FAA YÁKƐ KƆ́LƆI 15 - Kɛ́lɛ Niinaí

Malékaitii Ngalángi háá bama ngɔ́felangɔ í ɣɛ́i ti yaá

¹ Kɛ ngí mɔ́ɔ káámaa haa wala lɔ́a ngeleí ya. Ngí maléka ngɔ́felangɔ lɔ́i ngapúmaa haa bama ngɔ́felangɔi Ngalá ngáá vá ndáma i ti yaa. Ná vá tɔ í ngáá Ngalangí lííyaw̃al̃ai yápumai.

² Kɛ ngí ŋáni lɔ́a kulangɔ́ ngáá yívo kpatɛngɔ́ ngáá mɛl̃ɛ mɛl̃ɛí supungɔ́ ngáá ngɔmbuí. Nungáitii ti ɣɛ́i lóóni yívoi sí béla mbakaí Ngala ngí féni ti yaa, í tí yaá. Nungái nátii tɔ ti hómboi hésendaa yakpa suwaí sí w̃á ɛ́ɣɛ kɔɔ kɔɔ́ ŋáni tí kpátɛi kulangɔ́ la aáva taa tokovongí yéɣeni í ngáá nɔ́mbai áá ló ndaahéingi hááw̃a.

³ Ti ɣɛ́i taa nguleí sí hɔ́ɔ́lɛ sí Ngalangí yénge mɔí Muusé ɛ́ɣɛ Mbaalaí tɔ́ɔ́ sɔɔlɛ́, táa ɣɛ́ ta, “Yɛ́i yí ngáá Ndemɔí Ngakpa Ngála Ngwalaí, í gɛ́ɛ́ háitii tɔ ngáá faa wála wála ɛ́ɣɛ kááma haa. Yá lɔ́ yí ngáá masa ngwálai ngeleí sí wuu yélaitii kpɛ́lɛɛ mááh̃u. Í lúva veléitii ɛ́ɣɛ í háitii yáá kɛ, tiyá lɔ́ pele w̃a, ti ngáá tɔɔỹaá.

⁴ Yɛ́i yí ngáá Ndemɔí, ele lɔ ɛ́i wúfe í w̃a? Ele lɔ ɛ́i kɛ ɔ́ɔ́ í lɛ́? Í yílaa kpé tɔ́ faa ỹɔ́u áá í h̃ú. Ngeleí sí wuu yélaitii kpɛ́lɛɛ tiyá lɔ́ɔ vá í gákala ti í hɛ́li bɔw̃álale í lélembongi ya ngí ɣɛa ngáá ti ye.”

⁵ Ná sí í gúlai su, ngí mɔ́ɔ Hɛ́ɛ́ma Yála Pɛ́lɛi lɔ́i ngelegóóh̃u ndaa í wó Kula Ỹɛpɛ́l̃ɛngi i mbu mbéi Ngalangí áá ɣɛ na.

⁶ Kɛ maléka ngɔ́felangɔi faa báma ngɔ́felangɔi í ɣɛ́i ti yaa, ti gúlaa Hɛ́ɛ́ma Yála Pɛ́lɛi ná wú. Ti w̃ááyilingɔ ngáá kula tá áá hólo kólengɔ fó fó kíya nɔ́ɔ́ hɛ́mgbɛ í ná. Góóli bɛtii yílingɔ ti gilí su.

⁷ Kɛ fulú wɔ́li nááningɔi ti tá yílaa i góóli vani ngɔ́felangɔitii feá maléka ngɔ́felangɔitii ngeyá. Ti laahéngɔ i ɣɛi lá ngáá Ngalángi lííyaw̃al̃ai, Ngala lɛ́i í ná kúnafɔ taa ngí ndá gúnafɔ.

⁸ Hɛ́ɛ́ma Yála Pɛ́lɛi ná wu laa í héni ngáá nduulií í gúlani Ngalangí múw̃a muw̃angi ɛ́ɣɛ ngi yákpangi h̃u aáva nuu fíli ɛ́i belé lí Hɛ́ɛ́ma Yála Pɛ́lɛi ná wu í ló sú kpóloo faa báma ngɔ́felangɔitii ti ɣɛ́i maléka ngɔ́felangɔitii ngeyá ti fólo kɛɛlɛ́ma.