Keela woó vándai Máa í pɔ́nɛni kɔwɔ́ato Jísu Kílisitii wa MÁI 14 - Kɛ́lɛ Niinaí

Faa h̃uubatɛ́ngi kɔwɔ́ato Jísu vaa fái wa

¹ I ɣɛi náá loní ngáá foló félengɔ, kɛ Júsuai ti gúi sí taá tolí ngáá Ngumaawó Kúi ɛ́ɣɛ Kuí Maa Bíle Ɛ́i Lɛ́ Nga ɔ́ɔ́ foló náa ma. Ngala sááɣa gula mbélai ti wutúwɔaitii ɛ́ɣɛ kaamɔítiini Ngala sávai hááw̃a, ti ɣɛ́i taá kele ɣelé kɔ́li mba ngáá ti Jísu hou ndɔɔwu h̃ú tí páa.

² Kɛ́ ti ɣɛ́i ta, “A málaa kɛ kuí sí w̃ááh̃u. Ná láá lé, maa hái aa kpɔɔlɔ wála gula nungáitii ndiiwáá.”

Sɛ́ndi wulɔí vundái Jísu w̃a Bɛ́tani taí h̃u

³ Ná Jísu í ɣɛ́i taí sí h̃u taá tolí ngáá Bɛ́tani, i ɣɛi siỹɛndópo yiláá ngi vɛ́lɛi wu tɔ́ɔ́ tolí ngáá Sáimɔ, nduwu w̃aa heebɛ́i í ɣɛ́i náá walóni ma. Tí lóni nɔ́ɔ laaỹɛ́ma, kɛ nyah̃ápo yiláá i vaangá ngáá baabɔlɔ́ɔ́ngi. Sɛ́ndi wulɔí í ɣɛ́i su, sɔw̃ɔí bángɔ i ɣɛi lá ngwála. Kɛ nyah̃ápoi i baabɔlɔ́ɔ́ngi ná laa wólonga, í sɛ́ndi wulɔí ná vú Jísu wu mba.

⁴ Kɛ nungái sítii ti lɛ́ingaa ti ɣɛ́i na, tí lúúnga tíwaa ɣɛ́ ỹɔw̃ɔ́ ỹɔ́w̃ɔ w̃a, “Ndéénii le í sɛ́ndi wulɔí sí ỹááningɔ ma?

⁵ Sɛ́ndi wulɔí sí w̃aa ɔ́ɔ́ ɣɛ́ híyani kaní kóle hɔ́ndɔ sáángɔ hááw̃a, maa gápangi va í hé nyaani yélaitii ngeyá.” Faalɔ, tí nyáh̃apoi h̃uu hándɛ ngóó lení.

⁶ Kɛ́ Jísu i ɣɛi ti w̃a, “A bé nyah̃ápoi sí wa! Ndeénii le wáa suubɛ́ɛ́ɣi? Nyah̃ápoi sí i faa vánda wála ɣɛ́a mbɛ́.

⁷ Sífaa nyaani yélaitii tiyá lɔɔ ɣɛ́ wú lííwaa hɔ́wɔ fíli. Wáá bɔ́ ti wa mbéi hɔ́wɔi fíli wáa ɣɛ́ lói wú bɔ́ tí wa, kɛ́ ngáá vaama ɣɛ́ma wú lííwaa hɔ́wɔ fíli.

⁸ Sí ɔ́ɔ́ ɣɛ́ kɛní, aá lɔ í kɛ́nga. I sɛ́ndi wulɔ́i sí vúnga má ngáá í ndúwui ɣɛ kíli batɛ́ naa wutúwɔ kpɔ́lu fááw̃a.

⁹ Ngí tɔɔỹái le wú w̃á, mbéi fíli taá Ngalángi gééla woo vandaí lé ná ngeleí sí kpɛ́lɛɛ kpɛ́lɛɛ mbú, sí nyáh̃apoi sí í kɛ́a taá nde ti gindó fááw̃a laá su.”

