan nisep cen sawan ini kena kenai Tuhan, seʹ kem pedenga puyan patai Tuhan.

²⁷ Moʹ tuman ina, buk ca kelunan mele aheʹ pe iaʹ uman ruti Tuhan ngan nisep cen sawan Tuhan ina ngan layan iaʹ abeʹ un selumuk neng ia, atek salaʹ a neng usa ngan dahaʹ Tuhan.

²⁸ Moʹ ina, tekep lete ilu mung nesek usa le tengen ading, uʹo ina uman ruti ngan nisep cen sawan ina.

²⁹ Moʹ buk un kelunan diaʹ uman ngan nisep ina ngan abeʹ nuge usa Tuhan, ia uman ngan nisep ukum neng usa ha tengen.

³⁰ Ina ukoʹ o kadoʹ neng ahang ikem diaʹ sakit ngan lemaʹ, ngan palai lepa matai pe.

³¹ Un sepuʹo buk le nesek puyan usa le tengen ading, abeʹ Allah ke pebetep dau salaʹ neng ilu.

³² Un sepuʹo buk Allah iaʹ pebetep dau salaʹ ngan ngukum ilu ngajan ini, ina ne seʹ e pekatuk ilu, apan ne abeʹ un ke mekem salaʹ neng ilu pemung ngan dulu kusun tanaʹ ini uʹo te.

³³ Tuman ina cenganak cenganak keʹ, midan ncem pempun kuman Bunut Tuhan, tiga hem pekena ikem selepeʹ.

³⁴ Buk aheʹ iaʹ laʹu, talan pia uman kaʹ amin ne tengen, malap puyan mpun ncem abeʹ un ngelawit ukum Allah neng usun ikem. Puyan diaʹ ca akeʹ ubaʹ ke peteneng tegoʹ keʹ nai ʹo.