TÍMOTI HESENDAA GƆLƆÍ 6 - Kɛ́lɛ Niinaí

¹ Ngala fɛ́li mbélai sítii kínɛi ti ngáá nduwɔ lopóa núngaa wu, kɛ taá ngúfema hé ti w̃ááliɣiaitii mbɛ pele kpɛ́lɛɛ su, kɛinɔɔ́ nungáá tálaa yɛ́pɛ ỹɔ́u Ngalá mba ɛ́ɣɛ Ngala kálambongi.

² Ngala fɛ́li mbélai sítii pa taa ɣɛ́ ngáá nduwɔ lopóa sítii mbu tiyá bɛ́lɛ taa ɣɛ́ ngáá Ngala fɛ́li mbélaa, tálaa lɛ́ɣɛ ti w̃ááliɣiai nátii su ngáá sífaa nɔ́ɔ nátii bɛ́lɛ ti ngáá Ngala fɛ́li mbélaa. Kɛ́ laá ɣéle, ti gólo ti yɛ́ ngáá pangɔ́, bɔw̃álale, ti w̃ááliɣiai nátii tíwaa maa gúlasuunumai w̃aahɔ́lɔ, tiyá lɔ ngáá ti mbála Yalá fɛ́li mbélaa tiyɛ́i Ngala ndongɔ́ ngáá ti ye. Yaayaa fái sítii nde ngáá Ngalá ngoo, ná vólu, yí ɣɛ́ yáá núngaa gálambo la.

Ndaahíngi kɔwɔ́ato kpatɛí w̃áálii walái wa

³ Nuí fíli áá kálambo mbó áá ɣɛ léélaa a mu Yála fɛ́li kílii w̃aa gálambongi wa ɛ́ɣɛ a mu Lemɔ́i Jísu Kílisitii ndá lɔ́ɔ́ỹaa galambongí wa,

⁴ kɛ maa w̃ɔ́i h̃uuwɔ́ɔ́lɔngɔɔ lé ngwala laáva áá ŋani fíli kɔ́lɔ. Ki máá ỹɔ́i lɔ áá ɣɛ́ maa w̃ɔ́i yɛ ngáá í w̃ááɣaali, ɛ́ɣɛ í ndááhasa gúla njɛpɛ woó wa. Aáva ná áá vá nɔ́ɔ ngáá tolóma ɛ́ɣɛ ngoo ỹɔ́u ỹɔ́u léndaa taá ngɛ́ɛ́li ɛ́ɣɛ ỹɔw̃ɔ́ bélendaa bili mbú.

⁵ Ɛ́ɣɛ múl̃ɔ, aa kɛ ngáá háwu nungáá tí ɣɛ́ nɔ́ɔ fɔ́ maaɣaalí gúlandaa ya tiyɛ́i tí gi máitii ngá sáángɔi aáva taá mɔɔ tɔɔỹái wɔ́lɔ. Aá lɔ́ ti gi má ngáá Ngala fɛ́lindai lɔ ngáá pele ta nuu áá kpátɛ w̃ááhɔlɔ su.

⁶ Aá ɣéle Ngala fɛ́lindai aa nuu ɣɛ́ ngáá kpatɛ w̃ɔ́ɔ, ná wáá ngáá, aa kɛ í líílangɔ í ɣɛ́ la sítii fááw̃a taa ɣɛ́ í yáa,

⁷ sífaa, ná mú ɣɛ́i maa vá ngélei sí wú, maá vái ngáá ŋáni fíli aáva mɔí ŋáni fíli kúla ngeleí sí wúu wa mɔɔ líí la.

⁸ Faalɔ, ná a maá mɛ́ɛ́ni hɔ́lɔ ɛ́ɣɛ sí a máá ngíli w̃a bɛlɛ́ ná í mú liilá.

⁹ Kɛ́ sítii pa ti longɔ́ tí bátɛ, na aa kɛ ngáá háwu faa ỹɔ́u ɣɛ́ndaa í tí h̃úúgɔvɔ, ti víli su. Ná vólu, kisiyá í víli ti w̃a áá kɛ ngáá háwu ti víli tamál̃a fáá ɛ́ɣɛ kɛ kíli ỹaaní háá bíh̃iw̃aa h̃u. Ná vá tɔ áá nuu ɣɛ́ kíli ỹaaní,

¹⁰ sífaa, ndongí nuu áá ɣɛ́ sú ngáá naholoí ngwala laá lɔ í ngáá sapeí faa ỹɔ́i híí kpɛ́lɛɛ kpɛ́lɛɛ mbu. Nungáá lɛ́ingaa va naholó w̃ɔ́ni í ti w̃a ngwala í kɛ́a ngáá háwu ndangí taa ɣɛ́ su ngáá Jísu Kílisitii i gulaá ti h̃u aáva ndiihoolɛ́ bíh̃i kpih̃i ngi langá tí w̃a.

Pɔ́ɔ i Tímoti laahíni

¹¹ Tímoti, yɛ́i yí Ngála fááw̃a, léve fái sítii polú, yí yákpa yááyaa híya ngáá Ngalángi lélembo peleí. Ɣɛ́ ngáá Ngala fɛ́li mɔ́ɔ vanda, nda ngí ɣɛ í h̃u Jísu Kílisitii hááw̃a ɛ́ɣɛ ndo ngí ɣɛ́ i h̃u í mbála Yalá fɛ́li mbélaitii fááw̃a, ná vólu, yí liilɔ́lɔ faa bámai yáá ɛ́ɣɛ i ɣɛ́ngɔ í ɣɛ́ la lúúỹaa.

