Keela woó vándai Máa í pɔ́nɛni kɔwɔ́ato Jísu Kílisitii wa MÁI 6 - Kɛ́lɛ Niinaí

Násɔlɛ yeláitii ti bééleni Jísu wa

¹ Jísu i gulaní maa ỹándai wa, í li taá polú yélaitii taí sí h̃u tí kulaní sú na.

² Ná Júsuai ti Lɛ́ɛ́lɛmbo Ngála Fɛli Fóloi í fóloni ma, Jísu í pɛ́lɛ kalambongí wóma Júsuai ti Yála fɛli máákpɔ wotaí wu. Laáva sítii tí ngóó ỹɛ́nini, ti gindáá vílingɔ i ɣɛi lá, kɛ tí mɔ́ɔ́ningi wónga, ti ɣɛ́ ta, “Míl̃inda lɔ siỹɛndópoi sí í faí sítii kpɛ́lɛɛ mááhɔlɔngɔ na? Míl̃inda lɔ́ í kéle ɣeléngi sí w̃aahɔ́lɔngɔ na? Aá lɔɔ ɣéle káámaa haítii kɛ?”

³ Ti mɔ́ɔ ɣɛ ta, “Kápindai láa ngáá sí? Mɛɛloí lói laa ngáá sí? Jimisíni ngaa Joosɛ́ ɛ́ɣɛ Júdɔni ngaa Sáimɔ ti ndíyai laa ngáá sí? Kɛ́mbɛ ngi héélaitii tɔ mbéinda?” Faalɔ, ti bééleni Jísu wa.

⁴ Kɛ Jísu i ɣɛa ti w̃a, “Ỹánda fíli nuu kpɛ́lɛɛ taá ngúfema hé Ngalá ndaa háá lé mɔ́ɔ́ yɛ kɛ nɔ́ɔ léi kpɔwɔ́ bɔ́wɔ lái h̃úu yélaitii, ngi wólondaitii, ɛ́ɣɛ kpɔwɔ́ bɔ́wɔ vɛ́lɛ wuu yélaitii, tiyá lɔ tɛí ngúfema hé mbɛ.”

⁵ Faalɔ, Jísu aa káámaa haa fíli kɛ́ni kɛ nɔ́ɔ léi sí í lóko vɛ́lɛi seebɛ yelái tɛingáá w̃a, í tí waló.

⁶ Jísu gindáá vílingɔ i ɣɛi lá sífaa nda ngáá ɣɛ́i Násɔlɛ yeláitii su. Jísu i lɔve tɔvéni ná taítii su, áá nungáitii kálambo.

Jísu i volú yélaa púúngɔ maah̃úú félengɔitii tɔ́veni

⁷ Kɛ i volú yélaa púúngɔ maah̃úú félengɔitii tólinga ỹánda yílaa, í ti lɔ́ve tɔvé ngáá felé féle. Ná vólu, í ngakpá fé ti yaá ỹína nyɔítii téve fááw̃a nungáitii polú.

⁸ Ngoí sítii Jísu í ndéni ti w̃a tiyá lɔ ngáá sí, i ɣɛi ti w̃a, “A waá ŋáni fíli ngéɣe síyangi sí w̃a kɛ nɔ́ɔ léi siya túkpɔ yílangi. A waá mɛ́ɛ́ni fíli ngéɣe kɛlaa bɛ́bɛ. Ná vólu, a waá náholo fíli ngéɣe.

⁹ A kɔɔva wála kɛ́ a waá ndóma péka báha sí wa í wú w̃á.

¹⁰ Ná wáá lɛ́ pɛlɛ́ fíli mbú, a ló na í ló su kpóloo wú gúla taí ná wa.

¹¹ Kɛ́ aáva taa fíli sú nuu fíli ɛ́i ɣɛ́ lókoheini wú wú na, kɛlaa tɔɔ́ wólilo wú w̃á, a gulá náá wa wú náá húfulengi bɛ́kpɛlɛ gɔ́wɔ ya. Ná lɔ áá ngákɛ ngáá ti ye ngáá kɛ ti velé lálangɔɔ lé.”

