LÓÓMI 6 - Kɛ́lɛ Niinaí

A muỹá lɔ́ ndɛɛh̃ú h̃ú kpahái wa mú sú Jísu Kílisitii wa

¹ Kɛ sí wundamái waa bɛɛ́ hɔ́ɔ́? Baa aá wáá ngáá a mú ndí nɔ́ɔ́ ngu ma ngáá faa ỹɔ́u ɣɛ́ndai ngáá kɛinɔ́ɔ Ngalángi háá bɔwɔ́i í ɣɛ́ áá ɣɛ wɔ́ɔ́lɔ ngwala?

² Ngalá ngí gílihoo ná w̃a! Aá ɣéle p̃ɛ́ɛ́, maa hái gúlangɔɔ lé nɔ́ɔ́ ngáá kíya nɔ́ɔ nuu áá há í ndá fíli ɛ́i mɔ́ɔ́ ɣɛ faa wá ngeleí sí wu, ngimɔ́ɔ́ nɔ́ɔ a maa bɔ́i faaw̃á maá faa ỹɔ́i. Faalɔ, mɔí mɔ́ɔ́ ɣɛ faa ỹɔ́u ɣɛ́ndaa h̃u.

³ Wú súúwɔlɔ ngáá ná á mú nguyaí w̃ááhɔlɔni a mu báhai su a mú ɣɛ́ ngáá nuu yílaa maa Jísu Kílisitii. Paangí ná tí mbóni la mu lɔ́ngɔ lɔ í wóni ngáá mu ye.

⁴ Faalɔ, ngúyai a mú mááhɔlɔni kɛ kpɔ́lui wúl̃a tí mbóni ngáá mu ye a maá láa. Ná ná ɣɛ́ngɔ, kɛ i ɣɛ́ngɔ nɔ́ɔ ngáá a mú hááni a maá láa ngáá kɛinɔɔ́ kíya nɔ́ɔ Kɛɛɣɛ́i Ngálangi gááma yakpangí í kɛ́ni ngáá háwu Kílisitii í yóóɣeni sái h̃u a muỹá bɛ́lɛ nɔ a mú lɛɛh̃úi h̃uuhíya péle niiná h̃u.

⁵ Sái mú mbóngɔ kíya nɔ́ɔ í háángɔ aá lɔ́ í mú báhaa su maá láa, ngimɔ́ɔ́ nɔ́ɔ mú yooɣéndai sái h̃u kíya nɔ́ɔ í yóóɣeni sái h̃u áá vá mú báhama mbá.

⁶ A mú suuwɔlɔ́ ngáá maa hái gúlangɔɔ lé nɔ́ɔ ngáá kíya a mu ɣɛ́ngɔ maá lɛɛh̃úi h̃uuhíya hése aa mɔ́ɔ h̃íí, hése keleí ná í báhai Jísu wa ti kpákpa kúlɔsii w̃a, í ló na í há. Ná vá ngi ɣɛí kɛinɔɔ́ faa ỹɔu ɣɛ́ síya veleí sí í mu h̃u ngakpá ngálaa mɔ́ɔ́ ɣɛ mbɛ ngáá ɔ́ɔ́ mú wúto kíya nɔ́ɔ taá ndúwɔ lopói wúto,

⁷ bɔw̃álale, nuí fíli áá há í bándangɔ ɛi mɔ́ɔ ɣɛ́ lá faa ỹɔ́u ɣɛ́ndaa yaá.

⁸ Ná a maa ɣɛ báhai Kílisitii wa sái h̃u í mááhɔlɔni, ná ná áá ɣɛ́, kɛ a muỹá lɔɔ ɣɛ́ ndɛɛh̃ú h̃u maá láá.

⁹ Sífaa, a mú súúwɔlɔ ngáá nápa náa Ngála ngí Kílisitii wúyoɣeni sái h̃u ɛi mɔɔ ha kúnafɔ, saí yákpa ngáá mɔ́ɔ maah̃ú.

¹⁰ I haangɔ́ nɔ́ɔ sú yíla kpé í faa ỹɔ́i yákpangi ỹááni, ndɛɛh̃úi ná í su náa aá lɔ́ náá su Ngalá fááw̃a.

¹¹ Ngimɔ́ɔ́ nɔ́ɔ wá bɛ́lɛ nɔ́ kule í ma wú bɔ́wɔ yéɣe ngáá kíya nɔ́ɔ nuu áá ɣɛ́ ná saangɔ́ áá ɣɛ́ la, faa ỹɔ́u yákpa ngɛi mɔɔ ɣɛ wú w̃ááh̃u. Kɛ́ wú ɣɛ kíli i ɣɛ́ ngáá nuu áá ɣɛ ndɛɛh̃ú h̃u Ngalá fááw̃a kpahái wa wáá ɣɛ́ su Jísu Kílisitii wa.

¹² Náá hááw̃a, waa lúw̃ama ngáá wú lɛɛh̃úi h̃uuhíyandaa ngeleí sí wu faa ỹɔ́i ɣɛ́ndai ɔ́ɔ́ wu wúto ngáá sí fíli áá hítɛ wú gí ma wú kɛ.

¹³ Wálaa kɛ wú lúwui waa wɔ́lingaitii tá fíli tɔɔ́ gúla kɛlɛ́ma faa ỹɔ́u ɣɛ́ndai yɛ, tɔɔ́ ɣɛ́ ngáá kíya nɔ́ɔ ngenge nyáákani taa ɣɛ́ na faa ỹɔ́u ɣɛ́ndaa h̃u. Kɛ́ áá ɣéle, a bɔwɔ́ gúla kɛ́lɛma Ngalá mbɛ, wú ɣɛ́ kíli í ɣɛ́ nɔ́ɔ́ ngáá kíya nungáá taa ɣɛ́ yooɣénga saa h̃u, tí ɣɛ́ ndɛɛh̃ú h̃u. Wú lúwui waa wɔ́lingaitii kpɛ́lɛɛ kúla kɛlɛ́ma Ngalá mbɛ faa vándani kɛndáá h̃u.

