NJƆÚ 18 - Kɛ́lɛ Niinaí

Jísu houndái

¹ Ná naá Jísu í vílani Ngala fɛ́lindai sí w̃a, kɛ laá ɛ́ɣɛ polú yélaitii tí njɛ gúloi sí lévenga taa tolí ngáá Kidulɔ. Mbéinda va ti lííni na i ɣɛi ngáá kpelé h̃u. Laá ɛ́ɣɛ polú yélai ti wála maa bélei ná h̃u.

² Jísu volú w̃ɔ́i sí va tɔ́ɔ́ ɣɛ́ ma Júdɔ lɛ́i í ɣɛ́i áá va Jísu lokolevéma í ɣɛi maa ỹándai wɔ́lɔ bɔw̃álale Jísuni ngaa polú yélai tɔ́ɔ́ w̃ɛ́ɛ́ maa ỹándai hɔ́wɔ fíli.

^3-5 Naa lɔ Júdɔ í lííni na ngáá Lóómi hóya bɔngí. Hɛ́ɛ́ma Yála Pɛ́lɛi w̃aah̃ú béle mbélai tí lɛ́ingaa ti ɣɛ́i polú. Ngala sááɣa gula mbélai ti wutúwɔaitii ɛ́ɣɛ Júsuai sítii taa ɣɛ́ ti w̃a Falósiai tɔ ti ɣɛ́i nátii tɔvení. Kɔ ỹaakáitii ti ɣɛ́i ti kpɛ́lɛɛ ngéya lámbongai ɛ́ɣɛ ngalíítii. Jísu i ɣɛi kɔlɔ́ faí sí kínɛi ti ɣɛ́i taa vá kɛmá lá, faalɔ, i liini ti yelé, aáva Júdɔ lɛ́i í ɣɛ́i áá Jísu lokolevé i ɣɛi na. Kɛ Jísu i ti w̃ɔ́ɔ́ninga, i ɣɛ ti w̃a, “Ele lɔ wúwaa kɔlí?” Kɛ́ tí ngoo yápotenga, ti ɣɛ́ ma, “Jísu lɛ́i í gulángɔ Násɔlɛ taí h̃u, laá lɔ́ níwaa kɔlí.” I ɣɛ ti w̃a, “Kɛ nyá lɔ́ ngáá sí.”

⁶ Ngamá nɔ́ɔ́ kɛ ti kpɛ́lɛɛ ti yaséinga ndɔwɔlɔ́i wa.

⁷ Kɛ Jísu i mɔ́ɔ́ ti w̃ɔ́ɔ́ninga, i ɣɛ ta, “Ele lɔ wúwaa kɔlí?” Ti mɔ́ɔ́ ngoo yápote, ti ɣɛ́ ma, “Jísu lɛ́i í gúlangɔ Násɔlɛ taí h̃u.”

⁸ I ɣɛ ti w̃a, “Kɛ́ ngí ndénga náá wú w̃a kílii ngáá nuí wúwaa kɔlí maa w̃ɔ́i wáa ngáá ngé. Faalɔ, ná aá ɣéle nyá lɔ wáá ɣɛ́ wáá kɔ́li, kɛ a bé núngai sítii mba ti lí.”

⁹ Faí sí i ɣɛ́i kɛinɔɔ́ ngoí sítii Jísu í ti leí wɔ́lɔ ti hítɛ nga ngáá sí í ɣɛ́i ta, “Kɛɛɣɛ́, pólu yélaitii kínɛi yí ti hengɔ́ ngéya ngiláá kéle tɔ ngu ngáá lóngɔ su.”

¹⁰ Kɛ Sáimɔ Pítɛ i mbowá hɔ́kpɔi gúlanga í ɣɛ́i ngeyá, i Ngala sááɣa gula mbélai ti wutúwɔɔ w̃ɔ́ɔ́ walaí yénge mɔ́i yisa h̃u véle wolíí levé mba lá. Ngenge mɔ́i ná va ndaahéingi i ɣɛi ngáá Malukɔ.

