Keela woó vándai Lúu í pɔ́nɛni kɔwɔ́ato Jísu Kílisitii wa LÚU 15 - Kɛ́lɛ Niinaí

Mbaala longɔ́i su

¹ Folo yílaa, páva gula mbélaitii ɛ́ɣɛ faa ỹɔ́u yélaitii, ti ɣɛ́i taá yatɛ́ mba ngáá tí wolílo Jísu w̃a.

² Kɛ́ Júsuai sítii taa ɣɛ́ ti w̃a Falósiai ɛ́ɣɛ kaamɔítiini Ngala sávai háaw̃a ti ɣɛ́i taá wu sú bɔɔlɔ́, táá ɣɛ́ ta, “Siỹɛndópoi sí aa lokohéi sítiini mbu ti ngáá faa ỹɔ́u yélaitii, taá tiyéni táá laaỹɛ́ ỹanda yílaa.”

³ Kɛ Jísu va i faanɛ́ɛ́ngi sí héinga tí yɛ.

⁴ I ɣɛi ti w̃a, “Ná náa mbaala áá ɣɛ́ wú tá yílaa ngéya ngáá hɔ́ndɔ ngiláá, ngiláángi í ló su, maa w̃ɔ́i ɛi puu táávungɔ maah̃úú táávungɔi lo ỹandáa gbal̃aumái ɔ́ɔ́ lí ngilángi ná wɔlíma ndongɔ́ áá ɣɛ́ la su í ló su í tɔ?

^5-6 Aáva ná áá tɔ, aa nda gɔma ngáá kooh̃únɛɛ, í lii lá ngi vɛ́lɛi la. Aáva aa ngi mbálangaitii tóli náa ɛ́ɣɛ taa sítii taa ɣɛ́ kóvi h̃ú, i ɣɛ ti w̃a, ‘A baha mbá a mú gooh̃unɛ́ɛ, bɔw̃álale ní wáálai sí í ɣɛ́ngɔ loní su, ngí tɔ́nga!’ ”

⁷ Jísu í mɔ́ɔ́ ɣɛ ti w̃a, “Ngí nde wú w̃á, ngimɔ́ɔ́ nɔ́ɔ kooh̃unɛɛ wála áá ɣɛ́ ngelegóóh̃u faa ỹɔ́u w̃ɔ́ɔ yiláá fááw̃a áá vólu yafé ngi háá ỹɔí wa, í lɔ́ve kooh̃unɛɛ́i sí wa áá wó ná nuu vúu táávungɔ maah̃úú táávungɔ vekaí nátii faaw̃a táá ɣɛ́ ngáá telembo mbélaa kule ɛ́i ɣɛ́ tí w̃a tɔɔ́ vólu yáfe faa ỹɔ́u wa.”

Naholó lóngɔi su

⁸ Kɛ Jísu i mɔɔ ɣɛa ti w̃a, “Ná náa kaní kóle ngáá ɣɛ́ nyah̃á yaá púu ngilángi í ló su, ɛi lámbongi lo, ɔ́ɔ́ pɛlɛ́i wúubale, ɔ́ɔ́ kɔlí ngáá pangɔ́ í ló su h̃áá í tɔ?

⁹ Aáva ná áá tɔ, aa ngi mbálangai tolí ɛ́ɣɛ taa sítiini taa ɣɛ́ koví h̃ú i ɣɛ ti w̃a, ‘A baha mbá a mú góóh̃unɛɛ, bɔw̃álale ní náholoi í ɣɛ́ngɔ loní sú, ngí tɔ́nga!’ ”

¹⁰ Jísu í mɔ́ɔ ɣɛ ti w̃a, “Ngí nde wú w̃á, ngimɔ́ɔ́ nɔ́ɔ jɔ́ í ná ngelegóóh̃u. Kooh̃unɛɛ wála aa ɣɛ Ngalángi w̃álekaitii ndiiwáá ná faa ỹɔ́u w̃ɔ́ɔ yiláá kéle tɔ áá volú yáfe ngi háá ỹɔítii mba.”

