Keela woó vándai Lúu í pɔ́nɛni kɔwɔ́ato Jísu Kílisitii wa LÚU 19 - Kɛ́lɛ Niinaí

Jísu ɛ́ɣɛ Sákiyɔ

¹ Ná Jísu í lɛ́ɛ́ni Jɛlóko taí h̃u, i ɣɛi áá híya taí liiwáá ngáá í maaléve í li.

² Siỹɛndópo yiláá tɔ́ɔ́ ɣɛ́ ma Sákiyɔ, i ɣɛi ngáá pava gula núú walaí taí ná h̃u aáva kpatɛngɔ́ i ɣɛi la.

³ Siỹɛndópoi ná i ɣɛi loní í Jísu lɔ, í ɣɛ́ kɔlɔ́, kɛ́ sífaa í ɣɛ́i ngáá tukpú w̃ɔ́ɔ, ɛ́i belé tɔ, bɔw̃álale faŋaí i ɣɛi na.

⁴ Faalɔ, i liiní ngáá viliỹɛ́ naa wutúwɔ, í lɛ́ ngulúi h̃u ngáá í tɔ, sífaa Jísu i ɣɛi áá lí ngáá naa véle.

⁵ Ná Jísu í fóloni mbéi Sákiyɔ í ɣɛ́i na ngulúi h̃u, i wu nga séini, i ɣɛ ma, “Sákiyɔ, hitɛ ngulúi h̃u bála bala, í vɛ́lɛi laa lɔ́ háa ngíwaa lí ngí ló na.”

⁶ Faalɔ, Sákiyɔ i hitɛní ngamá, í lokohéi Jísu wu ngáá kooh̃unɛɛ wála.

⁷ Nungái sítiini ti ɣɛ́i na, ná tí fái sí ŋál̃aa lɔní, ti ɣɛ́i taá wu sú bɔɔlɔ́, táá ɣɛ́ ta, “I liingá háa í ɣɛ ngáá faa ỹɔ́u w̃ɔ́i sí w̃aa hotá!”

⁸ Kɛ Sákiyɔ i yooɣénga í ló, i ɣɛ Ndemɔí Jísu w̃a, “Kawalái, ndóngɔɔ lé yí ɣɛ́ kɔlɔ́ ngáá kɛ sɔ́lɔ wɔlingí kínɛi í ngéya, nyá lɔ́ɔ kɔlɛ́ su féle ngí kaka yílaangi he nyaaní yélaitii ngeyá. Ná vólu, ná ngáá ɣɛ́ ŋani fíli kúlangɔ nuu yáa ngáá kahá véle, ngáá kɛɣɛ́lai ɣɛ naáni, ngí fe maa w̃ɔ́i yaá ngáá potó.”

⁹ Kɛ Jísu i ngoo yápotenga, i ɣɛ ma, “Ngalá ngí vaangá ngáá ngumaawóngi pɛlɛ́i sí wu hááwɔ, bɔw̃álale yá bɛ́lɛ yá lɔ́ ngáá Lébilah̃au le kpámbi h̃uu w̃ɔ́i ta.

¹⁰ Nuí síí w̃ɔ́i taa ɣɛ ma Nuu Búsa Goo H̃ú Loí i vaangá ngáá í sítii kínɛi kɔwɔ́vo kúla ti betévengɔ Ngala mba, í tí wumááwo.”

Faanɛ́ɛ́ngi kɔwɔ́ato ngenge mbélaitii mba

¹¹ Nungái ngolí lóngɔ i loní nɔ́ɔ sí w̃a, Jísu í mɔ́ɔ faanɛ́ɛ́ péka hei. I faanɛ́ɛ́ngi sí héini bɔw̃álale i ɣɛi náa Jɛlúsɛl̃ɛ taí h̃uubéla, aáva i ɣɛi nungáitii ki má ngáá kɛ Ngalángi w̃ásandai lɔɔ vá wu kúlama ngamá nuu kpɛ́lɛɛ tí tɔ.

