Keela woó vándai Máa í pɔ́nɛni kɔwɔ́ato Jísu Kílisitii wa MÁI 5 - Kɛ́lɛ Niinaí

Jísu i ỹína nyɔítii tévei siỹɛndópoi vólu

¹ Kɛ Jísuni ngaa polú yélaitii tí Galéli Yɛ Walaí ná lévenga, tí lí tataí ná h̃u taá tóli ngáá Gɛlása.

² Ná nɔ́ɔ lɛ́i Jísu í hítɛni kélengi h̃u, siỹɛndópo yiláá ỹína nyɔítii ti ɣɛ́i polú i gulaní kambáhangi h̃u í vá Jísu yelé.

³ Siỹɛndópoi sí i ɣɛi nɔ́ɔ kambáhangi h̃u, aáva nuu fíli ɛ́i belé hómbo ɔ́ɔ́ njɔlɔwɔ vú mba.

⁴ Sífaa hɔ́wɔ fíli tɔ́ɔ kpakpá, tí njɔ́lɔwɔi vú mba, kɛ́ ɔ́ɔ́ tevé lokoí wa, í gúla kpeléwɔi ya. Nuu fíli aa ɣɛi na suubangɔ́ ɔ́ɔ́ ɣɛ́ la ngáá ɔ́ɔ́ sóu.

⁵ Foló p̃ɛ́ɛ́ kpindí p̃ɛ́ɛ́, i ɣɛi nɔ́ɔ kambáhangi h̃u ɛ́ɣɛ ngihéitii su íwaa woo gúla, íwaa bɔ́wɔ w̃al̃a w̃ál̃a ngáá kɔtuítii.

⁶ Ná í Jísu lɔní p̃óu ma, i viliỹɛ́ni í lí, í hítɛ wumbú ya Jísu gakála.

⁷ Kɛ i woo gúlanga gbél̃eiŋ, i ɣɛ Jísu w̃a, “Jísu, ndeé lɔ í lóngɔ yí kɛ ngáá ngé yɛ́i yí ngáá Ngutuwɔ́ Yála Ngwalaí H̃íỹɛndou Loí? Véle Ngála ma ngáá yáá faa bá ndáma má!”

⁸ Siỹɛndópoi i ngoí sí léni sífaa Jísu i ɣɛi áá ɣɛ́ ma, “Ỹína nyɔí, léve siỹɛndópoi sí vólu.”

⁹ Kɛ Jísu i siỹɛndópoi w̃ɔ́ɔ́ninga, i ɣɛ ma, “Í lááheingi?” Kɛ siỹɛndópoi i ngoo yápotenga, i ɣɛ ma, “Ndááhei mbáá ngáá Mbɛmbɛngí, sífaa ni bih̃íngɔɔ lé.”

¹⁰ Kɛ́ i Jísu w̃aanɛ́ɛ́nɛni ká ká, i ɣɛ ma, “Yaa ỹína nyɔí sítii kúla tataí sí h̃uu wá.”

¹¹ Búbu yámbɔɔlɔngɔ wála ti ɣɛ́i naa béla, tíwaa laaỹɛ́ ngihéngi góóɣaka w̃á.

¹² Faalɔ, ỹína nyɔu ỹɔungáitii ti Jísu w̃aanɛ́ɛ́nɛni, ti ɣɛ́ ma, “Ni lɔ́ve búbuaitii ndiiwáá ni víli ti h̃u.”

¹³ Jísu va i luw̃áni ma. Faalɔ, ỹína nyɔí nátii tí léveni siỹɛndópoi ná vólu, tí lí ti víli búbuaitii su. Búbuaitii pa ti ɣɛ́i bɛ́lɛ ngáá tásu félengɔ ỹɔkɔ́. Ti kpɛ́lɛɛ tí lííni ngáá viliỹɛ́ ngihé ngásɛlɛ sɛ́lɛngi ya, ti víli njɛ wálai wu, tí ló mbu.

¹⁴ Sítii ti ɣɛ́i taa búbuaitii maah̃ú belé, tí lííni ngáá viliỹɛ́, tí máa woo híya taí h̃u ɛ́ɣɛ kpaalaítii ma ti ɣɛ́i naa béla. Nungáitii pa tí vááni tí tɔ sí í ɣɛ́ni.

