FAA YÁKƐ KƆ́LƆI 17 - Kɛ́lɛ Niinaí

Kɔlɔsiyá mɔ́ɔ́ walaí

¹ Kɛ malékaa ngɔ́felangɔi páni ngɔ́felangɔi í ɣɛ́i ti yaá ngilángi i vaá, i ɣɛ má, “Vá, ngí fáá bámai ɣɛ́ ngáá í ye áá vá láma kɔlɔsiyá mɔ́ɔ́ walaí sí w̃á, ná wáá ngáá, taa walái ná tongɔ́ njɛ bíh̃i kpih̃ingi béla.

² Ndɔwɔlɔ w̃ása ngwala waláitii tí kɛ́a ngáá ti gɔ́lɔsiya mɔ́ɔ. Ngi gɔ́lɔsiyangi i ngélei sí wuu yélaitii sóunga kíya nɔ́ɔ́ ndɔɔ áá nuu hóu ti wú ngángi í vóte ti hítɛ polú.”

³ Hɛ́ɛ́ma Ỹínangi i vuí sú, malékai í lí ngáá ngé ngaalái h̃u. Ngí nyah̃á yílaa tɔ́i na i héini ngakpa súwa biỹangí sí gɔ́ma ngungí i nga wɔféla, ndowói í mba púu. Tɛɣɛsu lááheingaitii kɔwɔ́ato Ngala mba pɔnɛngɔ́ i ɣɛi lá suwaí sí w̃á hááli hááli.

⁴ Nyah̃ápoi sí w̃ááyilingɔ i ɣɛi lá ngáá kula boolé vóto ngí bíỹangi i su ɛ́ɣɛ kula biỹá, maa vungɔ́ ngáá góóli wɔlingáitii taa kɔtu vandá gúlo gulóaitii táá hólo ɛ́ɣɛ kɔtu wolé pándaitii maa bongóngɔ ngwala. Góóli gɔpungí i ɣɛi ngeyá ndaahéngɔ ngáá ndɔí. Ndɔí ná vá tɔ áá ló ngí yɔ́lɔ háitii fááw̃a ɛ́ɣɛ ngí gɔ́lɔsiyangi.

⁵ Ndaahéi pɔ́nɛngɔ i ɣɛi lá nyah̃ápoi sí lávala, nuu áá ɣɛ́i mbuuwɔlɔ́ ná wáá ngáá, “Babél̃ɔ laa walaí, lɛ́i ngi hái gúlangɔ ngáá nyah̃ái áá ɣɛ́ ngáá kɔlɔsiyá mbélaitii kpɛ́lɛɛ ti njéé lɛ́i í ngáá njɔlɔ háitii kpɛ́lɛɛ ngungi ngélewu.”

⁶ Nyah̃ápoi sí i ɣɛi Ngalangí vóngai ti ỹááw̃ɔi bɔ́lei ɛ́ɣɛ sítii tí tí vááni bɔw̃álale ti ɣɛ́i lái ngáá Jísu. Ti ỹááw̃ɔi i nyah̃ápoi ná hóuni kíya nɔ́ɔ ndɔɔ áá nuu hóu. Ná ngí tɔ́i, i kíndaa vílini ngwala.

⁷ Kɛ malékai i mɔ́ɔnia, i ɣɛ má, “Ndeé le í kíndaa vílingɔ? Nyá ngáá ndɔɔwu h̃u hái sí wúi ɣɛ́ ngáá í ye kɔwɔ́ato nyah̃ápoi wá ɛ́ɣɛ ngakpa súwai sí ngungi í ngá wɔféla ndowo púúngɔi í mbá áá lííla.

⁸ Ngakpa súwai sí yí tɔngɔ́ ndɛɛh̃ú í ɣɛ́ngɔ su, kɛ́ aa mɔɔ ndɛɛh̃ú h̃ú. Aá tɔ́ áá vá gulamá ndówa wálai sí h̃ú kpu ngáá mba, í lí mbéi áá saa w̃ááhɔlɔ na. Nungáitii tí ndɛɛh̃ú h̃ú ngélei sí wu aáva ti laahéingi vɔ́nɛngɔ áá ɣɛ́ngɔ lá kúnafɔ lɛ́ɛ́h̃u gɔlɔí h̃u ngelewu ɔ́ɔ́ ɣɛ́ p̃ɛ́ɛ́ í lɔ́kula héi, aa ɣɛ ngáá kindaa víli fáá wala ti hááw̃a ná taá ngakpa súwai sí lɔ́. Ngakpa súwai sí i ɣɛngɔ ndɛɛh̃ú h̃u, kɛ́ i ɣɛi náa haaní, kɛ́ aá lɔ́ vá vááma vólu.