¹² Hómbo yí Ngala fɛ́li fái ɣɛ ngáá hɛ́mbɛ kíya nɔ́ɔ nuu áá ɣɛ́ maaɣaalí víliỹɛi h̃u kɛinɔɔ́ yí kúnafɔ lɛ́ɛ́h̃ui w̃aahɔ́lɔ bɔwɔ́ hááw̃a. Sífaa, kúnafɔ lɛ́ɛ́h̃ui sí lɔ́ Ngalá ngí í lólingɔ fááw̃a ná h̃u yí kúlai la yí ndé ngáá yí laa ngáá Jísu Kílisitii nuu bíh̃iw̃aa yaah̃ú w̃a.

¹³ Ngalá tɔ́ í ngáá ní héélei lɛ́i í ndɛɛh̃ú héngɔ ŋani kpɛ́lɛɛ mbɛ́ ɛ́ɣɛ Jísu Kílisitii lɛ́i áá gúlai woo w̃á P̃ɔ́tiyɔ Páilɛɛ gakála tɔɔỹái le fái h̃u kɔwɔ́ato Ngalá mba ngáá ngí fái sítii ndéa í w̃a ngáá yí ɣɛ yáá tí ɣɛ.

¹⁴ Maa háitii mbaa ngáá, yí fái sítii kɛ ngáá pangɔ́ ɛ́ɣɛ tɔmbema w̃áá fíli álaa ɣɛ í wá faa fíli su í ló su bɛ́lɛ a mu Lemɔ́i Jísu Kílisitii í va.

¹⁵ Jísu lɔɔ vá vááma naa hɔwɔí kái káingi ná w̃a Ngalá ngí suubátɛngɔ ngáá í vá ma. Hɛ́ɛ́ma Yalángi sí yílaa kpé tɔ í ngáá Ngutuwɔ́ W̃ɔ́ɔ́ Walaí, í ngáá Masa Ngwála ndɔwɔlɔ w̃ásangaitii kpɛ́lɛɛ mááh̃u ɛ́ɣɛ í ngáá Ndemɔi nde mbélaitii kpɛ́lɛɛ mááh̃u.

¹⁶ Ngalá ngílaa kpé pá tɔ ɛ́i há kúnafɔ, aá lɔ lámbo fo ngwalaí sí yá nuu fíli ɛ́i hómbo ɔ́ɔ́ bɛ́ɛ́ mba. Nápa nuu fíli áá nɛɛ tɔ́i, nuu fíli pá ɛi hómbo ɔ́ɔ́ tɔ kúnafɔ. Bɛlɛ́ ngufema í ɣɛ́ mbɛ, ngákpa ngí ɣɛ́ ngeyá kúnafɔ! Amíína.

¹⁷ Nde Ngala fɛ́li mbélai sítii ma ti bátɛngɔi ngáá ngeleí sí wuu wɔ́lingaitiini ngáá tálaa h̃úú ɣɛ́ wɔ́ɔ́lɔ aáva tálaa gíto ngetéyangi sí h̃úubatɛ séɣe héɣe mba lɛ́i nuu ɛ́i lókola ma. Kɛ́ tí gítongɔ í ɣɛ́ la Ngalá mba lɛ́i áá ŋani kpɛ́lɛɛ fé a mu yaá ngáá ngambɔ́ɔ́lɔngɔ ɛ́i bóɣi kpoɣí, laa vá aa fe ngáá a mú liivó kɛ́ la.

¹⁸ Nde ti w̃a taayáá faa vánda ɣɛ, ná vólu, ti lóko h̃uulɔ́vengɔ í ɣɛ́ la ngwala kpɔmba hááw̃a nuu kpɛ́lɛɛ mbá. Ti ɣɛ́ ngáá nungáá taá ŋáni hé nuu yáá tɛi bóɣi kpoɣí, ná vólu, ti ɣɛ́ ngaá kɔ mbó mbélaa.

¹⁹ Ná taa sí ɣɛ ná ná áá ɣɛ́, taá ɣɛ́ kpatɛ́ yándɔɔlɔi bɔwɔ́ hááw̃a sí ngi háá h̃uu ɛ́i ỹááni laáva tɔ áá ɣɛ́ ngáá kitomáá giteí ti haáw̃a kúna. Aáva taá hómbo náa tí ndɛɛh̃úi sí w̃aahɔ́lɔ í ngáá ndɛɛh̃u gítei.

²⁰ Tímoti, sítii Ngalá ngí féa í yáá ngáá yááyaa ti ɣɛ, ti w̃ááh̃u béle ngáá pangɔ́. Léve njɛpɛí sítii pólu tɛi ɣɛ́ ngáá Ngala njɛ́pɛ aáva pele áá ti h̃u ɛ́ɣɛ tamál̃a mááɣaaliitii kɔwɔ́ato sí wa nungái ti lɛ́ingaa taá tóli ngáá kele ɣeléngi,

²¹ sífaa, aá lɔ́ nungái ti lɛ́ingaa gí ma ngáá kɛ tí maa géle ɣelengí w̃aahɔ́lɔnga aáva sí í kɛ́a ngáá háwu taá mɔ́ɔ́ laí ngáá Jísu Kílisitii. Bɛlɛ́ Ngalángi háá bɔwɔí í ɣɛ́ wú kpɛ́lɛɛ mbɛ́.