NJƆÚ 11 - Kɛ́lɛ Niinaí

Lásɔlɔ haalaí

¹ Siỹɛndópo yiláá i ɣɛi na tɔ́ɔ́ tolí ngáá Lásɔlɔ, seebɛngɔ́ i ɣɛi la. I ɣɛi ngáá taí sí h̃úu w̃ɔ́ɔ́ taá naa lolí ngáá Bɛ́tani. Naa lɔ ti ɣɛ́i na taá ngi héélai sítii tɔ́ɔ́ ɣɛ́ ti w̃a Mɛɛloí ɛ́ɣɛ Mááta.

² Mɛɛloí geleí sí lɔ́ i ɣɛi ngáá hɔ́wɔ ta í sɛ́ndi wulɔí vuní Ndemɔí Jísu gɔwɔ́i w̃a, í maa balé ngáá wundeɣái. Ngi héélai Lásɔlɔ va tɔ seebɛngɔ́ í ɣɛ́i la.

³ Lásɔlɔ heela félengɔi sítii pa tɔ tí keelá lɔ́veni Jísu yelé, ti ɣɛ́ ma, “Kawálai, í mbála vandaí í lóngɔ la seebɛngɔ́ɔ́ lé.”

⁴ Ná Jísu í keela woí sí ỹɛ́nini, i ɣɛi ta, “Seebɛí sí wu ngáá gulamá ngáá saá. Kɛ́ faí sí i ɣɛa nɔ́ɔ kɛinɔɔ́ nungáá ti tɔ kíya Ngalá káámaangɔ. Ná vólu, tí tɔ kíya Ngalángi H̃íỹɛndou Loí gáámaangɔ.”

⁵ Jísu i ɣɛi loní ngáá Mɛɛloí ɛ́ɣɛ Mááta ɛ́ɣɛ Lásɔlɔ.

⁶ Jísu i keela woí sí ỹɛ́nini kɔwɔ́ato Lásɔlɔ heebɛ haí wa, ná fíli su, i mɔɔ foló félengɔ ɣɛní mbéi i ɣɛ́i na.

⁷ Naa volú w̃a, kɛ Jísu i ɣɛa volú yélaitii ma, “A mú yángaima múl̃ɔ Judíya lataí h̃u.”

⁸ Kɛ polú yélai tí ngoo yápotenga, ti ɣɛ́ ma, “Kaamɔ́ɔ́, kuu félengɔi sí h̃u nɔ́ɔ, tataí ná h̃uu yélai ti ɣɛ́a loí ti í váá ngáá í hɔ́ɔ́ndaa ngáá kɔtu, yí ɣɛ́ múl̃ɔ mú yángaima múl̃ɔ na?”

⁹ Kɛ Jísu i ɣɛa ti w̃a, “Kɛ́mbɛ háwai i púu maah̃úú féle folo yílaangi h̃u? Nuí fíli áá híya ngáá foló, maa w̃ɔ́i ɛi bowa bɔw̃álale naa ɣɛngɔ́ aa ɣɛ lá mbɛ kpál̃au.

¹⁰ Kɛ́ ná áá híya kpindíí h̃u, aa bowa bɔw̃álale naa bindíngɔ aa ɣɛ la.”

¹¹ Ná Jísu í faí sítiini ndení, i mɔɔ ndií ngu ma, i ɣɛ ta, “A mu mbálai Lásɔlɔ aá lɔ́ náa lái nyii h̃u, kɛ́ nyá lɔɔ́ lí ngí maaléve.”

¹² Kɛ Jísu volú yélaitii tí ngoo yápotenga, ti ɣɛ́ ma, “Kaamɔ́ɔ́, ná wɔ́lii áá ɣɛ́ nyii h̃u, kɛ nduwú h̃u lɔɔ́ vá wuyamá.”

¹³ Jísu i ɣɛi áá yɛ́pɛ saí wa Lásɔlɔ í ɣɛ́i náá mbóni kɛ́ polú yélai taá ngátɔi mba, i ɣɛi ti gi má ngáá nyii gítei lɔ Jísu í ɣɛ́i ma.

