TÍMOTI HESENDAA GƆLƆÍ 5 - Kɛ́lɛ Niinaí

Kíya kule í Tímoti w̃a í Ngalá fɛ́li mbélaitii suuhóu

¹ Ná siỹɛ kpákolo ngáá fáá ɣɛ́ ɛ́i ɣɛ́ péle w̃a, yálaa téve kpé yɔ́ɔ ndé ma, kɛ́ laá ɣéle, yɛpɛ́ ngelé ndambi h̃u kíya nɔ́ɔ í kɛ́ɛ́ɣɛ í na. Siỹɛndóu lengáitii suuhóu ngáá í ndíyangaa ɔ́ɔ́ í ndéɣea ɣɛ́ kíli.

² Ná vólu, nyah̃á bákolongaitii suuhóu ngáá í njéé ɣɛ kíli. Yí kpélaniinangai suuhóu ngáá í héélani kɛ́ kíli pele kpɛ́lɛɛ su.

³ Í yááh̃u í ɣɛ́ ponyah̃ái sítiini mba ti lókolamaa fíli áá ná.

⁴ Kɛ́ ná ndengáá taa ɣɛ́ ponyah̃ái yáá ɔ́ɔ́ taala lengaa, kɛ ndengái nátii tí yákpa taayáá sítii kɛ kule áá ɣɛ́ tí w̃a tí kɛ tí lé mbélaitii mbɛ Ngalá ndaa wói w̃aa véle w̃a. Aáva ná taa ɣɛ́a ná ɣɛ, sí ti le mbélai taa ɣɛ́ kɛ́ni tí yɛ, kɛ póto míl̃a taa ɣɛ́ táa kúla, ná vá tɔ́ ngáá Ngalá ndiivó fáá.

⁵ Ponyah̃ái sí nuu fíli ɛ́i ɣɛ́ mbɛ aa lɔ í ngáá ponyah̃ái gíte gítei. Aá gitó Ngalá mba faa kpɛ́lɛɛ su, í ndí ngu ma ngáá Ngala fɛ́lindaa ngáá fóloni ngaa kpindí, áá Ngalá mɔ́ɔ́ni kpɔmba hááw̃a.

⁶ Kɛ́ ponỹah̃ái sí áá ɣɛ́ nɔ́ɔ beɣéi ndiivo kɛí hááw̃a, saangɔ́ vóto te kíya bɛ́lɛ áá ɣɛ́ ndɛɛh̃úi h̃u.

⁷ Ndaahíngi sítii mbo ngáá ponyah̃áitii ɛ́ɣɛ tí wólondaitii kɛinɔɔ́ tɔmbema w̃áá fíli álaa vɛ́lɛ ti wa.

⁸ Ngala fɛ́li mɔ́i ɛ́i ɣɛ́ ngí vóngaitii mbaa hái yeɣéni ngáá hɛmbɛ́ ngu ngí lí í nda mɛ́ɛ́ ngí vɛ́lɛ lowaí wuu yélai kái kái ma, kɛ ndangí sí nuu áá ɣɛ́ su ngáá Jísu Kílisitii i lokogúlaa su. Laáva kɛ tuva veléi ỹɔ́ungɔɔ lé í lɔ́ve bɛ́lɛ nuí sí wá ɛ́i ɣɛ́ lái ngáá Jísu Kílisitii.

⁹ Ponyah̃á fíli áá nɛɛ hitií fówo vúú ngɔ́hitangɔ h̃u yálaa ndaahéingi vɔ́nɛ ponyah̃á gɔ́lɔi h̃u. Ná vólu, ponyah̃ái sí fíli pa ɛ́i ɣɛ́ ɣɛ́i lɔwɔ́baɣani ngi h̃íỹɛngi yáá, yálaa ndaahéingi vɔ́nɛ ponyah̃á gɔ́lɔi h̃u.

¹⁰ Ponyah̃ái i ɣɛ́ ngáá nuu tɔwɔ́ vánda í mba, aáva áá ɣɛ́ maakɛ pánda vungɔ́ ngí léngaitii su. I ngáá nuu áá lókohei sotángaa wu ɛ́ɣɛ í ngáá ngufema háá ɣɛ́ mɔ́ɔ́ ngí mbála Yalá fɛ́li mbélaitii mbɛ, íwaa kpɔmba hé nungáá yɛ́ taa ɣɛ́ fáá báma h̃u aáva í bɔ́wɔ gúla kɛ́lɛma faa vánda vanda bih̃íw̃aa ɣɛ́ndaa h̃u.

¹¹ Kɛ́ yálaa ponyah̃ái sítii ndaahéingi vɔ́nɛ taa ɣɛ́ ngáá tɛɛniinángaa ponyah̃á gɔ́lɔi h̃u, sífaa, ná siỹɛ séi mɔ́nii áá víli ti lii vólu, taa lókogula Kílisitii hái h̃u.

¹² Aáva Ngalá ngáá ti velé lála ti gúúlongi ỹaani fááw̃a taa ɣɛ́ mbóni ngáá Kílisitii.

