FAA YÁKƐ KƆ́LƆI 9 - Kɛ́lɛ Niinaí

¹ Kɛ malékai lɔɔlú kélei i ngi ndá búlui hɛ́nga. Ná í ná ɣɛ́ni, ngí temúleɣai lɔ́i í gúla ngeleí yá í h̃úndɛ ngeleí sí wú, ndowá wálai sí kpu ngáá mba maa gíí héngɔ i ɣɛi lá ngeyá.

² Ná temúleɣai í ndowái ná laawóni, nduuli walá i ɣɛi áá gúla su, kíya nɔ́ɔ ngɔmbu walá áá víli ndɔbɔ h̃u. Aáva nduulí í folói w̃aabɔ́leni ngáá ɛ́i béle gúla.

³ Babangáitii ti gúlani nduulií ná h̃u tí vá ngeleí sí wu. Ngakpángi fengɔ í ɣɛ́i lá ti yaa, i ɣɛi ngáá kíya nɔ́ɔ nyakugááli yákpangi í ná.

⁴ Tí ndéni ti w̃a ngáá tálaa faa fíli kɛ́ ngáá kpitingí ɛ́ɣɛ ngulúitii taa sí ŋani vékaitii kpɛ́lɛɛ kɛ nɔ́ɔ́ léi nungáitii Ngalangí lókovongi ɛ́i ɣɛ́ ɣɛ́ni tí lavála.

⁵ Tí mɔ́ɔ ndení tí w̃a ngáá tálaa nungái nátiini páá, kɛ́ tí faa báma lá tí w̃a ngalú ndɔ́ɔ́lungɔ laá lówah̃u. Babangái nátii ndaavóngi ɔ́ɔ́ báálɛ kíya nɔ́ɔ kpéi nyakugááli wɔ́ngi í na.

⁶ Ngalú ndɔ́ɔ́lungɔi ná láá lówah̃u, nungáá taa ɣɛ́ taa saa w̃ɔní mɔ́ni kɛ, kɛ́ tɛ́i mbó. Taá ɣɛ́ loí tí há, kɛ́ tɛ́i mbó. Sái áa lɔɔwú tí wa.

⁷ Babangái nátii kɛ kíli gulangɔ́ i ɣɛi lá ngáá kíya nɔ́ɔ sooní kɛ kíli batɛngɔ́ áá ɣɛ́ lá kɔɔ haáw̃a. Mbɔɔlɔí ta i ɣɛi vɛ́lɛni tí wú mbá kpatɛngɔ́ ngáá góóli, kulangɔ ngáá masa mbɔ́ɔ́lɔ. Tí yaah̃úitii kulangɔ́ ngáá nuu yááh̃u ɣɛ́ kíli.

⁸ Tí wú ndéɣai gulangɔ́ i ɣɛi lá ngáá nyah̃aá wú ndeɣá ɣɛ́ kíli, ti laangɔ́lui gúlangɔ ngáá njala laa ngɔ́lu.

⁹ Ti gaká h̃úi vɛ́lɛngɔ í ɣɛi lá ngáá ŋani tá kulangɔ́ ngáá kɔlu. Ngɛingí ná taa héi su tí píli sooni mbá ngáá ti síya ngáá ti ye, babangái nátii ti govóngi h̃úúngi gúlangɔ i ɣɛi lá ngáá ngɛ́i bíh̃i kpih̃ingí ná áá ɣɛ́ soí wa taa ɣɛ́a víliỹɛ taa lí kɔ́ɔ́ wɔma.

¹⁰ Babangái nátii ngongí i ɣɛi ti wa kíya nɔ́ɔ́ nyakugááli ndái í na aáva ti wongí nátii su lɔ ngakpángi i na ngáá taayáá nuu búsa ỹááma lá ngalú ndɔ́ɔ́lungɔi laá lówah̃u.

¹¹ Ti w̃ááh̃u w̃ása ngwalaí wáá ngáá, nyaama w̃álekai sí ndówai sí kpu ngáá mbá í tóko h̃ú. Malékai sí laahéingi Híbulu woí h̃u aá wáá ngáá Abádɔ, i ngáá Apóliỹɔ Gilísi woí h̃u. Ná wúi wáa ngáá, Ỹanda H̃úú Ỹááni Mɔ́i.

