Keela woó vándai Lúu í pɔ́nɛni kɔwɔ́ato Jísu Kílisitii wa LÚU 23 - Kɛ́lɛ Niinaí

Ti liiní ngáá Jísu Páilɛɛ yelé

¹ Kɛ Faa H̃uu Haa Lé Mbélaitii kpɛ́lɛɛ ti yóóɣenga tí lí ngáá Jísu Lóómingaitii ti gɔ́mɛti nuu walai Páilɛɛ yelé.

² Kɛ tí pɛ́lɛnga faa lɛ́ma Jísu wu mba, táá ɣɛ́ ta, “Ní siỹɛndópoi sí lɔ́ngɔ íwaa ni vóngaitii siɣe ti híya velé wa. Aá lɔ́ɔ nde ti w̃a ngáá tálaa pava he Lóómi Lɔwɔlɔ́ W̃ása Ngwalaí yaá, ná vólu, i ɣɛ aá lɔ́ í ngáá Ngalángi Lókolo Mbá W̃ɔ́i, ná wáá ngáá masa ngwálai.”

³ Kɛ Páilɛɛ i Jísu w̃ɔɔningá, i ɣɛ ma, “Aa ɣɛ yá lɔ yí ngáá Júsuai ti W̃ása Ngwalaí?” Kɛ Jísu i Páilɛɛ woo yápotenga, i ɣɛ ma, “Ngimɔ́ɔ́ yí ndénga.”

⁴ Kɛ Páilɛɛ i ɣɛa Ngala sááɣa gula mbélai ti wútuwɔaitii ɛ́ɣɛ faŋaí w̃a, “Ngáá tɔ́ngɔ siỹɛndópoi sí velé lálangɔ ɔ́ɔ́ ɣɛ la faa ỹɔ́u hááw̃a.”

⁵ Kɛ́ nungáitii tí ndií nɔ́ɔ ngu ma ngáá ndendáá táá ɣɛ ta, “Jísu lɔɔ́ nungáitii ngu séi heí wa hááli hááli Judíya lataí kpɛ́lɛɛ su ngáá ngi gálambongi. I tɔkúla héingɔ Galéli lataí h̃u aáva i lowá su i vaá í foló mbéinda fáli.”

Ti Jísu lɔvení Masangí Hɛ́lɔdi yéle

⁶ Ná Páilɛɛ í ngoí sí ỹɛ́nini, i nungáitii mɔ́ɔ́nini ná wɔ́lii Jísu áá ɣɛ ngáá Galéli w̃ɔ́ɔ.

⁷ Ná aa vá í ɣɛ́i kɔlɔ́ ngáá kɛ Jísu i gulangɔ́ Masangí Hɛ́lɔdi lataí h̃u, i tɔvení Hɛ́lɔdi yelé lɛ́i í ɣɛ́i Jɛlúsɛl̃ɛ ná h̃u.

⁸ Ná Hɛ́lɔdi í Jísu lɔní, ndiilángɔ i ɣɛi lá ngwala, bɔw̃álale í ɣɛi naa faa ỹɛ́nini kɔwɔ́ato mba. Kuu h̃úúgooh̃angɔ hááw̃a i ɣɛi loí í Jísu lɔ ngáá na í kááma haí tá ɣɛ ngaah̃ú w̃a.

⁹ Faalɔ, Hɛ́lɔdi i Jísu w̃ɔɔniní ngáá mɔɔni kpíh̃i bih̃i, kɛ́ Jísu aa ngoo yápote fíli féni.

¹⁰ Ngala sááɣa gula mbélai ti wútuwɔaitii ɛ́ɣɛ kaamɔítii Ngala sávai hááw̃a ti ɣɛ́i lóóni na táa faa ỹɔ́u ỹɔ́ungaitii tɛ Jísu wu mba nɔ́ɔ kélei ngáá ndiihiká híka.

¹¹ Kɛ Hɛ́lɔdini ngaa ngi hóyaitii tí pɛ́lɛnga ngɛlɛ́ gúlama Jísu h̃u táa tokohiyá ngu maah̃ú háá ɣɛ la. Tí maayíli ngáá kula vandá, tí tɔve volú Páilɛɛ yéle.

¹² Folói ná w̃aa vá tɔ Hɛ́lɔdini ngaa Páilɛɛ ti ɣɛ́i ngáá mbala lopoa, kɛ́ hése, ti ɣɛ́i hilíni ngáá ỹɔw̃ɔ́ ỹɔ́w̃ɔ.