Júdɔ i luw̃áni ngáá í Jísu lokolevé

¹⁰ Kɛ Jísu volú yélaa púúngɔ maah̃úú félengɔi ti tá yílaa sí tɔ́ɔ́ ɣɛ́ ma Júdɔ Ɛsikɛ́liyɔ, i liinga Ngala sááɣa gula mbélai ti wutúwɔaitii ngéle ngáá í Jísu lokolevé tí w̃a.

¹¹ Ná Ngala sááɣa gula mbélai ti wutúwɔaitii ti ná ỹɛ́nini, i ti góóh̃unɛɛni ngwala. Faalɔ, ti Júdɔ guulóni ngáá taá naholó hé ngeyá. Náá hááw̃a, Júdɔ i ɣɛi náá áá pele wɔlí mba ngáá kɛ kíya áá kɛ áá Jísu lokolevé.

Jísuni ngaa polú yélaitii tí Ngumaawó Kúi w̃aa ỹɛ́ɛ́nii ỹɛ́ni

¹² Júsuai ti gúi ná taá tóli ngáá Kuí Maa Bíle Ɛ́i Lɛ́ Nga, hésendaa holoí ná w̃a maa gúi h̃u, naa h̃uu lɔ́ tɔ́ɔ́ saáɣa waalaítii paa Ngumaawó Kúi hááw̃a, Jísu volú yélaitii tí liiní ngelé, tí mɔɔní, ti ɣɛ́ ma, “Míl̃inda lɔ í lóngɔ ni lí ní naa ɣɛ kíli batɛ́ mu yɛ Ngumaawó Kúi w̃aa ỹɛ́ɛ́nii ỹɛ́ fááw̃a?”

¹³ Kɛ Jísu i volú yélaa félengɔ lɔvengá, i ɣɛ ti w̃a, “A lí Jɛlúsɛl̃ɛ taa h̃u. Wá lɔ́ɔ́ vá siỹɛndópo yiláá máálema njɛí i ngeyá fɛí h̃u íwaa líí la. A to maa h̃íỹɛndopoi wa,

¹⁴ pɛ́lɛi áá lɛ́ mbu, a ɣɛ́ pɛ́lɛ w̃ɔ́i w̃a, ‘Kaamɔ́ɔ́ í ɣɛ́, lómui bɛ́ɛ lɔ íwaa ɣɛ́ ngáá sotá lómui laá faaw̃a áá Ngumaawó Kúi w̃aa ỹɛ́ɛ́ni ỹɛ́ na taá polú yélaitii?’

¹⁵ Aáva aa lómu wala ta h̃úúɣɛ ngáá wú ye kɔlɔ́ɔ́ veleí ngeleya pɛ́lɛi h̃u naa bátɛngɔ kílii. Naa lɔ wáá mɛɛníitii kɛ́ kíli batɛ́ na mu haáw̃a.”

¹⁶ Kɛ polú yélai nátii ti gúlanga naa wa, tí li taa h̃u, aáva maa háitii kpɛ́lɛɛ ti hítɛni nga kíya nɔ́ɔ Jísu í ndéni ti w̃a. Faalɔ, tí Ngumaawó Kúi w̃aa ỹɛ́ɛ́nii ɣɛ́ kíli batɛní na.

¹⁷ Ná kpindíi í vɛ́lɛni, kɛ Jísuni ngaa polú yélaa púúngɔ maah̃úú félengɔitii tí fólonga taa h̃u.

¹⁸ Ná ti ɣɛ́i téévei gakála tíwaa laaỹɛ́, kɛ i ɣɛa ta, “Ngí tɔɔỹái le wú w̃á, wú tá yílaa tɔɔ vá tókolevema sí naá laá náa laaỹɛ́.”

