TÍMOTI HESENDAA GƆLƆÍ 1 - Kɛ́lɛ Niinaí

Ndaalimaí

¹ Nyɛ́i ngí ngáá Pɔ́ɔ, nyá lɔ ngáá kɔlɔí sí vɔ́nɛ. Nyá lɔ ngáá Jísu Kílisitii gééla kíya Ngalá lɛ́i í ngáá mu Wumáawo Mɔ́i ɛ́ɣɛ Jísu Kílisitii lɛ́i í ngáá mu gítomai ti ndéngɔ ngáá í ɣɛ́.

² Nyá lɔɔ kɔlɔí sí vɔ́nɛ í yéle, Tímoti, yɛ́i yí ngáá kpɔ́wɔ bɔ́wɔ lóu ɣɛ́ kíli mu lángi w̃áá véle w̃a Ngala fái h̃u. Bɛlɛ́ Kɛɛɣɛí Ngalá ɛ́ɣɛ mu Lemɔ́i Jísu Kílisitii ti háá bɔwɔí ɛ́ɣɛ tí yááh̃u w̃ááw̃aanui ɛ́ɣɛ tí lííhei tí ɣɛ́ í yɛ́.

Ndaahíngaitii kɔwɔ́ato ndɛɛ gálambo mbondái wa

³ Ná ngí ɣɛ́i ngáá lí Mɛsedóniya lataí h̃u, ngí ndéni í w̃á ngáá yí ló Ɛ́fɛsɔ taa h̃u kɛinɔɔ́ yí ndé nungái sítii ma tíwaa ndɛɛ galambóngi wo ngáá ti bé ná wa, aáva ná lɔ́ ndóngɔ yí kɛ.

⁴ Nde ndɛɛ gálambo mbelái nátii ma ti bé bɔwɔ́ w̃ááhololima ngáá gbéle táálii nátii ɛ́ɣɛ wɔ́lɔ wɔ́lɔma lé suugúlandaa yɔli njɔlingí ná wa. Ná vólu hái aa ɣɛ́ nɔ́ɔ léi ngáá tamal̃á mááɣaali aáva tɛ́i kpɔ́mba he Ngalángi háá h̃uubatɛngí wa ngakɛ́ngɔ ngáá mu ye ndangí w̃aa véle w̃a.

⁵ Ngí ndéngɔ ngáá wú ɣɛ́ waa sí ɣɛ kɛinɔɔ́ í kɛ́ ngáá háwu mu ló ngáá ỹɔw̃ɔ́ ỹɔ́w̃ɔ. Ndongí áá gúla nuu lií h̃u faa ỹɔ́u fíli ɛi ɣɛ su ɛ́ɣɛ nuu gi mai aa ɣɛ́ kpál̃au ngáá fáitii áá kɛ tiyá lɔ pele w̃a ɛ́ɣɛ ndangí nuu áá ɣɛ́ su ngáá Jísu Kílisitii ngáá tɔɔỹaá.

⁶ Nungái ti lɛ́ingaa tí vólu yáfenga sítii mba, ti víli kaka péleitii mba, tí lókovili tamál̃a mááɣaalini su.

⁷ Ti longɔ́ɔ́ lé ti ɣɛ́ ngáá kalambo mbó mbélaa Ngala sávai hááw̃a Ngalá ngí féni Muusé yaá kɛ́ tɛ́i ngatɔ́ mba kɛlaa sí í ngáá faí taa yɛ́pɛ mba.

⁸ A mú kɔ́lɔ ngáá savaí Ngala ngí féni Muusé yaá pangɔ́ɔ́ lé ná nuu áá ɣɛ áá ngangénge kíya kule í ma nuu í kɛ.

⁹ A mú kɔ́lɔ múl̃ɔ ngáá savaí bátɛngɔ láá lé sítii fááw̃a taa híya la. Kɛ́ kpatɛngɔ́ɔ́ lé sítii fááw̃a taá nyááni ɛ́ɣɛ nyaama yélaitii ɛ́ɣɛ sítii taa Ngala faaw̃a ɛ́ɣɛ faa ỹɔ́u yélaitii, ná vólu, sítii tɔmbema w̃áá í ti wa ɛ́ɣɛ sítii taa Ngalá fái h̃uuh̃ándɛ taa sítii taá ti kɛ́ɛ́ɣɛni ngaa ti njééni paa ɛ́ɣɛ nuu váá mbélaa vékaitii.

¹⁰ Ná vólu, savaí lɔ́ ná kɔlɔsiyá mbélaitii faaw̃a ɛ́ɣɛ siỹɛngái sítii taa hítɛ ti mbála h̃iỹɛngáitii pólu ɛ́ɣɛ nyah̃ái sítii taa hítɛ ti mbála ỹah̃áitii pólu, ɛ́ɣɛ sítii taá nungái maahíya ngáá ndúwɔ lopó taa sítii taá ndɛɛ gɔ́ɔ́la, ɛ́ɣɛ sítii taá ndɛɛ hééle wóó le ɔɔ sítii taá faí sítii kɛ tɛi ɣɛ́ péle w̃a Ngalá kalambongí w̃áa véle w̃a, ná wáá ngáá, tɔɔỹaá gálambongi.