¹¹ Kɛ Jísu i ɣɛa Pítɛ w̃a, “Í wówa hɔkpɔí wála taangí yá, kɛ ngí maanɔw̃ɔ́ wálai sí yéɣe sí ní Kɛ́ɛ́ɣɛ í ndángɔ kákala.”

Tí lííni ngáá Jísu Ánasi yelé

¹² Kɛ Lóómi hóyaitii í báha ti núú walaí wa ɛ́ɣɛ Hɛ́ɛ́ma Yála Pɛ́lɛi w̃aah̃ú béle mbélaitii, kɛ tí líínga ti Jísu hóu, tí ngíli.

¹³ Tí liiní ngáá Jísu hése siỹɛndópoi ná yelé tɔ́ɔ́ ɣɛ́ ma Ánasi. Ánasi va ngi nɔ́ko í ɣɛ́i ngáá Káyafa lɛ́i í ɣɛ́i ngáá Ngalá sááɣa gula mbélai ti wutúwɔɔ w̃ɔ́ɔ́ walaí náá h̃u.

¹⁴ Káyafa vá tɔ í ɣɛ́i ndaahingí woní ngáá Júsuaitii ngáá aá lɔ ngáá faa vánda ngáá yiláá w̃ɔ́ɔ́ í ha nuu kpɛ́lɛɛ fááw̃a.

Síɣesɔngai Pítɛ í mbóni

¹⁵ Sáimɔ Pítɛni ngaa Jísu volú w̃ɔ́ɔ́ vekaí ta ti hítɛni Jísu volú. Jísu volú w̃ɔ́ɔ́ vekaí ná va Ngala sááɣa gula mbélai ti wutúwɔɔ w̃ɔ́ɔ́ walaí ná i ɣɛi kɔlɔ́ ngáá pangɔ́. Faalɔ, i loí Jísu volú tí lɛ́ Ngala sááɣa gula mbélai ti wutúwɔɔ w̃ɔ́ɔ́ walaí náá góvii h̃u maayéle mbélengɔ í ɣɛ́i lá ngáá kpakií.

¹⁶ Kɛ́ Pítɛ i naa w̃áálɛlɛi ngitíí ya kpakií la. Kɛ Jísu volú w̃ɔ́ɔ́ vekaí ná va i yangáimanga volú, í yɛ́pɛ nyah̃alói yelé í ɣɛ́i lói kpakií la, í lɛ́ ngáá Pítɛ kpakií h̃u.

¹⁷ Kɛ maa nyáh̃aloi i Pítɛ w̃ɔ́ɔ́ninga, i ɣɛ ma, “Kɛ́mbɛ yá bɛ́lɛ yá lɔ ngáá siỹɛndópoi ná volú w̃ɔ́i ta?” Pítɛ í ngoo yápotei, i ɣɛ ma, “Kpéle, ti ta láá ngáá nge.”

¹⁸ Kɔɔlɛ́i va i ɣɛi áá vá, faalɔ, ngenge mbélaitii ti ɣɛ́i na ɛ́ɣɛ Hɛ́ɛ́ma Yála Pɛ́lɛi w̃ááh̃u béle mbélaitii ti ɣɛ́i lóóni ngɔmbuí w̃aayelé mbélengɔ ti ɣɛ́i ndaí táá gɔɔlɛ́ wó. Pítɛ bɛ́lɛ í ɣɛi lói na áá gɔɔlɛ́ wó.

Mɔɔni mɔɔníngi tí mbóni ngáá Jísu

¹⁹ Kɛ Ngala sááɣa gula mbélai ti wutúwɔɔ w̃ɔ́ɔ́ walaí ná i Jísu w̃ɔɔningá, i ɣɛ ma, “Elení tɔ ti ngáá í vólu yélaitii? Ná volú, ndeé lɔ í ngáá í galambongí yáá mbo?”

²⁰ Kɛ Jísu i ti woo yápotenga, i ɣɛ ti w̃a, “Ngí yɛ́pɛnga nungáitiini kpɛ́lɛɛ ngéle kpɔ sú, ngɔ́ɔ́ ní gálambongi kpɛ́lɛɛ mbó Ngala fɛli máákpɔ wotaí wu ɔɔ ná láá lé Hɛ́ɛ́ma Yála Pɛ́lɛi wu mbéi Júsuaitii kpɛ́lɛɛ tɔ́ɔ́ yatɛ́ mba na. Nápa ngáá yɛpɛí ndɔ́ɔ́wu h̃ú.