Ndoú lóngɔi su

¹¹ Jísu i mɔ́ɔ faanɛ́ɛ́ngi tá héini ti yɛ, i ɣɛ ta, “Siỹɛndópo yiláá tɔ́ í ɣɛ́i na, siỹɛndóu lengáitii tí ngeyá féle.

¹² Kɛ ndeɣe geleí í ɣɛa ti kɛ́ɛ́ɣɛ w̃a, ‘Kɛɛɣɛ́, í hɔ́lɔ wɔlíngi kínɛi yáá va ndóma ni yaá ngáá poŋaní, kɔlɛ ni wa, yí ní ndái he.’ Ti kɛ́ɛ́ɣɛ va i ngakɔ́lɛni ngi lóu félengɔi nátii ndowah̃u.

¹³ Kuu félengɔi ná h̃u, kɛ siỹɛndóu loí ná i sí kínɛi ngátɛnga mba í ɣɛ́i ngeyá, í sɔ́w̃ɔ kúla, í pele hóu, í lí ndɔwɔlɔ́ véka h̃u p̃óuma ngáá maa gápangi. Naa vá tɔ í ngi gápangi kpɛ́lɛɛ nyáánini na ndiivo kɛɛ́ wála h̃u.

¹⁴ Ná í vílani ngáá kápangi ná kpɛ́lɛɛ nyááni, ndɔlɛ walá i gulaní ndɔwɔlɔ́i ná kpɛ́lɛɛ sú, kɛ maa í pɛ́lɛnga nɔw̃ɔ́ma.

¹⁵ Kɛ i yooɣénga, í li ndɔwɔlɔ́i ná h̃uu léndoi ta yelé ngáá ná í ngénge fé ngeyá. Ná vá í ngeɣé, í tɔ́ve ngi báálai w̃á ngáá ááyaa ngi búbuaitii ndaawɔ́.

¹⁶ Mɛɛníi sí ɣéle tɔ búbuaitii tɔ́ɔ mɛ, ta ỹɛ mɔ́l̃i ɔ́ɔ́ ɣɛ́ ma ngwala, kɛ́ nuu ɛ́i belé ŋani fíli fé ngeyá.

¹⁷ Ngapúmai, kɛ i vungá w̃a bɛ́, i ɣɛ ta, ‘Ní kɛ́ɛ́ɣɛ yénge mbélaitii kpɛ́lɛɛ taá mɛɛní ỹɛ í w̃ɔ́lu ti w̃a, kɛ́ nyá belé tɛ mbéi ngíwaa ɣɛ́ ngí há ngáá ndɔlɛ!

¹⁸ Nyá lɔɔ yóóɣe ngí yangáima volú ní kɛ́ɛ́ɣɛ yéle, ngí ɣɛ́ ma, Kɛɛɣɛ́, ngí faa ỹɔ́u ɣɛ́a ngáá í ye ɛ́ɣɛ Ngalá.

¹⁹ Ngáá mɔ́ɔ kulaɣɛ́i ngáá nuú yáa tóli ngáá í lóu. Faalɔ, súúhou kɛ kíya yáá í yénge mbeláitii súúhou.’

²⁰ Kɛ i yooɣénga í li ngi kɛ́ɛ́ɣɛ yelé. Kɛ́ i loí nɔ́ɔ p̃óuma ngi kɛ́ɛ́ɣɛ í tɔ. Ngi kɛ́ɛ́ɣɛ i ngaah̃ú w̃ááw̃aanu hóuni ngwala, faalɔ, i liiní ngáá viliỹɛ́, í nɛɛnɛ́, í há ma.

²¹ Kɛ ngi lóu i ɣɛa ma, ‘Kɛɛɣɛ́, ngí fáa ỹɔ́u ɣɛ́a ngáá í ye ɛ́ɣɛ Ngalá. Ngáá mɔ́ɔ kulaɣɛí ngáá nuú yáa tolí ngáá í lóu.’