¹¹ Kalambongí sí vá í gulangɔ́ keela woó vánda w̃aanɛɛnɛɛngí sí h̃u Hɛ́ɛ́ma Yálangi í féngɔ ngéya ngáá ngí ndé.

Pɔ́ɔ i Ngalá tɛ́i í mɔ́ɔ́ Tímoti laahí

¹² Ngáá sɛ́ɣɛɛ gúla mu Lemɔ́i Jísu Kílisitii w̃a lɛ́i í ngákpa fénga mbɛ́ ní yéngengi hááw̃a. Ngáá sɛ́ɣɛɛ gúla ma ngáá í ngéɣengɔ ngáá tokolá ma w̃ɔ́ɔ́ aáva í lókolongɔ mbá ngáá ngí yénge mbɛ.

¹³ I ná ɣɛ́ngɔ mbɛ́ kíya bɛ́lɛ ngɔ́ɔ́ ngoo ỹɔ́u ỹɔ́u nde kɔwɔ́ato Jísu wa, ngí faa bá ndá ma, ngí ngɛ́ɛ́li, kɛ́ Ngalángi mááw̃aanu hóuni bɔw̃álale ngáá ɣɛ́i nɛ́nɛ laí ngáá Jísu aáva ngáá ɣɛ́i kɔ́lɔ ngáá faa ỹɔ́u lɔ́ ngí ɣɛ́i ngáá kɛ.

¹⁴ Faa bɔ́wɔi Ndemɔí Jísu í kɛ́i mbɛ́ suuwɔ́ɔ́lɔngɔɔ lé ngwala. Faa bɔ́wɔi sí vá tɔ í kɛngá ngáá háwu ngí lángɔ ngáá Jísu Kílisitii, ngí ló ngáá ní mbála Yalá fɛ́li mbélaitii. Ndangí ɛ́ɣɛ ndóngi sítii pa tɔ taa ɣɛ́ nuu fíli su kpahangɔ áá ɣɛ́ la Jísu Kílisitii wa.

¹⁵ Sí ngáá vá ndéma aá lɔ ngáá tɔɔỹaá wóo, kule lɔ nuu kpɛ́lɛɛ má tí lókohei mbu ɛ́ɣɛ tí lá la, ná wáá ngáá, Jísu Kílisitii i vaangɔ́ ngeleí sí wu ngáá í faa ỹɔ́u yélaitii ngumááwo. Aáva faa ỹɔ́u yélaitii kínɛi su, nyá lɔ ngí ngáá ti wúngi.

¹⁶ Kɛ́ háwu sí kái kái í kɛ́ngɔ Ngalá ngí ngááh̃u w̃aaw̃áánu hóungɔ aá wáa ngáá kɛinɔɔ́ Jísu Kílisitii í ngí líílɔlɔ walaí yaah̃ú ɣɛ́ ngáá ngé nyɛ́i ngí ngáá faa ỹɔ́u yélaitii kpɛ́lɛɛ ti wúngi. Aáva ná ngí ngáá ti wúngi, í séi náá sí h̃úi w̃a í lí naa lúwɔɔ nyá lɔ́ náá ngí ngáá tɔmaséi sítii fááw̃a táá vá láma ngáá Jísu Kílisitii ngáá taa kúnafɔ lɛ́ɛ́h̃ui w̃ááhɔlɔ.

¹⁷ A mú Ngalá tɛ lɛ́i i ngáá kúnafɔ w̃ása ngwálai, lɛ́i ɛ́i há kúnafɔ aáva lɛ́i nuu ɛ́i tɔ, lɛ́i ngilaá kpé í ngáá Ngalá. Bɛlɛ́ ndaaw̃áá í lɛ́, ngufema í ɣɛ́ mbɛ kúnafɔ taá ngí ndá gúnafɔ! Amíína.

¹⁸ Tímoti, yɛ́i yí ngáá kóó h̃u lóu ɣɛ́ kíli, nyá lɔ́ɔ ndé í w̃á ngáá sí kule í í w̃a yí ɣɛ́ yáa tí ɣɛ, ná wáá ngáá, sí í ngáá faa yílaangi Ngalá ndaa háá lé mbélai tí ndéi wɔ́lɔ kpɔ́lɔɔ kɔwɔ́ato í wa. Ná yáá ɣɛ́ yáá híya ngáá ti ye, maa haí aa ɣɛ gulaí ngáá kíya kɔɔ wɔ́ nyááka áá ɣɛ́ nuu yaa áá lápi la ngáá pangɔ́.

¹⁹ Aáva í lángi yí su ngáá Jísu Kílisitii í ndi ngu ma ɛ́ɣɛ í gí mai í ɣɛ́ kpál̃au faa fíli su yaa kɛ. Nungáá lɛ́ingaa tí wóli híɣea sí w̃a ti gi mái áá nde ti w̃a aáva ndangí tí ɣɛ́ngɔ su ngáá Jísu Kílisitii í gúlaa tí h̃u.

²⁰ Maa yélaitii suu vá, nuu félengɔ lɔ́ na taa ɣɛ́ ti w̃a Hamɛ́neeyɔ ɛ́ɣɛ Alɛsáánda tiyɛ́i ngí tí lókolevenga Setána w̃a kɛinɔɔ́ tí w̃áánɔw̃ɔ, ná ná áá ɣɛ́, taá kálambo mááhɔlɔ ti bé yɛ́pɛma ỹɔ́u Ngalá mba.