Biblia Todo Logo
Bìoball air-loidhne

- Sanasan -


Keela woó vándai Lúu í pɔ́nɛni kɔwɔ́ato Jísu Kílisitii wa LÚU 2 - Kɛ́lɛ Niinaí


Jísu lendái
( Máfiyu 1:18-25 )

1 Táingi ná h̃uu vá Njɔú léngɔ í ɣɛ́i náá la, Lóómi Lɔwɔlɔ́ W̃asa Ngwalaí sí tɔ́ɔ ɣɛ́ ma Ɔgɔ́sitɔ, i sava laní nungáitii ngeyá Lóómi lɔwɔlɔí ná h̃u ngáá tí laahéingitii pu kɔlɔ w̃a.

2 Sí lɔ í ɣɛ́i ngáá hésendaa laahei pundáá í híyani ná h̃u siỹɛndópoi sí tɔ́ɔ́ ɣɛ́ ma Kiléniyɔ, í ɣɛ́i ngáá masangí tataí sí h̃u taá náá lolí ngáá Síliya.

3 Nuí kpɛ́lɛɛ pá tí lííni ti bɔwɔ́ lé taítii su ngáá tí laahéingitii pu.

4-5 Faalɔ, Joosɛ́ lɛ́i í ɣɛ́i náa Mɛɛloí w̃aahóuni ti gulaní taa Mɛɛloí taí sí h̃u taá náá lolí ngáá Násɔlɛ í Galéli lataí h̃u, tí lí taí sí h̃u taa náá lolí ngáá Bɛ́tileh̃ɛ i tataí sí h̃ú taá tolí ngáá Judíya ngáá tí laahéingi vu. Tí lííni míl̃a bɔw̃álale Joosɛ́ í ɣɛ́i ngáá masangí wɔ́lɔ tɔ́ɔ ɣɛ́ ma Deevé ngi lé kpambíi h̃uu w̃ɔ́ɔ́ aáva Deevé lé tái i ɣɛi ngáá ná. Ti líí l̃aingi ná h̃úú vá Mɛɛloí í ɣɛ́i náá koí h̃u.

6 Ná tí ɣɛ́i na, kɛ naa hɔwɔ́i i folónga má ngáá Mɛɛloí í ndói le.

7 Aáva i ngi w̃áifɔlɔ ndoí ná léni ngáá siỹɛndóu lou, í kulaí yéle mbéle ma, í ndá suwaítii ti laaỹɛ́ nyáákai h̃u, bɔw̃álale ndaaw̃áá áá ɣɛ́i ti yɛ sotá ndááw̃aa vɛ́lɛ pɛ́lɛi wu.


Malékai i yɛpɛí mbaala w̃ááh̃u béle mbélaitii ngéle

8 Aáva mbaala w̃ááh̃u béle mbélaitii ti ɣɛ́i taí ná h̃uu béla táá mbaalaítii maah̃ú béle ỹandáá gbál̃aumai kpitingí h̃u ngáá kpindíi.

9 Kɛ́ Ndemɔí Ngalángi w̃áleka i gulangá tí yaah̃ú, ná vólu, Ndemɔí Ngalángi múw̃a muw̃angí í hólo ti w̃a, nduwá wála í vú ti h̃u.

10 Kɛ́ malékai i ɣɛi ti w̃a, “A waa lúwa! Ngí vaá ngáá keela woó vánda wú yéle, áá vá ɣɛ́ma ngáá kooh̃unɛɛ gítei nuu kpɛ́lɛɛ fááw̃a.

11 Hááwɔ hóloi sí, Deevé lé tái h̃u, ti wú Wumááwo Mɔ́i lengá ná. Laá lɔ́ í ngáá Ngalángi Lókolo Mbá W̃ɔ́i lɛ́i í ngáá Ndemɔí.

12 Aáva sí lɔ wáá ɣɛ́ kɔlɔ́ mba. Wá lɔɔ vá maa lói lɔmá kula nyɔ́ɔ́h̃uungi yelé mbélengɔ ma, i lááni suwaítii ti laaỹɛ́ nyáákai h̃u.”

13 Ngamá nɔ́ɔ, maléka yambɔ́ɔ́lɔngɔ wala tí vaaní, ti báha hésendaa geleí wa. Ti ɣɛ́i taá Ngalá ndaaw̃áálɛ, táá ɣɛ́ ta,

14 “Ngufema í ɣɛ́ Ngalá mbɛ́ lɛ́i i ngelegóóh̃u, ndiiheí va í ɣɛ́ ngeleí sí wu nuu búsaitiini mbɛ ndiilɛ́ingɔ ti haáw̃a.”

