FAA YÁKƐ KƆ́LƆI 12 - Kɛ́lɛ Niinaí

Nyah̃ápoi ɛ́ɣɛ kaalii

¹ Kɛ káámaa haa wala i ɣɛ́a ngeleí yá. Nyah̃ápoi i ɣɛi ngeleí yá, folói i ma ngáá kulaí, ngálungi i kɔwɔ́i wu. Masa mbɔ́ɔ́lɔi i ngu mba ngáá kpahái temúleɣaitii ti vɛ́lɛi mba púú maah̃úú féle.

² Nyah̃ápoi sí goí i ɣɛi náá hitií. Maa góó h̃u baalɛ wɔlɔí lɔ́ í ɣɛ́i náá áá mbó.

³ Kɛ káámaa haa veka i mɔɔ ɣɛa ngeleí yá. Kaali bíỹa ngwála i ɣɛi ngeleí yá. Ngungí i ɣɛi nga wɔféla, ndowói i ngú mba púu. Masa mbɔ́ɔ́lɔi i ɣɛi ngungí nátii kpɛ́lɛɛ má ngáá ngilá ngíla.

⁴ Temúleɣaitii kínɛi ti ngélei yá, ná tɔ́ɔ wɔ́lɛ sú sáwa ɔ́ɔ́ seiw̃aá yílaangi ná kpɛ́lɛɛ kpó kpói ngáá wóngi í pú ngélewu. Kaalíi sí i ɣɛi lóóni nyah̃ápoi sí gakála ngáá í ngí lói ỹɛ́ ná nɔ́ɔ́ léi ɔ́ɔ́ ndoí le.

⁵ Kɛ nyah̃ápoi sí i siỹɛ́ndou loí lénga sí áa vá ɣɛ́ma ngáá masa ngwálai ndɔwɔlɔ́itii kpɛ́lɛɛ mááh̃u aáva aa bandí bándi héi ti w̃a ngí w̃ásandai h̃u. Ná í ndoí lení, Ngala ngí kɛ́ni ngáá háwu ndoulálai sí í lɛ́ ngelegóóh̃u Ngalangí w̃ása kpɔkpɔngí gakála.

⁶ Nyah̃ápoi sí í w̃aavelái, í lí ngaalaí h̃u mbéi Ngala ngí náá bátɛi mbɛ ngáá í ló ná. Naa lɔ í loí ná Ngalá ngáá mááh̃u belé foló tásu ngíla hɔ́ndɔ félengɔ púu ngɔ́hitangɔ (1,260) hááw̃a.

⁷ Kɛ ngutuwɔ́ w̃álekai sí taa ɣɛ́ ma Maikɔ, taa ngí w̃álekaitii tí kɔ́ɔ́ vɛ́lɛa kaalii sí wá, kɛ laá bɛ́lɛ nɔ́ taa ngí w̃álekaitii tí ndáá hóunga.

⁸ Kɛ́ kɔí i kaaliini ngaa ngí w̃álekaitii kúlani. Náá hááw̃a, taa mɔ́ɔ loi ngelegóóh̃u.

⁹ Kaali wálai sí, ná wáá ngáá wɔ́lɔ wɔlɔma gáálii sí lɛ́i taa mɔ́ɔ ɣɛ́ ma Ngutuwɔ́ Ỹína Nyɔí ɔɔ Setána, lɛ́i íwaa nungáitii kpɛ́lɛɛ ngákpolowa ngélei sí wu sí h̃ui, aá p̃ɛ́ɛ́ ɛ́ɣɛ ngí w̃álekaitii kpɛ́lɛɛ, tí tí gúlani ngelegóóh̃u wá tí tí yéi mbéi ngélei sí wu.

¹⁰ Kɛ ngí ngóó wála ỹɛ́ninga áa gúla ngelegóóh̃u, ngoí ná i ɣɛi ngáá sí, “Ngala ngí vóngaitii ngúmaawonga. I ngí lɔ́wɔlɔ w̃asandaí yákpangi yakɛ́nga. Ná vólu, ngí Lókolo Mbá W̃ɔ́i bɛ́lɛ i ngí yákpangi yakɛ́nga, bɔw̃álale, maah̃abéhe mɔí sí lɔ́ nɔ́ɔ í ɣɛ́ngɔ loí Ngalá kakála áa mu mbála Yála fɛ́li mbélaitii maah̃abéhe kpindí p̃ɛ́ɛ́ fólo p̃ɛ́ɛ́, tí kúlanga ngelegóóh̃u wa, tí njéi ngélei sí wu.

¹¹ Mu mbála Yála fɛ́li mbélai tí hómboi Ngutuwɔ́ Ỹína Nyɔí w̃á saáɣa hái w̃áá véle w̃a Jísu í mbóni tí haáw̃a ɛ́ɣɛ mɔ́ɔ tɔɔỹáá gééla woí tí ɣɛ́i taa ndé. Tí lɛɛh̃úi w̃áá lii áá vílii tí lii vólu ngáá náa hááw̃a tɔɔ́ w̃áávela sái wá.

¹² Faale, wɛ́i kínɛi wú ngelegóóh̃u, a gooh̃unɛ́ɛ́. Kɛ́ suu wála lɔ́ɔ vá ɣɛmá ỹɔ́u wú w̃á ngwála wɛ́i wú mbéi ngélei sí wú ɛ́ɣɛ njɛ́ wú, bɔw̃álale, Ngutuwɔ́ Ỹína Nyɔí i yeingá wú w̃a. I kɔ́lɔ ngáá kɛ ngi gúi h̃úu áá mɔ́ɔ gooh̃á, náá hááw̃a, ndiiyáw̃al̃angɔɔ lé ngwála.”

¹³ Ná kaalii í ngátɔi ngáá kɛ tí kpɛ́a ngelegóóh̃u tí njéi ngélewu, i toí náa nyah̃ápoi sí wá í ɣɛ́i siỹɛndóu loí léni ngáá í sóu.

¹⁴ Kɛ́ tí kóɣɛ govó ngwála wala félengɔ héni nyah̃ápoi yáá ngáá í góvo la í lí ngaalaí h̃ú, mbéi Ngala ngí náá bátɛni mbɛ ngáá í ló ná fowó sáángɔ ɛ́ɣɛ síkpɛ fááw̃a, Ngalá ngááyaa maah̃ú béle. Aáva kaalii sí ɛi foló ma.

¹⁵ Kaalii sí i njei yɛ́ wála gúlai lá í tó nyah̃ápoi wá ngáá ná í ló mbu.

¹⁶ Kɛ́ ndɔwɔlɔ́i i kpɔ́mba héni nyah̃ápoi sí yɛ́ ngáá í lááwoni, njɛí ná kpɛ́lɛɛ í gúlai kaalii la, í yéi su.

¹⁷ Kaalii liiyáw̃al̃angɔ i ɣɛi náá lá nyah̃ápoi w̃á ngwala, náá hááw̃a, i hiɣeí naá nyah̃ápoi vólu ngáá í lí í lápi ngáá ngí léngaitii taa ngí láála lengáitii, ná wáá ngáá, sítii táa híya ngáá Ngalá saváitii ɛ́ɣɛ ti langɔ ngáá tɔɔỹaá gálambongi Jísu í mbóni.

¹⁸ Kaalii i lii naá í ló yívoi lá nyɛɛbasángi w̃a.