FAA YÁKƐ KƆ́LƆI 10 - Kɛ́lɛ Niinaí

Malékaini ngaa kɔlɔ w̃ááɣalangɔ gúloi

¹ Ná ná í gúlani su, ngí mɔ́ɔ ngakpa máleka wala lɔní íwaa gúla ngelegóóh̃u. Njɛ bilíí i ɣɛi malékai sí w̃á kíya kula áá ɣɛ́ nuu w̃a. Ngungí w̃ááyele mbélengɔ ngáá ngele gílangi. Ngaah̃úi i ɣɛi áá hólo í ɣɛ́ foló yákpangɔ hólo, kɔwɔ́i w̃aa í ɣɛ́i áá hólo míl̃a mil̃a kíya nɔ́ɔ ngɔmbu gɛhɛ́ wála.

² Kɔlɔ w̃áaɣalangɔ gúlo í ɣɛ́i malékai ná yaá ndaawóngɔ. I yísa h̃uu véle gɔwɔí loní yívoi liiwáá, í pékai ló kaséngi ya.

³ Kɛ i tolíngi wónga wóo wála h̃ú kíya nɔ́ɔ kpéi njála ááyaa híkɔ. Ná í tólingi wóni, ngele bandɛ́ ngɔ́felangɔ i tolí ngói yapóteni woo wála h̃u.

⁴ Ná léi tí bɔ́ɔ́lɔni, ngí ɣɛ́i loí ngí sítii pɔnɛ tí ndéni kɛ́ ngí ngói ỹɛ́nini í gúla ngelegóóh̃u, i ɣɛ ma, “Faí sítii ngele bandɛ́ ngɔ́felangɔitii tí ndéngɔ kɛ ngáá ndɔɔwu h̃u haa, yálaa ti vɔ́nɛ!”

⁵ Kɛ malékai sí ngí tɔ́ni kɔwɔ́ yílangi i lói yívoi liiwáá, pekái í lói kaséngi ya, i yísa lokói lɛ́a ngélei ya.

⁶ Í kɛ́lɛ ngeɣé Ngalángi sí laahéingi h̃ú í ndɛ́ɛ́h̃u h̃ú kúnafɔ taá ngí ndá gúnafɔ, lɛ́i í ngélewu bátɛngɔ, í yívoi bátɛ ɛ́ɣɛ sítii kpɛ́lɛɛ tí na. Kɛ maa w̃álekai i ɣɛa ta, “Maa lamál̃a péka fíli ɛi mɔɔ ɣɛ su,

⁷ ná malékai wɔ́fela kélei áá ngí ndá búlui hɛ́. Sí Ngala ngí súúbatɛngɔ ndɔɔwu h̃u, áá sítɛ náá nga, kíya í ndéni ngi yénge mbeláitii ma, ná wáá ngáá, ndaa háá lé mbélaitii.”

⁸ Kɛ ngoí sí ngí mɛ́nini hése íwaa gúla ngelegóóh̃u, ngí mɔ́ɔ́ mɛningá áá ɣɛ ta, “Lí malékai sí yéle í lói yívoi liiwáá ɛ́ɣɛ kaséngi ya, yí kɔ́lɔ w̃ááɣalangɔi hóu ngeya ndaawóngɔ.”

⁹ Ngí lííni maa w̃álekai yéle ngí ndéma ngáá í máa gɔ́lɔ guloí hé ngéya. Kɛ aá vá i ɣɛa má, “Sou, yí mɛ́. Ná yáá ɣɛ́ yáá mɛ, mbéélengɔ lɔ́ɔ ɣɛ́ lá í ɣɛ́ kɔiŋ ngúlɔ. Kɛ́ ná yáá mbúú bɔ́le, tabangɔ́ lɔ́ɔ ɣɛ́ lá í góó ya.”

¹⁰ Kɛ ngí kɔ́lɔ gulói ná hóunga ngeyá ngí mɛ́, mbeelengɔ́ i ɣɛi la ndá í ɣɛ́ kɔiŋ ngúlɔ. Kɛ́ ná ngí mbúú bɔ́leni, tabangɔ́ i ɣɛi lá kóó ya.

¹¹ Kɛ ti mɔ́ɔ ɣɛa má, “Lí, yí Ngála ndáa háá lé múl̃ɔ ndɔwɔlɔ w̃ása ngwala waláitii ma ndɔwɔlɔ kpɛ́lɛɛ su, ti híítii ma ɛ́ɣɛ ti laawóitii su.”