Keela woó vándai Máa í pɔ́nɛni kɔwɔ́ato Jísu Kílisitii wa MÁI 10 - Kɛ́lɛ Niinaí

Jísu galambongí kɔwɔ́ato kpeele mba hái wa

¹ Kɛ Jísu i gulangá mbéi wa í ɣɛ́i na, í lí taá polú yélaitii tataí sí h̃u taá tolí ngáá Judíya, ná vólu, tí Jɔ́ɔ́dɛ Yɛí léve. Kɛ nuu háŋaitii tí mɔ́ɔ́ vaangá ngelé. I pɛlɛní náa ti galámboma, sífaa ngi ndá lúva veleí i ɣɛi ngáá ná.

² Kɛ Júsuai sítii taa ɣɛ́ tí w̃a Falósiai tɛingáá tí váánga Jísu yelé kɛinɔɔ́ tí suugɔvɔ́. Faalɔ, tí mɔɔniní, ti ɣɛ́ ma, “Aá lɔ́ pele w̃a savaí h̃u Ngalá ngí féni Muusé yáá ngáá siỹɛ́ áá beele ngi ỹáh̃ai wa?”

³ Kɛ Jísu i ti woo yápotenga, i ɣɛ ti w̃a, “Ndeé lɔ Muusé í ndéni wú w̃á ngáá wú kɛ?”

⁴ Kɛ ti ɣɛ́a ma, “Muusé í lúw̃angɔ ma ngáá ná siỹɛ́ngi áá bééle ngi ỹáh̃ai wa, kɛ í kɔ́lɔ bátɛ, í fé nyah̃ái ná yáa ngáá kɛ i beelengá mba.”

⁵ Kɛ Jísu i ti woo yápotenga, i ɣɛ ti w̃a, “Muusé i savaí sí vɔ́nɛni wú hááw̃a sífaa wú wóli h̃u bɔ́lɔngɔ ngwala.

⁶ Tɔkúla héimai wɔ́lɔ, ná h̃ú Ngalá ngí ŋani kpɛ́lɛɛ kpátɛni, ‘I siỹɛngíni ngaa nyah̃ái bátɛni.’

⁷ Kíya nɔ́ɔ pɔnɛngɔ́ Ngala Kɔ́lɔi h̃u ngáá sí, ‘Ná hááw̃a, siỹɛ́ngi aa gula ngi kɛ́ɛ́ɣɛni ngaa ngi njéé ti vɛ́lɛi wu, í báha ngi ỹáh̃ai wa,

⁸ ti félengɔ ti ɣɛ́ ngáá nuu yílaa.’ Faalɔ, tɛí mɔ́ɔ́ ɣɛ ngáá nuu félengɔ, kɛ́ nuu yílaa kpé.

⁹ Aáva sí Ngalángi í kpahangɔ́ su, nuu álaa tí lówah̃u kɔ́lɛ.”

¹⁰ Ná Jísuni ngaa polú yélaitii ti ɣɛ́i pɛlɛ́i wu múl̃ɔ, polú yélaitii ti mɔɔniní ngáá faa yílaangi sí.

¹¹ Kɛ Jísu i ti woo yápotenga, i ɣɛ ti w̃a, “Nuí fíli áá bééle ngi ỹáh̃ai wa aáva í lí í nyah̃a véka yeɣé múl̃ɔ, kɛ i kɔlɔsiyá mbónga nyah̃ái ná yáa áá ɣɛ́ bééleni mba.

¹² Nyah̃ái va ná áá bééle ngi h̃íỹɛngi wa aáva í lí í siỹɛ péka yeɣé múl̃ɔ, kɛ i kɔlɔsiyá mbónga.”

Jísuni ngaa ndopóaitii

¹³ I ɣɛi ngáá hɔ́wɔ ta, nungáitii ti ɣɛ́i taa vá ngáá ndopóaitii Jísu yelé ngáá í loko vɛ́lɛ vɛlɛ́ ti w̃a, í hɛ́ɛ́ ti yɛ. Kɛ́ polú yélaitii tí ndéni nungáitii ma ngáá ti bé ná wa.

¹⁴ Ná Jísu í sí ŋál̃a lɔní polú yélai ti ɣɛ́i taá kɛ, ndiiyáw̃al̃angɔ i ɣɛi lá. Kɛ i ɣɛa volú yélaitii ma, “A bé ndópoaitii mba ti vá ngéle, a waá ti h̃úúhou, sífaa Ngalángi w̃ásandai lɔ nungáá w̃ááh̃u ti ɣɛ kíli í ngáá ndopoá ɣɛ kíli.

