NJƆÚ 9 - Kɛ́lɛ Niinaí

Jísu i siỹɛndópoi walóni tí ndeí mbolengɔ́

¹ Ná Jísu i ɣɛi áá lɔ́ve kpóloo, i siỹɛndópo yiláa tɔ́i mbolengɔ́. Tí siỹɛndópoi ná léi nɔɔ́ wɔ́lɔ mbolengɔ́.

² Kɛ Jísu volú yélai tí mɔ́ɔ́ninga, ti ɣɛ́ ma, “Kaamɔ́ɔ́, ele háá ỹɔ́u lɔ náa pongí vúngɔ siỹɛndópoi sí w̃a ngáá tí ndengɔ́ nɔɔ́ mbolengɔ́? Baa ngi kɛ́ɛ́ɣɛni ngaa ngí njéé le ɔɔ kpɔwɔ́ bɔ́wɔ haa ỹɔu lɔ í kɛ́ngɔ tí ndéngɔ nɔɔ́ mbolengɔ́?”

³ Jísu i ti woo yápoteni, i ɣɛ ti w̃a, “Siỹɛndópoi sí háá ỹɔu laa le kɛlaa ngi kɛ́ɛ́ɣɛ ɔɔ ngi njéé ti háá ỹɔ́u ɔ́ɔ́ ɣɛ́ la ɔ́ɔ́ kɛ tí ndéngɔ mbolengɔ́. Kɛ́ aá ɣéle, sí í ɣɛ́ngɔ kɛinɔɔ́ Ngalángi yénge tokoí yaah̃ú í ɣɛ́ laá ngi lɛ́ɛ́h̃ui h̃u.

⁴ Ná nɛ́nɛ í ngáá folói nuí í tɔ́vengɔ, kɛ a mú ngi yéngengi wo. Sífaa kpindíí lɔɔ vá vɛlɛmá ngáá nuu fíli ɛi mɔɔ hombó ɔ́ɔ́ fáá ɣɛ.

⁵ Aáva ná nɛ́nɛ nyá lɔ ngelewu, nyá lɔ́ ngí ngáá lámbongi ngelewu.”

⁶ Ná naá Jísu í sí leí, kɛ i laa yɛ́i vungá ndɔwɔlɔ́i wa, í pɔlɔí yɔ́mbɔ la, í siya siỹɛndópoi ná yaah̃úi w̃a.

⁷ I ɣɛ ma, “Lí yí yaah̃ú wúya kpólingi sí h̃u taa tolí ngáá Sáilow̃ɔ.” Maa lááheingi volúi waa ngáá Tɔ́vengɔi. Kɛ maa h̃íỹɛndopoi i lía njɛí ná h̃u, í yaah̃ú wúya. I yangáimai naá ngi vɛ́lɛ la íwaa ỹandá lɔ́.

⁸ Kɛ ngi góvii h̃úú yelái ɛ́ɣɛ nungáá vékai sítii tɔ́ɔ́ tɔ áá fɛli mbó maanɛɛnɛ́ su, tí ɣɛ́a ta, “Kɛ́mbɛ siỹɛndópoi sí lɔ ɔ́ɔ́ ɣɛ́ héini íwaa nungáá hɛli maanɛɛnɛ́ su?”

⁹ Faalɔ, ti lɛ́ingaa ti ɣɛ́i ta, “Maa h̃íỹɛndopoi lɔ.” Ti lɛ́ingaa vá ti ɣɛ́ ta, “Laá láa le, kɛ́ kulangɔ́ɔ́ lé nɔ́ɔ la.” Kɛ́ maa h̃íỹɛndopoi gíte i maa hái bákpai kɛ́ŋɛ, i ɣɛ ta, “Nyá kái kái té.”

¹⁰ Kɛ tí ɣɛ́a ma, “Ndeé lɔ náa i kɛ́a hɔ́ɔ yíwaa ỹánda lɔ́?”