15 Ná malékaitii tí tí loní na tí yangáima ngelegóóh̃u, kɛ mbaala w̃ááh̃u béle mbélaitii ti ɣɛ́a ỹɔw̃ɔ́ ỹɔ́w̃ɔ w̃a, “A mu lí Bɛ́tileh̃ɛ, a mú fái sí lɔ í ɣɛ́nga Ndemɔí Ngalá ngí ndéngɔ ngi w̃álekaitii ma tí ndénga mú w̃a.”

16 Kɛ tí liingá ngáá viliỹɛ́ bála bala ngáá tí maa ỹándai wɔ́li. Aáva tí Mɛɛloí lɔ́ni ná taá Joosɛ́ ɛ́ɣɛ ndoí. Ndoí i ɣɛi lááni suwaítii ti laaỹɛ́ nyáákai h̃u.

17 Ná tí ndói lɔní, sí malékai í ndéni tí w̃a kɔwɔ́ato ndoí sí wá, tí maa woo híyani.

18 Nungái sítii kínɛi tí fái sí ỹɛ́nini, i ti gindáá vílini ngwála ngáá sí mbaala w̃ááh̃u belé mbélaitii tí ndéni tí w̃a.

19 Mɛɛloí i giséini maa hái sítii kpɛ́lɛɛ má áá gisíya ngáá ti ye.

20 Mbaala w̃ááh̃u béle mbélaitiini tí yángaimani, táá Ngalá ndaaw̃áálɛ fái sítii kpɛ́lɛɛ fááw̃a tí mɛ́nini, tí naa lɔ kɛ kíya nɔ́ɔ malékai í ndéni tí w̃a.


Jísu laahéindai

21 Ná í ɣɛ́i náa ngáá folói wahákpa kéle w̃a Jísu lengɔ́i w̃a ngáá kɛ náa tɔ́ɔ tɔve pɛlɛ́ vólu, tí ndaahéini ngáá Jísu. Ndaahéingi sí lɔ malékai í pɛ́lɛni mbá p̃ɛ́ɛ́ Mɛɛloí ɔ́ɔ́ ɣɛ́a ngi góó yeɣé.


Ti Jísu galíhai Ngalá ma

22-24 Ná naa hɔwɔ́i í fóloni ma ngáá ti kpaloí gula Mɛɛloí wa ndoí hááw̃a í ndéni ná wáá ngáá, tí sááɣai sí gúla kɛ kíya pɔnɛngɔ́ savaí h̃u Ngalá ngí féni Muusé yáá, tí vááni ngáá Jísu taí sí h̃u taá náá lolí ngáá Jɛlúsɛl̃ɛ. Tí saáɣai sí gúlani Ndemɔí Ngalángi yɛ́pɛni kɔwɔ́ato mba ngi hávai h̃u, i ɣɛ́ ta, “A poovóó njivo félengɔ ɔɔ bomukulo félengɔ gúla ngáá saáɣa.” Ná vólu, ti Jísu galíhai naa Ndemɔí Ngalá ma, kɛ kíya pɔnɛngɔ́ Ndemɔí Ngalángi hávai h̃u ngáá sí í ɣɛ́i ta, “Ná nyah̃ái áá ngi hésendaa loí le ngáá siỹɛndóu lou, kɛ tí maa ndoí gáliha Ndemɔí Ngála ma.”

25 Ná h̃úu vá, siỹɛndópo yiláá i ɣɛi Jɛlúsɛl̃ɛ taa h̃u, ndaahéingi í ɣɛ́i ngáá Símiyɔ. I ɣɛi ngáá nuú Ngalá ndúwamba í su, ná vólu, i ngáá telembo mɔ́ɔ. Aáva i ɣɛi áá naa w̃áálɛlɛ ngáá Ísulɔ yeláitii tí ngumaawóngi w̃aahɔ́lɔ ɔ́ɔ́ ɣɛ́a ha. Aáva Hɛ́ɛ́ma Ỹínangi í ɣɛi polú.