¹² Faalɔ, Jísu volú yélaitii tí liiní tí Ngala ngói le ngáá nungáitii tí vólu yáfe ti háá ỹɔítii mba.

¹³ Ná vólu, ti ỹína nyɔu bih̃íw̃aa léveni nungáitii pólu. Ná vólu, tí ngúlɔ híyani séébɛ yeláá bih̃íw̃aa wú mba aáva tí waló.

Nguya Wo Mɔ́i Njɔú háálai

¹⁴ Masangí tɔ́ɔ ɣɛ́ ma Hɛ́lɔdi, i sí kpɛ́lɛɛ máá woo ỹɛ́nini Jísu í ɣɛ́i áá kɛ, bɔw̃álale Jísu w̃aa woo í híyani ngwála. Nungáitii ti lɛ́ingaa ti ɣɛ́i taa ɣɛ́ ta, “Nguya Wo Mɔ́i Njɔú lé í yóɣenga sái h̃u. Ná lɔ́ í kɛ́a ngakpángi í ngeya áá káámaa haí sítii kɛ.”

¹⁵ Pekaítii ti ɣɛ́i ta, “Ngalá ndaa háá le mɔ́i Iláija le.” Kɛ́ ná fíli sú, ti lɛ́ingaa ti ɣɛ́i taa ɣɛ ta, “Ngalá ndaa háá lé mɔ́ɔ́ le kíya nɔ́ɔ Ngalá ndaa háá lé mbélai ti tá ti ɣɛ́i na wɔ́lɔ wɔ́lɔmai h̃u.”

¹⁶ Ná Hɛ́lɔdi í faí sí ỹɛ́nini Jísu í ɣɛ́i áá kɛ, i ɣɛi ta, “Njɔú ngí kɛ́ni ngáá háwu tí ngungí léveni mba aá lɔ́ í yóóɣenga sái h̃u.”

^17-18 Hɛ́lɔdi i kisiyái sí wói, bɔw̃álale, sí ɔ́ɔ́ ɣɛ́ p̃ɛ́ɛ́ í ɣɛ́, i ɣɛi náá Hɛlɔ́diya yéɣei, ngi ndéɣe Félepi ỹah̃aí ngáá ngi ỹáh̃a. Aáva Nguya Wo Mɔ́i Njɔú í ɣɛ́i áá nde Hɛ́lɔdi w̃a, áá ɣɛ́ ma, “Aa pele w̃a ngáá yɔ́ɔ́ í ndéɣe Félepi ỹáh̃ai Hɛlɔ́diya yeɣé ngáá í ỹáh̃a.” Náá hááw̃a, Masangí Hɛ́lɔdi i nungáá lɔ́veni ngáá tí Njɔú hóu ti ngíli, tí píli kpindi vɛlɛ́i wu.

¹⁹ Faalɔ, Hɛlɔ́diya liiyáw̃al̃angɔ wala i ɣɛi lá Njɔú yáa. Ná vólu, i ɣɛi loní í páa kɛ́ aa nɛɛ ɣɛi pele hɔ́lɔni mba,

²⁰ sífaa Hɛ́lɔdi i ɣɛi áá wúfe ngwala Njɔú w̃á. Ná vólu, áá maah̃ú béle, bɔw̃álale i ɣɛi kɔlɔ́ ngáá kɛ Njɔú lɔ́ ngáá telembo mɔ́ɔ́ ɛ́ɣɛ hɛ́ɛ́ma w̃ɔ́ɔ́. Ná Hɛ́lɔdi ɔ́ɔ́ Njɔú wói ỹɛ́ni, ɔ́ɔ́ ndiiỹááni ngwala. Kɛ́ ná fíli sú, i ɣɛi loní ngáá Njɔú wói ỹɛ́nindaa.

