NJƆÚ 3 - Kɛ́lɛ Niinaí

Jísuni ngaa Nekodímɔ ti yɛ́pɛni

¹ Siỹɛndópo yiláá i ɣɛi na ndaahéingi i ɣɛi ngáá Nekodímɔ. I ɣɛi ngáa ngutuwɔ́ w̃ɔɔ Júsuai faaw̃a aáva i ɣɛ́i múl̃ɔ ngáa Júsuai sítii taa ɣɛ́ ti w̃a Falósiai ti tá.

² I liiní Jísu yelé ngáá kpindíi, i ɣɛ ma, “Kaamɔ́ɔ́, ní kɔ́lɔ ngáá yá lɔ́ yí ngáá kaamɔí yí gúlangɔ Ngalá ngelé, sífaa nuu fíli ɛ́i belé káámaa haí sítii kɛ yíwaa ti ɣɛ ná Ngalá ngɛ́i belé ɣɛ́ ɣɛi polú.”

³ Jísu i ngoo yápoteni, i ɣɛ ma, “Ngí tɔ́ɔỹai le í w̃a, nuu fíli ɛi ɣɛ Ngalángi w̃ásandai wu ná maa w̃ɔ́i ɛ́i ɣɛ́ nde mááhɔlɔi volú.”

⁴ Kɛ Nekodímɔ i ndengá ma, i ɣɛ ma, “Nuu áá ɣelé múl̃ɔ nde mááhɔlɔ volú ná áá ɣɛ náá ngáá kpakolo? Aáva tɔɔỹaá hááw̃a maa w̃ɔ́i ɛi mɔɔ wala ngi njéé goo ya tɔɔ́ nde volú.”

⁵ Kɛ Jísu i ngoo yápotenga, i ɣɛ ma, “Tɔɔỹái va tɔ ngáá nde í w̃a ngáá kɛ léi nuu í nde mááhɔlɔ njɛ w̃áá velé w̃a ɛ́ɣɛ Hɛ́ɛ́ma Ỹínangi w̃aa véle w̃a, kɛ́ ná láá le, ɛi ɣɛ Ngalángi w̃ásandai wu.

⁶ Nuu búsai lɔ áá nuu búsai le, Hɛ́ɛ́ma Ỹínangi vá tɔ́ áá kɛ ngáá háwu nuu áá ndɛɛh̃uu gítei w̃ááhɔlɔ.

⁷ Álaa gɔ́ɔ́la í wa ngáá sí ngí ndéngɔ ngáá kɛ wáá nde mááhɔlɔ volú.

⁸ Fɛfɛngí aa gula pele fíli su nɔ́ɔ, yáá vá yáá suŋ mɛ́ni. Yáá vá yɛ́i ɣɛ kɔlɔ́ mbéi áá híɣe na kɛlaa mbéi áá líí na. Ngimɔ́ɔ́ nɔ́ɔ maa hái í na ngáá sítiini taá nde mááhɔlɔ Hɛ́ɛ́ma Ỹínangi w̃aa véle w̃a.”

⁹ Ná Jísu í ná léni, kɛ Nekodímɔ i mɔɔnínga, i ɣɛ ma, “Ná aa ɣelé ɣɛ?”

¹⁰ Kɛ Jísu i ɣɛa ma, “Yí ngáá kalambo kɛɛɣɛ́ wala Ísulɔ yeláitii faaw̃a, yáá faí sítii ngatɔ́ngɔ mba?”

¹¹ Í mɔ́ɔ́ ɣɛ Nekodímɔ w̃a, “Ngí tɔ́ɔỹai le í w̃a, sí ní kɔ́lɔ, laá lɔ́ naá yɛ́pɛ kɔwɔ́ato mba wú yéle, sí va ní naa lɔngá niỹá gíte, laá lɔ́ naá nde wú w̃a. Kɛ́ ná fíli su, nuu áá lói ɔ́ɔ́ lokohéi ni gééla woí wu.

¹² Ngí yɛ́pɛnga wú yéle kɔwɔ́ato ngelewu háitii mba aáva wáá lángɔ ngáá ngé. Kɛ wáá ɣelé la náá ngáá ngé ná ngáá yɛ́pɛ wú yéle kɔwɔ́ato ngelegóóh̃u haítii mba?

