FAA YÁKƐ KƆ́LƆI 3 - Kɛ́lɛ Niinaí

Kɔlɔí sí lɔ́ na Ngala fɛ́li mbélaitii faaw̃a tí Sadé

¹ I mɔɔ ɣɛi má, “Keela wói sí vɔ́nɛ malékai sí yéle í Ngala fɛ́li mbélaitii mááh̃u tí Sadé tái h̃u. ‘Sí lɔ́ í ngáá keela wói áa gúla síí w̃ɔ́i yaá Ngalángi ỹína ngɔ́felangɔitii ɛ́ɣɛ temúleɣa ngɔ́felangɔitii ti ngéya. Ngí súúwɔlɔ sí wúwaa kɛ. Aá lɔ́ núngaa gí ma ngáá kɛ wá lɔ́ ndɛɛh̃uu h̃ú, kɛ́ wú háángɔɔ lé.

² A yóɣe wú sápu ndɛɛh̃uu gúloi sí h̃u ndongɔ́i wú h̃ú ɔ́ɔ́ belé há pɔ́ pɔ́. Sífaa ngí ngá kpɛ́ kpɛ́nga ngáá kɛ sí wáá kɛ, maa w̃úỹangɔ láá le nɛ́nɛ fó fó Ngala ngááh̃u.

³ Faalɔ, a giséi fái sítii ma wú tí galangá ɛ́ɣɛ sítii wú mɛ́ninga. Wú híya ngáá tí ye wú vólu yáfe wú háá ỹɔítii mba. Ná wɔ́i ɣɛ́ ná ɣɛ́ni, nyá lɔ́ɔ vá vááma wú gɔ́ɔ́la mba h̃ú kíya nɔ́ɔ ŋúỹa w̃ɔ́ɔ́ aáva wɔ́i ɣɛ́ kɔ́lɔ táingi ngáá vá ma.

⁴ Kɛ́ wú lɛ́ingaa wú Sadé nɛ́nɛ, wú gúlaitii kp̃ɔɔŋngɔ́ laá le, ná wáá ngáá, faa ỹɔ́u áá wú h̃u. Maa wúyeni tɔ máá vá ɣɛ́ma vólu kúla woléngi h̃u, bɔw̃álale wú lúva veléi í ngákɛnga ngáá kɛ wú gúlaɣɛngɔ le ngáá maa wúyeni a mu ɣɛ́ vúlu.

⁵ Wɛ́i wú ndái áá ndoma, wú w̃ááyilingɔ lɔ́ɔ ɣɛ́ lá kúla woléngi h̃u h̃íí na. Ngɛ́i mɔ́ɔ́ wú lááheingaitii kula kúnafɔ lɛ́ɛ́h̃u gɔlɔí h̃u. Ngáá ló ní kɛ́ɛ́ɣɛ yááh̃u taá ngi w̃álekaitii ngí ndé kpál̃au ngáá kɛ wá lɔ́ ngáá ní vóngaa.

⁶ Nuí faá ỹɛ́ni ngóli áá ɣɛ́ í wú mba, kɛ wolílo sí w̃á Hɛ́ɛ́ma Ỹínangi áá ndá Ngala fɛ́li mbélaitii ma!’ ”

Kɔlɔí sí lɔ́ na Ngala fɛ́li mbélaitii faaw̃a tí Feladɛ́fiya

⁷ I mɔɔ ɣɛi má, “Keela wói sí vɔ́nɛ malékai sí yéle í Ngála fɛ́li mbélaitii mááh̃u tí Feladɛ́fiya tái h̃u. ‘Sí lɔ́ í ngáá keela wói áa gúla síí w̃ɔ́i yáa faa ỹɔ́u áa su aáva tɔɔỹáángɔ. Aá lɔ́ kíi í ngéya Masangí Deevé vɛ́lɛi hááw̃a. Ná áa ndááwo, nuu fíli ɛi hombó ɔ́ɔ́ kpɔ́lu aáva ná áa ndaabɔ́lu, nuu fíli ɛí hombó ɔ́ɔ́ ndááwo.

⁸ Ngí súúwɔlɔ sí wáá kɛ. Ngí súúwɔlɔ ngáá kɛ wú h̃úú áá nɛ́ɛ́ báni ngwála, kɛ́ ná fíli sú, wú hítɛngɔ ní gálambongi vólu ɛ́ɣɛ mɔ́ɔ́ wú lɔ́wɔbaɣangɔɔ lé ngéya. Ngí kó ndaawónga wú yɛ́ sí nuu fíli ɛ́i hómbo ɔ́ɔ́ kpɔ́lu.

⁹ A wolílo! Sítii tí ngáá Setána hitɛ polú yeláitii ngáá ndɛɛ yélai nátii, tíwaa ɣɛ́ ta tiyá lɔ́ ngáá Júsua, kɛ́ aa ngáá tɔɔỹáa, nyá lɔ́ɔ vá kɛ́ma tí vá tí lá wú gɔ́wɔ wú. Tí kpɛ́lɛɛ táa ɣɛ́ náá súúwɔlɔ ngáá kɛ ndóngɔɔ lé ngáá wú ye.