¹⁹ Ti w̃ááw̃aanungɔ i ɣɛi la. Kɛ ti ɣɛ́a ma ngáá ngilá ngíla, “Kɛmbɛ nyá láá le, kɛ́lɛi?”

²⁰ Kɛ Jísu i ti woo yápotenga, i ɣɛ ti w̃a, “Wú púúngɔ wú w̃ááh̃uu félengɔi, wú tá yílaa te sí naá láa níwaa biléi ỹɛ kaalo yílaangi h̃u.

²¹ Nuí síí w̃ɔ́i taa ɣɛ́ ma Nuu Búsa Goo H̃ú Loí laá lɔ́ɔ vá haamá kíya nɔ́ɔ pɔnɛngɔ́ Ngalá Kɔ́lɔi h̃u kɔwɔ́ato mba. Kɛ́ suu lɔɔ vá ɣɛ́ma ỹɔ́u siỹɛ́ngi síí w̃a íwaa tokolevé! Ɔ́ɔ́ ɣɛ́ váni maa w̃ɔ́i hááw̃a ná tɛ́i belé ɣɛ́ ndení!”

Ngakɛ́ɛ́lɛ mɛ́ɛ́nii Jísuni ngaa polú yélai tí mɛ́ni

²² Tí loí nɔ́ɔ laaỹɛ́ má, Jísu í bílei yeɣé, í sɛ́ɣɛɛ gula Ngalá ma, í ngále ngále su, í fé volú yélaitii ngeyá, i ɣɛ ti w̃a, “A sou wú mɛ, ndúwui lɔ ngáá sí.”

²³ I mɔ́ɔ kɔ́pungi yéɣe, í sɛ́ɣɛɛ gula Ngalá ma, í fé ti yaá. Sí í ɣɛ́i su, ti kpɛ́lɛɛ tí kpɔle.

²⁴ Kɛ i ɣɛa ti w̃a, “Ní ỹááw̃ɔi lɔ ngáá sí íwaa ngákɛ ngáá Ngalángi gɛ́lɛngi lɔ́ ngáá tɔɔỹaá í ngéɣeni ti lówah̃u taá ngí vóngaitii. Aá lɔ́ɔ vú nuu bíh̃iw̃aa hááw̃a.”

²⁵ Í mɔ́ɔ́ ɣɛ ti w̃a, “Ngí tɔɔỹái le wú w̃á, ndɔí sí í kɔ́pungi sí h̃u, ngɛ́i mɔ́ɔ́ ngi híí bɔle í ló su kpóloo kɛ folói ngáá ngi níínai bɔ́le Ngalángi w̃ásandai h̃u.”

²⁶ Ná tí Ngala ngúlei hɔ́ɔ́lɛni, tí liiní náa ngihéi sí wa taá tolí ngáá Ɔ́levi Wuluí Yíhei.

Jísu i yɛpɛní kɔwɔ́ato Pítɛ híɣesɔngai wa

²⁷ Kɛ Jísu i mɔɔ ɣɛa ti w̃a, “Wú kpɛ́lɛɛ wá lɔɔ vá bétevema mbá, sífaa sí pɔ́nɛngɔ Ngala Kɔ́lɔi h̃u aá lɔ ngáa sí, Ngalá ngi ɣɛngɔ ta, ‘Nyá lɔɔ vá mbaala w̃ááh̃u belé mɔ́i vááma, aáva mbaaláitii suu áá váha.’

²⁸ Kɛ́ ná ngáá ɣɛ́ ɣɛ́i yooɣéi sái h̃u, ngáá lí wú wútuwɔ Galéli lataí h̃u.”

²⁹ Kɛ Pítɛ i ɣɛa Jísu w̃a, “Ti kpɛ́lɛɛ tɔɔ bɔ́ɔ́ betéve í wá, kɛ́ nyá ngɛ́i béteve í wá.”

