TÁITƆ 2 - Kɛ́lɛ Niinaí

Tɔɔỹáa gálambongi

¹ Táitɔ, kule lɔ í w̃á sí í ngáá tɔɔỹaá gálambongi yí mbó.

² Siỹɛ kpákolongaitii kalá ngáá tí ɣɛ́ ngáá faa yátɔ mbélaa, ti gɛ́ɛ́ haítii ngufema í ɣɛ́ ti w̃a, ɛ́ɣɛ tí bɔ́wɔ h̃úuhou w̃a faa fíli sú. Nde tí w̃a ti lá gíte ngáá tɔɔỹaá gálambongi kpáŋ kpáŋ ɛ́ɣɛ ti lóngi í ɣɛ́ ngáá kite, ti líílɔlɔi í ndí ngu ma kúnafɔ.

³ Nyah̃á bákolongaitii kala ngáá tiyá bɛ́lɛ tí híya veleítii ti ɣɛ́ ngáá sítii kɛ́ kíli taa ɣɛ́ Ngála fááw̃a. Tálaa ɣɛ́ ngáá ndɛɛ vɛlɛ́ mbá yélaa ɔɔ ndɔɔ bɔ́le mbélaa wala, kɛ́ láa ɣéle, tí ɣɛ́ ngáá kalambo pánda wó mbélaa,

⁴ kɛinɔɔ́ tí hómbo tí nyah̃á bélangaitii kalámbo ngáá tí ló ngáá tí h̃íỹɛngaitii ɛ́ɣɛ tí léngaitii.

⁵ Kule lɔ́ tí w̃a tí tí galámbo ngáá ti ɣɛ́ táa bɔ́wɔ h̃úúhou w̃a faa fíli su, faa ỹɔ́u fíli álaa ɣɛ́ tí h̃u, tí ɣɛ ngáá sei ỹah̃áá vándaa, ti ɣɛ́ ngáá faa bɔ́wɔ ɣɛ mbélaa, tí bɔwɔ́ gula kɛlɛma ti h̃íỹɛngaitii mbɛ́ kɛinɔɔ́ nuu fíli álaa faa ỹɔ́u lé kɔwɔ́ato Ngalá kééla woí wa.

⁶ Kule lɔ í w̃á ngáá yí siỹɛ ndákpangaitii ndiiwúúlɛ ngáá tiyá bɛ́lɛ tí bɔ́wɔ h̃úúhou w̃a faa fíli su.

⁷ Táitɔ, kɛ yá bɛ́lɛ nɔ í gɛ́ɛ́ haítii ɛ́ɣɛ í lúva veleítii tí ɣɛ́ pele w̃a faa kpɛ́lɛɛ su kɛinɔɔ́ yí ɣɛ́ ngáá tɔmaseí sítii faaw̃a yáá tí galámbo. Kalambongí wo ngáá tɔɔỹaá aáva i hɛ́mbɛ í ɣɛ́ su.

⁸ Ngoo ỹɔ́u fíli álaa gúla í lá ngáá nungáá tɔ́ɔ mbaagúla. Ná vá ngáá kɛ mu wááhilima yélaitii tí wúfe bɔw̃álale faa fíli ɛi ɣɛ na tɔɔ́ ndé ngáá ngi ỹɔ́u mu haáw̃a.

⁹ Kule lɔ í w̃á yí nduwɔáitii kálambo ngáá taayáá bɔwɔ́ gula kɛlɛ́ma tí w̃ááliɣiaitii mbɛ faa kpɛ́lɛɛ su ɛ́ɣɛ tí tí liilɛ́i faa kpɛ́lɛɛ sú. Tálaa ɣɛ́ táa wú sú bɔ́ɔ́lɔ ɔɔ tɔ́ɔ́ maaɣaalí gúla ngáá tí w̃ááliɣiaitii.

¹⁰ Tálaa ŋuỹa wó ti w̃a, kɛ́ láá ɣéle, ti ɣɛ́ ngáá tɔ́wɔbaɣa yélaa. Tí ɣɛ́ ngáá tokolá ma yélaa faa kpɛ́lɛɛ su kɛinɔɔ́ ngúfema í ɣɛ́ kalambongí sí w̃a kɔwɔ́ato Ngalá mbá lɛ́i í ngáá mu Wúmaawo Mɔ́i.

¹¹ Kule lɔ Ngala fɛ́li mbélaitii ma ti lúva h̃íí ná sífaa, Ngalá ngí ngi háá bɔwɔí yákɛnga. Ná wáá ngáá, ngumaawóngi áá mbo ngáá núu kpɛ́lɛɛ.

¹² Maa háá bɔ́wɔi sí vá aa ngakɛ́ ngáá mu ye ngáá mu bé fái sítii mba tɛ́i Ngalá ndiilɛí ɛ́ɣɛ faa ỹɔ́i sítii ti ngáá ngeleí sí wuulíívo kɛ́i. Ná vólu, aa ngakɛ́ ngáá mu ye kíya maá bɔ́wɔ h̃úúhou w̃a faa fíli su ngeleí sí wu ɛ́ɣɛ aa ngakɛ́ ngáá mú ye kíya mu lɛ́ɛ́h̃ui h̃uuhíya kílitii taa ɣɛ́ váni ti Ngalá ndiilɛ́i.

¹³ A maá ɣɛ́ maa sítii kɛ ná nɛ́nɛ múwaa kooh̃unɛ́ɛ́ hóloi sí w̃áálɛlɛ í ngáá mu gítomai. Ná wáá ngáá, fóloi sí mu Yála ngwalaí Jísu Kílisitii lɛ́i í ngáá mu Wumááwo Mɔ́i áá vá ngi yákpa maanɛɛnɛɛngí h̃u.

¹⁴ I lɛɛh̃úi gúlangɔ kɛ́lɛma mu haáw̃a ngáá í mu w̃ááɣawo faa ỹɔ́itii kpɛ́lɛɛ ngéya ɛ́ɣɛ í mú háá ỹɔítii ngúya mu w̃a fó, mu ɣɛ́ ngáá nungáá taá ɣɛ́ faaw̃a nɔ́ɔ ɛ́ɣɛ mu ɣɛ́ kíli batɛ́ngɔ í ɣɛ́ lá faa vánda ɣɛ́ fááw̃a.

¹⁵ I lóów̃ai í í yáá, maa yákpangi yangénge yí nungáitii kalámbo ngáá fái sítii ɛ́ɣɛ yí tí liiwúúlɛ. Sítii tɛ́i ɣɛ́ pele gíte w̃a, yí tí hítɛ pele vandá w̃a. Yálaa kɛ́ nuu fíli ɔ́ɔ́ tókohiya ngu maah̃ú háá ɣɛ ngáá í ye.