²¹ Ngapúmai náa tɛ́ɛ́lɛ tɛ́ɛ́lɛ, kɛ Njɔú váándai i ɣɛa ngáá solowo fáá Hɛlɔ́diya yaá. Folói sí tí Másangi Hɛ́lɔdi lení ma, ná maa hóloi í fóloni ma múl̃ɔ, Masangí Hɛ́lɔdi i mɛɛni wála yilíni gɔ́mɛti nuu wala walaítii taa sóyaitii ti núú wala walaítii mbɛ ɛ́ɣɛ tɔwɔ́ mba yélaitiini Galéli lataí h̃u.

²² Ná Hɛlɔ́diya ỹah̃aloí í lɛ́ɛ́ni, í ndoolií wóni, ndoolií ná í Másangi Hɛ́lɔdi liilɛ́ini tɔ́ tɔ taá ngi hótangaitii. Faalɔ, i ɣɛi nyah̃alói w̃a, “Sí fíli yáá ndaahéi kɛ́, ngáá fé í yáá.”

²³ Laáva kɛ́lɛngi í ngéɣeni nyah̃alói yaá i ɣɛi ngáá, “Sí fíli yáá ndaahéi kɛ, ngáá fé í yáa. Í bɔ́ɔ́ ɣɛ ngáá ní w̃ásandai gaka yílangi.”

²⁴ Kɛ nyah̃alói i liingá i ɣɛ ngi njéé w̃a, “Bɛɛ́ lɔ́ ngáá ndaahéi kɛ?” Ngi njéé i ngoo yápoteni, i ɣɛ ma, “Nguya Wo Mɔ́i Njɔú wúngi.”

²⁵ Kɛ nyah̃alói i liingá nɔ́ɔ́ ngamá bála bala, i ɣɛ Masangí Hɛ́lɔdi w̃a, “Ndóngɔɔ lé yí Nguya Wo Mɔ́i Njɔú wúngi hé ngéya kíya suú í na, í ɣɛ́ lááni nyaaká h̃u.”

²⁶ Masangí Hɛ́lɔdi w̃aaw̃áánungɔ i ɣɛi lá ngwala. Kɛ́ sífaa í ɣɛ́i náa kɛ́lɛ ngeɣéni, ngi hótangaitii kakála, faalɔ, aa ɣɛi loí ɔ́ɔ́ léle kɛ fááw̃a nyah̃alói yaá.

²⁷ Faalɔ, Masangí Hɛ́lɔdi í sóya w̃ɔí lɔ́veni nɔ́ɔ ngamá, í ɣɛ ma, “Lí, yí Ngúya Wo Mɔ́i Njɔú wúngi léve mba, yí váá la.” Sóya w̃ɔí ná i liiní, í Njɔú wúngi léve mba kpindi vɛlɛ́i wu,

²⁸ í váa lá vólu, i lááni nyaakái h̃u. Í fé nyah̃alói yaá, ná va í fé ngi njéé yaá.

²⁹ Ná Njɔú vólu yélai ti sí ỹɛ́nini, tí vááni, tí ngí vúw̃ai yéɣe, tí kpɔ́lu.

Jísu i nuu bíh̃iw̃aa laawɔ́ni

³⁰ Sítii Jísu í ɣɛ́i ti lɔ́veni ngáá Ngalángi géélaitii, tí yatɛ́ni mba Jísu yelé, ti sí kpɛ́lɛɛ súú ɣɛ la ti ɣɛ́i kɛní ɛ́ɣɛ kalambongí tí mbóni ngáá nungáitii.

³¹ Kɛ́ nungáitii ti bih̃í kílii w̃a ti ɣɛ́i taa lɛ́ táá yéi mbéi Jísu í ɣɛ́i na, Jísuni ngaa polú yélaitii tɛ́i belé lóko hɔ́lɔ tɔɔ́ laaỹɛ́. Jísu va i ɣɛ volú yélaitii ma, “A hitɛ pólu, a mu lí tévemba h̃u, a mú lɛ́ɛ́lɛmbo na muỹá léé léé.”

³² Kɛ Jísuni ngaa polú yélaitii ti vílinga kélengi h̃u, tí li tevémbai h̃u.