¹² Ná sí áá gúla su, kɛ hésendaa haa bamaí í viláa ngáá la. Kɛ í longá ngáá faa báma félengɔ áá vá vááma.

¹³ Kɛ malékai wɔhíta kélei i ngi ndá búlui hɛ́nga. Ná í ná ɣɛ́ni, ngí ngoí ỹɛ́nii áá gúla góóli lutúi gaká nááningɔi w̃a í Ngala kakála.

¹⁴ Kɛ ngoí sí i lengá malékai wɔhíta kélei ná w̃a, í ɣɛ ma, “Nyaama w̃álekaa nááningɔi nátii fuló tí lói njɛ wálai sí la taa tolí ngáá Yufuleti!”

¹⁵ Tí maléka nááningɔi nátii fulóni náa tí ɣɛ́ kíli batɛngɔ́ í ɣɛ́i lá ngáá tí nungáitii paá háwai ná kái kái má í fóloi ná kái kái sú, í ngálungi ná kái kái sú, í fówoi ná kái kái sú. Ná wáá ngáá nungáitii kínɛi tí ngélewu ná táá wɔ́lɛ su sáwa, tí seiw̃aá yílangi váa.

¹⁶ Sóyaitii ti ɣɛ́i soítii kɔma ti h̃ɔ́ingi tí kɛ́ni ngáá ngé ti ɣɛ́i ngáá, nuu tásu séiw̃aa tásu hɔ́ndɔ félengɔ (200,000,000).

¹⁷ Ná ngí ɣɛ́i keluí h̃u, ngí soítii tɔ́ni taá tí híya mbélaitii. Tí gaka h̃úi vɛ́lɛngɔ i ɣɛi lá ngáá ŋáni tá naa w̃ááh̃u belé fááw̃a kpiỹángɔ kíya nɔ́ɔ ngɔmbu mbuú bóólengɔ ɛ́ɣɛ maa báhingɔ. Soí nátii ti wungí gúlangɔ í ɣɛi lá ngáá njala wú ɣɛ́ kíli. Ngɔmbuí, nduulí ɛ́ɣɛ ŋani tá áa w̃ɔ́ ngwála kíya nɔ́ɔ fukúi í ná maakungí ỹɔ́ungɔ táa gúla ti la.

¹⁸ Nungáitii kínɛi tí ngélewu ná taá wɔ́lɛ su sáwa, ti heiw̃aá yílangi lɔ́ faa bámai sítii tí tí vááni. Ná wáá ngáá, ngɔmbuí, nduulií ɛ́ɣɛ ngɛingí ná áa w̃ɔ́ ngwála kíya nɔ́ɔ fukú í ná maakungí ỹɔ́ungɔ taá ɣɛ́ taá gúla soítii nda.

¹⁹ Soí sítii tí yákpangaitii tɔ tí láitii ɛ́ɣɛ ti wongítii su. Tí wóngitii tɔ́ɔ́ nuu ỹíí lá tí gúlangɔɔ lé ngáá kíya nɔ́ɔ kaalii ỹɔú ỹɔ́u ngáá nuu ỹíí áá báálɛ ngwala.

²⁰ Nuu búsa w̃átaitii kínɛi taa hááni faa bámai sítii su, taa vólu yáfeni tí yaa háitii mba. Taa béni ỹína nyɔu ỹɔungáitii fɛlindái wa ɛ́ɣɛ kɔɔ kɔɔ ŋániitii tɔ́ɔ́ kpatɛ ngáá góóli tɔ́ɔ ti yeɣé ngáá ngalángaa, kɔlu woléngi, báhi kɔ́lu, kɔtúi ɛ́ɣɛ ngulúi tiyɛ́i tɛ́i ỹanda lɔ, tɛ́i faá ỹɛ́ni kɛlaa tɔɔ́ híya.

²¹ Táa gahéi tɔɔ́ vólu yáfe nuu váándai wa, súkɛ gúlandai, kɔlɔsiyá mbóndai ɛ́ɣɛ ŋúỹa wóndai.