Saa hái i loní Jísu wa

¹³ Kɛ Páilɛɛ i Ngala sááɣa gula mbélai ti wútuwɔaitii tolínga ỹanda yílaa taá ngutuwɔ́aitii ɛ́ɣɛ nungáitiini,

¹⁴ i ɣɛ ti w̃a, “Wú váángɔ ngáá siỹɛndópoi sí ngéle wúwaa nde ngáá aá lɔ́ɔ nungáitii to gɔ́mɛtii laa wú. Kɛ́ ngí kɔsɔ́nga wú kpɛ́lɛɛ kákala, ngáá tɔngɔ́ pelé lálangɔ ɔ́ɔ́ ɣɛ́ la faí ta fíli sú wú pɛ́lɛnga mba.

¹⁵ Ná vólu, Hɛ́lɔdi buteí aa tɔngɔ́ pelé lálangɔ ɔ́ɔ́ ɣɛ la, bɔw̃álale i mɔ́ɔ tɔvengá nɔ́ɔ a mu yelé. Faalɔ, ngakɛ́ngɔɔ lé kpál̃au ngáá kɛ Jísu aa nɛɛ faa fíli kɛ́ni ngáá nuu áá paa faaw̃a.

¹⁶ Náá hááw̃a, nyáá ngáá faa bá ndá nɔ́ɔ ma, ngí bé mba í lí.” [

¹⁷ Aáva, Júsuai ti Wumaawó Kúi wuya sɔ́wɔi fíli ma, kɛ Páilɛɛ ɔ́ɔ́ nuu yílaa kúla kpindi vɛ́lɛi wu, í maahaalo.]

¹⁸ Kɛ́ nungáitii kpɛ́lɛɛ ti ɣɛ́i taá woo gúla, táa ɣɛ ta, “Jísu váa, siỹɛndópoi sí taa ɣɛ́ ma Balába yí maahaaló ni yɛ!”

¹⁹ Balába va ti ɣɛ́i piliní kpindi vɛlɛ́i wu nuí hááw̃a í pááni ɛ́ɣɛ ndapií hááw̃a í gúlani nungáitii ndowah̃u taa gɔ́mɛtii taa walái h̃u.

²⁰ Kɛ́ Páilɛɛ i ɣɛi loní í Jísu w̃aahaalo, faalɔ, i nungáitii maanɛ́ɛ́nɛni mɔ́ɔ.

²¹ Kɛ́ tí ndií nɔ́ɔ ngu ma ngáá woo gúlandaa, táa ɣɛ́ ta, “Kpakpá kulɔ́sii w̃a, kpakpá kulɔ́sii w̃a, í lo na í há!”

²² Páilɛɛ yɛ́pɛlai hawa kélei nungáitii ngelé, i ɣɛi ti w̃a, “Ndeénii le? Faa ỹɔ́i bɛɛ́ lɔ í kɛngɔ́? Ngáá nɛ́ɛ faa ỹaaní fíli tɔ́ni siỹɛndópoi sí h̃u ngáá nuu áá paá fááw̃a. Faalɔ, nyá ngáá faa bá nda nɔ́ɔ ma, ngí bé mba í lí.”

²³ Kɛ́ nungáitii ti ndií nɔ́ɔ ngu ma ngáá bandɛndáá ngáá ti Jísu bakpá kulɔ́sii w̃a, aáva ngapúmai tɛ́ɛ́lɛ, ti ndaí í ndoí náa ma.

²⁴ Páilɛɛ va i kpatɛní náa gi má ngáá í lokohéi nungáitii ndaa wói wu.

²⁵ Faalɔ, i siỹɛndópoi sí w̃ááhaaloni ti ɣɛ́i lói i maahaaló lɛ́i ti ɣɛ́i piliní kpindi vɛlɛ́i wu nuu váa fááw̃a ɛ́ɣɛ ndapií hááw̃a í gúlani nungáitii ndowah̃u taa gɔ́mɛtii. Aáva í Jísu va tokolevéni náa ngáá i saa w̃aahɔ́lɔ kíya nungáitii ti ɣɛ́i loní tí kɛ.

Ti Jísu bakpáni kulɔ́sii w̃a í há

²⁶ Ná sóyaitii ti ɣɛ́i taa lí ngáá Jísu, ti w̃ɛ́ni taa siỹɛndópo yiláa táá ɣɛ́ ma Sáimɔ. I ɣɛi ngáá taí sí h̃uu w̃ɔ́ɔ taá náá lolí ngáá Saílini. I ɣɛi áá gúla kpaalaí w̃a áá vá taa walái h̃u. Tí sóuni, ti kulɔ́sii la kɔma ngáá í to Jísu wa í líi la.

²⁷ Faŋa walá i toní Jísu wa, nyah̃áitiini ti ɣɛ́i ti h̃u táa gilísu léve, ti w̃áaw̃aanungɔ táá Jísu w̃aa wɔlɔ́ wó.

