LÓÓMI 7 - Kɛ́lɛ Niinaí

Sí kɛmbɛhéi í ngáá ngi lɔ́masei

¹ Mu mbála Yalá fɛ́li mbélai, wú faa wɔ́lɔ kpál̃au kɔwɔ́ato savaí wa. Ná wáá ngáá nuu áá ɣɛ́ nɔ́ɔ léi sávai wu ná nɛ́nɛ yáá ɣɛ́ ndɛɛh̃ú h̃u.

^2-3 Maa lɔ́masei waa nɔ́ɔ ngáá nyah̃ái sɔw̃ɔ hengɔ́ áá ɣɛ́ la kɛmbɛhéi h̃u aa ɣɛ ngáá nyah̃á kɛmbɛhéi ná h̃u ná nɔ́ɔ léi ngi h̃íỹɛngi áá ɣɛ́ ndɛɛh̃u h̃u. Kɛ́ ná náa ngi h̃íỹɛngi áá há, kɛ nyah̃ái ná aa mɔ́ɔ savaí ná yakpángi wú siỹɛ péka yeɣé fááw̃a. Kɛ́ ná wɔ́lii ngi h̃íỹɛngi áá ɣɛ nɛ́nɛ ndɛɛh̃u h̃u aáva í lí í siỹɛndópo véka hou kɛ i kɔlɔsiyá mbónga.

⁴ Mu mbála Yalá fɛ́li mbélai, ngimɔ́ɔ́ nɔ́ɔ maa hái í na kɔwɔ́ato wú wá. Wú lówah̃u i lévea kpé wáá sávai kíya nɔ́ɔ nuí áá há ngi ndá fíli ɛ́i mɔ́ɔ́ ɣɛ faa h̃u. Wú báhangɔɔ lé náá wa wáá Kílisitii kíya nɔ́ɔ nuu lúwui waa wɔ́lingaitii ti báhangɔ wa. Naa gúlangɔɔ lé náá kɛ́lɛma wú yɛ́ ngáá wú ɣɛ́ Kílisitii hááw̃a lɛ́i Ngalá ngí mbuyoɣéni sái h̃u ngáá kɛinɔɔ́ mú ɣɛ́ ngáá kulasuunúma hááni kɛ mbélaa Ngalá mbɛ.

⁵ Ná h̃ú a mɔ́ɔ́ gísiya ngáá bɔwɔ́ nɔ́ɔ savaí ɔ́ɔ́ kɛ ngáá háwu a máá híya ngáá faa ỹɔ́u líívo kɛítii. I kɛí ngáá háwu wú lúwui waa wɔ́lingaitii kpɛ́lɛɛ tí ɣɛ́ ngáá nduwɔ́ lopóa ɣɛ́ kíli faa ỹɔ́u ɣɛ́ndai h̃u. Ná kpɛ́lɛɛ pá ngákɛɛlɛmai waa ngáá sái.

⁶ Kɛ́ a maá mɔ́ɔ́ savaí yákpangi wu ta guló bɛ́lɛ. A mu ɣɛ kíli waa nɔ́ɔ́ ngáá kíya nɔ́ɔ nuí áá há savái yákpa ngɛ́i mɔ́ɔ́ ɣɛ maah̃u kulo bɛ́lɛ. Pele niiná lɔ́ náá kulangɔ́ kɛ́lɛma a maa ɣɛ́ máá Ngála ndiivó fáitii kɛ́, ná wáá ngáá, ngi Hɛ́ɛ́ma Ỹínangi w̃áá véle w̃a lɛ́i a mu golóngɔ áá ɣɛ́ la mbɛ. Aa mɔɔ ngáá a mu híyalaa ngáá savaí ná wɔ́lɔ Ngalá ngí féi Muusé yáá.

