MÁFIYU 25 - Kɛ́lɛ Niinaí

Faanɛ́ɛ́ngi kɔwɔ́ato nyah̃á béla púúngɔi wa

¹ Kɛ Jísu i ɣɛa vólu yélaitii ma, “Ná nuí síí w̃ɔ́i taa ɣɛ́ ma Nuu Búsa Goo H̃ú Loí vaalaí áá ɣɛ́a foló ma, Ngalángi w̃ásandai ɣɛ kíli aa gula ngáá faanɛ́ɛ́ngi sí. Nyah̃á béla púúngɔ lɔ wɔ́lɔ ti ɣɛ́i na, tí tí hɛ́fɛ lambongáitii ngéɣei, tí lí nyah̃á wɔ́li mɔ́i lúwɔ.

² Ndɔ́ɔ́lungɔi ti ɣɛ́i ngáá tamál̃a mbélaa, ndɔ́ɔ́lungɔ vekaítii pá ti ngáá sɛmbɛ heí yélaa.

³ Tamál̃a mbélai tí tí hɛ́fɛ lambongáitii ngéɣei kɛ́ taá ngulɔ́ véka báhai mba.

⁴ Kɛ́ sɛ́mbɛ héi yélai tí ngulɔ́i yeɣéni baabɔlɔ́ɔ́ngaitii su, tí kpáha ti hɛ́fɛ lambongáitii mba.

⁵ Kɛ́ ná nyah̃á wɔlí mɔ́i áá vaaní h̃úmbuwa, ti kpɛ́lɛɛ tí bɔlɔ́ni nyii w̃ɔníi í tí hóu, ti ỹíi.

⁶ I ɣɛi náá ngáá kuyá liiwáá kɛ tí nuu wóó ỹɛ́ninga, áá seehéi wó, áá ɣɛ́ ta, ‘Nyah̃á wɔ́li mɔ́i i vaangá! A mu lí túwɔ!’

⁷ Kɛ nyah̃a bélangai nátii kpɛ́lɛɛ tí yóóɣenga nyíi h̃u, tí tí hɛ́fɛ lambongáitii kɛ kíli batɛ́, tí tí lo.

⁸ Kɛ tamál̃a mbélaitii ti ɣɛ́a sɛ́mbɛ héi yélaitii ma, ‘A ni wɔ wú wúlɔi h̃u, sífaa ni hɛ́fɛ lambongáitii tiyá lɔ́ɔ há.’

⁹ Kɛ́ nátii tí tí woo yápoteni, ti ɣɛ́ tí w̃a, ‘Kpéle, tɛingaa ɛi kulaɣɛ́ mu wa maa wúyeni. Wá ɣéle, a lí sítii ngelé táa ngúlɔi w̃ááɣɛ, wú ta yaá bɔ́wɔ hááw̃a.’

¹⁰ Kɛ́ ná tamál̃a mbélai nátii ti ɣɛ́i taa lí ngulɔ́i tá yaáma, tí loí nɔ́ɔ liimá, nyah̃á wɔ́li mɔ́i í vá. Sɛmbɛ héi yélai nátii pa ti w̃ááhei wóngɔ í ɣɛ́i lá, ti báhai nyah̃á wɔ́li mɔ́i wa, tí lɛ́ nyah̃á wɔlí kótai wu nyah̃á wɔlí kúi w̃a, pɛlɛ́i va ndaa í bɔ́lu.

¹¹ Ná naa í ɣɛ́i kpɛ́ɛ́, kɛ tamál̃a mbélaa ndɔ́ɔ́lungɔi nátii tí vaá, ti ɣɛ́ nyah̃á wɔ́li mɔ́i w̃a, ‘Kawálai, kawálai! Pɛlɛ́i laa wó ni lúwɔ!’

¹² Kɛ́ nyah̃á wɔlí mɔ́i i ti woo yápoteni, i ɣɛ ti w̃a, ‘Ngí tɔɔỹái le wú w̃á, ngáá wú wɔ́lɔ.’ ”

¹³ Jísu i faanɛ́ɛ́ngi sí vólui ɣɛí, i ɣɛ ta, “Faalɔ, a w̃aah̃ú béle, sífaa wáá fóloi wɔlɔ́ ɔɔ táingi í fóloi ná h̃u sí Nuu Búsa Goo H̃ú Loí áá vá ma.”