⁹ Kɛ nuu géle ɣelengɔ í ɣɛ́ lá ngwala ɔ́ɔ́ ɣɛ́a hombó í fái sí wúúwɔlɔ. Ngu ngɔ́felangɔi aá lɔ́ áá ló ngihé ngɔ́felangɔi hááw̃a nyah̃ápoi í héini ma. Tiyá lɔ́ múl̃ɔ táa ló ndɔwɔlɔ w̃ása ngwala wala ngɔ́felangɔi hááw̃a.

¹⁰ Ndɔ́ɔ́lungɔitii ti vílaa ti w̃ásandai ɣɛ́ma tí há. Ngilángi lɔ́ náá í masandái h̃u. Ngapúmaa w̃ɔ́i aa nɛɛ ngí ndá w̃ásandai lɔ́kula héini, kɛ́ ná áá tɔ́kula héi, suu ɛ́i ɣɛ́ gooh̃á.

¹¹ Ngakpa súwai sí ndɛɛh̃ú í ɣɛ́ngɔ su kɛ́ aa mɔɔ ndɛɛh̃ú h̃ú. I ɣɛngɔ́ ngáá masa ngɔ́felangɔi ti tá, kɛ́ aa lɔ́ vá í ɣɛ́ ngáá masangí wahákpa kélei aáva aa li mbéi áá saa w̃ááhɔlɔ na.

¹² Ndowo púúngɔitii yí tí lɔngɔ́, tiyá lɔ́ ti lói ndɔwɔlɔ w̃ása ngwala waláitii fááw̃a kɛ́ taa nɛ́ɛ́ masandái lɔkúla héini. Tiyá lɔ́ vá ngakpá sɔ́lɔma ti ɣɛ́ ngáá ndɔwɔlɔ w̃ása ngwala wala í báha ngakpa súwai sí wá háwa yiláá ndáá lówah̃u.

¹³ Masa púúngɔi sítii ti gi ma hái aa ɣɛ yíla kpé aáva taa tí w̃ásandai ɛ́ɣɛ ti yákpangi hé ngakpa súwai sí yaa.

¹⁴ Ngakpa súwai sí ɛ́ɣɛ ngí w̃ása púúngɔitii, tiyá lɔ́ vá ndapi vɛ́lɛma Mbaalaí wá. Kɛ́ Mbaalaí taa polú yélaitii tiyá lɔ́ɔ hómbo ngakpa súwai sí w̃a ɛ́ɣɛ polú yélaitii. Mbaalaí sí lɔ́ ngáá Ndemɔí nde mbélaitii kpɛ́lɛɛ fááw̃a ɛ́ɣɛ masa ngwálai masangáitii kpɛ́lɛɛ fááw̃a aáva polú yélaitii mbaa ngáá sítii Ngala ngí ti lolíngɔ, í lókolo tí wa aáva ti lɔwɔbáɣangɔ ngeyá.”

¹⁵ Kɛ malékai i mɔɔ ɣɛa má, “Njɛi sítii yí tí lɔ́ngɔ kɔlɔsiyá mɔ́ɔ́ walaí sí í héini ti ya tiyá lɔ́ tí lói nuu bɔ́ngitii fááw̃a híí kpɛ́lɛɛ sú ti gúlangɔ ndɔwɔlɔ́itii kpɛ́lɛɛ sú, taa ti laa woítii ndé.

¹⁶ Ndowó púúngɔitii yí tɔ́ngɔ ɛ́ɣɛ ngakpa súwai tiyá lɔ́ɔ vá hilíma ngáá kɔlɔsiyá mɔ́ɔ́ walaí sí, ti ngeyá ỹááka kpɛ́lɛɛ kúla ngeyá, tí maaỹaaká ló. Tiyá lɔ́ɔ nduwú yói ỹɛ ma ti mɔ́ɔ́ mɔ́ ngɔmbuí ya.

¹⁷ Ngala ngí kɛngɔ́ ngáá háwu masa púúngɔi nátii ti gi mái í ɣɛ́ yílaa sí Ngala ndóngɔ í ɣɛ́ tí kɛ. Ná wáá ngáá, tí woo í ɣɛ́ su yílaa, tí tí yákpangi hé ngakpa súwai sí yaá ngáá í másandai ɣɛ í ló sú kpóloo Ngalá ndáá woí í hítɛnga.

¹⁸ Nyah̃ápoi sí yí tɔ́ngɔ áa lɔ́ í lói taa walaí sí hááw̃a ngáá ndɔwɔlɔ́ w̃ása ngwala í ndɔwɔlɔ w̃ása ngwala waláitii kpɛ́lɛɛ mááh̃u ngeleí sí wu.”