¹⁵ Ná tí vááni Jísu yelé, tí siỹɛndópoi lɔní ỹína nyɔítii tevéngɔ náa polú. I ɣɛi héini maayílingɔ, ngungí h̃úúlangɔ náa. Faalɔ, faí sí i nduwá vúni nungáitii kpɛ́lɛɛ sú.

¹⁶ Sítii ti ɣɛ́i na faí sí í ɣɛ́i, tí suu ɣɛí kpɛ́lɛɛ ngáá nungáitii sí í híyani ngáá siỹɛndópoi sí ỹína nyɔítii ti ɣɛ́i polú ɛ́ɣɛ sí í ɣɛ́i ngáá búbuaitii.

¹⁷ Faalɔ, nungáitii ti Jísu w̃aanɛ́ɛ́nɛni, ti ɣɛ́ ma, “Yí véleni kái gula ni látai h̃úú wa.”

¹⁸ Ná Jísu í ɣɛ́i áá víli keléngi h̃u, siỹɛndópoi sí ỹína nyɔítii tevéngɔ í ɣɛ́i náa lá polú, i Jísu w̃aanɛ́ɛ́nɛni, i ɣɛ ma, “Bɛlɛ́ ngí tó í wá, mu lí.”

¹⁹ Jísu aa kɛní, kɛ́ i ɣɛi siỹɛndópoi w̃a, “Lí vólu í vóngaitii ngelé, yí súúɣɛ ngáá ti ye sí kínɛi Ndemɔí Ngála ngí kɛ́nga í yɛ́ ɛ́ɣɛ kíya í í yááh̃u w̃ááw̃aanu hóungɔ.”

²⁰ Siỹɛndópoi ná va i liiní náa, í pɛ́lɛ ndemá nungáitii ma tataí sí h̃u taa tolí ngáá Taa Púúngɔ Látai ngáá sí h̃ɔ́ingi Jísu í kɛ́nga mbɛ. Aáva nungáitii kpɛ́lɛɛ ti gindáá vílingɔ i ɣɛi lá.

Jáilɔ ỹah̃aloí ɛ́ɣɛ nyah̃ápoi í lúbani Jísu gulaí wa

²¹ Ná Jísu í ɣɛ́i náá njɛ wálai levéni kaká vékai w̃a, ngangáima w̃ái keléngi h̃u múl̃ɔ, faŋa walá i yatɛ́ni mba ma.

²² I ɣɛi nɔ́ɔ lóóni njɛí la, kɛ Ngala fɛ́li máákpɔ wotaí wu wútuwɔ w̃ɔ́ɔ́ yiláá tɔ́ɔ́ ɣɛ́ ma Jáilɔ i vaangá na. Ná í Jísu lɔní, í láni mbɛ,

²³ i maanɛ́ɛ́nɛ ngáá hɛmbɛ́ fíli, i ɣɛ ma, “Ní ỹáh̃alou guloí lɔ náá saa lowá la. Vá kái, yí loko vɛ́lɛ ma kɛinɔɔ́ í wálo kái álaa há.”

²⁴ Jísu va i toní mba, tí lí taá láa. Faŋa walá i toní Jísu wa, tíwaa híɣa hiɣá mba.

²⁵ Nyah̃ápo yiláá pá i ɣɛi na lɛ́i maaw̃uỹá héébɛi í ɣɛ́i náá kɛní mba ngáá fowó púúngɔ maah̃úú félengɔ.

²⁶ Maa í ɣɛ́i náá nɔw̃ɔ́i ngáá seebɛí sí ngwála salé vɛ́lɛ laa yénge mbelaa bih̃íw̃aa lóko h̃u. Laáva i ɣɛi náa sí kpɛ́lɛɛ mááhiyani í ɣɛ́i ngeyá. Kɛ́ laá ɣéle, sí ɔ́ɔ́ kɛ í waló, suu í ɛ́i nɔ́ɔ áá ɣɛ́ wɔ́ɔ́lɔ ngwala.

²⁷ Ná í Jísu w̃aa woo ỹɛ́nini, i liiní polú véle sá sá faŋaí h̃u, í lúba Jísu gulaí wa.

²⁸ Sífaa i ndení gí ma, i ɣɛ ta, “Ná nɔɔ́ léi bɛ́lɛ ngáá lúba ngi gúlai wa, ngáá wálo.”

²⁹ Ngamá nɔ́ɔ, maaw̃uỹá héébɛi ná i walóni náa mba. Laáva i ngatɔ́ni luwú h̃u ngáá kɛ i gulangá ngi w̃áánɔw̃ɔi h̃u.