Faanɛ́ɛ́ngi kɔwɔ́ato ngenge mbélaa sáángɔi wa

¹⁴ Kɛ Jísu i ɣɛa ti w̃a, “Ná nuí síí w̃ɔ́i taa ɣɛ́ ma Nuu Búsa Goo H̃ú Loí váalai vólu áá ɣɛ́a folóma, Ngalángi w̃ásandai ɣɛ kíli gulangɔ́ áá ɣɛ lá ngáá faanɛ́ɛ́ngi sí mɔ́ɔ. Siỹɛndópoi yiláá tɔ́ wɔ́lɔ í ɣɛ́i na, i ɣɛi áá lí siyamá, kɛ i ngi yénge mbeláitii tólinga, í yaá wɔ́lingai ndo ti lóko h̃u.

¹⁵ I féni ngiláángi yaá ngáá bɛ́ki ndɔ́ɔ́lungɔ, í fé pekaí yaá ngáá bɛ́ki félengɔ, ná vólu, í fé pekaí yáa ngáá bɛ́ki yiláá. I fení ti yilá ngíla ngéya ngáá ti hómbondaa vélei, kɛ i liingá ngi híyangi w̃a.

¹⁶ Ngenge mɔ́i sí í bɛ́ki ndɔ́ɔ́lungɔi w̃aahɔ́lɔni, i lií ngamá áá loko vóte voté ngí ndá gápangi h̃u, bɛ́ki ndɔ́ɔ́lungɔi í láma ngeyá.

¹⁷ Ngimɔ́ɔ́ nɔ́ɔ jɔ́ ngenge mɔ́i sí í bɛ́ki félengɔi w̃aahɔ́lɔni, laá bɛ́lɛ í kɛ́ni bɛ́ki félengɔi í láma ngeyá.

¹⁸ Kɛ́ ngenge mɔ́i sí í bɛ́ki yilángi w̃aahɔ́lɔni, i liiní í ndowái wɔ ndɔwɔlɔ́i wa, í ngi núu walaí gápangi lɔ́ɔ́wu su.

¹⁹ Ná taíŋ suugooh̃ángɔ í gúlai su, kɛ ngenge mbélai nátii ti núú walaí i vaangá volú ngáá ti kápangi hái yakúla mba taá tiyéni ti lówah̃u.

²⁰ Ngenge mɔ́i sí í bɛ́ki ndɔ́ɔ́lungɔi w̃aahɔ́lɔni, i vaaní í bɛ́ki ndɔ́ɔ́lungɔi báha ndɔ́ɔ́lungɔ vekaí wa í kpɛ́lɛɛ tɔ́ve ngi núú walaí yelé i ɣɛ ma, ‘Kawálai, yí bɛ́ki ndɔ́ɔ́lungɔ longɔ́ tóko h̃u, kɛ́ tɔ lɛ́ɛ, ndɔ́ɔ́lungɔ vekaa lɔ í lángɔ ma.’

²¹ Kɛ ngi núu walaí i ɣɛa ma, ‘Yí kɛ́ngɔ ngwála, yá lɔ ngáá ngenge mɔ́ɔ́ vánda ɛ́ɣɛ tɔ́wɔbaɣa w̃ɔ́ɔ́! Yí tɔ́wɔbaɣa gúlangɔ faa gúlo kw̃ɛ́ɛ́ su, faalɔ, nyáá ngáá ŋáni bih̃íw̃aa he í yáa ti ɣɛ́ í lóko h̃u. Vá, yí báha í núú walaí wa ngi góóh̃unɛi h̃u!’

²² Ngenge mɔ́ɔ vékai vá í bɛ́ki félengɔi w̃aahɔ́lɔni, laá bɛ́lɛ i vaaní, i ɣɛ ngi núú walaí w̃a, ‘Kawálai, yí bɛ́ki félengɔ lóngɔ tóko h̃u, kɛ́ tɔ lɛ́ɛ, kɛ́ félengɔ vékaa lɔ í lángɔ ma ngéya.’