¹⁵ Ngí tɔɔỹái le wú w̃á, nuí fíli ɛ́i ɣɛ́ lokohéini Ngalángi w̃ásandai wu ngáá ndopo gúlo ɣɛ kíli, Ngalángi w̃ásandai ɛi ɣɛ maa w̃ɔ́i w̃ááh̃u.”

¹⁶ Kɛ Jísu i ndopóaitii ngéɣenga báki su, í lóko vɛ́lɛ ti w̃a, í hɛ́ɛ́ ti yɛ.

Jísu galambongí kɔwɔ́ato kpatɛ w̃áá líi wa ɛ́ɣɛ Ngalángi w̃ásandai

¹⁷ Ná Jísu í pele hóuni, siỹɛ́ ngílaa i liiní ngáá viliỹɛ́ ngelé, í lá mbɛ, í mɔ́ɔ́ni, i ɣɛ ma, “Kaamɔ́ɔ́ vándai, ndée lɔ kúle í má ngí kɛ́ ngɔ́ɔ́ ɣɛ́a kúnafɔ lɛ́ɛ́h̃ui w̃ááhɔlɔ?”

¹⁸ Kɛ Jísu ngoo yápotenga, i ɣɛ ma, “Ndeénii le yíwaa tóli ngáá nuu vánda? Nuu fíli aa ngáá nuu vánda kɛ léi Ngalá ngílaa kpé í ngáá nuu vánda.

¹⁹ Yí Ngala savaítii kɔ́lɔ sɔ́ sí í ɣɛ́ngɔ ta, ‘Yaá nuu váa, yaá kɔlɔsiyá mbo, yaá ŋúỹa wo, yaá káha hééle woo le, yaá ŋáni gúla nungáá yáa ngáá kahá véle, wufe í njééni ma taa í kɛ́ɛ́ɣɛ.’ ”

²⁰ Kɛ siỹɛndópoi i Jísu woo yápotenga, i ɣɛ ma, “Kaamɔ́ɔ́, ngí híyanga ngáá savaí nátii kpɛ́lɛɛ í séi ní lópo gulo hɔwɔ w̃a.”

²¹ Kɛ Jísu i siỹɛndópoi belénga tííŋ, í ló lá. Kɛ i mɔ́ɔ ɣɛa siỹɛndópoi w̃a, “Faa yílaa tɔ yáá nɛ́ɛ́ kɛní. Lí, yí yáa gɔ́lingai kpɛ́lɛɛ mááɣɛ, yí maa náholoi he nyaani yélaitii ngeyá. Ná yáá ná ɣɛ́, kpatɛ́ yándɔɔlɔngɔ aa ɣɛ náá la í hááw̃a ngelegóóh̃u. Ná vólu, vá, yí ɣɛ́ ngáá pólu w̃ɔ́ɔ́.”

²² Ná siỹɛndópoi i ngoí sí ỹɛ́nini, i gulaní náá wa maaw̃áánungɔ, sífaa kpatɛngɔ́ i ɣɛi lá ngwala.

²³ Kɛ Jísu i wɔlɛngá w̃a, i ɣɛ volú yélaitii ma, “Naa bangɔ́ɔ́ lé ngwala ngáá kpatɛ yélaitii ti wála Ngalángi w̃ásandai wu!”

²⁴ Jísu laa wói ná í ndéni, i polú yélaitii kíndaa vílini ngwala. Kɛ́ Jísu i mɔɔ ɣɛi ta, “Mu mbálangaa, naa bangɔ́ wálaa le ngáá nuu í ɣɛ́ Ngalángi w̃ásandai wu!

²⁵ Naa bangɔ́ɔ́ lé kpatɛ w̃ɔ́i í ɣɛ́ Ngalángi w̃ásandai wu í lɔ́ve sí wa nyɔ́ɔ́mai áá wála sɛɛgulángi wóli h̃u.”

²⁶ Ngoí sí i polú yélaitii kindáá vílini ngáá suulɔ́vengɔ, kɛ ti ɣɛ́a ỹɔw̃ɔ́ ỹɔ́w̃ɔ w̃a, “Kɛ ele lɔ náá hɔ́ɔ́ áá ngumaawóngi w̃aahɔ́lɔ?”

²⁷ Kɛ Jísu i ti belénga, i ɣɛ ti w̃a, “Ná áá gɛ́ɛ́lɛ nuu búsa wa, ɛi holowo, kɛ́ ná áá gɛ́ɛ́lɛ Ngalá mbá, faa kpɛ́lɛɛ aa holowo.”

²⁸ Kɛ Pítɛ í ɣɛ́a Jísu w̃a, “Tɔ lɛ́ɛ, ní bénga faa kpɛ́lɛɛ mbá, ni hítɛ í vólu!”