¹³ Taá w̃áá holó lí ngáá lɔve tɔvéndaa pɛlɛ́itii nda, kɛ́ í síɣe bɛ́lɛ ná wa, taá ɣɛ́ taá ndaawó mbó. Ná vólu, táá víli nungáá hááni su ɛ́i ɣɛ́ ngáá ti waaháá.

¹⁴ Faale, ngáá ɣɛ́ loí ponyah̃ái sítii ti ngáá tɛɛniinángaa tí síỹɛ ngéɣe, tí ndéngaa lé, aáva tí tí vɛ́lɛ lowaí wúú h̃úúhou ngáá pangɔ́ kɛinɔɔ́ mɔɔ naa gúla kɛlɛ́ma mu waahílima yélaitii mbɛ tɔɔ yɛ́pɛ mu wa ỹɔ́u,

¹⁵ sífaa, ponyah̃áitii ti lɛ́ingaa ti vólu yáfenga naa kílii Jísu wa, ti hítɛ Setána volú.

¹⁶ Nyáh̃ai fíli áá ɣɛ́ ngáá Ngala fɛ́li mɔ́ɔ́ aáva ponyah̃áá tí ngéya ngi wólondai h̃u, kɛ í ti haa yeɣé laá gítei álaa túkpe Ngala fɛ́li mbélaitii ngu mba kɛinɔɔ́ Ngala fɛ́li mbélai tí kpɔ́mba hé ponyah̃ái sítii mbɛ ti lókolamaa fíli áá ná kpósouŋ.

¹⁷ Kele gelé mbélai sítii taá ɣɛ́ taa yénge ngáá pangɔ́ wú lííwaa, sí taa ɣɛ́ táá maahɔ́lɔ ngáá ti pávai, aa ɣɛ pele w̃a bɛ́lɛ kɛɣɛ́lai í láma ti yɛ ngu ngí lí í nda mɛ́ɛ́ sítii ma ti yéngengi í ngáá Ngala ngóo lendái ɛ́ɣɛ maa gálambo mbondái.

¹⁸ Sífaa, sí pɔnɛngɔ́ɔ́ Ngala Kɔ́lɔi h̃u, aá waa ngáá sí, “Walaá toŋaníí laa yíli ná áá ɣɛ́ áá mɛɛníí sí yándiɣa taa tolí ngáá wíitii.” Laáva pɔnɛngɔ́ɔ́ lé múl̃ɔ su ngáá sí, “Kule lɔ́ ngenge mɔ́i w̃a í ngí pávai w̃aahɔ́lɔ.”

¹⁹ Nuu álaa faa fíli pɛ́lɛ kele gelé mɔɔ wa Ngala fɛ́li mbélai ndiiwáá yɔ́ɔ́ ngéɣe ngáá tɔɔỹaá, kɛ léi hééle félengɔ ɔɔ sáángɔ í ɣɛ́ maa hái wa.

²⁰ Kɛ́ sítii kínɛi taá ɣɛ táá ndí ngu ma ngáá faa ỹɔ́u ɣɛ́ndaa, tevé kpé yí ndé tí w̃a lííwaa kɛinɔɔ́ ndúwa í vú pekaítii su tɔ́ɔ vá tá ɣɛ.

²¹ Ngaláni ngáá Jísu Kílisitii ɛ́ɣɛ hɛ́ɛ́ma w̃álekaitii tiyá lɔ́ ti ngáá ní hééleaitii ngáá ngí fái sí léa í w̃a kpáŋ kpáŋ ngáá yí híya ngáá ti ye. Yálaa suuwɔlɛ́ mbo kɛlaa yɔ́ɔ́ tó polú wó ngáá nuu fíli í híyalai h̃u ngáá fái sítii.

²² Yálaa bɛ́li ngáá yí lóko vɛ́lɛ nuu fíli ma ngáá yí Ngala fɛ́li mbɛ ngáá í ɣɛ ngáá ngenge mɔ́ɔ́ Ndemɔí Ngalá mbɛ. Yálaa víli faa ỹɔ́i sítii su nungáá vékaitii taa ɣɛ́ táá kɛ. Tɔmbema w̃áa fíli álaa ɣɛ́ í wa.

²³ Yaa ɣɛ́ nɔ́ɔ yáá njɛ séɣe héɣe kpɔ́le, kɛ́ yááyaa ndɔ́ɔ tá guló bɔ́le í góó h̃ui hááw̃a na séébɛi ɛ́i lómbiya í hóu.

²⁴ Nungái ti lɛ́ingaa tí háá ỹɔí ya ngáá ɣɛ́ kpál̃au aáva faa h̃uu haa lé mbélai kele tɔ taá ɣɛ́ faa wɔ́lɔ mba p̃ɛ́ɛ́ maa w̃ɔ́i ɔ́ɔ́ ɣɛ́a foló ti w̃a. Kɛ́ tí lɛ́ingaa ti háá ỹɔítii ɛi h̃umbuwá gúla kalá kála ma.

²⁵ Ngimɔ́ɔ́ nɔ́ɔ máá hái í na nuu lúva velé vándai géle tɔ nga ngáá ɣɛ́ kpál̃au ɛ́ɣɛ múl̃ɔ sí ɣéle tɔ nga ngɛ́i ɣɛ́ kpál̃au ngwala, maa ɛ́i lɔ́ɔ́wu.