²⁸ Kɛ́ Jísu i votení, i ɣɛ ti w̃a, “Wɛ́i wú ngáá nyah̃áitiini wú ngáá Jɛlúsɛl̃ɛ taa walái h̃uu léngaitii, a waa wɔ́lɔ fááw̃a. A wɔ́lɔ bɔwɔ́ haaw̃a ɛ́ɣɛ wú léngaitiini.

²⁹ Sífaa táingi lɔɔ va folóma ma, nungáitii taá ɣɛ ta, ‘Aá lɔ ngáá faa vánda kpeeỹɔ́ nyah̃áitii fááw̃a tiyɛ́i taá ndoú léni kɛlaa tɔ́ɔ nyiní hé ndoú yɛ́.’

³⁰ Táingi na h̃uu lɔ nungáitii taa ɣɛ́ taa ɣɛ́ fasá yiheítii ma, ‘A h̃undɛ́ ni w̃a,’ ti ɣɛ́ ngihéi w̃a, ‘Ni w̃áá bɔ́lu!’

³¹ Nyá ɣéle na táa sítii kɛ ngáá ngé nyɛ́i kúlangɔi ngáá ndɔbɔ wundú. Ná ná áá ɣɛ, bɛɛ́ lɔ aáva ɣɛmá ngáá wú ye wɛ́i wú gúlangɔi ngáá pɔsaɣá mbéngɔ?”

³² Siỹɛ félengɔ vekaa ti ɣɛ́i na, ti héi h̃u félengɔ ti ɣɛ́i ngáá faa ỹaaní mbélaa. Tiyá bɛ́lɛ tí tí báhani Jísu wa, tí li ngáá ti ye ti váá fááw̃a.

³³ Ná tí folóni ỹandái mbéi taa ɣɛ naa w̃a Ngu Kokó Ỹándai, naa lɔ ti Jísu bakpáni na kulɔ́sii w̃a í báha faa ỹaaní mbélaa félengɔi nátii mba. Tí ngiláángi bákpani ngisa h̃u vélei, tí pekaí bákpa kɔvɔ h̃u vélei.

³⁴ Kɛ Jísu i Ngala fɛ́linga, i ɣɛ ta, “Kɛɛɣɛ́, ti h̃úúhaalo, sífaa taá kɔ́lɔ sí tíwaa kɛ.” Sóyaitii tí falángi yáleni náa Jísu gulaítii ma tí kɔ́lɛ wɔlɛ́ wa.

³⁵ Nungáitii ti ɣɛ́i lóóni na táá naa belé. Ti wútuwɔaitii pa ti ɣɛ́i lóóni na táa ngɛlɛ́ gúla Jísu h̃u, tíwaa ɣɛ́ ta, “I nungáá vekaítiini maawalónga kɛ́ bɛlɛ́ na hɔ́ɔ í bɔwɔ́ w̃ááwalo ná wɔ́lii tí laá lɔ í ngáá Ngalángi Lókolo Mbá W̃ɔ́i.”

³⁶ Sóyaitii bɛ́lɛ nɔ tí ngɛlɛ́ gúlani Jísu h̃u, ti vááni ngáá ndɔɔ lábangɔi mbɛ.

³⁷ Kɛ ti ɣɛ́a ma, “Ná yá lɔ yí ngáá Júsuai ti W̃ása Ngwalaí, bɔwɔ́ w̃aawálo na!”

³⁸ Kɔlɔ vɔ́nɛngɔi pɛlɛngɔ́ í ɣɛ́i la Jísu wu kɔlɔ́i suu wói i ɣɛi ngáá sí, “Júsuai ti W̃ása Ngwalaí lɔ ngáá sí.”

³⁹ Faa ỹaaní mbélaa félengɔi sítiini ti bakpángɔ í ɣɛ́i la kulɔ́siitii ma, ngiláángi i ɣɛi áá ngɛɛli ngóó le Jísu w̃a. I ɣɛi áá ɣɛ ma, “Kɛmbɛ yá lɔ́ yí ngáá Ngalángi Lókolo Mbá W̃ɔ́i? Bɔwɔ́ w̃ááwalo na ɛ́ɣɛ niỹá!”

⁴⁰ Kɛ́ ngi mbála háá ỹááni mɔ́i i ndaa wóó léveni nda, i ɣɛ ma, “Nduwá áá í h̃u Ngalá fááw̃a baa? Mu lɔ́ngɔ kpɛ́lɛɛ saa háa híí yiláá kpéngi lɔ í lóngɔ a mu wa,

⁴¹ kɛ́ mu ndái laá, aá lɔ pele w̃a sífaa, mu gɛɛhɔ́ngi lɔ i kɛ́a kule í mu w̃a mú sái sí wo. Kɛ́ siỹɛndópoi sí aa faa ỹɔ́u fíli kɛ́ngɔ.”