²¹ Ndeé le wáá mɔ́ɔ́ni? A sítii mɔɔní ti ngóó ỹɛ́nini, tɔɔỹaá hááw̃a tí kɔlɔ́ sí ngí ndéni.”

²² Ná Jísu í ngói sítii ndení, kɛ Hɛ́ɛ́ma Yála Pɛlɛí w̃aah̃ú béle mbélai ti tá yílaa í ɣɛ́i lói Jísu bela, i ngolí h̃u bóólɛnga, i ɣɛ ma, “Ngimɔ́ɔ́ yáá Ngala sááɣa gula mbélai ti wútuwɔɔ w̃ɔ́ɔ́ walaí woo yápote?”

²³ Jísu i ngoo yápotei, i ɣɛ ma, “Ná wɔ́lii ngáá ɣɛ́ faa léngɔ ɛ́i ɣɛ́ pele w̃a, yɛpɛ kɔwɔ́ato mba. Kɛ́ ná wɔ́lii sí ngí ndéngɔ áá ɣɛ́ ngáá tɔɔỹaá kɛ ndeé le yáá ndéve?”

²⁴ Ánasi va i Jísu yilingɔ́ loi nɔ́ɔ nɛ́nɛ kpɛ́, í tɔve Ngala sááɣa gula mbélai ti wutuwɔ́ɔ́ w̃ɔ́ɔ́ walaí ná yelé tɔ́ɔ́ ɣɛ́ ma Káyafa.

Siɣesɔngaí Pítɛ í mboní múl̃ɔ

²⁵ Pítɛ va i ɣɛi nɛ́nɛ lóóni kpɛ́ ngɔmbu béla, íwaa ngɔɔlɛ́ wo. Kɛ nuu vékaitii ti ɣɛ́i na tí mɔɔningá, ti ɣɛ́ ma, “Yá bɛ́lɛ kɛmbɛ yá lɔ ngáá siỹɛndópoi ná vólu w̃ɔ́i ta, kɛ́lɛi?” Kɛ Pítɛ í híɣenga nga, i ɣɛ ta, “Kpéle, ti tá láá ngáá ngé.”

²⁶ Ngala sááɣa gula mbélai ti wutúwɔɔ w̃ɔ́ɔ́ walái yénge mɔ́i ta yílaa, sí ngí létɔ í ɣɛ́i ngáá siỹɛndópo sí Pítɛ í ngolíí levéni mba, i Pítɛ wɔ́ɔ́ni, i ɣɛ ma, “Ngáá í lɔ́ngɔ kpeléi h̃u siỹɛndópoi ná volú?”

²⁷ Kɛ Pítɛ í mɔ́ɔ híɣenga nga, i ɣɛ ta, “Kpéle.” Ná nɔ́ɔ́ léi í ná léni, tɛɛh̃ínai i wokólei.

Tí lííni ngáá Jísu Páilɛɛ yelé

²⁸ Kɛ Júsuai ti gúlanga ngáá Jísu Káyafa vɛlɛí láa wa ngáá ngelendáá lɛtɛngí ti lii la Lóómi gɔ́mɛti nuu walaí vɛ́lɛi la. Taa kɛ́ni tɔɔ lɛ́ pɛ́lɛi wu sífaa taa ɣɛ́i lói tɔɔ́ kpaló mbá háá ɣɛ́ ngáá tɔɔ́ bááh̃aa Ngumaawó Kúi w̃aaỹɛ́ɛ́ni ỹɛ́ma.

²⁹ Kɛ gɔ́mɛti nuu walaí, Páilɛɛ í gulangá ngitíí ya í tí w̃ɔ́ɔ́ni, i ɣɛ ta, “Ndéé háá lɔ wáá pɛlɛ siỹɛndópoi sí wa?”

³⁰ Kɛ tí ngoo yápotenga, ti ɣɛ́ ma, “Kɛbei aa ɣɛi ngáá faa ỹɔ́u w̃ɔ́ɔ́ nɛ́i belé tokolevé í w̃á.”