¹¹ I ti woo yápoteni, i ɣɛ ti w̃a, “Siỹɛndópoi sí taá tolí ngáá Jísu, laá lɔ́ í pɔlɔ́i yɔ́mbɔngɔ, í siya ngááh̃ui w̃a, í nde má ngáá ngí lí Sáilow̃ɔ yɛí h̃u ngí yaah̃ú wúya na. Kɛ ngí lía ngí yaah̃ú wúya na aáva ngí pɛ́lɛ ỹánda lɔ́ma.”

¹² Ti mɔ́ɔ́ mɔɔní, ti ɣɛ́ ma, “Míl̃inda lɔ hɔ́ɔ́ maa h̃íỹɛndopoi ná í na?” I ɣɛ ti w̃a, “Ngáá kɔlɔ́ mbéinda í na.”

Falósiai tí siỹɛndópoi waló fái h̃uuw̃ɔ́ɔ́nini

¹³ Kɛ tí liingá ngáá maa h̃íỹɛndopoi ná mbolengɔ́ í ɣɛ́i ɣɛi la Júsuai sítii ngelé taa ɣɛ́ ti w̃a Falósiaitii.

¹⁴ Aáva folói ná Jísu i pɔlɔ́i yɔmbɔ́i í siya siỹɛndópoi yaah̃ú, ná yaah̃úi í híɣei ma, maa hóloi i ɣɛi ngáá Júsuai ti Lɛ́ɛ́lɛmbo Ngála Fɛli Fóloi w̃a.

¹⁵ Faalɔ, Falósiaitii tí maa h̃íỹɛndopoi w̃ɔ́ɔ́ni múl̃ɔ ngáá i ɣele kɛ́a íwaa ỹánda lɔ. Maa h̃íỹɛndopoi va i ɣɛi ti w̃a, “Jísu i pɔlɔ́i yɔmbɔ́i í síya ngááh̃u, ngí li ngí yaah̃ú wúya, ngí pɛ́lɛ náá ỹánda lɔmá.”

¹⁶ Falósiaitii tí lɛ́ingaa ti ɣɛ́i náá taa ɣɛ́ ta, “Siỹɛndópoi sí aa gulangɔ́ Ngalá ngelé, sífaa aa Ndɛɛlɛmbó Ngála Fɛli Folo hávai yeɣéma.” Kɛ́ ti lɛ́ingaa ti ɣɛ́i taa ɣɛ́ ta, “Nuu áá ɣéle ɣɛ́ náá ngáá faa ỹɔ́u w̃ɔ́ɔ́ wala aáva í hómbo íwaa káámaa haa wala walaí sítii kɛ?” Faalɔ, faŋaí lowah̃u kɔ́lɛngɔ i ɣɛi lá, ti woo yáfaha fáhangɔ ma.

¹⁷ Ngapúmai náa kɛ Falósiai ti mɔ́ɔ́ vótenga siỹɛndópoi wa Jísu í ɣɛ́i náá ngaah̃úi híɣei ma, tí mɔɔní, ti ɣɛ́ ma, “Ndeé lɔ́ í í gí ma ngáá yí ndé kɔwɔ́ato Jísu wa, sífaa yá lɔ í í yááh̃ui híɣengɔ ma?” Ná í ti woo yápoteni, i ɣɛ ta, “Aá lɔ́ ngáá Ngalá ndaa háá lé mɔ́ɔ́.”

¹⁸ Ná fíli su, Júsuai ti wútuwɔaitii taá ɣɛi loí nɛ́nɛ kpɛ́ tɔɔ lá lá ngáá siỹɛndópoi sí wólengɔ i ɣɛi la Jísu í ɣɛ́i náá mbalóni. Faalɔ, tí keelá lɔ́vei maa h̃íỹɛndopoi njéé ɛ́ɣɛ ngi kɛ́ɛ́ɣɛ vomá.

