NJƆÚ 14 - Kɛ́lɛ Niinaí

Jísu lɔ í ngáá peleí áá lí Kɛɛɣɛí Ngalá ngelé

¹ Jísu í mɔ́ɔ́ nde volú yélaitii ma, i ɣɛ ta, “A waá liihɛ́lɛ, a lá ngáá Ngalá, wú lá ngáá ngé nyá bɛ́lɛ.

² Ndaa lomú bíh̃iw̃aa lɔ ní Kɛ́ɛ́ɣɛ vɛ́lɛi wu. Kɛ bele aa ɣɛi ngáá tɔɔỹáa, ngɛ́i bele sí lé wú w̃a. Nyá ngáá lí ngí ỹanda bátɛ na wú yɛ́.

³ Aáva ná ngáá ɣɛ́ lii, ngí ỹandá ɣɛ kíli batɛ́ wú yɛ, ngáá mɔ́ɔ yangáima náá ngáá ngí wú yéɣe wú ɣɛ́ ndóów̃a. Mbéi fíli pá ngáá ɣɛ́ na, naa lɔ náá wá bɛ́lɛ wáá ɣɛ́ na.

⁴ Wú peleí wɔlɔ́ áá lí mbéi ngíwaa lí na.”

⁵ Kɛ Tɔmɔsí í mɔ́ɔ́ninga, i ɣɛ́ ma, “Kɛɛɣɛ́, naá kɔlɔ́ mbéi yíwaa lí na, ná ná áá ɣɛ, naá ɣelé ɣɛ́ náá peleí wɔlɔ́?”

⁶ Kɛ Jísu i ngoo yápotenga, i ɣɛ ma, “Nyá lɔ́ ngí ngáá peleí. Nyá lɔ́ ngáá tɔɔỹái ɣɛ ngáá nuu kɔwɔ́ato Ngalá mba. Nyá lɔ́ ngáá ndɛ́ɛ́h̃u gítei hé. Nuu fíli ɛi li Kɛɛɣɛí Ngalá ngelé kɛ léi máávele w̃á.”

⁷ Jísu í mɔ́ɔ́ ɣɛ ti w̃a, “Ná wɔ́lii wɔ́ɔ́ ɣɛ kɔ́lɔ gíte, wɔ́ɔ́ ɣɛ́ ní Kɛ́ɛ́ɣɛ bɛ́lɛ kɔlɔ́. Í séi hááw̃a í lí naa wutúwɔɔ, wú kɔlɔ́ aáva wú tɔngá.”

⁸ Kɛ Félepi i ɣɛa ma, “Kaamɔ́ɔ́, í Kɛ́ɛ́ɣɛ ɣɛ́ ngáá ni ye. Ná lɔ́ áá ni liilɛ́i gíte.”

⁹ Jísu i ngapóteni, i ɣɛ ta, “Ndɛmbí ngwálai sí a mú mbóa ỹanda yílaa maa wúyeni, ná fíli su Félepi, yáá nɛ́ɛ́ kɔ́lɔ kpɛ́? Nuí fíli í tɔ́nga, kɛ maa w̃ɔ́i i ní Kɛ́ɛ́ɣɛ lɔngá. Aá ɣelé kɛ́ náá yáá ɣɛ́ má, ‘Í Kɛ́ɛ́ɣɛ ɣɛ ngáá ni ye’?

¹⁰ Félepi, baa yáá laní lá ngáá kɛ naa ní Kɛ́ɛ́ɣɛ ni ɣɛ kíli i yíla kpé pele kpɛ́lɛɛ sú? Ngoí sítii ngíwaa ti le wú w̃a, taa ngáá ngúmaawoo, kɛ́ ní Kɛ́ɛ́ɣɛ lɛ́i naa laa ni báhangɔ su, laá gíte lɔ íwaa ngi yéngengitii mbo.

