NJƆÚ 13 - Kɛ́lɛ Niinaí

Jísu i volú yélai kɔwɔ́itii maaw̃úỹani bɛ́kpɛ

¹ P̃ɛ́ɛ́ Júsuai ti Wumááwo Kúi ɔ́ɔ́ foló ma foló vékai w̃a, Jísu i ɣɛi suuwɔlɔ́ ngáá táingi i folónga ma ngáá íwaa vá náa híɣema ngeleí sí wu í lí Kɛɛɣɛí Ngala ngéle. Aáva hɔ́wɔ fíli i ɣɛi loí ngáá nungái sítii ti langɔ́ í ɣɛ́i lá lá, ti ngáá polú yélaa ngeleí sí wu. I ɣɛi loí ngáá ti ye í ló su bɛ́lɛ í foló naa h̃uu kái kái má í sáá w̃ááhɔlɔni.

² I ɣɛi ngáá kpindi yiláá Ngumaawó Kúi w̃ááỹii wó kpɔ́kɔi, Jísuni ngaa polú yélaitii ti ɣɛ́i héini táá mɛɛnií ỹɛ, aáva Ngutuwɔ́ Ỹína Nyɔí i ɣɛi náá vuní Sáimɔ Ɛsikɛ́liyɔ h̃iỹɛndou loí Júdɔ lií h̃u ngáá í Jísu lókoleve.

³ Jísu i ɣɛi kɔlɔ́ ngáá ngi Kɛ́ɛ́ɣɛ Ngala i ngakpá féa ngeyá faa kpɛ́lɛɛ mááh̃u. I ɣɛi suuwɔlɔ́ múl̃ɔ ngáá i gulangɔ́ Ngalá ngelé laáva aá lɔɔ́ yangáima Ngalá ngelé.

⁴ Faalɔ, i wuyoɣéni mɛɛníi gakála, í ngi lóma maah̃u lómangi gúla w̃a, i táwai yíli lii h̃u.

⁵ Kɛ i njɛí vúnga báfui h̃u, í pɛ́lɛ volú yélai kɔwɔ́itii maaw̃úỹa ma, íwaa ti w̃áábale ngáá táwai í ɣɛ́i ndiih̃u.

⁶ Kɛ i folónga Sáimɔ Pítɛ w̃a, ná í mɔ́ɔ́ni, i ɣɛ ma, “Kɛ́ɛ́ɣɛ, yá lɔɔ kɔ́wɔi w̃aaw̃úỹa?”

⁷ Jísu í ngoo yápoteni, i ɣɛ ma, “Yáá nɛ́ɛ sí yatɔ́ma mba ngíwaa kɛ kíya suu í na, kɛ́ yá lɔɔ vá ngátɔma mba naa wutúwɔɔ.”

⁸ Pítɛ í ɣɛ ma, “Kpéle, kúnafɔ yɛ́i kɔ́wɔ w̃aaw̃úỹa.” Jísu va í ngoo yápoteni, i ɣɛ ma, “Kɛ ngáá í gɔ́wɔ w̃ááw̃uỹa, ná láá lé, kɛ yɛ́i ɣɛ́ ngáá pólu w̃ɔɔ.”

⁹ Sáimɔ Pítɛ va í mɔ́ɔ́ ngoo yápoteni, i ɣɛ ma, “Kɛɛɣɛ́, kɛ álaa gɛ́ɛ́lɛ hɔ́ɔ́ kɔ́wɔi yílaa mba, kɛ́ kpaha bɛ́lɛ tókoitii mba ɛ́ɣɛ ngú mbaí ɣéle tɔ.”

¹⁰ Jísu i ɣɛ ma, “Nuí fíli náa áá ɣɛ́ w̃aaw̃úỹani kɛ nɔ́ɔ́ náá léi í gɔwɔ́itii maaw̃úỹa bɔw̃álale nduwúi kpɛ́lɛɛ mááw̃uỹangɔ aa ɣɛ náá la. Wú kpɛ́lɛɛ wú w̃aaw̃úỹangɔ lé kɛ nɔ́ɔ́ léi nuu yílaa.”

¹¹ Jísu va i ɣɛi náá kɔlɔ́ nuí sí í ɣɛ́i áá va tokolevema. Ná lɔ́ í kɛ́ni i ndéni ngáá ti kpɛ́lɛɛ taa le ti w̃aaw̃úỹangɔ ɔ́ɔ́ ɣɛ́ la.

¹² Ná náa Jísu í vílani ti gɔwɔ́itii maaw̃úỹama, kɛ i ngí lóma maah̃u lómangi vungá w̃a í yangáima ngi héiw̃ai. Kɛ i ti w̃ɔ́ɔ́ninga, i ɣɛ ta, “Wú faí sí yatɔ́ngɔ mba ngi kɛngá wú yɛ́?