¹² Faalɔ, Jísu i ɣɛi ti w̃a, “Siỹɛndópo yiláá tɔ́ í ɣɛ́i na. I ɣɛi ngáá kpatɛ w̃ɔ́ɔ́ goo h̃ú lóu. Folo yílaa, siỹɛndópoi sí i ɣɛi áá vá liimá siya má ndɔwɔlɔ́ yílaa su naa gooh̃ángɔ wála í ɣɛ́i lá. I ɣɛ́i áá lí ngáá tí lokoló mba ngáá masa ngwála ndɔwɔlɔ́i ná w̃ááh̃u í ɣɛ́i su ɔ́ɔ́ yangáima náa.

¹³ Kɛ́ ɔ́ɔ́ ɣɛ́ p̃ɛ́ɛ́ í lí, i ngi yénge mbelaa púúngɔ lolíni, í naholó hé ti yilá ngíla ngeya, i ɣɛ ti w̃a, ‘A waayaa loko vóte voté nahalói sí h̃u í ló su kpóloo ngí vá.’

¹⁴ Kɛ́ ngi lɔwɔlɔ́ h̃uu yélaitii taá ɣɛ́i loí la. Faalɔ, ná í pele hóuni, nátii ti lókoloni nungáá wá ngáá ti lí ti ɣɛ́ masangí w̃a, ‘Naá loní siỹɛndópoi sí ɔ́ɔ́ ɣɛ́ ngáá ni w̃ásangi.’

¹⁵ Kɛ́ ná fíli su, i masandái w̃aahɔ́lɔni aáva í yángaima. Kɛ i ndengá ngáá ngenge mbélaa púúngɔi sítii í náholoi hení tí yaá, tí nde ti w̃a ti vá kɛinɔɔ́ tí ngi háá yakúlamba ngáá sí tí sɔ́lɔngɔ ngáá ndamái.

¹⁶ Hésendaa w̃ɔ́i i vaaní, i ɣɛ ta, ‘Kawálai, naholói yí ndóngɔ tóko h̃u kɛɣɛ́laa púúngɔ lɔ í lángɔ ma ngáá ndamaí.’

¹⁷ Kɛ masangí i ɣɛa ma, ‘Yí kɛ́ngɔ ngwala, ní yénge mɔɔ vandaí, bɔw̃álale, yí tɔ́wɔbaɣa gúlangɔ faa gúloi sí h̃u, faalɔ nyá ngáá ngakpá fé í yáá yí ɣɛ́ taa walá wála púúngɔ w̃ááh̃u.’

¹⁸ Kɛ felé kélei i ɣɛa masangí w̃a, ‘Kawálai, naholói yí ndóngɔ tóko h̃u, kɛɣɛ́laa ndɔ́ɔ́lungɔ lɔ́ í lángɔ ma ngáá ndamaí.’

¹⁹ Kɛ masangí i ɣɛa ma, ‘Nyá lɔ́ɔ ngakpá fe í yáa yí ɣɛ́ taa walá wála ndɔ́ɔ́lungɔ w̃ááh̃u.’

²⁰ Kɛ ti háwa kélei i vaangá, i ɣɛ masangí w̃a, ‘Kawálai, í náholoi lɔ ngáá sí. Ngí ɣɛ́ngɔ ngáá ngándɔɔlɔ kúla hakpái ya.

²¹ Ngí ɣɛ́ngɔ ngáá lúwa í wá bɔw̃álale, í hái bangɔ́ɔ́ lé. Sífaa ŋanií yɛ́i nda, aá lɔ yáá ngeɣé, ná vólu, mbéi yɛ́i sí ŋaní hí na, naa lɔ́ yáá lí na ngi wá kúlama.’

²² Kɛ masangí i ngoo yápotenga, i ɣɛ ma, ‘Yá lɔ́ ngáá ngenge mɔ́ɔ ỹɔ́u ỹɔ́u ngwala. Í bɔ́wɔ bɔ́wɔ láá woí lɔ́ ngíwaa í wááleve ma. Kɛ yí ɣɛ́i kɔlɔ́ ngáá ní hái bangɔ́ɔ́ lé, ná vólu, sí ngɛ́i ndá aá lɔ́ ngáá ngéɣe ɛ́ɣɛ múl̃ɔ mbéi ngɛ́i sí ŋaní hí na naa lɔ ngáá lí nga mbá kulamá na, kɛlɛí?

