FAA YÁKƐ KƆ́LƆI 13 - Kɛ́lɛ Niinaí

Ngakpa súwa wala félengɔi

¹ Kɛ ngí ngákpa súwa wala yilá tɔ́a áa gúla yívoi wú. Ngungí i ngá wɔféla, ndowói i ngu mbá púu. Masa mbɔ́ɔ́lɔi i ndowó púúngɔi nátii ma ngáá ngiláá ngílaa p̃ɛ́ɛ́. Tɛɣɛsu lááheingaitii kɔwɔ́ato Ngalá mbá, pɔnɛngɔ́ ngungí nátii ma ngáá ngiláá ngílaa.

² Ngakpá súwai sí ngí tɔ́ni, kulangɔ́ i ɣɛi lá ngáá kɔlíi. Kɔwɔ́i gúlangɔ ngáá ngakpá súwai sí táa tolí ngáá bíyai. Ndaí gúlangɔ ngáá kíya njalai lai í na. Ngakpa súwai sí i ngakpá ɛ́ɣɛ masandáá w̃ááhɔlɔni kaali wálai sí yáa.

³ Ỹanda wála héingɔ i ɣɛi lá ngakpa súwai sí wú ngiláángi wa ngáá ɔ́ɔ́ ɣɛ́ pááni kɛ́ i ɣɛi náá béni. Ná i kɛi nungáitii kpɛ́lɛɛ tí ngélei sí wú ti ɣɛ́i wu nga wúúlee ngwala aáva tí hítɛ súwai sí vólu.

⁴ Nungáitii ti ɣɛi náa táa kaalii hɛ́li ngáá tí yála bɔw̃álale i ngakpa ngwála héni ngakpa súwai sí yáá. Ti ɣɛ́i mɔ́ɔ taa ngakpa súwai sí hɛ́li, tíwaa ɣɛ́ ta, “Nuu fíli aa na kulangɔ́ ɔ́ɔ́ ɣɛ́ lá ngáá ngakpa súwai sí. Nuu fíli aa na ɔ́ɔ́ hómbo ɔ́ɔ́ lápi lá.”

⁵ Ngalú púú nááningɔ maah̃úú félengɔ laa lówah̃u, tí béni ngakpa súwai sí wá ngáá sí fíli í ngáá yonga ngoo ɔɔ tɛɣɛsu woo ɔ́ɔ́ ɣɛ́ í ndé Ngalá ma ɔ́ɔ́ ndé aáva ngakpángi i ɣɛi ngeyá ngáá í masandáá ɣɛ́ kuí sí láá lówah̃u.

⁶ I pɛlɛí náa Ngala ndáahei nyááni má, áá ngɛɛli ngóó le Ngalá má ɛ́ɣɛ mbéi Ngalá ngí na taa naa yélaitii.

⁷ Ngakpa ngí ɣɛ́i súwai sí yáá táingi sí laa lówah̃u ngáá í lápi ngáá Ngalá ngí vóngaitii í hómbo tí w̃a. Ngakpa ngí ɣɛi ngeyá mɔ́ɔ híítii maah̃u tiyɛ́i taá híí woítii nde bɛ́kpɛ tí gúlangɔ paatiitíí su tí ndɔ́wɔlɔ kpɛ́lɛɛ sú.

⁸ Nungáitii kpɛ́lɛɛ tí ngélei sí wú tiyá lɔ́ɔ vá súwai sí hɛ́lima kɛ léi sítii ti laahéingi vɔ́nɛngɔ kúnafɔ lɛ́ɛ́h̃u gɔlɔí h̃u p̃ɛ́ɛ́ Ngalá ngɔ́ɔ́ ɣɛ́a ngelewuí sí bátɛ. Ná wáá ngáá, kɔlɔí sí í Mbáálai sí hááw̃a tí pááni wɔ́lɔ.

⁹ “Nuí fíli faa ỹɛ́ni ngóli áá ɣɛ́ ngú mba, í fái sí yéɣe ngáá hɛmbɛ́ fíli.