¹¹ A lá ngáá sí ngí ndéngɔ ngáá naa ní Kɛ́ɛ́ɣɛ ni ɣɛ kíli i yíla kpé pele kpɛ́lɛɛ sú. Ɔɔ ná láá lé, káámaa haí sítii ngíwaa ti ɣɛ, tí kɛ ngáá háwu wú lá la.

¹² Ngí tɔɔỹái le wú w̃a, nuí fíli áá ɣɛ laí ngáá ngé, maa w̃ɔ́i aa hombó í sítii kɛ ngíwaa ti ɣɛ. Aa hombó bɛ́lɛ í faa wála wála ɣɛ í lɔ́ve sítii mba ngíwaa ti ɣɛ, bɔw̃álale nyá lɔɔ lí ní Kɛ́ɛ́ɣɛ yelé.

¹³ Aáva, sí fíli yáá fɛli ndááheingi h̃u, ngáá kɛ í yɛ́. Ná aa ɣɛ kɛinɔɔ́ ngi H̃íỹɛndou Loí w̃áá véle w̃a nungáá ti ɣɛ́ kɔlɔ́ ngáá kíya laá Kɛɛɣɛí kaámaangɔ.

¹⁴ Sí fíli yáá fɛ́li má, ngáá kɛ í yɛ́.”

Jísu i Hɛ́ɛ́ma Ỹínangi w̃aa guuló mboní

¹⁵ Jísu i ndií ngu ma, i ɣɛ ta, “Ná gíte wáá ɣɛ loí ngáá ngé, kɛ wáá híya ngáá savaí sítii ngí ndangɔ́ wú yáá.

¹⁶ Nyá lɔɔ́ Kɛɛɣɛí w̃ɔ́ɔ́ni ngáá í kpɔ́mba w̃ɔ́ɔ́ véka lɔve wú yɛ áá ɣɛ́ wú vólu kúnafɔ.

¹⁷ Maa bɔ́mba w̃ɔ́i waa ngáá Hɛ́ɛ́ma Ỹínangi lɛ́i áá tɔɔỹái yakɛ kɔwɔ́ato Ngala mbá. Ngeleí sí wuu yélai tɛí lókohei kpɔmba w̃ɔ́i sí wú bɔw̃álale tɛí tɔ kɛlaa tɔɔ́ ɣɛ́ kɔlɔ́. Kɛ́ wá laa wú kɔlɔ́ bɔw̃álale aá lɔ́ ɣɛ́ wú vólu kúnafɔ aáva wú báhangɔɔ aa ɣɛ la su.

¹⁸ Ná ngáá lí, ngáá wú lóma nɔɔ́ kíya pondengáá taa ɣɛ́ na, nyá lɔɔ vá mɔ́ɔ́ yangáimama wú yéle.

¹⁹ Suu áá mɔ́ɔ́ gooh̃á nungáá vekáitii tí ngélei sí wu tɛí mɔɔ tɔ́ kpósouŋ, kɛ́ wá, wá lɔɔ vá tɔ́ma múl̃ɔ. Aáva sífaa ngáá va ɣɛmá múl̃ɔ ndɛɛh̃úi h̃u, náá hááw̃a, wá bɛ́lɛ wáá ɣɛ́ ndɛɛh̃úi h̃u.

²⁰ Folói ná w̃a vá, wáá ɣɛ kɔlɔ́ ngáá kɛ naa ní Kɛ́ɛ́ɣɛ ni ɣɛ kíli i yíla kpé pele kpɛ́lɛɛ su aáva wáá ɣɛ mɔ́ɔ́ kɔlɔ ngáá maa wúyeni mu ɣɛ kíli i yíla kpé pele kpɛ́lɛɛ su.

²¹ Nuí fíli áá lókohei ní hávaitii mbu aáva í híya ngáá ti ye aá lɔ ndongɔ ngáá ngé. Nuí fíli pá áá ló ngáá ngé, ní Kɛ́ɛ́ɣɛ bɛ́lɛ aa lo ngáá maa w̃ɔ́i. Nyá bɛ́lɛ ngáá ló ngáá maa w̃ɔ́i, ngí mɔ́ɔ́ bɔwɔ́ ɣɛ lá í ɣɛ́ kɔ́lɔ ngáá pangɔ́.”

