1 KURINTUS 10 - Kenyah New Testament

Jagaʹ uyat

¹ Ahaʹ cenganak cenganak keʹ, abeʹ keʹ ubaʹ ikem turan neng puyan tepun le diaʹ bayaʹ Musa cen naʹaʹ are. Abun bioʹ ina iaʹ nyelempau ida mung, ngan mung nte masat tanaʹ pelawat Banget Bala are.

² Ngan mung nte sihoʹ ngebatis iaʹ pedapit ida neng Musa. Man abun ngan banget ida alaʹ batis ina.

³ Ngan mung nte kuaʹ uman penguman duip berua ina.

⁴ Ngan mung nte kuaʹ nisep telang udip berua ina. Atek Keristus iaʹ un ngan nte seleket batu sio iaʹ un serengan ngan nte, ngan mung nte nisep telang cen ia.

⁵ Naʹ pe iaʹ pekina, kadoʹ de abeʹ un sihoʹ pengubaʹ Allah. Ina ukoʹ patai re muʹo purat kaʹ tanaʹ lenga.

⁶ Naʹkini mung puyan pemuyan dina are, nuyan kudaʹ kudaʹ kata milu, apan ne ke mulen ilu kaseng kimet neng puyan iaʹ jaʹat koʹ baʹan ida are.

⁷ Ayen ncem ngelan uyat koʹ baʹan palai ida are. Koʹ baʹan dau dalem Kitap iaʹ kuma ha: “Kelunan dina madung uman ngan nisep, penco re nai beteʹ ke kancet.”

⁸ Ayen le petaro laki neng leto koʹ baʹan palai mida ban uyan are. Dalem ca tau le dua puloʹ telu ibu mida matai kuʹun puyan ina.

⁹ Laʹa ayen ilu ten Tuhan koʹ baʹan palai mida lepa ten ia, penco re matai kuʹun ncung ulai.

¹⁰ Ca laʹa, ayen ncem kuheng kuheng koʹ baʹan palai mida are, penco re matai kuʹun Melikat Patai are.

¹¹ Mung pemuyan dina lepa nuyan neng ida, apan ne un kata milu diaʹ ca. Lepa ha un neng surat, nuyan katuk iaʹ ke mulen ilu, moʹ ilu diaʹ mudip dalau ketai kuʹo udip kusun tanaʹ ini.

¹² Moʹ ina, aheʹ iaʹ kuma ia salet tekaʹ neng tekejeng nge, jagaʹ tiga tiga malap ia ketai tubang ʹo.

¹³ Mung puyan pengeten iaʹ lepa sihoʹ ikem, seʹ e pengeten iaʹ ngelayen sihoʹ kelunan lete. Un sepuʹo Allah iaʹ semamet, ia abeʹ un pedayo ikem ke sihoʹ ten lapa neng ʹo pengali hem ke nyekang nge. Dalau hem sihoʹ pengeten, Allah iaʹ ke naʹ pengali mikem apan ncem nengayet ngan salet. Pekina puyan Allah ke uyan janan takau mikem.

¹⁴ Moʹ ina cenganak cenganak diaʹ akeʹ malaʹ, ngecoʹ ne usa hem cen puyan lemameʹ palaʹ uyat.

¹⁵ Akeʹ pisiu ikem koʹ baʹan nceʹ pisiu kelunan iaʹ mencam pekimet. Tiga ne ikem tengen ke pekimet inu iaʹ akeʹ badaʹ ini.

¹⁶ Dalau le uman Bunut Tuhan, ilu nisep cen sawan tuman peniga Tuhan, mentung le nyuaʹ tiga saheʹ kuʹun ne. Puyan ina nuyan pekina moʹ le lepa pebulung dalem dahaʹ Keristus. Ruti iaʹ ilu pepiding, ilu pemung uman ne, moʹ le lepa pebulung dalem usa Keristus.

¹⁷ Bang ca le ruti, ina ne ilu mung. Ngan naʹ pe ilu kadoʹ, ilu bang ca le usa le, moʹ le mung pemung uman ruti iaʹ ca le are.