²³ Kɛ ndeénii le hɔ́ɔ́ yáá ní náholoi vúni naholó yándɔɔlɔ pɛ́lɛi wu kɛinɔɔ́ ná ngɔ́ɔ́ yangáima, ngɔ́ɔ́ ɣɛ́ ɣɛi maahɔ́lɔni, í báha ndamaí wa?’

²⁴ Faalɔ, masangí i ɣɛi sítiini ma ti ɣɛ́i lóóni na, ‘A nahóloi hóu ngeyá, wú fé hésendaa w̃ɔ́i yáa.’

²⁵ Kɛ́ nátii ti ɣɛ́i masangí w̃a, ‘Kawálai, kɛ́ nahólo bih̃íngɔ lɔ náa ngeyá kíli.’

²⁶ Kɛ masangí i ti woo yápotenga, i ɣɛ ti w̃a, ‘Nyá lɔ́ɔ nde wú w̃a ngáá, nuí fíli ŋani áá ɣɛ́ ngeyá bíh̃i, ta áá bahá mba, kɛ́ nuí fíli ŋani ɛ́i ɣɛ́ ngeyá bíh̃i, sí gúloi ɣéle tɔ áá ɣɛ́ ngeyá, ɛi ló ngeyá.

²⁷ Ná vólu, mbaahílima yélai sítiini taa ɣɛ́ngɔ loní ngɔ́ɔ́ masandái w̃aahɔ́lɔ, a vá ngáá ti ye, wú tí váa mbéi kákala!’ ”

Jísu lɛɛ hái Jɛlúsɛl̃ɛ

²⁸ Ná Jísu í vílani faanɛ́ɛ́ngi sí héima, i toní náa w̃áá velé la, íwaa lí Jɛlúsɛl̃ɛ.

²⁹ Ná Jísu í bɛ́ɛ́ni taa félengɔi sítii kpela taá ti lolí ngáá Bɛféji ɛ́ɣɛ Bɛ́tani, ngihéi sí wa taa tolí ngáá Ɔ́levi Wuluí Yíhei, i volú yélaa félengɔ lɔvení,

³⁰ i ɣɛ ti w̃a, “A lí taí sí h̃u í naa lúwɔ, wáá lɛ nɔ́ɔ léi kɛ wú soohaalé sólangi lɔ́nga kpulɔ́ngɔ nuu fíli áá nɛ́ɛ́ héini kɔ́ma ɔ́ɔ́ síya. A fuló, wú váá la mbéinda.

³¹ Ná nuu fíli áá wú w̃ɔ́ɔ́ni, i ɣɛ wú w̃á, ‘Ndeénii le wáa fuló,’ a ɣɛ́ ma, ‘Káámɔɔ béɣengɔɔ lé ma.’ ”

³² Aáva nuu félengɔi nátii Jísu í ti lɔ́veni, tí liiní tí máále nɔ́ɔ jɔ́ kíya Jísu í ɣɛ́i ndení ti w̃a.

³³ Ná ti ɣɛ́i taá soohaalé sólangi na húlo, kɛ ngi yélai tí gúlanga, tí tí w̃ɔ́ɔ́ni, ti ɣɛ́ tí w̃a, “Ndeénii le wúwaa fuló?”

³⁴ Kɛ tí tí woo yápotenga, ti ɣɛ́ ti w̃a, “Kaamɔ́ɔ́ beɣengɔ́ɔ́ lé ma.”

³⁵ Tí fulóni naá, tí vaa lá Jísu yelé, tí tí gúla w̃aah̃u gúlaitii pɛlɛ polú, tí bɔ́ mba, í lɛ́, í héi maah̃u.

³⁶ Ná Jísu í ɣɛ́i héini kɔma táá li, nungáitii tí tí gúla w̃aah̃u gúlaitii nga ndáá laáni peleí w̃a ngutúwɔ.

³⁷ Ná í bɛ́ɛ́ni Jɛlúsɛl̃ɛ béla mbéi peleí yéingɔ í ɣɛ́i lá na ngáá Ɔ́levi Wuluí Yíhei wu véle, faŋaí í ɣɛ́i polú véle tí pɛ́lɛni Ngalá ndaaw̃áálɛma ngáá kooh̃unɛɛ woo wála h̃ú káámaa haítii kpɛ́lɛɛ fááw̃a í ɣɛ́i náa kɛní ti yaah̃ú w̃a.