³³ Kɛ́ nuu bíh̃iw̃aa tí tí lɔní tíwaa lí aáva ti gingí lóni tí h̃u. Faalɔ, nungáitii ti víliỹɛni, ti híya gɔwɔ́ w̃á, tí lí naa lúwɔ.

³⁴ Ná Jísu í hítɛni kélengi h̃u, i faŋa walá ya tɔ́i vúúni. Ti w̃ááw̃aanu í sóuni bɔw̃álale ti gúlangɔ i ɣɛi nɔ́ɔ lá ngáá mbaalaá ti w̃ááh̃u béle mɔ́ɔ ɛ́i ɣɛ́ na. Faalɔ, i pɛlɛní náa ti galámboma ngáá faa bíh̃i bíh̃i.

³⁵ Táingi ná h̃úú vá, folói liingɔ́ i ɣɛi náá lá. Faalɔ, Jísu volú yélaitii ti liiní ngelé, ti ɣɛ́ ma, “Folói liingɔ́ɔ́ lé náa, mbéi vá tɔ́ ngáá tévemba h̃u.

³⁶ Faalɔ, nungái sítii tɔ́ve kpaalaítii su ɛ́ɣɛ kokóitii nga ti mbéinda béla kɛinɔɔ́ tí mɛɛní yaá bɔ́wɔ hááw̃a tí mɛ.”

³⁷ Kɛ́ Jísu i ti woo yápoteni, i ɣɛ ta, “Wá ɣéle a mɛɛni hé ti yaá, tí mɛ.” Kɛ ti ɣɛ́a Jísu w̃a, “Ná ná áá ɣɛ́, ná naá ɣɛ́ ní bilé yáa í kulaɣɛ sítii kínɛi mbá kɛ kaní kóle hɔ́ndɔ félengɔ aa ɣɛ ngáá ná. Niyá lɔ naa ná l̃ɔ́ingi yéɣe, ní maa híya bilé w̃á, ní fé sítii ngeyá, tí mɛ?”

³⁸ Kɛ Jísu i ti w̃ɔ́ɔ́ninga, i ɣɛ ti w̃a, “Bilé búsa nɔ́nɛngɔ lɔ í wú yáá? A lí lɛ́ɛ́ wú tɔ.” Ná polú yélaitii ti wɔ́lɛni na, ti ɣɛ́i ma, “Bilé búsa ndɔ́ɔ́lungɔ ɛ́ɣɛ nyɛɛ busá félengɔ.”

³⁹ Kɛ Jísu i ndengá ti w̃a, i ɣɛ ta, “A nde nungáitii kpɛ́lɛɛ má ti héi ndɔwɔlɔ́i wa kpitingí ya, tí buutó búúto mba.”

⁴⁰ Kɛ nátii ti héinga, tí buutó búúto mba ngáá hɔ́ndɔ ngiláá ngílaa, ti lɛ́ingaa puu lɔɔ́lu ndɔ́ɔ́lu.

⁴¹ Kɛ Jísu i bilé búsa ndɔ́ɔ́lungɔi yeɣénga ɛ́ɣɛ nyɛɛ busá félengɔi, í wúnga séi ngeleí ya, í sɛ́ɣɛɛ gula Ngalá ma. Kɛ i bilé búsai nátii ngalé ngálenga su, í tí he volú yélaitii ngeyá ngáá tí kɔlɛ wɔlɛ́ nungáitii mba. Í mɔ́ɔ nyɛí bɛ́lɛ ngále ngále su, í ti he volú yélaitii ngeyá ngáá tí kɔ́lɛ wɔlɛ́ nuí kpɛ́lɛɛ mbá.

⁴² Ti kpɛ́lɛɛ tí mɛní aáva í kúlaɣɛ ngáá ti ye.

⁴³ Jísu volú yélaitii tí bíle w̃átaitii ɛ́ɣɛ nyɛɛ w̃atáitii ngátɛni mba ti gúlani polú, í kámbali ngwála wála púúngɔ maah̃úú félengɔ laahé.