²³ Kɛ ngi núú walaí i ɣɛa ma, ‘Yí kɛngɔ́ ngwála, yá lɔ ngáá ngenge mɔ́ɔ vánda ɛ́ɣɛ tɔ́wɔbaɣa w̃ɔ́ɔ́! Yí tɔ́wɔbaɣa gúlangɔ faa gúlo kw̃ɛ́ɛ́ngi sí h̃u, faalɔ, nyáá ngáá ŋáni bih̃íw̃aa he í yáa ti ɣɛ́ lóko h̃u. Vá, yí báha í núú walaí wa ngi góóh̃unɛi h̃u!’

²⁴ Kɛ ngenge mɔ́i sí ngi núú walaí í bɛ́ki yilángi héni ngeyá, i vaangá, i ɣɛ ngi núú walaí w̃a, ‘Kawálai, ngí ɣɛ́i kɔlɔ́ ngáá í hái bangɔ́ɔ́ lé, mbéi yɛ́i sí ŋani béle lá na, naa lɔ yáá lí na kulama, ná vólu, mbéi yɛ́i sí ŋaní hí na, naa lɔ́ yáá lí na ngi wá kúlama.

²⁵ Faalɔ, ngí ɣɛ́i ngáá lúwa, náá hááw̃a, ngí líi ngí ndówai wɔ, ngí í gápangi lɔ́ɔ́wu su. Faalɔ, í gápangi lɔ.’

²⁶ Kɛ ngi núú walaí í ɣɛa ma, ‘Yá lɔ ngáá nyaama yénge mɔɔ, ná vólu, í háɣangɔ! Mɛima ɣɛ yí ɣɛ́i suuwɔlɔ́ ngáá mbéi ngɛ́i sí ŋaní béle la na naa lɔ ngáá lí na kulamá, ná vólu, mbéi ngɛ́i sí ŋani hí na naa lɔ ngáá lí na ngi wa kulamá?

²⁷ Kɛ yɔ́ɔ́ ɣɛ́ hɔ́ɔ́ ní gápangi vúni kápa ngándɔɔlɔ pɛ́lɛi wu kɛinɔɔ́ ná ngɔ́ɔ́ yangáima, ngɔ́ɔ́ ɣɛ́ ɣɛ́i bɛ́ki yilángi w̃aahɔ́lɔni í báha ndamaí wa.’

²⁸ Kɛ nuu wálai ná i ɣɛa ngenge mbélaa vékaitii tɛingáá w̃a, ‘A bɛ́ki yilángi hóu ngeyá, wú fe sí yáa bɛ́ki púúngɔi í ngeyá.

²⁹ Sífaa, nuí fíli ŋani áá ɣɛ́ ngeyá bih̃í, ta áá báha mba aáva kpih̃íngɔ aa ɣɛ náa ngeyá, kɛ́ nuí fíli ŋáni ɛ́i ɣɛ́ ngeyá bih̃í, sí gúloi ɣéle tɔ áá ɣɛ́ ngeyá, ɛi ló ngéya.

³⁰ Ngambalá mba yénge mɔ́i sí laa, a píli ngitíí ya kpindíi h̃u. Naa lɔ áá ɣɛ́ na, áá wɔ́lɔ, áá laangɔ́lu yámɛ.’ ”

Ngapúmaa gɔsɔngí

³¹ Jísu í mɔ́ɔ́ ɣɛ volú yélaitii ma, “Ná nuí síí w̃ɔ́i taa ɣɛ́ ma Nuu Búsa Goo H̃ú Loí áá vá áá hólo ngi yákpa maanɛɛnɛɛngí h̃u, aáva malékaitii kpɛ́lɛɛ tí mba, ngi gááma w̃asandai h̃u,

³² nuí kpɛ́lɛɛ pá tí lengɔ́ ngeleí sí wu, ti yatɛ́ngɔ aa ɣɛ lá mbá kakála, aáva aa ti yakɔ́lɛma kíya nɔ́ɔ mbaala w̃ááh̃u béle mɔ́i áá mbáálaitii ngakɔ́lɛma taá njeéngaitii.

³³ Aa telembo mbélaitii pu ngáá yisa h̃u vélei, í telembo tála yélaitii pu ngáá gɔvɔ h̃u véle.