26 Hɛ́ɛ́ma Ỹínangi i ɣɛi ngakɛ́ni ngáá Símiyɔ ngáá ɛi ha í ló su í Ndemɔí Ngalángi Lókolo Mbá W̃ɔ́i lɔ.

27 Hɛ́ɛ́ma Ỹínangi i kɛní ngáá háwu í lí Hɛ́ɛ́ma Yála Pɛ́lɛi góvii h̃u. Ná Mɛɛloíni ngaa Joosɛ́ ti líini ngáá Jísu kɛinɔɔ́ sí í ngáá ti ndá lúva vele savaí h̃u tí kɛ Jísu haaw̃a,

28 Símiyɔ i ndóu lalái Jísu yeɣéni, í séi bakí su, í Ngalá tɛ. I ɣɛi áá ɣɛ́ ta,

29 “Ndemɔí Ngála, yí kɛ́nga ngáá háwu í gúúlongi í hítɛ nga, bɛlɛ́ náa í yénge mɔí í ha ndiilɛí h̃u.

30 Sífaa ngááh̃u i langá Ngumaawó Mɔ́i w̃a,

31 sí yí kɛ kíli batɛngɔ́ nuu kpɛ́lɛɛ kpɛ́lɛɛ ngaah̃ú w̃a.

32 Aá lɔ ngáá lámbo fo kɛ kíli áá Ngalá ndówa wo ngáá sítii taa ngáá Júsua. Aa kɛ ngáá háwu ngufema í la Ísulɔ yeláitii mbɛ ti ngáá i vóngaitii.”

33 Jísu njéé ɛ́ɣɛ ngi kɛ́ɛ́ɣɛ, ti gindáá vílingɔ i ɣɛí lá ngáá fái sí Símiyɔ í ndéni kɔwɔ́ato Jísu wa.

34 Kɛ Símiyɔ i hɛɛ́nga ti w̃a, i ɣɛ Jísu njéé w̃a, “Ndoí sí lɔɔ́ kɛ ngáá háwu Ísulɔ yeláitii kpih̃íw̃aa ti wú nga ngí yéi, ná vólu, ti bih̃íw̃aa ti wú nga ngí yóóɣe. Laá lɔ áá Ngalángi yákpangi yákɛ aáva taá léle mba,

35 kɛinɔɔ́ i nuu bíh̃iw̃aa ti gísiyai gúla foló yá. Yáa va maa hái ɣɛ kíli aa gula í yáa ngáá kíya nɔ́ɔ mbowá bákpangɔ áá ɣɛ́ la í líí wa.”

36 Nyah̃ápo yiláá i ɣɛi na, laá bɛ́lɛ i ɣɛi ngáá Ngalá ndaa háá lé mɔ́ɔ. Ndaahéingi i ɣɛi ngáá Ana. Ngi kɛ́ɛ́ɣɛ laahéingi i ɣɛi ngáá Fanuwɛ. Nde kpambii sí taa ɣɛ́ tí w̃a Ásiyɔ ti tá i ɣɛi ngáá nyah̃ápoi ná. Kɛ́ nyah̃ápoi sí bokólongɔ i ɣɛi náa lá ngwala. Ná h̃u í wálani ngi h̃íỹɛngi yáa, tí kɛní nɔ́ɔ héini ngáá fowó ngɔ́felangɔ,

37 ngi h̃íỹɛngi í há. I ɣɛi náa kɛní ngáá fowó vúu ngwáhakpangɔ maah̃ú nááningɔ ponyah̃álai ná h̃u. Aáva nápa aa liilaá w̃aaléveni Hɛ́ɛ́ma Yála Pɛ́lɛi góvii h̃u. Ná vólu, ɔ́ɔ́ súngi hóu, í Ngala fɛ́li kpindí bɔngɔ́ fólo wa.

38 Táingi na h̃u kái kái má, nyah̃ápoi sí i lií maa ndói ŋál̃aa, í sɛ́ɣɛɛ gula Ngalá ma, ná vólu, í yɛ́pɛ kɔwɔ́ato ndói wa sítii kpɛ́lɛɛ kpɛ́lɛɛ ngelé ti ɣɛ́i taá naa w̃áálɛlɛ ngáá tí tɔ́ Jɛlúsɛl̃ɛ taí h̃u wumááwongɔ í ɣɛ́ la.