¹⁴ Faalɔ, Jísu aa mɔɔ kaa pɛ́lɛi ma, i ndení náa ti w̃a nɔ́ɔ kpésekele, i ɣɛ ta, “Lásɔlɔ i haangá.

¹⁵ Kɛ́ ná fíli su, wá wú hááw̃a kɛinɔɔ́ wú la ngáá ngé, kóóh̃unɛɛngɔɔ lé ngwala ngáá naá laá naa ɣɛ́ngɔ ỹanda yílaa, kɛ́ a mu lí lɛ́ɛ ngelé.”

¹⁶ Jísu volú w̃ɔ́i sí tɔ́ɔ́ ɣɛ ma Tɔmɔsí ndaahéi pekai í ɣɛ́i ngáá Heelangí, i ndení Jísu volú yélaa vékaitii ma, i ɣɛ ta, “A muỹá bɛ́lɛ a mu lí Bɛ́tani taí h̃u kɛinɔɔ́ a mu báha Jísu wa, mu ha.”

Jísu lɔ í ngáá mbuyoɣé saa h̃u w̃ɔ́i ɛ́ɣɛ ndɛɛh̃u gítei hé mɔ́i

¹⁷ Ná Jísu í fóloni maa lái h̃u, kɛ i mɛningá ngáá ti ɣɛ́i náá Lásɔlɔ bɔluní aáva i ɣɛi náá kɛní ná ngáá foló nááningɔ.

¹⁸ Í gula Jɛlúsɛl̃ɛ taa walái h̃u, í fólo Bɛ́tani taí h̃u, ɛ́i belé kula ɣɛ ngáá hawa yílaa síya mbó máá.

¹⁹ Aáva Júsuai kpih̃íw̃aa tí vááni Mɛɛloíni ngaa Mááta yele ngáá kɛinɔɔ́ tí tí liiyápɔpɔ ti ndíya Lásɔlɔ haa haí w̃a.

²⁰ Ná Mááta i mɛ́nini ngáá Jísu aá tɔ́ áá vá, kɛ i yooɣénga ngáá í lí ngáá í Jísu laaw̃ɛ́ɛ́, Mɛɛloí vá i ɣɛi pɛ́lɛi wu.

²¹ Ná Jísuni ngaa Mááta ti w̃ɛ́ɛ́ni, kɛ Mááta i ɣɛa Jísu w̃a, “Kɛɛɣɛ́, kɛ bele yí ɣɛ́i mbéi, ní héélai Lásɔlɔ ɛ́i belé ɣɛ́ haaní.

²² Kɛ́ ná fíli su, ngí suuwɔlɔ́ ngáá ná yáá Ngala fɛ́li faa fíli fááw̃a, sí fíli yáa fɛlí faaw̃a, aa maa hái ɣɛ í yɛ.”

²³ Kɛ Jísu i ngoo yápotenga, i ɣɛ ma, “Í héélai Lásɔlɔ lɔɔ vá mɔ́ɔ́ yooɣéma saí h̃u, í ɣɛ́ ndɛɛh̃úi h̃u.”

²⁴ Mááta i ɣɛ ma, “Ngí suuwɔlɔ́ ngáá aá lɔɔ vá mɔ́ɔ́ yooɣéma saí h̃u ngetéyangi yakɛ́ɛ́lɛ foloí w̃a.”

²⁵ Kɛ Jísu i mɔɔ ɣɛa ma, “Nyá lɔ́ ngáá nungái mbuyoɣé saí h̃u ɛ́ɣɛ nyá lɔ́ ngaa ndɛɛh̃u gítei hé. Nuí fíli áá la ngáá ngé, maa w̃ɔ́i aa ɣɛ ndɛɛh̃ú gítei h̃u, ɔ́ɔ́ bɔ́ɔ́ ha bɛ́lɛ ngeleí sí wu.