²² Kɛ siỹɛndópoi sí taa ɣɛ́ ma Júdɔ, kɛ́ aa ɣɛi ngáá Júdɔ Ɛsikɛ́liyɔ, i ndengá Jísu w̃a, i ɣɛ ma, “Kaamɔ́ɔ́, ndéénii le yáá bɔwɔ́ ɣɛ́ ngáá ni ye ngáá pangɔ, kɛ́ yɛ́i bɔwɔ́ ɣɛ́ ngáá nungáá vekaítii ngáá pangɔ?”

²³ Jísu í ngoo yápoteni, i ɣɛ ma, “Nuí fíli áá ɣɛ́ loí ngáá ngé, maa w̃ɔ́i aa híya ngáá ní gálambongi. Ní Kɛ́ɛ́ɣɛ vá aa lo ngáá maa w̃ɔ́i. Ná vólu, naá va naa ní Kɛ́ɛ́ɣɛ maa w̃ɔ́i yelé, ní ló ndoow̃á.

²⁴ Nuí fíli ɛ́i ɣɛ́ loí ngáá ngé, maa w̃ɔ́i ɛi híya ngáá ní gálambongi. Kalambongi sítii wú wáá mɛni taa ngáá ngúmaawoo, kɛ́ ti gúlangɔ ní Kɛ́ɛ́ɣɛ yaá lɛ́i í tɔ́vengɔ.

²⁵ Ngí faí sítii kpɛ́lɛɛ ndénga wú w̃a ná nɛ́nɛ a mú loow̃á maa wú yéni.

²⁶ Kɛ́ kpɔmba w̃ɔ́i, ná wáá ngáá Hɛ́ɛ́ma Ỹínangi lɛ́i ní Kɛ́ɛ́ɣɛ áá va tɔvemá ndááheingi h̃u, aá lɔ áá wú gálambo ngáá faa kpɛ́lɛɛ, aa va í wú gísitɛ faí sítii kpɛ́lɛɛ mba ngí wú gálambonga la.

²⁷ Ngáá kɛ ngáá háwu wú líí í héi aáva kpɔ́wɔ bɔ́wɔ lííhei lɔ ngíwaa vaa la. Ní ndá lííhei ngáá vaa la aa ngáá kíya ngeleí sí wú lííhei áá va. A waá liihɛ́lɛ, ná vólu, nduwá álaa ɣɛ́ wú h̃u.

²⁸ Wú mɛningɔ́ sí ngí ndengɔ́ ngáá nyáá ngáá gúla mbéi wa, ngí lí, aáva nyáá ngáá yangáima wú yéle. Ná wɔ́lii wú lóngɔ áá ɣɛ́ la ngáá ngé, wú góóh̃unɛɛngɔ ɔ́ɔ́ ɣɛ lá ngáá ngáá li ní Kɛ́ɛ́ɣɛ yelé sífaa ngakpángɔɔ lé í lɔ́ve mba.

²⁹ Ngí faí sí lenga wú w̃á p̃ɛ́ɛ́ ɔ́ɔ́ ɣɛ́a ɣɛ kɛinɔɔ́ ná áá ɣɛ́ ɣɛi, wáá la náá la.

³⁰ A mɔí mɔ́ɔ́ yɛpɛ maa wúyeni suu ɔ́ɔ́ ɣɛ́ gooh̃á bɔw̃álale ngeleí sí wuu w̃ása ngwalaí aá tɔ́ áá va. Ngi yákpa fíli aa mááh̃u,

³¹ kɛ́ kɛ ngeleí sí wúu yélaitii taa ɣɛ́ kɔlɔ́ ngáá kɛ ndóngɔ lé ngáá ní Kɛ́ɛ́ɣɛ. Laá va sí jɔ́ áá ndé má laá lɔ ngáá kɛ. A yooɣé, mu gúla mbéi wa.”