TÍMOTI HESENDAA GƆLƆÍ 4 - Kɛ́lɛ Niinaí

Pɔ́ɔ í ndaahí mbóni kɔwɔ́ato ndɛɛ gálambongi wa

¹ Hɛ́ɛ́ma Ỹínangi í ndengɔ́ kpál̃au ngáá ngetéyangi sí yákɛɛlɛmai laa lówah̃u, nungái ti lɛ́ingaa taá lókogula ndangí h̃u tí su ngáá Jísu Kílisitii, ti hítɛ ỹína ỹɔítii pólu, nátii táá ti yakpólowa ngáá ndɛɛ gálambongaitii.

² Ngakpolówa kálambo táálii sítii pa taá gúla sítii ngéya taa Ngála fái la yaah̃ú, kɛ́ ɛ́i ɣɛ ti lií h̃u. Maa lɛ́ɛ́ galambo mbélai sítii pa faa ỹɔ́u ɣɛ́ndaa áá mɔ́ɔ ti yaah̃ú ngáá faa fíli.

³ Nungái sítii tɔ taá kalambongí wó ngáá aa pele w̃a ngáá Ngala fɛ́li mɔ́ɔ́ ɔ́ɔ́ nyáh̃a yéɣe ɔɔ ɔ́ɔ́ wála siỹɛ́ ngéya. Ná vólu, mɛɛni lɛ́ingaa lɔ na bɛ́ kpɛ́ kule áá Ngala fɛ́li mɔ́ɔ́ w̃a ɔ́ɔ́ mɛ. Kɛ́ Ngalá ngí mɛɛní kpɛ́lɛɛ kpátɛngɔ a mu haáw̃a ngáá mú mɛ. A muỹɛ́i vá a mu langɔ́ ngáá Jísu Kílisitii, aáva a mu tɔɔỹái wɔlɔ́ náa, mɛɛní fíli maa ɣɛ́ mú mɛ maá sɛ́ɣɛɛ gula nɔ́ɔ Ngalá ma faaw̃a a mú mɛ́.

⁴ Sí kínɛi Ngalá ngí kpátɛngɔ, kpɛ́lɛɛ pángɔɔ lé. Kule aa ma nuu ɔ́ɔ́ léle ta fíli mbá. Kɛ́ ná nuu áá ɣɛ́ í ta fíli mɛ, aa sɛ́ɣɛɛ gúla ma hé nɔ́ɔ Ngalá mbɛ́ faaw̃a, í mɛ.

⁵ Mɛɛní fíli tɔ ngáá ŋani vánda mɛ́ fááw̃a mu yɛ, bɔw̃álale, ngimɔ́ɔ́ Ngalá ngí ndéngɔ, ná vólu, mú Ngála fɛ́li ma, mu sɛ́ɣɛɛ gulá má faaw̃a.

Ngenge mɔ́ɔ́ vándai Jísu Kílisitii hááw̃a

⁶ Tímoti, na yáá fái sítii suuɣɛ́ ngáá a mu mbála Yalá fɛ́li mbélaitii ngáá taayaá kɛ, kɛ yá lɔ́ ngáá ngenge mɔ́ɔ́ vánda Jísu Kílisitii hááw̃a. Tɔɔỹaá gálambongi ɛ́ɣɛ Ngalá ndáá wói yáá híya la lɛ́i áá kɛ ngáá háwu nuu í la ngáá Jísu, tiyá lɔ táá i h̃úúba Ngala fái h̃u.

⁷ Gbelengái nátii nungái taa ɣɛ́ táá pili, tɛ́i ɣɛ ngáá Ngala fáa aáva pele áá tí le fáá h̃u, volú yáfe tí wa, í hɛ́mbɛ héingɔ í ɣɛ́ la fái sítii kal̃aa wɔlíndaa h̃u taá i ɣɛ ngáá Ngala fɛ́li mɔ́ɔ vanda.

⁸ Sítii nuu áá ɣɛ́ áá ti ɣɛ ngáá kɛinɔɔ́ í h̃uu í ba, pangɔɔ́ nɔ́ɔ pele tá h̃u, kɛ́ sítii nuu áá ɣɛ áá ti ɣɛ ngáá í h̃úú í ba Ngala fɛ́li fái h̃u pangɔ́ɔ́ lé pele fíli sú nɔ́ɔ, sífaa, aa va ngáá kulasuunúma nuu yɛ́ ndɛɛh̃úi sí h̃u nuu í su naa ɛ́ɣɛ ndɛɛh̃úi sí í náá wutúwɔ.

⁹ Sí ngí ndéngɔ aá lɔ́ ngáá tɔɔỹaá aáva kule lɔ nuu kpɛ́lɛɛ má tí lókohei mbu ɛ́ɣɛ tí lá la.

¹⁰ Aáva muỹá lɔ́ɔ w̃ɔ́l̃ɛ máá yakpá ngwala bɔw̃álale mú kpɛ́lɛɛ mú gitóngɔɔ lé Ngalá mba, lɛ́i í ngáá Ngalá ndɛɛh̃ú í su, lɛ́i í ngáá nuu kpɛ́lɛɛ Ngúmaawo Mɔ́i kɛ́ ngu ngi nda mɛ́ɛ́ sítii ma tí langɔ́ la.

¹¹ Tímoti, fái sítii ndé kalámbo su mu mbála Yalá fɛ́li mbélaitii ma, yí nde ti w̃a taayáá ti ɣɛ.

¹² Yaá kɛ nuu fíli ɔ́ɔ́ yááh̃u víli í w̃ááh̃u ngáá sífaa nɔ́ɔ yí ngáá siỹɛndói lou, kɛ́ laá ɣéle, yí ɣɛ́ ngáá tɔmaséi ti haáw̃a í yɛ́pɛ gilí h̃u, í lúva velé h̃u, ndo su, ɛ́ɣɛ ndángi yí su ngáá Jísu Kílisitii ɛ́ɣɛ í w̃ááw̃uỹa kílii h̃u fó faa ỹɔ́i yaá.

¹³ I ló su kpóloo ngí vá, bɔwɔ́ gúla kɛ́lɛma Ngala Kɔ́lɔi galandái h̃u kpɔ ndííwaa ɛ́ɣɛ Ngala ngóó lendái ɛ́ɣɛ Ngala kálambo mbondái.

¹⁴ Ngenge tókoi Hɛ́ɛ́ma Ỹínangi í kɛ́i ngáá háwu yí hómboi nda ná h̃u Ngala ndaa háá lé mbélaitii ɛ́ɣɛ kele ɣéle mbélai tí lóko vɛ́lɛi i w̃á, ti Ngalá fɛ́li í yɛ́, ngáá ɣɛ́ loí yí ndí ngu ma ngáá maa yénge pandaí ná wóndaa.

¹⁵ Fái sítiini kal̃aa wɔlí í lóko h̃uulévengɔ í ɣɛ́ la ti ɣɛndáá h̃u kɛinɔɔ́ nungáitii kpɛ́lɛɛ ti í yénge toko vandaí lɔ.

¹⁶ Bɔwɔ́ w̃ááh̃u béle, ná vólu, yí w̃ááh̃u béle ngáá kalambongí yíwaa mbo. Ndi ngu ma ngáá sítii kɛndáá bɔw̃álale ná yáá sí ɣɛ, yáá bɔ́wɔ wúmaawo ɛ́ɣɛ sítii taa ɣɛ́a wolílo í w̃a.