⁴⁴ Siỹɛngáitiini sɔíngi tí ndaaỹɛ́ngi wóni, ti ɣɛ́i ngáá tásu ndɔ́ɔ́lungɔ.

Jísu hiyalaí njɛí ya

⁴⁵ Ngamá nɔ́ɔ, Jísu i ndení vólu yélaitii ma ngáá ti víli keléngi h̃u ti lí naa lúwɔ taí sí h̃u taá tóli ngáá Bɛsééda, laá va í nungáitii tɔ́veni náa ti láitii su.

⁴⁶ Ná Jísu í hɛ́lini vólu yélaitii ma, i lɛɛní náa ngihéi wa ngáá í Ngala fɛ́li.

⁴⁷ Ná kpíndii í vɛ́lɛni, Jísu volú yélaitii ti ɣɛ́i keléngi h̃u njɛ wálai liiwáá, Jísu va i kaséngi ya ngilangɔ́.

⁴⁸ Kɛ i volú yélaitii tɔngá keléngi h̃u, keléngi wúlindaa bɔlungɔ́ ti la, bɔw̃álale fɛfɛngí i ɣɛi áá gúla ti líí veléi h̃uu véle. Ngelesú bíndii, Jísu i vaaní vólu yélaitii ngéle íwaa híya njɛí ya. Ná í ɣɛ́i náa áá vá ngáá hiya ti bélaa véle,

⁴⁹ kɛ tí tɔ́nga íwaa híya njɛí ya. I ɣɛi ti gi má ngáá kɛ ngafuw̃á te. Faalɔ, tí báini,

⁵⁰ sífaa ná ti kpɛ́lɛɛ tí tɔ́ni, nduwái i ɣɛi ti h̃u ngáá suulɔ́vengɔ. Kɛ́ Jísu i yɛpɛní tí yelé ngáma, i ɣɛ ti w̃a, “Nyáá le. A wáá lúwa!”

⁵¹ Kɛ i vilingá kélengi ná h̃u ti ɣɛ́i su, fɛfɛngí vá ngangí yéini náa. Kɛ́ polú yélaitii ti gindáá vílingɔ i ɣɛi lá ngwala,

⁵² bɔw̃álale taá ngátɔni mba kíya Jísu í nuu tásu ndɔ́ɔ́lungɔi laa wɔ́ni ngáá bilé búsa ndɔ́ɔ́lungɔi ɛ́ɣɛ nyɛɛ busá félengɔi. Ti gi máitii ndaa vɛ́lɛngɔ i ɣɛi lá.

Jísu i seebɛ yeláitii mbalóni Gɛnɛ́sɔlɛ

⁵³ Aáva ná Jísuni ngaa polú yélaitii tí njɛí léveni, ti hítɛni náa tataí sí h̃u taá tóli ngáá Gɛnɛ́sɔlɛ tí kélengi búlɔ.

⁵⁴ Ná nɔ́ɔ léi ti hítɛni kélengi h̃u, nungái ti ɣɛ́i náa Jísu wɔlɔ́ ngáma.

⁵⁵ Nungáitii ti víliỹɛni náa tataí ná kínɛi sú, tí vá ngáá seebɛ yeláitii Jísu yelé mbéi fíli tɔ́ɔ́ maa woo ỹɛ́ni na. Seebɛ yelái nái pa tɔ́ɔ ɣɛ́ lái bɔwɔ́ hábaitii ma tí va ngáá ti ye.

⁵⁶ Aáva mbéi fíli Jísu ɔ́ɔ́ lí na kokóitii nga, taa walá wálaitii su, ɛ́ɣɛ taítii su, nungáitii tɔ́ɔ́ lí ngáá seebɛ yeláitii ngelé ngití wálai ya, tíwaa maanɛ́ɛ́nɛ ngáá í lúw̃a ma seebɛ yeláitii ti lúba bɛ́lɛ ngi lóma kooh̃aí wóliyangi wa. Aáva sítii kínɛi ti lúbani mba, tí wáloni.