²⁹ Kɛ Jísu i ti woo yápotenga, i ɣɛ ti w̃a, “Ngí tɔɔỹái le wú w̃á, nuí fíli áá vólu yáfe ngi vɛ́lɛi wa, ɔɔ ngi ndéɣeni ɔɔ ngi ndíyani mba, kpahangɔ́ ngí njééni ngaa ngi kɛ́ɛ́ɣɛ wa, ɛ́ɣɛ ngi léngaitii kpahangɔ́ ngi báálaitii mba nyá fááw̃a ɛ́ɣɛ Ngalángi gééla woo vandaí hááw̃a,

³⁰ maa w̃ɔ́i aa kɛɣɛ́laitii maahɔ́lɔ í w̃ɔ́lu ma p̃óu p̃óu kpahangɔ́ maanɔw̃ɔ́itii mba. Ná vólu, ná áá há, aa kúnafɔ lɛ́ɛ́h̃ui w̃aahɔ́lɔ.

³¹ Kɛ́ sítii kpih̃íw̃aani ti ngáá tɔwɔ́ mbá yélaa taá ɣɛ́ ngáá tɔwɔ́ mbá lála yélaa, aáva sítii kpih̃íw̃aani pa ti ngáá tɔwɔ́ mbá lála yélaa, tiyá lɔ́ taa ɣɛ́ ngáá tɔwɔ́ mbá yélaa.”

Jísu yɛpɛí hawa kélei í púni kɔwɔ́ato haalaí wa

³² Ná Jísuni ngaa polú yélaitii ti ɣɛ́i peleí w̃a táá lí Jɛlúsɛl̃ɛ, Jísu i ɣɛi ti w̃áá velé lá, polú yélaitii pa ti gindáá vílingɔ i ɣɛi lá. Ná vólu, sítii bɛ́lɛ nɔ ti ɣɛ́i ti volú nduwá í ɣɛ́i ti h̃u. Kɛ Jísu i vólu yélaitii tólinga naa góóɣaka w̃á, í ndé ti w̃a sí í ɣɛ́i áá vá ɣɛmá lá.

³³ I ɣɛi ti w̃a, “A muỹá lɔɔ lí Jɛlúsɛl̃ɛ taí h̃u, naa vá tɔ tíwaa vá nuí síí w̃ɔ́i taa ɣɛ ma Nuu Búsa Goo H̃ú Loí lókolevema ná Ngala sááɣa gula mbélai ti wutúwɔaitii ma ɛ́ɣɛ kaamɔítiini Ngala sávai hááw̃a aáva taá pelé lála ngáá í saa w̃ááhɔlɔ. Ná vólu, tí tokolevé sítii ma taa ngáá Júsua.

³⁴ Nátii pa taá ngɛ́lɛ gúla su tí laayɛ́i vú ma, tí ngámɔ kíli ỹɔu wo, tí paá. Kɛ́ ná fólo félengɔ áá gúla su sawa kélei w̃a, aa yooɣé sái h̃u, í vá ndɛɛh̃úi h̃u volú.”

Jimisíni ngaa Njɔú tí masa kpéla lóów̃aa h̃úúhɛlini

³⁵ Kɛ Sɛ́bɛdi h̃iỹɛndou lengáitii Jimisíni ngaa Njɔú tí líínga Jísu yelé, ti ɣɛ́ ma, “Kaamɔ́ɔ́, ni longɔ́ɔ́ lé sí fíli naa í w̃ɔ́ɔ́ni fááw̃a yí kɛ́ ni yɛ.”

³⁶ Kɛ Jísu i ti w̃ɔ́ɔ́ninga, i ɣɛ ti w̃a, “Ndeé lɔ wú lóngɔ ngí kɛ wú yɛ́?”

³⁷ Kɛ tí ngoo yápotenga, ti ɣɛ́ ma, “Ná yáá ɣɛ́ í w̃ásandaa w̃aanɛɛnɛɛngí h̃u, ni longɔ́ɔ́ lé ni ɣɛ́ ngáá í bélaa yélaitii.”

³⁸ Kɛ Jísu i ɣɛa ta, “Wáá kɔ́lɔ sí wúwaa kal̃aa w̃ɔ́ɔ́ni. Wáá hómbo wú maanɔw̃ɔ́i yeɣé ngíwaa vá ngéɣema? Baa wáá hómbo wú ha kíya ngíwaa vá haamá?”

³⁹ Kɛ ti Jísu woo yápotenga, ti ɣɛ́ ma, “Naá hómbo.” Kɛ Jísu i ɣɛa ti w̃a, “Wá lɔɔ vá maanɔw̃ɔ́i sí yéɣema ngíwaa vá ngéɣema. Ná vólu, saí sí ngíwaa vá mbóma, wú mbó.

⁴⁰ Kɛ́ ngákpa ngáá ngéya ngáá ngɔ́ɔ́ lókolo nungáá wá ngáá kpéla yélaa. Ngalá ngí naítii ndóngɔ sítiini mbɛ í lókolongɔ ti wa.”