¹³ Aáva nápa nuu fíli aa nɛɛ lɛɛní ngelegóóh̃u kɛ léi nuí síí w̃ɔ́i taa ɣɛ́ ma Nuu Búsa Goo H̃ú Loí lɛ́i í híɣengɔ na.”

¹⁴ Kɛ ti Nuu Búsa Goo H̃ú Loí lɛ́ ngeleya kíya nɔ́ɔ Muusé í ngɛíngi ná lɛí ngeleí ya ngulúi w̃a ngaalaí h̃u kulangɔ́ í ɣɛ́i lá ngáá kaalii.

¹⁵ Ná ná vá ngáá ɣɛ́, nuí fíli áá la lá, maa w̃ɔ́i aa kúnafɔ lɛ́ɛ́h̃ui w̃aahɔ́lɔ.

¹⁶ Sífaa, Ngalá ndóngɔ ngáá nuu búsai ngwala ná lɔ́ í kɛ́ni í ngi H̃íỹɛndou Lou yiláá kpéngi lɔ́veni ngáá nuí fíli áá lá ngáá ngi H̃íỹɛndou Loí ɛi saa w̃ááhɔlɔ kɛ́ aa kúnafɔ lɛ́ɛ́h̃ui w̃ááhɔlɔ.

¹⁷ Sífaa Ngalá ngáá ngi H̃íỹɛndou Loí lɔ́vengɔ ngeléi sí wu ngáá í suu yélaitii kɔsɔ́ í faa bá ndá ti w̃a, kɛ́ laá ɣéle, í tí wumááwo.

¹⁸ Nuí fíli áá lá la pelé lálangɔ ɛi ɣɛ́ la kɔsɔ́ su, kɛ́ nuí fíli ɛ́i lá la, kɛ maa w̃ɔ́i véle lálangɔ aa ɣɛ náa lá kɔsɔ́ su, bɔw̃álale aa langɔ́ ngáá Ngalángi H̃íỹɛndou Lou yiláá kpéngi.

¹⁹ Kɔsɔ́ngi ỹáánimai lɔ́ ngáá sí ti w̃a. Lámbongi i vaangá ngelewu, kɛ́ sí ɣéle ɔ́ɔ́ kɛ nungáitii ti ló ngáá lámbongi, aá ɣéle kpindíí lɔ ti longɔ́ la, bɔw̃álale ti lúva veléitii nyɔungɔ́ɔ́ lé.

²⁰ Faa ỹɔ́u ỹɔ́u kɛ mɔ́ɔ́ fíli, silíngɔɔ le ngáá lámbongi aáva ɛi gula lámbongi ya bɔw̃álale ɛi ɣɛ loí ngi háá ỹɔu ỹɔungáitii ti w̃áá ɔ́ɔ́ ɣɛ́ kpál̃au.

²¹ Kɛ́ nuí fíli áá ɣɛ́ ngáá tɔɔỹaá híya mbo mɔ́ɔ aa gula lámbongi ya kɛinɔɔ́ nga ngí ɣɛ́ kpál̃au ngáá sí íwaa kɛ, aá lɔ Ngalángi vélei w̃a.

Sí Nguya Wo Mɔ́i Njɔú í ndení kɔwɔ́ato Jísu wa

²² Ná ná í gúlani su, Jísuni ngaa polú yélai tí lííni náa Judíya lataí h̃u. Naa lɔ í kuu félengɔ ɣɛ́i na taá polú yélaitii laá bɛ́lɛ áá nguyaí wó ngáá nungái.

²³ Njɔú bɛ́lɛ i ɣɛi áá nguyaí wo ngáá nungáitii njɛí ná h̃u taa tolí ngáá Íínɔ í tataí sí h̃u béla taa naa lolí ngáá Salími bɔw̃álale njɛí bíh̃ingɔ i ɣɛi lá na. Aáva nungái ti ɣɛ́i taa lí ngelé nɔɔ́ kélei ngáá í ngúyai wó ngáá ti ye.

²⁴ Sí i ɣɛí p̃ɛ́ɛ́ tɔɔ ɣɛ́a Njɔú víli kpindi vɛlɛ́i wu.

²⁵ Kɛ maaɣaalí i tɔkúla héinga Njɔú vólu yélai ndowah̃u ɛ́ɣɛ siỹɛndópo yiláá í ɣɛ́i ngáá Júsuaitii ti tá kɔwɔ́ato ngúya wo kíli wa ti Yála fɛlindái h̃u.