Savái i faa ỹɔ́u ɣɛ́ndai ɣɛa ngáá mú ye

⁷ Kɛ ná waa náá ngáá ndee? Kɛ savaí lɔ́ ngáá faa ỹɔ́u? Ná aa h̃íí kulo bɛ́lɛ, kɛ́ aá wáa ngáá kɛbei sava langɔ́ aa ɣɛi lá faa ỹɔ́u ɣɛ́ndai w̃a ngɛ́i belé ɣɛ́ kɔlɔ́ sí gíte í ngáá faa ỹɔ́i. Ngi lɔ́masei waa nɔ́ɔ ngáá kɛbei sava langɔ́ aa ɣɛi lá ma ngáá nuu álaa ngi mbála yaá wɔ́li mɔ́ni mɔ́ni kɛ, ngɛ́i belé ɣɛ́ kɔlɔ́ ngáá kɛ ná lɔ́ ngáá faa ỹɔ́u.

⁸ Faa ỹɔ́u ɣɛ́ndai i sávai yángengengɔ, i kɛ ngáá háwu mɔ́ni mɔ́ningi í víli ndíí vólu. Kɛ́ ná sávai ɛ́i ɣɛ́ na, kɛ faa ỹɔ́u ɣɛ́ndai gúlangɔɔ lé nɔ́ɔ ngáá nuu háángɔ.

⁹ Ná h̃u nɛ́nɛ ngáá ɣɛ́i savaí wɔ́lɔ kulangɔ́ɔ́ lé ngáá kɛ ndɛɛh̃ú w̃úl̃a ngí ɣɛ́i su. Kɛ́ ná náa léi sávai ná í vílini ngóli h̃u, kɛ faa ỹɔ́u ɣɛ́ndai i ɣɛi gúlai nɔ́ɔ ngáá nuu aa ɣɛ́ ndɛ́ɛ́h̃u h̃u.

¹⁰ Kɛ ná ná vá ngáá ɣɛ́, kɛ saa w̃ul̃á náá ngí ɣɛ́i su. Kɛ savaí sí ɣéle kule í ɣɛ́i ma í kɛ́ ngáá háwu ngi ɣɛ́ ndɛɛh̃ú h̃u, laá lɔ́ náá í kɛ́i ngáá háwu nyá ɣéle ngí saa w̃ááhɔlɔ.

¹¹ Faa ỹɔ́u ɣɛ́ndai i sávai yángengengɔ, í kɛ́ ngáá háwu ngá ngi bólowa. Aáva kɛ saa w̃ul̃á nɔ́ɔ í kɛ́ngɔ ngáá háwu ngí mááhɔlɔngɔ savái w̃áá véle w̃a.

¹² Kɛ́ ná fíli sú, hésendaa hava gɔlɔítii ɛ́ɣɛ ná vólu w̃áá hávaitii Ngála ngí ndáni faa fíli aa ti wa tiyá lɔ pele w̃a aáva ti ngáá faa vánda.

¹³ Kɛ ná ná áá ɣɛ́, sí í ngáá faa vánda ná wáá ngáá, savaí, laá lɔ́ í kɛ́ngɔ ngáá háwu ngí sáá w̃ááhɔlɔ? Maa hái aa h̃íí kpósouŋ. Aá ɣéle kulangɔ́ɔ́ lé ngáá faa ỹɔu ɣɛ́ndai i savaí yéɣengɔ nɔ́ɔ ngáá ngi yénge nyááka í kɛ́ ngáá háwu ngí sáá w̃ááhɔlɔ ná w̃áá véle w̃a kíya bɛ́lɛ savái í ngáá faa vánda. Ná vá tɔ a maá kɔ́lɔ mba ngáá kíya faa ỹɔ́u ɣɛ́ndai ỹɔúngɔ pílangɔ kp̃óu.

Nuu gí mai yakɔlɛngɔ́ɔ́ lé ma féle

¹⁴ A mú kɔ́lɔ ngáá savaí lɔ́ ngáá Ngala fáá, kɛ́ nyá lɔ́ɔ nɔ́ɔ ngáá nuu búsa aáva tókolevengɔɔ lé faa ỹɔ́u ɣɛ́ndai h̃u kíya nɔ́ɔ ngáá ɣɛ́ ngáá nduwɔ lopó fááw̃a.