⁴² I ɣɛ Jísu w̃a, “Jísu, gindó sú kái ná yáá va í w̃ásandai h̃u!”

⁴³ Kɛ Jísu i ngoo yápotenga, i ɣɛ ma, “Ngí tɔ́ɔ́ỹai le í w̃á, hááwɔ, ma yá muỹá lɔ ɣɛ́ ngelegóóh̃u.”

Jísu haalaí

⁴⁴ Ná folói í foloní nuu wú ndiiwáá, kpindíi i hitɛní gíli ndɔwɔlɔ́i ná h̃u kínɛi í ló su kpɔkɔ hólo yakpamái í fólo.

⁴⁵ Folói i bení gulandái wa. Kula walái vá í ɣɛ́i hɛ́lɛni Hɛ́ɛ́ma Yála Pɛ́lɛi wu, i waliní su féle.

⁴⁶ Jísu i baíni woo wála h̃u, i ɣɛ ta, “Kɛɛɣɛ́, nyáá ngáá súúyafuw̃angi he náa í ló í lóko h̃u.” Ná léi Jísu í ngoí sí lení, ndii í gúlai náa.

⁴⁷ Ná sóya nuu walaí í fái sí lɔní í híyani, i Ngalá tɛ́ni, i ɣɛ ta, “Tɔɔỹaá hááw̃a, faa ỹɔ́u fíli aa ɣɛngɔ siỹɛndópoi sí h̃u.”

⁴⁸ Nungái sítiini kpɛ́lɛɛ ti yatɛngɔ́ í ɣɛ́i la mba ngáá tí naa lɔ, ná tí tɔ́ni fái sí í híyani, tí gilísuitii ndevení ngáá maaw̃aanú, ti gúla naa wa tí li.

⁴⁹ Kɛ́ sítii kpɛ́lɛɛ ti ɣɛ́i Jísu wɔlɔ́, í báha náa nyah̃áitii mba ti ɣɛ́i toní mba ti gúlani Galéli lataí h̃u, ti ɣɛ́i lóóni p̃óuma táá faí sítiini kal̃aa lɔ.

Jísu bɔlundái

^50-51 Siỹɛndópo yiláá i ɣɛi na, taá ɣɛ ma Joosɛ́, i gulaní taí sí h̃u taá náá lolí ngáá Alemátiya, í Judíya lataí h̃u. I ɣɛi ngáá telembo mɔ́ɔ. Aáva í ɣɛi áá Ngalángi w̃ásandai w̃aalɛ́lɛ. I ɣɛi ngáá Faa H̃uu Haa Lé Mbélaitii ti tá, kɛ́ ndaahɔ́ ngáá ɣɛi ti háá h̃uubatɛngi ta fíli su ɛ́ɣɛ ti lúva veléi kɔwɔ́ato Jísu wa.

⁵² Laá lɔ í lííni Páilɛɛ yelé, i Jísu vuw̃aí h̃uuhɛ́li ma.

⁵³ Kɛ i Jísu vuw̃aí gúlanga kulɔ́sii w̃a, i kula wóle pánda yelé mbéle ma, í li í kpɔ́lu kambái h̃u í ɣɛ́i ngáá kokongí mbɔngɔ́ í ɣɛ́i la kɔtuí wa mbéi taa nɛ́ɛ ɣɛi nuu fíli kpɔ́luni na.

⁵⁴ Folói ná i ɣɛ ngáá Ndɔwɔ́ Wála hólo, aáva Júsuai ti Lɛ́ɛ́lɛmbo Ngála Fɛli Fóloi i ɣɛi náa áá va lɔkúla héima.

⁵⁵ Nyah̃ái sítiini ti ɣɛ́i toní Jísu wa taá tiyéni ti gúlani Galéli lataí h̃u, tí tóni Joosɛ́ wa tí lí tí kambái hɔ́bɛ, ná vólu, tí naa hɔ́bɛ kíya í Jísu vuw̃ai láni kámbai h̃u.

⁵⁶ Ná ná í gúlani su, tí yangáimai náa mbéi ti ɣɛ́i na tí ngulɔ w̃ááku nɛɛ nɛɛngí ɣɛ́ kíli batɛ́ ɛ́ɣɛ sɛ́ndi ngáá ti pú Jísu vuw̃aí w̃a. Kɛ́ tí lɛ́ɛ́lɛmboni Júsuaitii ti Lɛ́ɛ́lɛmbo Ngála Fɛli Fóloi w̃a, sífaa savaí i ɣɛi ngáá ná.