³⁰ Kɛ Jísu i Pítɛ woo yápotenga, i ɣɛ ma, “Ngí tɔɔỹái le í w̃á, hááwɔ bíndii sí kái kái, tɛɛhínai ɔ́ɔ́ ɣɛ́ p̃ɛ́ɛ́ í wókole féle, yáá hiɣendáá ɣɛ nga sáwa ngáá yáá kɔ́lɔ.”

³¹ Kɛ́ Pítɛ i Jísu woo yápoteni, í laa bákpa ma, i ɣɛ ma, “Ngí bɔ́ɔ́ baha hɔ́ɔ́ í wá tí mú váa, kɛ́ kúnafɔ ngɛ́i ɣɛ ta ngáá í wɔ́lɔ!” Jísu volú yélaa vekaítii bɛ́lɛ ngimɔ́ɔ́ nɔ́ɔ jɔ́ tí ndéni.

Jísu i Ngala fɛ́lini Gɛsɛmɛ́ni

³² Kɛ Jísuni ngaa polú yélaitii tí liingá ỹandái ta taá náá lolí ngáá Gɛsɛmɛ́ni. Kɛ i ɣɛa volú yélaitii ma, “A hei mbéinda. Nyá lɔɔ lí ngí Ngala fɛ́li.”

³³ I Pítɛ yeɣéni ɛ́ɣɛ Jimisí í báha Njɔú wa tí lí taá tiyéni. Kɛ Jísu i pɛlɛngá w̃aaw̃áánuma, ndii áá ỹááni.

³⁴ Kɛ i ɣɛa ti w̃a, “Nyá lɔ́ náá saa lowá lá ngáá maaw̃áanui ɛ́ɣɛ ndiiỹaani ỹɔ́u ỹɔungí. A ló mbéinda yaah̃ú húlu yá.”

³⁵ Kɛ Jísu i liingá kuló kélei má, í bɔwɔ́ gula ndɔwɔlɔ́i wa, í yapɛ́lɛ, í Ngala fɛ́li ngáá ná wɔ́lii áá ɣɛ́ ngáá solowo fáá, maanɔw̃ɔ́i na í víli maah̃u.

³⁶ Í mɔ́ɔ́ ɣɛ ta, “Kɛɛɣɛ́ Ngála, ná áá gɛ́ɛ́lɛ í wá, faa fíli aa na áá bááh̃aa ɣɛmá. Maanɔw̃ɔ́ gɔ́pungi sí gúla kái ngéya. Kɛ́ ná fíli sú, nyá ngáá ɣɛ́i sí ndóngɔ lá í ɣɛ́, kɛ́ sí í lóngɔ lá í ɣɛ́.”

³⁷ Kɛ i ỹangáimanga volú yélaa sáángɔitii ngéle, í tí w̃áále nyii h̃u. Kɛ i ɣɛa Pítɛ w̃a, “Sáimɔ, yá lɔ nyii h̃u kpɛ́? Yɛ́i belé hómbo yɔ́ɔ́ ló yaah̃ú húlu ya háwa yiláá fááw̃a bɛ́lɛ?

³⁸ A ló yaah̃ú húlu ya, wú Ngala fɛ́li ngáá suugɔvɔ́ fáa álaa wú w̃áále wɔ́ɔ́ kɛ, sífaa wáá ɣɛ́ loí wú sí ɣɛ́ áá ɣɛ́ péle w̃a wú lií h̃u, kɛ́ nduwú h̃ú aa gula wú wá.”

³⁹ Kɛ Jísu i mɔɔ liingá, í Ngala fɛ́li, aáva ngoí sítii í ti lení hésendaa Yala fɛli ngói h̃u, í mɔɔ ti lení nɔ́ɔ jɔ́.

⁴⁰ Ná i mɔ́ɔ yangáimani, i volú yélaitii maalení nyíí h̃u, bɔw̃álale nyii w̃ɔníí i ɣɛi ti w̃a ngwala, aáva taá ɣɛ́i kɔlɔ́ ngoo h̃u gulái sí taá fé ngeyá nyií hááw̃a.