²⁶ Nuí fíli pá áá ɣɛ́ ndɛɛh̃úi h̃u, aáva í lá ngáá ngé, maa w̃ɔ́i ɛi saa gítei w̃aahɔ́lɔ. Í lángɔɔ lé ngáá faí sí ngí ndéngɔ?”

²⁷ Kɛ Mááta í ngoo yápotenga, i ɣɛ ma, “Éei, Kɛɛɣɛ́, ndángɔɔ lé la ngáá yá lɔ́ yí ngáá Ngalángi Lókolo Mbá W̃ɔ́i, yá lɔ́ yí ngáá Ngalángi H̃íỹɛndou Lói, yá lɔ́ Ngalángi ndeí ngáá yá lɔɔ vá vaamá ngeleí sí wu.”

Jísu i wɔlɔni

²⁸ Ná Mááta í faí sí léni, i yangáimani naá í ngi ndéɣe Mɛɛloí lolí léélaa ti félengɔ, i ɣɛ ma, “Mu káámɔɔ Jísu i vaangá, aá lɔ́ í ŋál̃a w̃ɔ́ɔ́ni.”

²⁹ Ná Mɛɛloí i faí sí ỹɛ́nini, kɛ i yooɣénga ngáá maahulángɔ, í li Jísu yelé.

³⁰ Jísu va aa nɛɛ ɣɛi lɛí Bɛ́tani taí h̃u, i ɣɛi nɛ́nɛ mbéinda Mááta í maaleí na.

³¹ Nungái sítii ti ɣɛ́i Mɛɛloí w̃a pɛlɛ́i wu táá ndiiyápɔpɔ, ná tí tɔní í yooɣéi áá lí ngáá maahulángɔ, tiyá bɛ́lɛ tí yooɣéni tí tó mba. I ɣɛi ti gi má ngáá aá lɔɔ lí Lásɔlɔ gambaí ŋál̃a í ngɔlɔ́i tá wo na.

³² Ná Mɛɛloí í fóloni mbéi Jísu i ɣɛi na, í Jísu lɔní, kɛ i hitɛnga wumbu ya kakála, i ɣɛ ma, “Kɛɛɣɛ́, kɛ bele yí ɣɛ́i mbéinda ní héélai Lásɔlɔ ɛi belé ɣɛ ɣɛi haaní.”

³³ Ná Jísu í Mɛɛloí lɔni áá wɔ́lɔ ɛ́ɣɛ Júsuai sítii ti ɣɛ́i toní Mɛɛloí wa tiyá bɛ́lɛ táá wɔ́lɔ, Jísu lii yá ngáá ɣɛi nɛɛni i ɣɛi áá w̃aaw̃áánu ti haaw̃a.

³⁴ Kɛ i ti w̃ɔ́ɔ́ninga, i ɣɛ ti w̃a, “Míl̃inda lɔ́ wú kpɔlúngɔ na?” Kɛ tí ngoo yápotenga, ti ɣɛ́ ma, “Kawálai, vá, yí náa lɔ.”

³⁵ Jísu yaah̃ú wɔɔ́yai i vuni.

³⁶ Kɛ Júsuai ti ɣɛ́a ỹɔw̃ɔ́ ỹɔ́w̃ɔ w̃a, “Tɔ lɛɛ kái, kíya ndongɔ́ ngáá Lásɔlɔ.”

³⁷ Kɛ́ ti lɛ́ingaa va ti ɣɛ́i taa ɣɛ́ ỹɔw̃ɔ́ ỹɔ́w̃ɔ w̃a, “Aá mbole w̃ɔi yaah̃uí w̃áá wo, ndeénii le ɛ́i belé ɣɛ́ kɛní ngáá háwu Lásɔlɔ álaa há?”