¹⁵ Seímil̃a p̃ɛ́ɛ́, tuvaí sítii ngáá ɣɛ́ ngáá tí wo, ngɛ́i ngátɔ mba. Sítii ngí kɔ́lɔ ngáá tiyá lɔ́ pele w̃a ngɛ́i nátii kɛ, sítii sílingɔ ngáá ti ɣɛndáa, tiyá lɔ́ ngáá tí ɣɛ.

¹⁶ Ná ngɛ́i ɣɛ́ loí ngáá sítii kɛndáá sílingɔ ngáá ti ye, kɛ ná lɔ́ áá ngákɛ ngáá ngáá máá luw̃á mbo hɔ́ɔ́ ngáá kɛ savaí lɔ́ ngáá faa vánda.

¹⁷ Ná ná áá ɣɛ, kɛ nyá gíte láá le ngɔ́ɔ́ ɣɛ́a tuva velé ỹɔ́i sítii mbo kɛ faa ỹɔ́u ɣɛ́ndai í sú laá lɔ íwaa maa háitii kɛ.

¹⁸ Ngí kɔ́lɔ ngáá kɛ ndiivo kɛɛ́ w̃ɔ́ni mɔningítii ti sú taá kɛ ngáá háwu ngɛ́i faa fíli kɛ í ngáá faa vánda. Ná bɛ́lɛ ngáá ɣɛ́ loí ngí sí ɣɛ́ í péle w̃a, ngɛ́i kɛ.

¹⁹ Laá ɣéle sí aá ɣɛ́ péle w̃a ndóngɔ ngí kɛ ngɛ́i ná ɣɛ, kɛ́ sí ɛ́i ɣɛ́ péle w̃a ngɛ́i ɣɛ loí ngí kɛ, laá lɔ́ ngáá kɛ.

²⁰ Náá hááw̃a, ná nyá ɣéle ngáá ná ɣɛ́ ngáá loí ngɔ́ɔ́ kɛ, kɛ nyá láá le múl̃ɔ ngɔ́ɔ́ ɣɛ́a maa hái sítii kɛ, faa ỹɔ́u ɣɛ́ndai í sú aá lɔ áá ti ɣɛ.

²¹ Kɛ ngi ngátɔa náa mba ngáá kɛ ŋani tá lɔ́ sú íwaa kɛ ngáá háwu ngɛ́i sí ɣɛ ngáá ɣɛ́ kɔ́lɔ ngáá aá lɔ péle w̃a.

²² Ngáá lúw̃a ma gíte ngáá lií kpɛ́lɛɛ ngáá Ngalángi hávai lɔ pele w̃a.

²³ Ngí hómboa ngí ngátɔ mba ngáá kɛ ŋani tá lɔ sú íwaa lápi ngáá kí mái. I hómboa í kɛ́ ngáá pelésina ɣɛ́ kíli faa ỹɔ́u ɣɛ́ndai ya, laá vá tɔ áá ngúto faa kpɛ́lɛɛ sú ngáá kɛ.

²⁴ Kɛ ná ná áá ɣɛ́, nyá lɔ́ɔ ngáá nuu ndííỹaaningɔ pilangɔ kp̃óu. Ele lɔ náá áá mááwalo faa ỹɔ́u ɣɛ́ ndiivó kɛ w̃ɔni mɔningí sí yáá í má ngáá kule ngáá ngi saa w̃ááhɔlɔ?

²⁵ Ngáá sɛ́ɣɛɛ gulá Ngalá ma lɛ́i aa sí ɣɛ a mú Lemɔ́i Jísu Kílisitii w̃áá vele w̃a. Kíya bɛ́lɛ í kí má gite ngáá ngí híya ngáá Ngalá sávai, kɛ́ ndiivo kɛɛ w̃ɔ́ni mɔningí lɔ áá kɛ nɔ́ɔ ngáá faa ỹɔ́i ɣɛ.