³¹ Kɛ Páilɛɛ i ndengá ti w̃a, i ɣɛ ta, “A lii lá, wá búte wú kɔsɔ́ wú bɔ́wɔ bɔ́wɔ havaí w̃áá véle w̃a.” Ti mɔ́ɔ́ ngoo yápotei, ti ɣɛ́ ma, “Kule fíli aa ni w̃a nɔɔ́ nuu gɔ́sɔ nɔ́ɔ paa.”

³² Sí va ngi ɣɛí kɛinɔɔ́ ngói sítii Jísu í ndéni ngáá kíya í ɣɛ́i áá vá hááma í hítɛ nga.

³³ Kɛ Páilɛɛ í lɛɛngá pɛlɛí wu volú, í Jísu lolí, í mɔɔní, i ɣɛ ma, “Aa ɣɛ́ yá lɔ́ yí ngáá Júsuai ti W̃ása Ngwalaí?”

³⁴ Jísu bɛ́lɛ í mɔ́ɔ́ni, i ɣɛ ma, “Í wú maa géle ɣele tɔ, baa nungáá vékaa ti yɛ́pɛngɔ í yéle kɔwɔ́ato mbá?”

³⁵ Kɛ Páilɛɛ bɛ́lɛ i Jísu woo yápotenga, i ɣɛ ma, “Aa lɔ í gí má Júsu w̃ɔɔ waa ngáá ngé? Í bɔ́wɔ vóngaitii ɛ́ɣɛ wú Yála sááɣa gula mbélai ti wútuwɔaitii tɔ tí í lókolevengɔ má. Ndeé lɔ yí kɛ́ngɔ?”

³⁶ Kɛ Jísu i ngoo yápotenga, i ɣɛ ma, “Ní w̃ásandai aa ngáá ngeleí sí wúu w̃ásandaa, kɛ bele i ɣɛi lá, mbáá yélaitii tɔ́ɔ́ ɣɛ́ lapiní sóu fái h̃u Júsuaitii mbɛ. Kɛ́ ní w̃ásandai i gulangɔ́ ỹanda véka.”

³⁷ Kɛ Páilɛɛ i mɔɔ Jísu w̃ɔɔningá, i ɣɛ ma, “Ná ná áá ɣɛ́, kɛ yá lɔ́ ngáá masa?” Ná í ngoo yápotei, i ɣɛ ma, “Yá lɔ́ nde ngáá nyá lɔ́ ngáá masa kɛ́ nyá lɔ́ nde ngáá ti ndéngɔ ngáá ngí vá ngeleí sí wu ngáá ngí faa yákɛ kɔwɔ́ato tɔɔỹái wa. Nuí fíli pá áá ɣɛ́ tɔɔỹaá gakaí w̃á aa wolílo ndáá wói w̃a.”

³⁸ Kɛ Páilɛɛ i mɔɔningá, i ɣɛ ma, “Bɛɛ́ lɔ́ í ngáá tɔɔỹái?” Ná Páilɛɛ í ngói sí léi, kɛ i mɔ́ɔ́ gulaa ngitíí ya Júsuaitii ngelé, i ɣɛ ti w̃a, “Ngáá tɔ́ngɔ pele lálangɔ ɔ́ɔ́ ɣɛ́ la faa ỹɔ́u hááw̃a.

Páilɛɛ i Jísu lɔvení ngáá tí paa

³⁹ Kɛ́ aá lɔ ngáá wú ndá gɛ́ɛ́ haa ngáá nungái sítii tí kpindi vɛlɛ́i wu ngáá yilá w̃ɔɔ́ w̃aahaa í ló Ngumaawó Kuí sí w̃ááh̃u. Wú lóngɔɔ lé ngí Júsuai ti W̃ása Ngwalaí w̃ááhaalo?”

⁴⁰ Kɛ tí woo gúla gbél̃eiŋ táá ngoo yápote, tíwaa ɣɛ́ ma, “Naá ɣɛ́i laá, kɛ́ aá ɣéle, be Balába wa ni yɛ.” Balába va i ɣɛi ngáá ŋuỹa w̃ɔ́ɔ́ wala.