Jísu i Lásɔlɔ wuyóɣei saí h̃u

³⁸ Jísu lii yá ngáá ɣɛi nɛɛni kulo bɛ́lɛ múl̃ɔ, kɛ i líínga kambái ŋál̃a mbɔngɔ í ɣɛ́i la ngáá kɔtú wokóngi. Ndaa vɛ́lɛngɔ i ɣɛi la ngáá kɔtu hɛvɛ́ wála.

³⁹ Kɛ Jísu i ɣɛa ti w̃a, “A kɔtu hɛvɛ́i híɣe kambái la.” Kɛ́ saa w̃ɔ́i héélai Mááta i ɣɛa Jísu w̃a, “Kɛɛɣɛ́, maakungí wála ỹɔungɔ́ aa ɣɛ náá la, sífaa foló nááningɔ i lɔvengá naá kpɔlungɔ́i w̃a.”

⁴⁰ Jísu i ngoo yápoteni, i ɣɛ ma, “Ngáá ndengɔ́ í w̃a ngáá yá lɔɔ vá tɔma kíya Ngalá káámaangɔ na nɔɔ́ nda ngáá ɣɛ í h̃u?”

⁴¹ Kɛ nungáitii tí kɔtu hɛvɛ́ wálai hiɣengá maa gámbai la, kɛ Jísu í wunga séinga, i ɣɛ ta, “Kɛɛɣɛ́, ngáá sɛ́ɣɛɛ gula í w̃a ngáá yáá ní hɛ́li ngoi yápote.

⁴² Ngí súúwɔlɔ ngáá í wolílongɔ le ma hɔ́wɔ fíli, kɛ́ nyá lɔɔ́ ngoí sí lé nɔ́ɔ nungái sítii ti lóóni mbéinda ngáá ti lá la ngáá kɛ yá lɔ́ yí tɔ́vengɔ ngeleí sí wu.”

⁴³ Ná Jísu i ɣɛ́i náá ngoí sí léni, kɛ i tolíngi wongá woo wála h̃u, i ɣɛ ta, “Lásɔlɔ, gula!”

⁴⁴ Kɛ Lásɔlɔ saangɔ́ í ɣɛ́i la, i gulangá kambái h̃u, tokói taa kɔwɔí w̃aayelé mbélengɔ ngáá puw̃a gúlai, ná vólu, kulaí yelé mbélengɔ ngaah̃ú. Kɛ Jísu i ɣɛa nungáitii ma, “A puw̃a gúlai nátii kulá gulá ma, wú bé mba í lí.”

Júsuai tí faa h̃uubatɛ́ mbóni ngáá ti Jísu vaa

⁴⁵ Faalɔ, Júsuai sítii kpih̃íw̃aa ti ɣɛ́i váni Mɛɛloíni kɔwɔ́ w̃a, tí laní ngáá Jísu ná tí tɔní í faí sí ɣɛní.

⁴⁶ Kɛ́ ti lɛ́ingaa va tí liiní Júsuai sítii ngelé taa ɣɛ́ ti w̃a Falósiai, tí faí sí le ti w̃a, Jísu í ɣɛ́i kɛní.

⁴⁷ Faalɔ, Falósiaitii ɛ́ɣɛ Ngala sááɣa gula mbélai ti wútuwɔai ti w̃ɛ́ɛ́ni taa Faa H̃uu Haa Lé Mbélaitii, tí ɣɛ́ ta, “Bɛɛ́ lɔ náá maa kɛ faí sí h̃u? Wɔlɛ lɛ́ɛ káámaa haí sí kpɛ́lɛɛ mba naá siỹɛndópoi sí íwaa kɛ.

⁴⁸ Ná a maa bé nɔɔ́ mba h̃íí na í ndí ngu ma ngáá káámaa haí sítii kɛndáá, nungái kpɛ́lɛɛ taá lá la aáva Lóómi gɔ́mɛti nuu walaítii taá va, tí Hɛ́ɛ́ma Yála Pɛ́lɛi ɣɛ kíli ỹááni í báha mu lɔ́wɔlɔi wa.”