Mɛɛloí taá Joosɛ́ ti yangáimandai Násɔlɛ taa h̃u

39 Ná Mɛɛloíni ngaa Joosɛ́ ti vílani faí sítii kpɛ́lɛɛ kɛ́ma ngáá Ndemɔí Ngalángi hávai í ndéni ngáá kɛ tí kɛ, tí yángaimani náa Galéli lataí h̃u ti láa h̃u taá naa lolí ngáá Násɔlɛ.

40 Ndói va i looláni, suu í ba, ki máá í gúla ngwala, Ngalángi hɛ́i i ma.


Jísu lɔ Hɛ́ɛ́ma Yála Pɛ́lɛi góvii h̃u

41 Jísu kɛ́ɛ́ɣɛ ɛ́ɣɛ ngi njéé tɔ́ɔ lí fowó fíli Jɛlúsɛl̃ɛ taa h̃u Júsuaitii ti gúi sí hááw̃a taá tolí ngáá Ngumaawó Kúi.

42 Faalɔ, ná Jísu í ɣɛ́i náa kɛní ngáá fowó púúngɔ maah̃úú félengɔ, tí liiní Jɛlúsɛl̃ɛ maa gúi hááw̃a sífaa ti ndá lúva vele i ɣɛi ngáá ná.

43 Ná kúi í ɣɛ́i náa viláni, Jísu njéé ɛ́ɣɛ ngi kɛ́ɛ́ɣɛ ti ɣɛ́i taá yangáima ti láá h̃u. Jísu i loní naa volú véle Jɛlúsɛl̃ɛ kɛ́ ngi njééni ngaa ngi kɛ́ɛ́ɣɛ taá ɣɛ́i kɔlɔ́ ngáá kɛ i longɔ́.

44 I ɣɛi ti gi má ngáá kɛ Jísu lɔ faŋaí liiwáá, faalɔ, ti híyani foló w̃á kp̃ái, kɛ tí pɛlɛngá kɔlí kɔ́lima ti vóngaitii ndiiwáá ɛ́ɣɛ ti mbálangaitiini.

45 Kɛ́ ná taá tɔní folói ná, kɛ ngele vekái i wongá tí yangáima Jɛlúsɛl̃ɛ.

46 Ná vólu w̃áá yeleí í wóni, kɛ tí pɛlɛngá kɔlíma í ló su tí tɔ. Tí maaleí i héini Hɛ́ɛ́ma Yála Pɛ́lɛi góvii h̃u. I ɣɛi héini kaamɔítiini Ngala sávai hááw̃a ti liiwáá. I ɣɛi áá wolílo tí w̃a, ná vólu, áá ti w̃ɔ́ɔ́ni mɔɔní.

47 Aáva sítii kínɛi tí ngoo ỹɛ́nini, ti gindáá vílingɔ i ɣɛi lá ngáá kíya ɔɔ faítii ngatɔ́ mba, ná volú, kíya ɔ́ɔ́ ngapóte.

48 Ngi njéé ɛ́ɣɛ ngi kɛ́ɛ́ɣɛ, ti gindáá vílingɔ i ɣɛi lá ná tí tɔ́ni. Kɛ ngi njéé i ɣɛa ma, “Ní lóu, ndeénii le yí lúvangɔ ngáá ni ye h̃íí na? Naa í kɛ́ɛ́ɣɛ ni liihɛ́lɛngɔ i ɣɛngɔ lá ngwala, náá í wɔ́li kɔ́li.”

49 Kɛ Jísu i ti w̃ɔ́ɔ́ninga, i ɣɛ ti w̃a, “Ndeénii le wáa kɔ́li má? Wáá ɣɛ́ngɔ kɔlɔ́ ngáá kɛ kule lɔ má ngí ɣɛ́ héini ní Kɛ́ɛ́ɣɛ Ngalángi vɛ́lɛi wu?”

50 Kɛ́ taá ɣɛ́i ngatɔ́i mba sí Jísu i ɣɛi ma.

51 Aáva Jísu i toní tí wa, tí yángaima Násɔlɛ. Laa vá kolóngɔ i ɣɛi lá tí yɛ. Kɛ́ ngi njéé i giséini fái sítii kpɛ́lɛɛ má.

52 Taa í báhai naá Jísu gi mái wa, ná vólu, áá lóóla. Aáva ngi hái i Ngalá ndiilɛ́ini ɛ́ɣɛ nuu nungáitiini.

Bandi New Testament © Bible Society in Liberia, 2000

Bible Society in Liberia
Lean sinn:



Sanasan