¹⁰ Nuí fíli kpatɛngɔ́ ndaaw̃á ngáá tí sóu, kɛ tí sóu. Nuí fíli pá kpatɛngɔ́ ndaaw̃á ngáá kɛ í ló mbowá hɔ́kpɔ yá, kɛ í ló nga. Ngoí sí lɔ́ ná ngáá í kɛ ngáá háwu Ngalángi vóngaitii ndiilɔ́lɔngɔ í ɣɛ́ lá, ti lɔwɔbáɣangɔ í ɣɛ́ lá Ngála ngéya.”

¹¹ Kɛ ngí mɔ́ɔ ngakpa súwai hele kélei lɔ́nga í gúla ndɔwɔlɔ́i wu. Ndowói i ngu mba féle kíya nɔ́ɔ mbaala lowó í na. Kɛ́ ngoi i ɣɛi gulaní nɔ́ɔ ngáá kaalii woó.

¹² I hésendaa huwa walaí sí yákpangi kpɛ́lɛɛ ngákɛni ná yááh̃u w̃a. I kpáni ngélei sí wú yélaitii kpɛ́lɛɛ má ngáá kule ngáá ti hésendaa yakpa súwai sí hɛ́li pala walaí í ɣɛ́i ngungi wa kɛ́ kpengɔ́ í ɣɛ́i náá lá.

¹³ Ngakpa súwai hele kélei sí i káámaa haa walaní kɛ́ni. I kɛ́ni ngáá háwu ngɔmbu í gúla ngeleí yá áá vú ndɔwɔlɔ́i wa nuu kpɛ́lɛɛ ngááh̃u w̃a.

¹⁴ I nungáitii kpɛ́lɛɛ ngákpolowani ngélei sí wú ngáá káámaa háitii Ngala ngí béni mba í ɣɛ́i áá tí ɣɛ́ hésendaa yakpa súwai yááh̃u w̃a. Ngakpa súwai hele kélei sí i ndéni náa nungáitii kpɛ́lɛɛ má ngáá tí kɔ́ɔ́ kɔɔ ŋáni bátɛ kulangɔ́ ngáá hésendaa huwaí sí ɣɛ́ kíli ngi wúfemai hááw̃a lɛ́i mbowa hɔ́kpɔi í ɣɛ́i ỹanda héini mba kɛ́ aa mɔ́ɔ ɣɛi haaní.

¹⁵ Ngala ngí béni ngakpa súwai hele kélei sí wá ngáá í ndɛɛh̃u vú kɔɔ kɔ́ɔ́ ŋáni sí h̃u tí kpátɛi kulangɔ́ ngáá hésendaa yakpa súwai kɛinɔɔ́ i hómbo í bɔ́ɔ́lɔ ɛ́ɣɛ í sítii páa tɛ́i ɣɛ́ kɛ́i tɔ́ɔ fɛli ngáá ti yála.

¹⁶ Ngakpa súwai hele kélei sí í kpáni nungáitii kpɛ́lɛɛ ma ngáá kule ngáá sítii taá ngáá ndaahéi mbá yélaa ɛ́ɣɛ sítii ti ngáá ndaahéi mbá yélaa, kpatɛ yélaa, nyaani yélaa, nduwɔá ɛ́ɣɛ nuí áá ngáá nduwɔ, ngáá í lókovondo ti yísa lokói h̃u ɔɔ ti lavála.

¹⁷ Nuu fíli ɛi belé ŋani yaá kɛlaa maa ɔ́ɔ́ ŋani w̃ááhiya ná ngakpa súwai sí lókovongi ɛ́i belé ɣɛ́ tóko w̃a ɔɔ tavála. Tokovongí ná lɔ́ í ngáá ngakpa súwai sí laahéingi ɔɔ í ngáá nɔ́mbai lɛ́i áá ló ndaahéingi hááw̃a.

¹⁸ Kɛ nuu géle ɣelengɔ í ɣɛ́ lá ngwala ɔ́ɔ́ ɣɛ́a hombó í nɔ́mbai sí yátɔ mba ɛ́ɣɛ í ɣɛ́ mbúúwɔlɔ bɔw̃álale nɔ́mbai sí lɔ́ na nuu lááhei fááw̃a. Maa nɔ́mbai wáá ngáá hɔ́ndɔ ngɔ́hitangɔ puu ngɔ́hitangɔ maah̃úú wɔhíta (666).