¹⁹ Ná nátii ti vái, kɛ tí tí w̃ɔ́ɔ́ninga, ti ɣɛ́ ti w̃a, “Wú lói lɔ ngáá sí? Aa ɣɛ́ ti ɣɛ́ wu ndéi mbolengɔ́? I ɣelé kɛ́a náá áá ỹánda lɔ?”

²⁰ Nátii ti ngapótei, ti ɣɛ́ ta, “Ní kɔ́lɔ ngáá ní lói le aáva ní kɔlɔ́ ngáá ní ndeí mbolengɔ́.

²¹ Kɛ́ sí í kɛ́a náa íwaa ỹandá lɔ ɔɔ nuí va í ngaah̃úi híɣengɔ ma, naá kɔlɔ́. Kɛ́ laá gítei aá lɔ́ ngáá siỹɛ kpákolo bɔwɔ́ hááw̃a, faalɔ, a mɔ́ɔ́ni, í yɛ́pɛ bɔwɔ́ haaw̃á.”

²² Tí ngapótei h̃íí bɔw̃álale ti ɣɛ́i taa lúwa Júsuai ti wútuwɔaitii mba, sífaa nátii ti ɣɛ́i náá faa h̃uubatɛ́ mbói ngáá nuí fíli ɔ́ɔ́ lokohéi mbu ngáá Jísu lɔ í ngáá Ngalángi Lókolo Mbá W̃ɔ́i, tɔ́ɔ́ maa w̃ɔ́i betéve Ngala fɛli máákpɔ wotaí wuu wa.

²³ Ná lɔ i kɛní maa h̃íỹɛndopoi njééni ngaa ngi kɛ́ɛ́ɣɛ ti ɣɛ́i ngutuwɔ́aitii ma, “Aá lɔ náá ngáá kpakolo bɔwɔ́ hááw̃a, faalɔ, a mɔɔní.”

²⁴ Kɛ tí mɔ́ɔ́ siỹɛndópoi lolínga mbolengɔ́ í ɣɛ́i la Jísu í ɣɛ́i mbalóni, ti ɣɛ́ ma, “Véle Ngalá kákala ngáá yá lɔɔ́ tɔɔỹaá wóó le faí sí h̃u, sífaa ní kɔ́lɔ nɔ́ɔ ngáá siỹɛndópoi í ngáá Jísu, aa lɔ ngáá faa ỹɔ́u w̃ɔ́ɔ.”

²⁵ I ti woo yápotei, i ɣɛ ti w̃a, “Baa aa lɔ ngáá faa ỹɔú w̃ɔ́ɔ́, baa aa ngáá faa ỹɔ́u w̃ɔ́ɔ, ngáá kɔlɔ́. Faa yílaa tɔ ngí kɔ́lɔ aá vá mbaa ngáá mbólengɔ i ɣɛngɔ lá, kɛ́ nyá lɔɔ́ ỹandá lɔ náa.”

²⁶ Ti mɔ́ɔ́ mɔɔní, ti ɣɛ́ ma, “I ɣéle kɛ́ngɔ ngáá í ye? I ɣéle kɛ́ngɔ í í yááh̃ui híɣengɔ ma?”

²⁷ Kɛ maa h̃íỹɛndopoi i mɔɔ ti woo yápotenga, i ɣɛ ta, “Ngí ndengá wú w̃a yíla wáá wolíɣɛngɔ ma. Ndeé lɔ́ múl̃ɔ wú lóngɔ wú mɛni? Baa wá bɛ́lɛ wú lóngɔɔ le wú ɣɛ́ ngáá polú yelái ti tá?”

²⁸ Kɛ tí ngɛɛliá, ti ɣɛ́ ma, “Yá lɔ yí ngáá siỹɛndópoi ná volú w̃ɔɔ, kɛ́ niyá láa, niyá lɔ ngáá Ngalá mɔ́i Muusé vólu yélaa!

²⁹ Ní kɔ́lɔ ngáá Ngalá ngí yɛpɛí Muusé yéle kɛ́ siỹɛndópoi sí laá taá tolí ngáá Jísu, naá kɔlɔ́ mbéi í gúlangɔ na!”