²⁶ Kɛ tí líínga Njɔú yelé, ti ɣɛ́ ma, “Kaamɔ́ɔ́, yí gíseingɔ siỹɛndópoi ná w̃a wáá laá wú ɣɛ́i loow̃á Jɔ́ɔ́dɛ Yɛí góóɣaka vékai w̃a véle, lɛ́i yí yɛ́pɛi kɔwɔ́ato mba? Aá lɔ́ náá áá nguya wo ngáá nungái aáva nuí kpɛ́lɛɛ tɔ́ɔ́ lí naá nɔɔ́ ngelé.”

²⁷ Kɛ Njɔú í ti woo yápotenga, i ɣɛ ti w̃a, “Sí fíli nɔɔ́ léi nuu áá mááhɔlɔ, aa gula Ngalá ngeyá.

²⁸ Ná vólu, wá gítei wá lɔ ngáá maa héélea ngáá ngí ndengɔ́, ngí ɣɛ́ ta, ‘Nyá láá lé ngɔ́ɔ́ ɣɛ́ ngáá Ngalángi Lókolo Mbá W̃ɔ́i, kɛ́ aá ɣéle, Ngalá ngí tɔ́vengɔ nɔɔ́ naa wutúwɔ.’ ”

²⁹ Njɔú i maa hái h̃úúw̃ai nɔ́ɔ nyah̃á wɔlíndai wa, i ɣɛ ta, “Nyah̃ái aa ɣɛ na nyah̃á wɔ́li mɔ́i hááw̃a. Nyah̃á wɔ́li mɔ́i mbalái va aa ɣɛ lói naa béla ngolílongɔ ngáá í nyah̃á wɔlí mɔ́i woo ỹɛ́ni. Aáva ná áá ngoo ỹɛ́ni, kooh̃unɛ́ɛ́ngɔ aa ɣɛ la. Kɛ ngimɔ́ɔ́ ní góóh̃unɛi í na aa gɛɛlɛngɔ́ pele h̃u.

³⁰ Laá kɛ ngangí ɣɛ́ mba ngwala, nyáá vá kɛ ngú nga ngí yéi.”

Nuí áá gula ngelegóóh̃u

³¹ Njɔú í mɔ́ɔ́ ɣɛ ta, “Nuí áá gúla ngelegóóh̃u, aá lɔ nuu kpɛ́lɛɛ mááh̃u, nuí vangí í gúlangɔ ngeleí sí wuu aá lɔ na ngeleí sí wuu hááw̃a laáva aa yɛpɛ nɔ́ɔ́ kíya ngeleí sí wuu w̃ɔ́ɔ́ áá yɛ́pɛ. Nuí áá gúla ngelegóóh̃u aá lɔ nuu kpɛ́lɛɛ mááh̃u.

³² Aa faa lé kɔwɔ́ato sí wa í tɔngá, ná vólu, í mɛ́ninga, kɛ́ nuu fíli ɛi lokohéi ngi gééla woí wu.

³³ Aáva nuí fíli áá lokohéi ngi gééla woí wu, kɛ maa w̃ɔ́i i ngakɛ́a kpál̃au ngáá Ngalá tɔwɔ́ báɣangɔɔ lé.

³⁴ Sífaa lɛ́i Ngalá ngí tɔvengɔ́ Ngalá ndaa wóitii tɔ áá ndé. Laáva Ngalá ngi Hɛ́ɛ́ma Ỹínangi yákpangi kpɛ́lɛɛ féngɔ ngeyá.

³⁵ Kɛɛɣɛí Ngalá ndongɔ́ɔ́ lé ngáá ngi H̃íỹɛndou Loí aáva í ŋani kpɛ́lɛɛ puá toko h̃u.

³⁶ Nuí fíli áá la ngáá Ngalángi H̃íỹɛndou Loí, kɛ kúnafɔ lɛ́ɛ́h̃ui lɔ maa w̃ɔ́i yaá. Kɛ́ nuí fíli ɛ́i golo mbu ɛi kúnafɔ lɛ́ɛ́h̃ui w̃aahɔ́lɔ, kɛ́ aá ɣéle, Ngalángi haa bamaí aa ɣɛ maa w̃ɔ́i w̃a kúnafɔ.”