FAA YÁKƐ KƆ́LƆI 7 - Kɛ́lɛ Niinaí

Malékaitii taá Ngalangí lókovongi vú Ngalangí yénge mbeláitii ma

¹ Ná sí í gúlai su, ngí malékaa nááningɔ lɔ́ni lóóni ndɔwɔlɔ́i gaká nááningɔi w̃a táá fɛfɛ nááningɔi h̃úúhou ngáá kɛinɔɔ́ fɛfɛ ngákpangɔ álaa vá ndɔwɔlɔ́i h̃u ɔ́ɔ́ yívoi ɛ́ɣɛ ngulúitii suu lika líka.

² Kɛ ngí mɔ́ɔ malékai ta lɔngá áá gúla ngáá foló gúla máa veleí áá vá, Ngalangí sí ndɛɛh̃úi í su, ngi lókovongi í ngeyá. Malékai sí í yɛpɛní woo wála h̃u malékaa nááningɔitii ngelé tiyɛ́i Ngala ngí ngákpa féi tí yáa ngáá tí ndɔwɔlɔ́i ɛ́ɣɛ yívoi ỹááni.

³ Malékai ná i ɣɛi áá ɣɛ́ ta, “Waa nɛ́ɛ́ faá ɣɛ́ ngáá ndɔwɔlɔ́i sí ɛ́ɣɛ yívoi taa ngulúitii, í ló su kpóloo ní tokovongí vú Ngalángi yénge mbeláitii tavála.”

⁴ Tí ndéni má ngáá kɛ sítii kínɛi tí Ngalángi lókovongi vúni ti lavála, ti ɣɛ́i ngáá nuu tásu seiw̃aá hɔ́ndɔ ngiláá puu nááningɔ maah̃úú naaní (144,000). Nungái nátii kpɛ́lɛɛ tí gúlani nde kpambi púúngɔ maah̃úú félengɔitii su Ísulɔ yélaitii su.

^5-8 Ndé kpambii sítii ngilá ngíla p̃ɛ́ɛ́, nuu tásu seiw̃aá púúngɔ maah̃úú félengɔ (12,000) lɔ í gúlai tí h̃u. Ndé kpambii sítii pa ti ɣɛ́i ngáá Júda, Lubɛ, Ga, Ásiyɔ, Náfutali, Mɛnasa, Símiyɔ, Lívai, Esaka, Sɛ́biyul̃ɔ, Joosɛ́ ɛ́ɣɛ Bɛ́njimai.

Faŋa yambɔ́ɔ́lɔngɔ wálai

⁹ Ná sí í gúlani su, ngí wɔ́lɛni ngí faŋaí lɔ sí nuu fíli ɛ́i belé hómbo ɔ́ɔ́ ti báɣa. Tiyá lɔ́ bɛ́kpɛ tí gúlani paatiitíí su tí ndɔwɔlɔ́i kpɛ́lɛɛ su ɛ́ɣɛ híítii su taa ti laawóitii ndé ngeléi sí wu. Faŋaí í ɣɛi vúúni masa ngwálai bɔ́kpɔngi ɛ́ɣɛ Mbaalaí gakála. Tí w̃ááyilingɔ ngáá jobgo kólengaitii, ndɔɔ laɣái í hói tí yaá.

¹⁰ Tí ɣɛ́i taá wóó gúla, táá ɣɛ́ ta, “Mu Yálangi lɛ́i í héini masa ngwálai bɔ́kpɔngi ya ɛ́ɣɛ Mbaálai tiyá lɔ́ ngumaawóngi áá gúla ti yaá!”

¹¹ Malékaitii kpɛ́lɛɛ ɛ́ɣɛ kele ɣéle mbélaitii ɛ́ɣɛ fúlu wɔ́li nááningɔitii ti ɣɛ́i masa ngwálai bɔ́kpɔngi w̃ááyele mbélengɔ. Tí kpɛ́lɛɛ tí lái masa kpɔ́kpɔngi gakála, tí Ngála fɛ́li, tíwaa ɣɛ́ ta,

¹² “Amíína! A mú sɛ́ɣɛɛ gula mu Yálangi w̃a, mú ndaaw̃áálɛ, mú ngufema hé mbɛ ngi géle ɣelengi hááw̃a, ngi h̃úúbangi ɛ́ɣɛ ngi yakpángi hááw̃a, kúnafɔ taá ngí ndá gúnafɔ! Amíína!”

¹³ Kɛ kele ɣelé mbélai tí tá yíla í mɔ́ɔ́ninga, i ɣɛ má, “Ele wáá ngáá nungái sítii tí w̃ááyilingɔi ngáá jogbo kólengaitii, ná vólu, míl̃i lɔ́ táá gúla na?”

¹⁴ Ngí ngóó yápoteni, ngí ɣɛ́ ma, “Kawálai, ngáá ti wɔ́lɔ. Yá lɔ́ yí tí wɔ́lɔ.” Kɛ i ɣɛa ma, “Sítii tɔ́ tí hómbongɔ tí híya faa báma walaí h̃u ngelewu. Tí tí jógbongaitii nguyangɔ fó, ngáá Mbaalai haaɣa hai ỹááw̃ɔi i mbóni í tí wóle fó.

¹⁵ Ná lɔ́ í kɛ́nga tí lói Ngalangí w̃ása kpɔ́kpɔngi gakála Hɛ́ɛ́ma Yála Pɛ́lɛi wú, táá yénge ngala mbɛ kpindí p̃ɛ́ɛ́ taá foló. Lɛ́i í héini masa kpɔ́kpɔngi h̃u, aá lɔ́ ɣɛ́ áá tí w̃ááh̃u béle.

¹⁶ Kúnafɔ ndɔlɛ ɣéle tɔ taá njɛ́ w̃ɔ́ni ɛi mɔ́ɔ tí hóu. Foló ɛ́i mɔ́ɔ́ tí w̃áá w̃ɔ́ kɛlaa ngi lúúye nduuye ngɔ́ɔ́ héi tí w̃a,

¹⁷ bɔw̃álale Mbaalaí, í masa ngwálai bɔ́kpɔngi béla, aá lɔ́ɔ ɣɛ́ ngáá tí w̃ááh̃u béle mɔ́i. Laá lɔ́ ngáá ti w̃ááh̃u béle mɔ́i kíya nɔ́ɔ mbaala w̃ááh̃u bele mɔ́i í na. Aá pele ɣɛ ngáá ti ye áá lí í tó ndɛɛh̃u w̃ááhɔlɔ njɛ́i wa. Ngalá tɔ́ɔ vá ti yaah̃ú wɔ́lɔyɛi kpɛ́lɛɛ kpálema tí yaah̃ú.”