³⁰ Siỹɛndópoi i ti woo yápotei, i ɣɛ ti w̃a, “Kɛ́ káámaa haa wul̃á ngáá na hɔ́ɔ́, bɔw̃álale wáá kɔlɔ́ mbéi í gúlangɔ na, kɛ́ ná fíli su, i ngááh̃u híɣengɔ nɔɔ́ ma.

³¹ A mú kɔ́lɔ ngáá Ngalá ngɛ́i wolílo faa ỹɔ́u yélaa w̃a kɛ́ aa wolílo sítii ma taá fɛ́li aáva taá ndiivó fáitii kɛ.

³² Aáva nápa nuu áá nɛ́ɛ́ mɛniní ngeleí sí wu ngáá tí nuu lénga mbolengɔ́ nuu í mbaló.

³³ Kɛbei siỹɛndópoi sí aa ɣɛi gulaí Ngalá ngelé, ɛ́i belé hómbo ɔ́ɔ́ ɣɛ́a káámaa haí sítii ta fíli kɛ.”

³⁴ Ná siỹɛndópoi í faí nátii ndeí kɛ tí ngoo yápotenga, ti ɣɛ́ ma, “Yɛ́i sí faa ỹɔ́i yámbɔɔlɔngɔ í w̃a í séi í lé sɔ́wɔ w̃a, yá lɔ yáa va ni galámboma?” Aáva tí kula ngitíí ya, tí kpetéve Ngala fɛ́lindai wa Ngala fɛ́li máákpɔ wotaí wuu wá.

Sítii ti ɣɛngɔ́ ngáá mbole yeláá ɣɛ́ kíli

³⁵ Faalɔ, ná Jísu í mɛniní ngáá tí maa h̃íỹɛndopoi betévenga Ngala fɛ́li máákpɔ wotaí wúú wa, i kɔlíi, í tɔ, i ɣɛ ma, “Í lángɔɔ le ngáá nuí sí taa ɣɛ́ ma Nuu Búsa Goo H̃ú Lói?”

³⁶ Siỹɛndópoi i ɣɛi Jísu w̃a, “Kawálai, ele wáá ngáá laá kɛinɔɔ́ ngí lá lá?”

³⁷ Jísu i ngoo yápotei, i ɣɛ ma, “Yí tɔngá naá kílii. Aá ɣéle p̃ɛ́ɛ́, laá waa ngáá nuí sí wúwaa yɛ́pɛ wáá laá.”

³⁸ Kɛ siỹɛndópoi i ɣɛ́a ma, “Kɛɛɣɛ́, ndángɔɔ le ngáá í ye,” Aáva í hítɛi wumbú yá Jísu gakála.

³⁹ Kɛ Jísu i ɣɛa ta, “Ngí vaangɔ́ ngáá ngí nungáitii kɔsɔ́ ngelewu kɛinɔɔ́ sítii ti wólengɔ, ti ɣɛ́ taá ỹandá lɔ, sítii pá taá ỹandá lɔ ti wólengɔ í ɣɛ́ la.”

⁴⁰ Faalɔ, na Júsuai sítii tɛingáá taa ɣɛ́ ti w̃a Falósiai ti faí sí ỹɛniní í ndéni, ti ɣɛ́i ma, “Kɛ niỹá bɛ́lɛ ní wólengɔɔ lé hɔ́ɔ?”

⁴¹ Kɛ Jísu i ɣɛa ti w̃a, “Kɛ bele wú wólengɔɔ i ɣɛi lá, wú véle lálangɔ ɛ́i belé ɣɛ́ lá faa ỹɔ́u ɣɛ́ fááw̃a, kɛ́ ná wú kpátɛa ngáá wá lɔ́ɔ́ ỹandá lɔ, kɛ wáá vélei wú háá ỹɔítii faaw̃a.”