¹³ Wáá ɣɛ́ ma Kaamɔ́ɔ́ wú mɔ́ɔ́ ɣɛ má Ndemɔí, aáva aá lɔ́ pele w̃a ngáá wáá ɣɛ́a tóli h̃íí ná bɔw̃álale nyá lɔ́ ngí ngáá Kaamɔí, ngí ngáá Ndemɔí.

¹⁴ Nyɛ́i ngí ngáá Ndemɔí, ná vólu, ngí ngáá Kaamɔí, ngí wú gɔ́wɔitii maaw̃úỹanga. Faalɔ, kule lɔ wú w̃a wá bɛ́lɛ, wú ỹɔw̃ɔ́ ỹɔ́w̃ɔ gɔwɔ́itii maaw̃úỹa bɛ́kpɛ.

¹⁵ Ngí sí ɣɛ́a ngáá wú tɔ wú ɣɛ́ kɔlɔ́ kɛinɔɔ́ wááyaa kɛ.

¹⁶ Ngi tɔɔỹái lé wú w̃a, nduwɔ lopó fíli ngakpángɔɔ laa le ɔ́ɔ́ lɔ́ve w̃aalíɣii wa ɛ́ɣɛ mɔ́ɔ́ bɔ́ilopo fíli ngakpángɔɔ laa le ɔ́ɔ́ lɔve ngi núú walaí wá áá ɣɛ́ tɔ́veni.

¹⁷ Ná wú faí sítii kɔlɔ́ naá, ná wáá ti ɣɛ, aa lɔ ngáá faa vánda wú hááw̃a.”

Jísu i yɛpɛí tokolevéngi wa í ɣɛi áá vá wóma lá

¹⁸ Jísu í mɔ́ɔ́ ɣɛ ta, “Wú kpɛ́lɛɛ táá le ngɔ́ɔ́ ɣɛ́ ngáá njɛpɛ́i sí vú kɔwɔ́ato wú wa, ngí sítii kɔlɔ́ nɔ́ɔ́ ngí lókolonga ti wa ngáá ní ndá, kɛ́ sí pɔ́nɛngɔ Ngalá Kɔ́lɔi h̃u, kɛ nɔ́ɔ́ í hítɛ nga. Aáva sí pɔ́nɛngɔi aá waa ngáá sí, ‘Nuí sí náá laaỹɛ́ ỹanda yílaa naá laá, laá lɔ́ í wálaa mááwooya h̃u.’

¹⁹ Nyá lɔɔ́ faí sí lé wú w̃á p̃ɛ́ɛ́ ɔ́ɔ́ ɣɛ́a ɣɛ kɛinɔɔ́ ná áá ɣɛ́ ɣɛi, wáá lá náá la ngáá Nyá Wáa Ngáá Nyá.

²⁰ Nyáá vá nyá lɔɔ́ tɔɔỹái le wú w̃a múl̃ɔ ngáá nuí fíli áá lokohéi nuu fíli mbú ngáá tɔ́ve, kɛ maa w̃ɔ́i i lokohéinga mbú. Nuí fíli pá áá lokoheí mbu, kɛ maa w̃ɔ́i i lokohéinga núi sí wu í tɔ́vengɔ.”

²¹ Ná naá Jísu í sí lení, ndiíỹaaningɔ i ɣɛ́i la ngwala, kɛ i ɣɛa ta, “Tɔɔỹái lɔ ngáá nde wú w̃a, wú tá yiláá tɔ́ɔ́ vá tókolevema.”

²² Kɛ polú yélaitii tiyá tɔ́ɔ́ taá wɔ́lɛ wɔlɛ́ yaah̃ú, ti gi mái ɣɛi nɔ́ɔ́ múku maká ngáá maa haí. Ti ɣɛ́i taá gísiya ngáá baa ele ɔ́ɔ́ ɣɛ́ la yɛ́ɛ́ Jísu ɔ́ɔ́ ɣɛ́ áá yɛ́pɛ kɔwɔ́ato mba.

²³ Nuí sí gíte Jísu í ɣɛ́i loí la ngwála polú yélaitiini su, i ɣɛi héini Jísu bela.

²⁴ Kɛ Sáimɔ Pítɛ í lóko ɣɛa lá míŋa míŋa ngáá ná í Jísu w̃ɔɔní ngáá nuí gítei Jísu í ɣɛ́i áá faí ná le kɔwɔ́ato mba.

²⁵ Kɛ ná vá i wupɛ́lɛnga Jísu wa, i ɣɛ ma, “Kɛɛɣɛ́, ele wáá ngáá maa w̃ɔ́i?”

²⁶ Kɛ Jísu i ngapótenga, i ɣɛ ta, “Nuí ngáá hakpángi híya biléi w̃a ngí fé ngeyá, maa w̃ɔ́i le.” Kɛ i bilé lukpu gulo levénga mba, í hakpángi híya ma, í fé Sáimɔ Ɛsikɛ́liyɔ h̃iỹɛndou loí Júdɔ yaá.