³⁰ Ngamá nɔ́ɔ, Jísu i ngátɔni ngáá kɛ ngakpángi tá í gúlanga su. Faalɔ, i votení faŋaí h̃u, í mɔ́ɔ́ningi wo, i ɣɛ ta, “Ele lɔ í lúbangɔ ní gúlai wa?”

³¹ Kɛ polú yélaitii tí ngoo yápotenga, ti ɣɛ́ ma, “Yáá tɔ táá híɣa hiɣá í wa, ná fíli sú yíwaa mɔ́ɔ́ni mbó ngáá ele lɔ í lúbangɔ í gúlai wa?”

³² Kɛ́ Jísu i ɣɛi nɔ́ɔ kélei áá wɔ́lɛ wɔlɛ́ w̃a ngáá í tɔ́ nuí í lúbangɔ mba.

³³ Kɛ́ ná nyah̃ápoi í ɣɛ́i náa kɔlɔ́ ngáá sí í ɣɛ́a lá, i liiní ngáá nduwá suu áá bɛ́li, í lá Jísu yɛ. Sí í ɣɛ́i hiyaní lá, í kpɛ́lɛɛ súúɣɛ la, aáva i ngáá tɔɔỹaá.

³⁴ Kɛ Jísu i ɣɛa ma, “Mu mbálai, í lángi í í h̃u í í wálonga. Lí ndiilɛí h̃u, ná vólu, yí gúlaa í w̃áánɔw̃ɔi h̃u.”

³⁵ Jísu i loní nɔ́ɔ njɛpɛí vúma, kɛ siỹɛngáá lɛingáá ti híɣenga Jáilɔ vɛlɛí la, ti ɣɛ́ ma, “Í ỹáh̃a loí i haangá. Ndeénii lé múl̃ɔ yíwaa Kaamɔí Jísu h̃uubɛ́ɛ́ɣi?”

³⁶ Jísu aa wolí ɣɛ́i sí w̃a tí ndéni, kɛ́ i ɣɛi Jáilɔ w̃a, “Yaá liihɛ́lɛ, ndangí í ɣɛ́ nɔ́ɔ í h̃ú.”

³⁷ Kɛ́ Jísu aa kɛní nuu fíli ɔ́ɔ́ hítɛ polú kɛ léi Pítɛ, Jimisí, ɛ́ɣɛ Njɔú, Jimisí ndéɣei.

³⁸ Ná tí fóloni Jáilɔ vɛlɛí la, Jísu i ngɔlɔ́ wála w̃ááleni na.

³⁹ Kɛ i lɛɛngá mbéi ndópoi í ɣɛ́i lááni na, i ɣɛ ti w̃a, “Ndeé lɔ sɔɔlɛ wálai sí ɛ́ɣɛ ngɔlɔ́i í fááw̃a? Ndopói háángɔ láá le, kɛ́ aá lɔ nɔ́ɔ nyii h̃u.”

⁴⁰ Kɛ nungáitii tí ngɛ́lɛ gúlanga Jísu h̃u. Jísu va í ti kpɛ́lɛɛ kúlani ngitíí ya, í ndóu kɛ́ɛ́ɣɛini ngaa ngi njéé yéɣe ɛ́ɣɛ polú yéla sáángɔi sítii ti ɣɛ́i polú, tí lɛ́ mbéi ndopói í ɣɛ́i lááni na.

⁴¹ Kɛ Jísu i ndopói hóunga tokoí wa, i ɣɛ ma Híbulu woí h̃u, “Talíta kóumi,” ná wúi wáá ngáá, “Nyah̃alóu guloí, ngí ndé í w̃a, yooɣé!”

⁴² Ngamá nɔ́ɔ, ná í yooɣéni, í lɔ́ve tɔvé kpóloo, aáva i ɣɛi ngáá fowó púúngɔ maah̃úú félengɔ lóu. Faí sí i nungáitii kpɛ́lɛɛ gíndaa vílini ngwala.

⁴³ Kɛ́ Jísu i ndaahi kpá kpá mbóni ngáá ti ye, i ɣɛ ti w̃a, “A waá kɛ nuu fíli ɔ́ɔ́ ɣɛ́ faa wɔ́lɔ faí sí wa. A mɛɛní hé nyah̃alóu guloí yáa í mɛ.”