Keela woó vándai Máa í pɔ́nɛni kɔwɔ́ato Jísu Kílisitii wa MÁI 16 - Kɛ́lɛ Niinaí

Jísu yooɣéndai saí h̃u

¹ Ná Júsuaitii ti Lɛ́ɛ́lɛmbo Ngála Fɛli Fóloi í gúlai su, Mɛɛloí Magadála w̃ɔí ɛ́ɣɛ Jimisí njéé Mɛɛloí ɛ́ɣɛ múl̃ɔ Sálomi, tí ngúlɔ w̃ááku nɛɛ nɛɛ ngeyáni ngáá ti lí tí pú Jísu vuw̃aí w̃a kambái h̃u.

² Ngelendáá lɛtɛngí, Tɛnɛ́mai hóloi, ngáá folói í ɣɛ́i náá yooɣéi kínɛi vóma, ti ɣɛ́i peléi h̃u tíwaa lí kámbai ŋál̃a.

³ Kɛ tí ỹɔw̃ɔ́ ỹɔ́w̃ɔ w̃ɔ́ɔ́ninga, ti ɣɛ́ ta, “Ele lɔ náa áá kɔ́tui hɛ́kpɛ kámbai la?”

⁴ Ti ɣɛ́i taa ná le sífaa i ɣɛi ngáá kɔtu walá. Kɛ́ ná tí naa hɔ́bɛni, kɛ tí tɔ́nga kɔtuí hɛ́kpɛngɔ kambái la.

⁵ Ná ti wálani kambái h̃u, kɛ tí siỹɛndópo yiláá tɔ́nga maayílingɔ ngáá kula wolé kooh̃aí, i héini ti yísa h̃uu vélei. Faalɔ, ti gindáá vílingɔ i ɣɛi la ngwála.

⁶ Kɛ i ɣɛa ti w̃a, “Wú gíndaa álaa víli. Jísui sí í ngáá Násɔlɛ w̃ɔí aá lɔ wúwaa kɔlí, sí ti ɣɛ́ngɔ ɣɛi kpakpáni kulɔ́sii w̃a. Kɛ́ i yooɣénga sái h̃u, aa mɔ́ɔ mbéinda. A tɔ lɛ́ɛ mbéi ti ɣɛ́ngɔ ndaní na.

⁷ Kɛ́ a lí wú ndé Jísu volú yélaitii ma ɛ́ɣɛ Pítɛ lɛ́i laá bɛ́lɛ í ngáá Jísu volú w̃ɔ́i ta, wú ɣɛ́ tí w̃a, ‘Jísu lɔɔ lí wú wútuwɔ Galéli lataí h̃u, naa lɔ wáá maalé ná kíya nɔ́ɔ í ndéni wú w̃á.’ ”

⁸ Kɛ nyah̃ái nátiini ti gúlanga kambái h̃u, tí li ngáá viliỹɛ́, bɔw̃álale ti h̃úú i ɣɛ́i áá bɛ́li ngáá nduwái. Taá faa fíli ndéni nuu fíli má sífaa ti ɣɛ́i taa lúwa. [

Jísu i gulaní Mɛɛloí yaah̃ú

⁹ Ná Jísu í yóóɣeni sái h̃u Tɛnɛ́mai ngelendáá lɛtɛngí, i gulaní Mɛɛloí Magadála taa h̃uu w̃ɔí yaah̃ú hése, lɛ́i Jísu buteí í ɣɛ́i ỹína nyɔu ngɔ́felangɔi levéni polú.

¹⁰ Aáva i liiní, í nde Jísu volú yélaitii ma, ti ɣɛ́i héini tí w̃ááw̃aanungɔ tíwaa wɔ́lɔ.

¹¹ Kɛ́ ná tí mɛ́nini ngáá kɛ Jísu lɔ ndɛɛh̃ú h̃u ɛ́ɣɛ Mɛɛloí Magadála w̃ɔí i ɣɛi náá tɔní, taá ɣɛ́i laí lá.

Jísu i gulaní volú yélaa félengɔ yaah̃ú

¹² Ná ná í gúlani su, Jísu i mɔ́ɔ gulaní volú yélaa félengɔ yaah̃ú ná ti ɣɛ́i peleí h̃u tíwaa li, kɛ́ i ɣɛi léélaa.

¹³ Nátii tí yangáimani tí li, tí nde Jísu volú yélaa vekáitii ma, kɛ́ na ɣéle tɔ nátii taá ɣɛ́i láni ngáá ti ye.

Jísu i gulaní volú yélaa púúngɔ maah̃úú yilángai ngaah̃ú

¹⁴ Ná vólu, ná Jísu volú yélaa púúngɔ maah̃úú yilángaitii ti ɣɛ́i taá laaỹɛ́, Jísu i gulaní ti yaah̃ú múl̃ɔ. I yɛpɛní ti yelé, i ɣɛ ti w̃a, “Aá lɔ ngáá faa ỹɔ́u ỹɔ́u ngáá nda ngáá wú h̃u aáva wɔ́i faa yátɔ mba fála fala. Kule í ɣɛ́ngɔ wú w̃á wú lá ngáá sítiini ti tɔ́ngɔ mbúyoɣengɔi w̃a saí h̃u.

¹⁵ A lí ndɔwɔlɔ́i kpɛ́lɛɛ kpɛ́lɛɛ su, wú Ngalángi gééla woo vandaí lé nuu kpɛ́lɛɛ má.

¹⁶ Nuí fíli pá áá lá la aáva maa w̃ɔ́i í nguyaí w̃ááhɔlɔ, maa w̃ɔ́i wumáá áá wo, kɛ́ nuí fíli ɛ́i ɣɛ́ láni lá, ngumáá ɛ́i wo.

¹⁷ Aáva sítii taa lá la, taá ɣɛ taa káámaa haítii kɛ. Ndááheingi h̃uu lɔ́ taa ɣɛ́ taa ỹína nyɔítii téve núngaitii polú. Ná vólu, taá ɣɛ́ taa híí woo vekaní ndé.

¹⁸ Ná taá kaali hulá húlani ngéɣe ngáá loko, ná vólu, tí ŋani fíli kpɔ́le áá nuu váa, ɛi faa fíli kɛ́ ngáá ti ye. Taá ɣɛ taá lóko vɛ́lɛ seebɛ yeláá w̃a, nátii pa tíwaa wálo.”

Jísu lɛɛlaí ngelegóóh̃u

¹⁹ Ná Ndemɔí Jísu í vílani yɛpɛmá volú yélaitii ngéle, i lɛ́i ngelegóóh̃u. Aáva aá lɔ héini ngufema ỹándai Ngalá kpela ngi w̃ásandai h̃u.

²⁰ Jísu volú yélaitii pa tí liiní náa tí Ngalángi gééla woo vandaí le ỹanda kpɛ́lɛɛ kpɛ́lɛɛ. Ndemɔí Jísu va i bɔní ti wa ngáá sí í kɛ́ni ngáa háwu ti ɣɛ́i taa káámaa haítii kɛ, sí í ngakɛ́ni kpál̃au ngáá kɛ ti gééla woí lɔ ngáá tɔɔỹaá.]