⁴¹ Ngangáima w̃ái hawa kélei, kɛ i ɣɛa ti w̃a, “Wá lɔ́ nɛ́nɛ kpɛ́ nyíí h̃u wáá lɛɛlɛmbó? I kulaɣɛngá náa! Táingi i folónga ma. A tɔ lɛ́ɛ, táá va Nuu Búsa Goo H̃ú Loí lókolevema faa ỹɔ́u yélaa w̃a.

⁴² A yooɣé, a mu lí. Tókoleve mɔ́i i vaangá!”

Jísu houndái

⁴³ Jísu i loní nɔ́ɔ njɛpɛí vumá, kɛ polú yélaa púúngɔ maah̃úú félengɔitii ti tá yílaa, sí tɔ́ɔ́ ɣɛ́ ma Júdɔ í vaangá. Faŋa walá i ɣɛi polú mbowá hɔ́kpɔitii tí tí yaá ɛ́ɣɛ ngulú lúkpu ỹíímiingaitii. Júsuai ti Yála saaɣa gula mbélai ti wutúwɔaitii ɛ́ɣɛ kaamɔítiini Ngala sávai hááw̃a ɛ́ɣɛ kele ɣelé mbélaitii tiyá lɔ tí faŋaí ná lɔ́veni.

⁴⁴ Jísu lokolevé mɔ́i Júdɔ va i kele ɣelé féni faŋaí ná yáa, i ɣɛ ti w̃a, “Nuí sí ngáá nɛɛnɛ́, kɛ laá w̃úl̃a ngáá ná. A sou, wú maah̃ú béle ngáá pangɔ́, wú líí la.”

⁴⁵ Ná Júdɔ í vááni, i liiní nɔ́ɔ tííŋ Jísu yelé, i ɣɛ ma, “Kaamɔ́ɔ́,” i Jísu nɛɛnɛ́.

⁴⁶ Kɛ nungáitii ti búndɛnga Jísu w̃a, tí sou.

⁴⁷ Kɛ sítii ti ɣɛ́i lóóni naa béla ti tá yiláá i ngi wówa hɔkpɔí gúlanga, í Ngala sááɣa gula mbélai ti wutúwɔɔ w̃ɔ́ɔ́ walaí yénge mɔ́i wólii levé mba.

⁴⁸ Kɛ Jísu i ɣɛa ta, “Nyá lɔ ngáá faa ỹaaní mɔɔ ngáá kɛ wáá vá ngáá mbowá hɔ́kpɔitii ɛ́ɣɛ ngulú lúkpu ỹíímiingaitii sóu fááw̃a?

⁴⁹ Ngí ɣɛ́a wú lííwaa hɔ́wɔ fíli ngíwaa kalambongí wó Hɛ́ɛ́ma Yála Pɛ́lɛi góvii h̃u, wáá kɛ́ni wɔ́ɔ́ sóu. Kɛ́ kɛ nɔ́ɔ sítii pɔnɛngɔ́ Ngalá Kɔ́lɔi h̃u tí hítɛnga.”

⁵⁰ Kɛ Jísu volú yélaitii kpɛ́lɛɛ ti Jísu longá ná, ti víliỹɛ.

⁵¹ Kɛ́ siỹɛ́ ndákpa ngiláá i ɣɛi na, kulaí séɣe héɣe tɔ́ nɔ́ɔ í ɣɛ́i ma. I ɣɛi Jísu volú. Kɛ́ ná núngaitii ti souní ngi gúlai wa,

⁵² i gulái náá wa ngáá w̃aa busá, í ngi gúlai lo volú véle.