²² Kɛ́ ngi kɛ́ɛ́ɣɛ i ɣɛi ngi yénge mbeláitii ma, ‘A maa hulá bála bala, wú vá ngáá jogbo pánda wálai, wú pú ma. Wú fuléi víli toko wa, wú kɔɔva wála kɔwɔ́ yá.

²³ Ná vólu, a vá ngáá nika holá pándai wú páa, a mu ndááỹɛ ngwála wo, a mú kóóh̃unɛɛ gúú wuya.

²⁴ Sífaa ní lói sí i ɣɛngɔ ɣɛi haaní kɛ́ i mɔɔ yangáimanga ndɛɛh̃ú h̃u, i ɣɛngɔ loní su kɛ́ aáva ngí mɔ́ɔ́ tɔngá.’ Faalɔ, ti pɛ́lɛi náa kooh̃unɛɛ wóma.

²⁵ Naa laa lówah̃u, ngi w̃áifɔlɔ siỹɛndou loí i ɣɛi nɛ́nɛ kpaalaí h̃u. Ngangáimaw̃ai, ná í bɛ́ɛ́ni taí wa, i ngɛi wɔlíngaa h̃uu mɛ́nini ɛ́ɣɛ ndooli yeláitii suungí.

²⁶ Kɛ i ngi kɛ́ɛ́ɣɛ yénge mɔí tá yílaa tólinga ngáá í mɔ́ɔ́ni ngáá sí í ɣɛ́i áá híya taa h̃u.

²⁷ Kɛ ná i ngoo yápotenga, i ɣɛ ma, ‘Í ndéɣe í vaangá, wu kɛ́ɛ́ɣɛ va i nika holá pándai váánga bɔw̃álale wú kɛ́ɛ́ɣɛ i mɔɔ í ndéɣe w̃aahɔ́lɔnga nduwu h̃u wuyá su.’

²⁸ Faalɔ, ngi w̃áifɔlɔ ndoí ná i luuní ngwála aa kɛní ɔ́ɔ́ lɛ́ pɛlɛ́i wu. Ngi kɛ́ɛ́ɣɛ vá i gulaní náa ngitíí ya, í maanɛ́ɛ́nɛ.

²⁹ Kɛ́ i ngi kɛ́ɛ́ɣɛ woo yápoteni, i ɣɛ ma, ‘Tɔ lɛ́ɛ, fowói sí h̃u kínɛi kinɛi ngí w̃ɔ́l̃ɛnga í yɛ́ kíya nɔ́ɔ kpéi nduwɔ lopó, nápa ngáá nɛ́ɛ́ koló lála gúlai ngáá í ye. Kɛ́ ná fíli su, njeé njívo ɣéle tɔ yáá nɛ́ɛ feí ngéya ngáá nɔɔ́ kooh̃unɛ́ɛ́ gúla naa ní mbálangaitii.

³⁰ Kɛ́ í lói sí i liingá í í yáá wɔ́lingaitii nyááni kɔlɔsiyá nyáh̃aa w̃a, aáva ná í váánga, yí nika holá pándai váa mbɛ.’

³¹ Kɛ́ ngi kɛ́ɛ́ɣɛ i ngoo yápoteni, i ɣɛ ma, ‘Ní lóu, yálaa yá lɔ mbá hɔ́wɔ fíli, aáva sí kpɛ́lɛɛ í ngéya yá lɔ í ndáá lé.

³² Kule í ɣɛ́ngɔ nɔ́ɔ mu w̃a ngáá a mú ndáaỹɛ ngwála wo, a mú gooh̃unɛ́ɛ, bɔw̃álale í ndéɣei sí i ɣɛngɔ haaní kɛ́ i mɔɔ vaá ndɛɛh̃ú h̃u volú, i ɣɛngɔ loní su kɛ́ aáva i mɔɔ lɔngá.’ ”