FAA YÁKƐ KƆ́LƆI 5 - Kɛ́lɛ Niinaí

Kɔlɔ w̃ááɣalangɔi taá nuí síí w̃ɔ́i taá ɣɛ́ma Mbaalaí

¹ Ngí kɔ́lɔ w̃ááɣalangɔi lɔní í hóuni nuí síí w̃ɔ́i yísa lokói ya í héini masa ngwálai bɔ́kpɔngi h̃u. Kɔlɔ w̃ááɣalangɔi sí w̃áá vɔ́nɛngɔ i ɣɛí lá kaká félengɔi w̃a, tokovo ngɔ́felangɔ i mba ngáá ndaabɔ́lumaa.

² Ngí mɔ́ɔ maléka yakpángɔ wála lɔní íwaa wóo gúla ngáá mɔɔningí, áá ɣɛ́ ta, “Éle lɔ́ kulaɣɛngɔ́ ngáá nuu ngáá áá hómbo í tókovongi sítii máaleve í ndááwo?”

³ Kɛ́ nuu fíli aa hɔlɔní ngelegóóh̃u, ngelewu ɛ́ɣɛ saa yelái ti lɔ́wɔlɔi h̃u ɔ́ɔ́ hómbo í kɔ́lɔ w̃ááɣalangɔi sí w̃ááleve ɔ́ɔ́ ndaawó ɔ́ɔ́ wɔ́lɛ su.

⁴ Ngí wɔ́lɔni ngáá ngaw̃ál̃angɔ, sífaa nuu fíli aa hɔlɔni kulaɣɛngɔ́ ngáá nuu ɔ́ɔ́ hómbo í kɔ́lɔ w̃ááɣalangɔi sí w̃ááleve ɔ́ɔ́ ndaawó ɔ́ɔ́ wɔ́lɛ su.

⁵ Kɛ́ kele ɣelé mbélai nátii ti tá yíla i ɣɛi má, “Yaa wɔ́lɔ. Wɔlɛ! Nuí síí w̃ɔ́i taá ɣɛ́ma Njalaí í ngáá nde kpambii sí h̃úu w̃ɔ́ɔ taá ɣɛ́ ma Júda, i náá Masangí Deevé Láála Loí ta ngakpa mɔ́ɔ́ walaí, ngi ndái í ndónga ma. Faalɔ, aa hómbo í tokovo ngɔ́felangɔi w̃ááleve í kɔ́lɔi laawó.”

⁶ Kɛ ngí Mbáálai lɔ́nga í lóóni masa ngwálai bɔ́kpɔngi béla, maayéle mbélengɔ ngáá fulú wɔ́li nááningɔi ɛ́ɣɛ kele ɣelé mbélaitii, kulangɔ́ ngáá tí ɣɛ́i paaní pɔlɔ w̃a. Ndowói i ɣɛi Mbalaí sí wú mba wɔféla, ngaah̃úi i mba wɔféla. Ngaah̃úi nátii pa tɔ tí ngáá Ngalangí ỹína ngɔ́felangɔitii tí tí lɔ́vengɔ ngeleí sí wu kpɛ́lɛɛ.

⁷ Mbaalaí sí í liiní í kɔ́lɔ w̃ááɣalangɔi sí hóu nuí síí w̃ɔ́i yísa lokói ya í héini masa kpɔ́kpɔngi h̃u.

⁸ Ná í sóuni, fulú wɔ́li nááningɔitii ɛ́ɣɛ kele ɣelé mbélaa púú félengɔ maah̃úú nááningɔitii, tí hítɛni wumbú yá Mbáálai gakála. Mbakaí i ɣɛi ti yaá ngáá ngilá ngíla ɛ́ɣɛ góóli vaningí, suulaahéngɔ ngáá ŋani ta táa mɔ́ maakungí nɛ́ɛ́ngɔ taa tolí ngáá ísɛngi, ná vá tɔ́ í ngáá Ngalangí vóngaitii tí Yála fɛ́li ngói.

⁹ Tí ngúle niiná hɔ́ɔ́lɛni, tí ɣɛ́ ta, “Yá lɔ́ í gúlaɣɛngɔ ngáá nuu yáá hómbo yí kɔ́lɔ w̃ááɣalangɔi yeɣé, yí tókovongitii teve, sífaa yí bɔ́wɔ gúlani kɛ́lɛma ti í váá. Saáɣa haí ná vá yí mbóni, í nungáá wúmaawonga Ngála mbɛ́ táá gúla híítii sú bɛ́kpɛ, tiyɛ́i taá híí woítii ndé bɛ́kpɛ ti gúlangɔ paatiitíí su tí ndɔ́wɔlɔi kpɛ́lɛɛ su.

¹⁰ Yí ti ɣɛngá ngáá saáɣa gula mbélaa í w̃ásandai h̃u ngáá tí yénge mu Yálangi yɛ. Ná vólu, tí ɣɛ ngáá masangáá ngeleí sí wu.”

¹¹ Kɛ ngí malékaitii tɔ́nga tí yambɔ́ɔ́lɔngɔ ngáá tásu séiw̃aa bíh̃iw̃aa ti lóóni masa bɔ́kpɔngi w̃ááyele mbélengɔ ɛ́ɣɛ fulú wɔ́li nááningɔi ɛ́ɣɛ kele ɣelé mbélaitii.

¹² Tí ngúle hɔ́ɔ́lɛni wóo wála h̃u. Tí ɣɛ́i taá ɣɛ́ ta, “Mbáálai paangɔ́ í ɣɛ́ngɔ la áá lɔ́ kúlaɣɛngɔ ngáá í sɛ́ɣɛɛ gula ma w̃ááhɔlɔ taá ngufema. Ná vólu, í ndaaw̃áálɛ mááhɔlɔ ngí yákpangi hááw̃a, ngí bátɛi hááw̃a, ngí géle ɣelengi hááw̃a, ɛ́ɣɛ ngi h̃úúbangi hááw̃a!”

¹³ Kɛ ngí fúlu wɔ́lingai kpɛ́lɛɛ kpɛ́lɛɛ ngoo ỹɛ́ninga ngelegóóh̃u, ngeleí sí wu, saa yelái ti lɔ́wɔlɔi h̃u, ɛ́ɣɛ njɛ wú ɛ́ɣɛ fúlu ỹániaitii kpɛ́lɛɛ ti ỹánda kpɛ́lɛɛ táa ngule hɔ́ɔ́lɛ, táá ɣɛ́ ta, “A mú sɛ́ɣɛɛ gula nuí síí w̃ɔ́i w̃a í héini masa ngwálai bɔ́kpɔngi h̃ú ɛ́ɣɛ Mbáálai. Ná vólu, a mú tí laaw̃áálɛ, mú ngufema hé ti yɛ tí yákpangi hááw̃a, kúnafɔ taá ngí ndá gúnafɔ!”

¹⁴ Fulú wɔ́li nááningɔitii tí mbúúhou, ti ɣɛ́ ta, “Amíína!” Kelé ɣelé mbélaitii, tí hítɛ wumbú ya, tí Ngala fɛ́li.