²⁷ Aáva ná nɔɔ́ léi Júdɔ í bilé lukpuí ná hóuni Jísu yaá, kɛ Setána i vungá su. Kɛ Jísu va í ndeá Júdɔ w̃a, i ɣɛ ma, “Sí yíwaa vá kɛ́ma, maahulá yí kɛ bála bala.”

²⁸ Kɛ́ tiyɛ́i va ti ɣɛ́i maa ỹɛ́ɛ́ni ná ỹɛ́ɛ́mai, ti tá fíli taa sí yátɔi mba Jísu í ndení Júdɔ w̃a.

²⁹ Kɛ sífaa Júdɔ lɔ í ɣɛi ngáá ti gápa ngandɔ́ɔ́lɔ mɔ́i, i ɣɛi ti lɛ́ingaa gí má ngáá kɛ Jísu i ɣɛi áá nde Júdɔ w̃a ngáá í lí í ŋaní tá yaá Ngumaawó Kúi wúya fááw̃a ɔɔ ná láá lé, í ŋani tá he ỹaani yélaitii ngeyá.

³⁰ Kɛ́ ná nɔɔ́ léi Júdɔ í lókoheini bíle lúkpu guloí ná wu Jísu í féi ngeyá, ngamá nɔ́ɔ í gulaí náa í li. Aáva ná h̃u sí í ɣɛ́ni i ɣɛi naa ngáá kpindí.

Jísu i sava níína laní

³¹ Ná naá Júdɔ í ɣɛ́i liiní, kɛ Jísu i ɣɛa ta, “Taíngi i folongá ma ngáá nungái táá vá naa lɔmá nuí síí w̃ɔ́i taa ɣɛ́ ma Nuu Búsa Goo H̃ú Loí kíya kaámaangɔ. Laá lɔɔ vá mɔ́ɔ́ kɛmá ngáá háwu nungái tí naa lɔ kíya Ngalá káámaangɔ.

³² Ná náa áá ɣɛ́ kɛ́ni ngáá háwu nungáitii tí náá lɔ kíya Ngalá kaámaangɔ, Ngalá kpúte aa kɛ náá ngáá háwu nungáitii tí naa lɔ kíya Nuu Búsa Goo H̃ú Loí gáámaangɔ aáva Ngala tɔ vá kɛmá h̃umbuwa.

³³ Mu mbálangaa, nyá lɔ nɔ́ɔ́ náa wú lóów̃a kulo kpɛ́ɛ́. Wá lɔ́ɔ vá kɔ́lima, aáva kíya nɔ́ɔ ngí ndéngɔ Júsuai ti wútuwɔaitii ma ngimɔ́ɔ́ nɔ́ɔ ngáá nde wú w̃á ngáá mbéi ngáá lí na wɔ́i vá na.

³⁴ Sava níína lɔ náá múl̃ɔ ngíwaa nda wú yáá. Ná wáá ngáá, a ló ngáá ỹɔw̃ɔ́ ỹɔ́w̃ɔ. Kɛ kíya ngí loá ngáá wú ye, ngimɔ́ɔ́ kule í wú w̃a wú ló ngáá ỹɔw̃ɔ́ ỹɔ́w̃ɔ.

³⁵ Ná wáá ló ngáá ỹɔw̃ɔ́ ỹɔ́w̃ɔ, ná aa kɛ nungái kpɛ́lɛɛ ti ɣɛ́ suuwɔlɔ́ ngáá kɛ wá lɔ wú ngáá pólu yélaa.”

Jísu i yɛpɛí kɔwɔ́ato Pítɛ híɣesɔngai wa

³⁶ Kɛ Sáimɔ Pítɛ í mɔɔningá, i ɣɛ ma, “Kɛɛɣɛ́, míl̃inda lɔ yíwaa lí na?” Jísu í ngoo yápoteni, i ɣɛ ma, “Yɛ́i nɛ́ɛ́ to mbá mbéinda ngíwaa lí na, kɛ́ aáva yá lɔɔ́ vá tóma mbá ná naa gulo áá ɣɛ́ kpɛ́ɛ́.”

³⁷ Pítɛ í mɔ́ɔ́ mɔɔníni, i ɣɛ ma, “Kɛɛɣɛ́, ndéénii le ngɛ́i tó í wa h̃íí féa? Ngáá lɛɛh̃úi gúla kɛlɛ́ma í hááw̃a.”

³⁸ Kɛ Jísu í mɔɔningá, i ɣɛ ma, “Yáá lɛɛh̃úi gúla kɛlɛ́ma fááw̃a ngáá tɔɔỹaá? Kɛ́ ngí tɔ́ɔ́ỹai le í w̃a, tɛɛh̃ínai ɔ́ɔ́ ɣɛ p̃ɛ́ɛ́ í wókole, yáá híɣendaa ɣɛ nga sáwa ngáá yáá kɔ́lɔ.”