¹⁰ Kolongí wú su ndáá wói wú a ndi ngu ma ngáá ndiilɔlɔ́, nyá lɔ́ɔ vá wú w̃ááh̃u bélema faa bámai sí yáa aá vá vááma nuu kpɛ́lɛɛ mááh̃u ngeleí sí wú suugɔ́vɔngi hááw̃a.

¹¹ Nyá lɔ́ɔ vá h̃úmbuwa, a ndi ngú ma ngáá wú lúva véle vándai sí wú kálanga kɛinɔ́ɔ nuu ɔ́ɔ́ wú wú ngapóte ngáá wɔ́ɔ́ wála wú w̃ááỹangi w̃a.

¹² Wɛ́i wú ndái áa ndoma, ngáá wú ɣɛ́ ngáá kpɛndɛ ní H̃ɛ́ɛ́ma Yála Pɛ́lɛi wú laáva wɔ́i gúla na kúnafɔ. Ngáá ní Yálangi laahéingi vɔ́nɛ wú w̃á, ngí mɔ́ɔ ngi láá niiná walaí sí taá tolí ngáá Jɛlúsɛl̃ɛ aá vá gúlama ngelegóóh̃u ndaahéingi vɔ́nɛ wú w̃á ɛ́ɣɛ ngí mɔ́ɔ ní lááhei niinái vɔ́nɛ wú w̃á.

¹³ Nuí faá ỹɛ́ni ngóli áá ɣɛ́ í wú mba, kɛ wolílo sí w̃á Hɛ́ɛ́ma Ỹínangi áá ndé Ngala fɛ́li mbélaitii ma!’ ”

Kɔlɔí sí lɔ́ na Ngala fɛ́li mbélaitii faaw̃a tí Leyodésiya

¹⁴ I mɔɔ ɣɛi má, “Keela wói sí vɔ́nɛ malékai sí yéle í Ngala fɛ́li mbélaitii mááh̃u tí Leyodésiya tái h̃u. ‘Sí lɔ́ í ngáá keela wói áá gúla síí w̃ɔ́i yáa taa ɣɛ́ ma Amíína í ngáá tɔ́wɔbaɣa w̃ɔ́i ɛ́ɣɛ tɔɔỹáá héélei lɛ́i maa véle w̃a Ngala ngí ŋani kpɛ́lɛɛ kpátɛngɔ.

¹⁵ Ngí súúwɔlɔ kíya wú ná. Wɔ́i ní hái yeɣé ngáá hɛmbɛ́ wáá vá wɔ́i lókogula su. Ɔ́ɔ́ ɣɛ́ ngáá ndíívo fáá ná wáá ngéɣe ngáá hɛmbɛ́ ɔɔ ná ná láá lé, wú lókogula su.

¹⁶ Kɛ́ sífaa wáá lói kɔwɔ́ yíla nga, nyá lɔ́ɔ vá wú vílima kíya nuu áá laayɛ́ víli!

¹⁷ Wá lɔ́ɔ ndé ngáá wú bátɛngɔɔ lé, wú lííheingɔ. Kɛ́ wáá kɔ́lɔ kíya wú w̃ááw̃aanungɔ. Wú ỹááningɔɔ lé, wú wólengɔ ɛ́ɣɛ wú w̃ááỹaaka.

¹⁸ Faale, nyáá ngáá wú lááhi ngáá wú vá wú góóli wuyangɔ́ yáa má kɛinɔɔ́ wú bátɛ. Wú kula wóle ngíya wú ngíli w̃a kɛinɔɔ́ wú w̃ááỹaaka ɔ́ɔ́ ɣɛ́ lá ɛ́ɣɛ mɔ́ɔ wú salé yáa yááh̃ui hááw̃a kɛinɔɔ́ wááyaa ỹanda lɔ.

¹⁹ Nungáitii kínɛi ndóngɔ ngáá ti ye, tiyá lɔ́ ngáá tí háá ỹɔítii kɛ ngáá ti ye, ngí fáa bá ndá tí w̃a ti ɣɛ́ fááw̃a. Faalɔ, a ní hái yeɣé ngáá hɛmbɛ́, wú vólu yáfe wú háá ỹɔítii mba.

²⁰ A wolílo! Nyá lɔ́ lói pɛlɛ́i la, ngíwaa túba. Ná nuu fíli áá ngóó ỹɛ́ni, í ndááwo, ngáá vá mbu maa w̃ɔ́i yéle, náa láá ni héi ní lááỹɛ ỹanda yílaa.

²¹ Wɛ́i wú ndái áa ndoma, ngáá lúw̃a ma wú héi kpéla ní w̃ásandai h̃u kíya nɔ́ɔ ní ndái í ndóngɔ ma ngí héini ní Kɛ́ɛ́ɣɛ bélaa ngi w̃ásandai h̃u.

²² Nuí fáa ỹɛ́ni ngóli áá ɣɛ́ í wú mba, kɛ wolílo sí w̃á Hɛ́ɛ́ma Ỹínangi áá ndé Ngala fɛ́li mbélaitii ma!’ ”