⁴¹ Ná Jísu vólu yélaa púúngɔ vekaítii ti sí ỹɛ́nini, ti liiyáw̃al̃angɔ i ɣɛi lá Jimisíni ngaa Njɔú yáa.

⁴² Kɛ Jísu i ti lolínga ỹanda yílaa, i ɣɛ ti w̃a, “Wú kɔ́lɔ ngáá sítii taa ngáá Júsua ti w̃ása ngwála walaítii ɛ́ɣɛ kulo gulóaitii taá bandí bándi héi sítii ma taa ɣɛ́ tí wu ti w̃ásandai h̃u.

⁴³ Kɛ́ aáva ná fíli sú, wúndai aa h̃íí na. Kɛ́ aá ɣéle, ná wú tá fíli áá ɣɛ́ loí í ɣɛ́ ngáá ngutuwɔ́ w̃ɔ́ɔ́ wú lííwaa, kɛ aa ɣɛ ngáá mɔl̃ɛ́ w̃ɔ́i pekaítii fááw̃a.

⁴⁴ Nuí fíli pá áá ɣɛ́ loí í ɣɛ́ ngáá ngakpa mɔ́ɔ́ wú lííwaa, kɛ maa w̃ɔ́i aa ɣɛ ngáá nduwɔ lopó ɣɛ́ kíli wú kpɛ́lɛɛ fááw̃a.

⁴⁵ Sífaa nuí síí w̃ɔ́i taa ɣɛ ma Nuu Búsa Goo H̃ú Loí ɣéle tɔ aa vaangɔ́ ngáá nungáá ti w̃ɔ́l̃ɛ mbɛ. Kɛ́ laá ɣéle, i vaangɔ́ ngáá í ɣɛ́ ngáá mɔl̃ɛ́ w̃ɔ́ɔ nungáá yɛ, ná vólu, í lɛɛh̃úi gúla ndɔbɔ nuu bih̃íw̃aa ti wumááwo fááw̃a.”

Jísu i mbole w̃ɔɔ́ yílaa mbáloni tɔ́ɔ́ ɣɛ́ ma Batímeyɔ

⁴⁶ Kɛ Jísuni ngaa polú yélaitii ɛ́ɣɛ faŋaí í ɣɛ́i ti volú tí fólonga taa walái sí h̃u taa tolí ngáá Jɛlóko. Ná tí ɣɛ́i taa gúla naa wa, ti Temeyɔ h̃iỹɛndou loí w̃áálei héini peleí béla tɔ́ɔ́ ɣɛ́ ma Batímeyɔ mbolengɔ́ áa maanɛ́ɛ́nɛ mbó ngáá tí kɔ ngáá ŋani.

⁴⁷ Ná í mɛniní ngáá kɛ Jísu í ngáá Násɔlɛ taa h̃u w̃ɔ́i laá lɔ í ɣɛ́i áá lɔ́ve, kɛ i pɛlɛngá woo gúlama, íwaa ɣɛ́ ta, “Jísu, yɛ́i taa í lóli ngáá Deevé Láála Lói, mááw̃aanu hóu kái!”

⁴⁸ Kɛ́ nuu bíh̃iw̃aa ti bándɛni la ngáá í w̃aa ɣɛ ló, kɛ́ siỹɛndópoi i ɣɛi áá woo gúla náá ɣéla múl̃ɔ ngwala, áá ɣɛ́ ta, “Yɛ́i taa í lóli ngáá Deevé Láála Lói, mááw̃aanu hóu kái!”

⁴⁹ Kɛ Jísu i longá, i ɣɛ ta, “A tolí.” Kɛ tí siỹɛndópoi lólinga, ti ɣɛ́ ma, “Yaa lúwa! Yooɣé, yí ló! Jísu lɔɔ í lóli.”

⁵⁰ Kɛ siỹɛndópoi i ngi lóma kooh̃aí gúlanga w̃á, í wúyoɣe, í ló ngáá maahulángɔ, í lí Jísu yelé.

⁵¹ Kɛ Jísu i mɔɔningá, i ɣɛ ma, “Ndeé lɔ í lóngɔ ngí kɛ́ í yɛ́?” Kɛ mbole w̃ɔ́i ná i ɣɛa Jísu w̃a, “Kaamɔ́ɔ́, ndóngɔɔ lé ngí ɣɛ́ ngáá ỹánda lɔ.”

⁵² Kɛ Jísu i ɣɛ́a ma, “Lí náa. Í lángi í í h̃ú, í í wálonga.” Ngamá nɔ́ɔ, kɛ siỹɛndópoi yaah̃úi w̃aa i wónga, í to Jísu wa, tí lí.