Jísu i ɣɛi Faa H̃úú Haa Lé Mbélaitii kákala

⁵³ Nungái sítii ti Jísu houní, tí lííni lá Ngala sááɣa gula mbélai ti wutúwɔɔ w̃ɔ́ɔ́ wálai yéle. Aáva Ngala sááɣa gula mbélai ti wutúwɔaitii kpɛ́lɛɛ ɛ́ɣɛ kele ɣelé mbélaitii ɛ́ɣɛ kaamɔítiini Ngala sávai hááw̃a ti w̃áákpɔngɔ í ɣɛ́i lá mba ỹanda yílaa.

⁵⁴ Pítɛ i toní tí wa, kɛ́ ti lówah̃u i ɣɛi gooh̃á kúlo. Kɛ i liingá Ngala sááɣa gula mbélai ti wutúwɔɔ w̃ɔ́ɔ́ wálai góvii h̃u. Naa lɔ í héini ná taá ỹándaa w̃aah̃ú béle mbélai íwaa gɔɔlɛ́ wó ngɔmbuí w̃a.

⁵⁵ Ngala sááɣa gula mbélai ti wutúwɔaitii ɛ́ɣɛ Júsuai ti Háá H̃uu Haa Lé Mbélai ti wutúwɔɔ yélaitii kpɛ́lɛɛ ti ɣɛ́i taá faa wɔ́li ngáá tí pɛlɛ Jísu wa kɛinɔɔ́ tí páa, kɛ́ taá faa fíli tɔ́i tɔɔ́ pɛlɛ mba.

⁵⁶ Hééle bih̃íw̃aa tí ndɛ́ɛ́ vɛ́lɛni Jísu wa, kɛ́ ti hééle woítii taá liiní ngáá pele yílaa.

⁵⁷ Kɛ siỹɛngáá lɛingáá ti yóóɣenga, tí ndɛ́ɛ́ vɛ́lɛ Jísu wa, ti ɣɛ́ ta,

⁵⁸ “Ní ngoo ỹɛ́nini, i ɣɛ ta ‘Nyá lɔɔ Hɛ́ɛ́ma Yála Pɛ́lɛi wólo nuu búsaitii tí tóngɔ aáva foló sáángɔ laa lówah̃u, ngáá péka lo ngáá sí nuu búsa ɛ́i hómbo ɔ́ɔ́ to.’ ”

⁵⁹ Kɛ́ ná ɣéle tɔ bɛ́lɛ ti hééle woítii taá liiní ngáá pele yílaa.

⁶⁰ Kɛ Ngala sááɣa gula mbélai ti wutúwɔɔ w̃ɔ́ɔ́ walaí i yooɣénga, í ló ti kpɛ́lɛɛ kákala, í Jísu w̃ɔɔní, i ɣɛ ma, “Ngoo yapóte ngáá í yáá sí hááw̃a tí ndéngɔ í hááw̃a?”

⁶¹ Kɛ́ Jísu i w̃aa ɣɛí ló, aa ngoo yapóte fíli féni. Kɛ Ngala sááɣa gula mbélai ti wútuwɔɔ w̃ɔ́ɔ́ walaí i mɔɔ mɔɔningá, i ɣɛ ma, “Yá lɔ yí ngáá Ngalángi Lókolo Mbá W̃ɔ́i, Hɛ́ɛ́ma Yálangi H̃íỹɛndou Loí?”

⁶² Kɛ Jísu i ngoo yápotenga, i ɣɛ ta, “Eéi, aáva wá lɔɔ vá nuí sí w̃ɔ́i taa ɣɛ́ ma Nuu Búsa Goo H̃ú Loí lɔmá héini ngufema ỹándai Ngakpa Ngála Ngwalaí béla masandáá h̃u. Wáa tɔ í héini njɛ bilíítii su áá vá.”

⁶³ Kɛ Ngala sááɣa gula mbélai ti wutúwɔɔ w̃ɔ́ɔ́ walaí i w̃aa gúlai wálinga ngá kɛinɔɔ́ í kɛ ngáá kɛ ndiiyaw̃al̃angɔ́ɔ́ lé ngwala, í mɔ́ɔ́ningi wó, i ɣɛ ta, “Ndee hééle lɔ múl̃ɔ a máá kɔlí?