¹⁸ Pekimet adet lepoʹ Israil ne. Kelunan iaʹ uman cen pencai iaʹ ida meliwa ina, atek de ngadet palaʹ Allah pemung ngan padung liwa ina.

¹⁹ Inu iaʹ baʹan nceʹ? Un udip ne uyat dulu taʹin? Un tuman penguman iaʹ ida mencai ina taʹin?

²⁰ Naʹun. Bang ini le dau heʹ: Pencai iaʹ dulu mencai neng usun padung liwa re, atek de mencai ie me bali Sitan, abeʹ e me Allah. Abeʹ keʹ ubaʹ ikem tai pebulung ngan bali.

²¹ Abeʹ kem senteng nisep cen sawan Tuhan buk kem nisep cen sawan bali. Laʹa abeʹ kem senteng pemung uman kaʹ bijaʹ Tuhan buk kem pemung ngan bijaʹ bali.

²² Moʹ abeʹ ilu iaʹ pebeteʹ iʹet Tuhan tupe? Un le lapa pali neng Tuhan tupe?

²³ Un dau palai kuma ha: “Abeʹ un palan iaʹ ke mulen ameʹ ti inu inu laʹa.” Ahaʹ, naʹ pia pekina, abeʹ e mung puyan iaʹ ke ngkin peniga. “Abeʹ un palan meʹ ke uyan inu inu pe,” baʹan dau palai. Un sepuʹo abeʹ e mung nge ngkin bang me kelunan.

²⁴ Ayen ca usa pekimet pengubaʹ usa ha tengen, un sepuʹo pekimet anun kelunan diaʹ ca.

²⁵ Inu iaʹ dulu matu kaʹ pasen panguman, senteng ngkem uman ne. Abeʹ titin cem mutu inu moʹ tuman tekaʹ kimet dalem penawai hem.

²⁶ Moʹ un dau Kitap kuma ha: “Tuhan iaʹ un tanaʹ ini peging ngan mung inu iaʹ un neng usun ne.”

²⁷ Buk ca usa iaʹ abeʹ un ngelan Tuhan ke nepai ikem uman, ngan kimet cem ubaʹ tai, tiga hem uman inu iaʹ ia naʹ mikem ne, ngan ayen mutu inu tuman tekaʹ kimet dalem penawai hem.

²⁸ Un sepuʹo buk ca kelunan kuma ha neng ikem: “Lepa ne ameʹ mencai penguman ini palaʹ bali uyat,” ayen uman penguman ina, moʹ tuman kelunan iaʹ pisiu pekina dau, laʹa tuman tekaʹ kimet dalem penawai ie.

²⁹ Sen ne, abeʹ e inu ban tekaʹ kimet dalem penawai hem tengen, di lareʹ tekaʹ kimet dalem penawai kelunan diaʹ ca ina. Tuman ina, masaʹ un dau iaʹ ke lemutu akeʹ kuma ha: “Moʹ inu adeʹ pejo udip keʹ ina ke tabin pencit kuʹun tekaʹ kimet dalem penawai kelunan diaʹ ca tupe?

³⁰ Buk keʹ alaʹ penguman ngan nyuaʹ tiga saheʹ palaʹ Allah, moʹ inu ca kelunan ke ngetepet akeʹ kuʹun penguman iaʹ tuman nceʹ lepa nyuaʹ tiga saheʹ keʹ tupe?”

³¹ Ina ukoʹ pekini dau heʹ, mele inu inu pemuyan ncem, uman pe ngan nisep pe, uyan ne mung tuman ke nyerema peniga Allah.

³² Mudip temek, apan ncem are nyapet kelunan Yahudi, pekina pe dulu diaʹ ca, ngan pekina pe Mpun iaʹ anun Allah ina.

³³ Ahaʹ pemuyan ncem pekuaʹ pemuyan nceʹ. Nengayet ceʹ ke niga kimet kelunan mung neng mung pemuyan nceʹ. Abeʹ keʹ nawai bang me usa heʹ tengen, di lareʹ tawai heʹ ke nawai kelunan kadoʹ, apan nte ke tisen puyan iaʹ ke pudip ida.