³⁸ Ti ɣɛ́i taa ɣɛ́ ta, “Bɛlɛ́ Ngalá ngi hɛ́ɛ́ masangí sí yɛ, lɛ́i íwaa vá Ndemɔí Ngalá ndaahéingi h̃u. Ndiiheí lɔ ngelegóóh̃u, ná vólu, ngufema i ɣɛ́ ngákpa Ngálangi yɛ lɛ́i í ngelegóóh̃u!”

³⁹ Júsuai sítii taa ɣɛ́ ti w̃a Falósiai, ti lɛ́ingaa ti ɣɛ́i faŋaí ná liiwáá, tiyá lɔ tí ɣɛ́i Jísu w̃a, “Kaamɔ́ɔ́, bandɛ ngáá í vólu yélaitii tí w̃áá ɣɛ ló.”

⁴⁰ Kɛ́ Jísu i ti woo yápoteni, i ɣɛ ti w̃a, “Ngí ndé wú w̃a, bele pá sítii taá w̃áa ɣɛ ló, kɔtuítii taá woo gúla.”

Jísu i wɔlɔ́ni nungái faaw̃a ti ɣɛ́i Jɛlúsɛl̃ɛ

⁴¹ Ná Jísu í bɛ́ɛ́ni Jɛlúsɛl̃ɛ wá i naa lɔní, kɛ i pɛlɛngá wɔ́lɔma náa hááw̃a,

⁴² áá ɣɛ́ ta, “Jɛlúsɛl̃ɛ yélaitii, wáá kɔ́lɔ sí í hááwɔ hóloi h̃u ɔ́ɔ́ ɣɛ́ vái ngáá ndiiheí wú yɛ kɛbei kái wú ɣɛ́i kɔlɔ́, kɛ́ ngákpindingɔɔ lé wú yáa.

⁴³ Folói lɔɔ vá fóloma ma, wú wááhilima yélaitii taá kpakií ló wú w̃á, ti wú w̃ááyele mbéle ngáá sóyaitii tí pele levé wú lúwɔ pele fíli sú nɔ́ɔ.

⁴⁴ Aáva taa wú vɛ́lɛitii nyaaní pɔ́lɛɣɛ pɔ́lɛɣɛ ɛ́ɣɛ wá gítei. Kɔtu yiláá kéle tɔ tɛí ndo lááni ngi mbála w̃aah̃u í pɛlɛ́i h̃u, bɔw̃álale wáá ɣɛ́i folói sí wɔ́lɔ Ngalá ngí vááni wú wúmaawoma!”

Jísu i liiní Hɛ́ɛ́ma Yála Pɛ́lɛi góvii h̃u

⁴⁵ Kɛ Jísu i liingá Hɛ́ɛ́ma Yála Pɛ́lɛi góvii h̃u, í pɛ́lɛ nungái sítii kpɛmá ti ɣɛ́i taá yawo ɣɛ́ na.

⁴⁶ I ɣɛ ti w̃a, “Pɔnɛngɔ́ɔ́ lé Ngalá Kɔ́lɔi h̃u ngáá sí Ngalá ngí ɣɛ́ngɔ ta, ‘Ní vɛ́lɛi lɔɔ vá ɣɛ́ma ngáá Ngala fɛ́li pɛ́lɛ,’ kɛ́ wú naa ɣɛ́a ngáá ŋuỹá yélaa tí ỹándaa!”

⁴⁷ Hɔ́wɔ fíli, Jísu i ɣɛi áá kalambongí wo Hɛ́ɛ́ma Yála Pɛ́lɛi góvii h̃u. Kɛ́ Ngala sááɣa gula mbélai ti wútuwɔaitii, ɛ́ɣɛ kaamɔítiini Ngala sávai hááw̃a taá ngutuwɔ́ yélaitii, ti ɣɛ́i taá pele wɔlí mba ngáá ti Jísu vaa.

⁴⁸ Kɛ́ taá pele fíli sɔ́lɔni mba ngáá tɔɔ́ kɛ bɔw̃álale hɔ́wɔ fíli nungáitii tɔ́ɔ́ ɣɛ bih̃í ngwala tɔ́ɔ́ yatɛ́ mba ma ngáá tí wolílo ndaa wóó w̃á.