⁶⁴ Wú tɛ́ɣɛsu wóó ỹɔ́u ỹɔ́ungi ná ỹɛ́ningɔ í ndengɔ Ngalá ma. Bɛɛ́ lɔ í ngáá wú gí máá hái?” Tí kpɛ́lɛɛ tí ndení ngáá Jísu aa veléi, faalɔ, kɛ í sáá w̃ááhɔlɔ.

⁶⁵ Kɛ ti lɛ́ingaa tí pɛ́lɛnga laa yɛ́i vumá Jísu w̃a, tí ngaah̃ú yíli, táá túba ngáá bɔtáingai, táá ɣɛ́ ma, “Nde ná ní w̃a, ele lɔ í í lúbangɔ?” Kɛ ỹandá w̃aah̃ú béle mbélaitii tí vaangá Jísu vomá, tíwaa lí ngáá ndeve.

Pítɛ híɣesɔngai

⁶⁶ Ná Pítɛ í ɣɛ́i héini kovíí h̃u, Ngala sááɣa gula mbélai ti wutúwɔɔ w̃ɔ́ɔ́ walaí ngi bɔ́mba yeláitii ti tá yílaa, i ngáá nyah̃alóu i vaaní.

⁶⁷ Kɛ i Pítɛ lɔngá íwaa gɔɔlɛ́ wo, kɛ i Pítɛ bélenga tííŋ, i ɣɛ ma, “Yá bɛ́lɛ yí ɣɛ́ngɔ ngáá Jísu volú w̃ɔ́i ta, Jísui sí í gúlangɔ Násɔlɛ taa h̃u.”

⁶⁸ Kɛ́ Pítɛ i híɣeni nga, i ɣɛ ta, “Ngáá kɔ́lɔ sí yíwaa yɛ́pɛ kɔwɔ́ato mba kɛlaa ngɔ́ɔ́ ngatɔ́ mba.” Kɛ i liingá ngáá kpakií laa véle tongɔ́ í ɣɛ́i lá kovíí w̃a. [Kɛ tɛɛhínai i wokoléa.]

⁶⁹ Ná maa bɔ́mba w̃ɔí ná í ɣɛ́i ngáá nyah̃alóu í tɔní na múl̃ɔ, kɛ i mɔɔ ɣɛa sítii ma ti ɣɛ́i na, “Siỹɛndópoi sí lɔ ngáá Jísu volú yélaitii ti tá.”

⁷⁰ Kɛ́ Pítɛ i mɔ́ɔ́ hiɣení nga. Ná naa í ɣɛ́i kpɛ́ɛ́, sítii ti ɣɛ́i lóóni na kɛ ti ɣɛ́a Pítɛ w̃a, “Tɔɔỹaá kái kái té, ti tá yílaa mbáá ngáá í ye, sífaa Galéli w̃ɔɔ waa í ye.”

⁷¹ Kɛ Pítɛ í vélenga kéle kélei, i ɣɛ ta, “Ngáá siỹɛndópoi ná wɔ́lɔ wáá yɛ́pɛ kɔwɔ́ato mba!”

⁷² Ngamá nɔ́ɔ, kɛ tɛɛhínai hele kélei i wokoléa. Kɛ Pítɛ gíngi i hitɛngá ngoí sí wa Jísu í ndéni ma í ɣɛ́i ma, “Tɛɛhínai ɔ́ɔ́ ɣɛ́ p̃ɛ́ɛ́ í wókolendaa ɣɛ féle, yáá híɣendaa ɣɛ nga sáwa ngáá yáá kɔ́lɔ.” Kɛ Pítɛ líí í ỹááninga ngwala, í pɛ́lɛ wɔlɔ́ma.