⁴⁹ Kɛ́ ti ta yiláá, lɛí tɔ́ɔ́ ɣɛ́ ma Káyafa, í ɣɛ́i ngáá Ngala sááɣa gula mbélai ti wútuwɔɔ w̃ɔɔ walaí táingi ná h̃u, i ndení ti w̃a, i ɣɛ ta, “Wáá faa fíli kɔ́lɔ p̃ɛ́ɛ́ faí sí h̃u.

⁵⁰ Wáá suuwɔlɔ́ ngáá maanɛ́ɛ́ngɔ lé yiláá w̃ɔɔ í há nuu kpɛ́lɛɛ fááw̃a í lɔ́ve sí wa nungái kpɛ́lɛɛ taá saa w̃ááhɔlɔ?”

⁵¹ Aa ɣɛi ngáá Káyafa wumaawóó ɔ́ɔ́ nde, kɛ́ Ngalá ngí kɛ́ni faí sí í lɛ́ nda í nde bɔw̃álale laá lɔ́ í ɣɛ́i ngáá Ngala sááɣa gula mbélai ti wutúwɔɔ w̃ɔɔ walaí taíngi ná h̃u. Sí va í ndéni polú hái i ɣɛi ngáá Jísu i ɣɛi áá va haamá Júsuaitii faaw̃a.

⁵² Kɛ́ aa ɣɛi nɔ́ɔ́ léi ngáá Júsuai ngilaá fááw̃a, kɛ́ aá ɣéle, maa sái i ɣɛi na sítiini kínɛi fááw̃a ti ngáá Ngalángi vóngai ti vahá fáhangɔ ndɔwɔlɔ́i h̃u hááli kɛinɔɔ́ tí ɣɛ ngoo yiláá su.

⁵³ Í síɣe náá naa hɔwɔ́ w̃a, Júsuaitii ti wútuwɔaitii ti wálangɔ i ɣɛi náá lá Jísu w̃aawóya h̃u ngáá tí páa.

⁵⁴ Faalɔ, Jísu aa mɔɔ ɣɛi áá gúla kalá kála ma Júsuai ndiiwáá. Kɛ i liingá taí sí h̃u taa tolí ngáá Ɛfíỹɛ í ngaalaí h̃uu véle. Naa vá tɔ náá ti ɣɛ́i na taá polú yélaitii.

⁵⁵ Suu áá mɔ́ɔ ɣɛi gooh̃á kɛ i folongá Júsuai ti guí ná taa tolí ngáá Ngumaawó Kúi wuya sɔ́wɔi w̃a, nungáá bih̃íw̃aa va tí vááni taa gúla Jɛlúsɛl̃ɛ bela látai nátii kpɛ́lɛɛ kpɛ́lɛɛ su, tí lí Jɛlúsɛl̃ɛ. Tí liiní ngáá kɛinɔɔ́ tí bɔwɔ wuyá faa ỹɔ́u háitii su p̃ɛ́ɛ́ Ngumaawó Kuí ɔ́ɔ́ ɣɛa foló ma.

⁵⁶ Ná ti ɣɛ́i náa maa gúi w̃a, ti ɣɛ́i náa taá yaah̃ú híya hiyá ngáá Jísu. Aáva ná tí yátɛni mba Hɛ́ɛ́ma Yála Pɛ́lɛi wu, ti ɣɛ́i náa taá ỹɔw̃ɔ́ ỹɔw̃ɔ́ w̃ɔɔni mɔɔní, tíwaa ɣɛ́ ta, “Baa Jísu ɔɔ va vaamá yɛ́ɛ́ kuí sí w̃a, baa ɛi wɔɔ va?”

⁵⁷ Kɛ́ Falósiaitii ɛ́ɣɛ Ngala sááɣa gula mbélai ti wútuwɔaitii tí ndení nungáitii ma ngáá nuí fíli áá ɣɛ́ kɔlɔ mbéi Jísu í na í nde ti w̃a. Kɛ ngimɔ́ɔ́ ti ɣɛ́i loí ti Jísu hou.