³⁴ Masangí aa ɣɛ náa sítii ma taa ɣɛ́ ngisa h̃u vélei, ‘A vá, wɛ́i ní Kɛ́ɛ́ɣɛ Ngalá ngí hɛ́ɛ́ngɔ wú yɛ, a va wú ɣɛ́ ngi w̃ásandai h̃u kɛ kíli batɛngɔ́i wú háaw̃a wɔ́lɔ kpɔ́lɔɔ ngetéyangi lɔ́kula héimai,

³⁵ sífaa ná ndɔlɛí í ɣɛ́i má, wú kɔ́i ngáá mɛɛní ngí mɛ, ná njɛ w̃ɔlíi i ɣɛi ma, wú kɔ́ ngáá njɛ ngí kpɔ́le, ná ngí ɣɛ́i ngáá sotá, wú lokohéini mbú,

³⁶ ná kula beɣé ngí í ɣɛi mbá, wú kula yíli má, ná séébɛngɔ í ɣɛi lá, wú mááh̃u belé, ná ngí ɣɛ́i kpindi vɛlɛ́i wu, wú bɔ́i mbá.’

³⁷ Kɛ́ telembo mbélaitii pa taá ngoo yápote náa, ti ɣɛ́ ma, ‘Kawálai, bele hɔ́wɔ lɔ ní tɔí ndɔlɛ í í w̃á ni í lááwɔ, ɔɔ njɛ w̃ɔlí í í w̃á ni í wɔ́ ngáá njɛ?

³⁸ Béle hɔ́wɔ lɔ nápa ni í lɔ́i ngáá sotá ní lokohéi í wú, ɔɔ kula beɣé ngí i wá ní kula yíli í w̃á?

³⁹ Bele hɔwɔ́ lɔ́ ní tɔí i héébɛngɔ ɔɔ yí kpindi vɛlɛ́ wu ní bɔ í wá?’

⁴⁰ Masangí aa ti woo yápote náa, i ɣɛ ti w̃a, ‘Ngí tɔɔỹái le wú w̃á, sí fíli wú kɛ́ni nungái sítii ti tá yílaa mbɛ́ ngakpá ngáa ɣɛ́i tí yɛ, kɛ́ ti ngáá ní vóngaa ɣɛ kíli, wú kɛngɔ́ mbɛ́.’

⁴¹ Kɛ́ aa ɣɛ sítii ma tí kɔvɔ h̃u vélei, ‘Wɛ́i Ngalángi vélengi í wú wá, a hiɣe ngááh̃u wú lí kúnafɔ wɔ́mbui h̃u, sí kɛ kíli batɛngɔ́i Ngutuwɔ́ Ỹína Nyɔí haaw̃a taá polu yeláitii,

⁴² sífaa ná ndɔlɛí i ɣɛi má, wáá kɔ́i ngáá mɛɛní ngɔ́ɔ́ mɛ, ná njɛ w̃ɔlí í ɣɛi má, wáá kɔ́i ngáá njɛ ngɔ́ɔ́ kpɔ́le,

⁴³ ná ngí ɣɛ́i ngáá sotá, wáá lokohéini mbú, ná kula beɣé ngí ɣɛ́i mbá, wáá kula yílini má, ná séébɛngɔ i ɣɛi lá, ɛ́ɣɛ ná ngí ɣɛ́i kpindi vɛlɛ́i wu, wáá bɔ́i mbá.’

⁴⁴ Nátii bɛ́lɛ taá ngoo yápote, ti ɣɛ́ ma, ‘Kawálai, nápa bele hɔ́wɔ lɔ ni í lɔ́ni ndɔlɛ í í w̃á ɔɔ njɛ w̃ɔní í í w̃á ɔɔ yí ngáá sotá, ná láá lé, kula beɣé ngí wá ɔɔ í héébɛngɔ ɔɔ yí kpindi vɛlɛ́i wu nɛ́i belé bɔ í wá?’

⁴⁵ Masangí aa ti woo yápote, i ɣɛ ti w̃a, ‘Ngí tɔɔỹái le wú w̃á, sí fíli wáá kɛ́ni sítii ti tá yílaa mbɛ́ ngakpá ngáá ɣɛ́i ti yɛ, kɛ wáá kɛ́ni mbɛ́.’ ”

⁴⁶ Jísu woo yápumai faanɛ́ɛ́ngi sí h̃u, i ɣɛi ta, “Aáva taá li kúnafɔ w̃áánɔw̃ɔi h̃u. Kɛ́ sítii pa tí ngáá telembo mbélaitii taá lí kúnafɔ lɛ́ɛ́h̃ui h̃u.”