¹⁴ Kule áá ma wú bándangɔ ɔ́ɔ́ ɣɛ́ la faa ỹɔ́u ɣɛ́ndai ya, bɔw̃álale, Ngala sávai nátii taa le wɔ́ɔ́ ɣɛ́ ti wu, kɛ́ áá ɣéle, wá lɔ́ náa Ngalángi háá bɔ́wɔi wu.

A muỹá lɔ́ ngáá nduwɔ lopóa ɣɛ́ kíli telémbo fáitii kɛ́ndai h̃u

¹⁵ Kɛ ná ná áá ɣɛ́, ná wáa náá ngáá ndeé? Baa ná wáa ngáá a mu ɣɛ́ máa faa ỹɔ́i ɣɛ ngáá sífaa a maá mɔ́ɔ́ Ngala sávai nátiini mbu kɛ́ aá ɣéle a mú Ngalángi háá bɔwɔí wú? Ngalángi gílihoo ná w̃a!

¹⁶ Wáá súúwɔlɔ ngáá ná nuu áá bɔ́wɔ gúla kɛ́lɛma nuu yɛ́ ngáá í gólo maa w̃ɔ́i yɛ ngáá nduwɔ lopó, kɛ áá lɔ́ ngáá nduwɔ lopó mbu? Ná ná áá ɣɛ́, kɛ bɛɛ́ lɔ́ hɔ́ɔ mú mbú ngáá nduwɔ lopóa? Baa faa ỹɔ́u ɣɛ́ndai le, lɛ́i áá kɛ́ ngáá háwu nuu sáa w̃ááhɔlɔ, baa kolóngi nuu áá ɣɛ́ su Ngalá mbɛ́ lɛ́i áá kɛ́ ngáá háwu nuu í ɣɛ́ ngáá telembo mɔ́ɔ́ Ngála ngaah̃u?

¹⁷ Nuu áá sɛ́ɣɛɛ gulá Ngalá ma ngáá kíya bɛ́lɛ wú ɣɛ́i ngáá nduwɔ lopóa ɣɛ́ kíli faa ỹɔ́u ɣɛ́ndai h̃u kɛ́ wú bɔ́wɔ gulangá kɛ́lɛma fó fóndei tɔɔỹaá galambongí sí wu, wú mááhɔlɔni.

¹⁸ Wú wúmaa i wongá faa ỹɔ́u ɣɛ́ndai yaá, wá lɔ́ náá ngáá nduwɔ lopóa ɣɛ́ kíli telembo fáitii kɛ́ndai h̃u.

¹⁹ Nyá lɔ́ɔ njɛpɛí sítii pú nuu búsa ndá háá yeɣé kíli h̃u bɔw̃álale naa bangɔ́ɔ́ lé ngáá wú faí sítii ngatɔ́ mba. Kíya nɔ́ɔ wú ɣɛ́ngɔ wú lúwui waa wɔ́lingaitii kpɛ́lɛɛ kúlai kɛ́lɛma ngáá nduwɔ lopóa ɣɛ́ kíli faa ỹɔ́u ɣɛ́ndai ya kékelei, ngimɔ́ɔ́ nɔ́ɔ kule í ma naa wú tí gúla kɛlɛ́ma telembo fáitii kɛ́ndai h̃u h̃íí na kɛinɔɔ́ wú ɣɛ́ ngáá Ngalángi vóngaa fó fóndei tɔmbema w̃aa fíli álaa ɣɛ́ wú wa.

²⁰ Ná h̃u wú ɣɛ́i ngáá nduwɔ lopóa ɣɛ́ kíli faa ỹɔ́u ɣɛ́ndai ya, telembo faa ɣɛ́ndaa aa ɣɛi wú w̃a ngáá kpama kúle.

²¹ Kɛ́ aáva sí kínɛi náá wú suuhíyanga faa ỹɔ́u ɣɛ́ndai ná h̃u, wúwaa wúfe la sí h̃úi ndeé lɔ́ gítei í ngáá kulasuunúmai wú mááhɔlɔnga ti volú véle h̃u? Maa gulasuunumaí waa nɔ́ɔ ngáá sái nuu áá maahɔ́lɔ.

²² Kɛ́ sí h̃úi náa, wú wúmaawongɔɔ lé náá faa ỹɔ́u ɣɛ́ndai yaa aáva wú ɣɛ́a náá ngáá kíya nɔ́ɔ nduwɔ lopóa ɣɛ́ kíli Ngalá mbɛ. Ná vá ngi ndá gúlasuunumai wáá ngáá wú ɣɛ́ ngáá Ngalángi vóngaa fó fóndei tɔmbéma w̃aa fíli álaa ɣɛ́ wú wa. Ná vá tɔ áá kɛ́ ngáá háwu wú kúnafɔ lɛ́ɛ́h̃ui w̃ááhɔlɔ.

²³ Pavaí nuu áá mááhɔlɔ faa ỹɔ́u ɣɛ́ndai h̃u aá wáá ngáá sái. Kɛ́ Ngálangi hémbɛ wɔ́lingi waa ngáá kúnafɔ lɛ́ɛ́h̃ui lɛ́i nuu áá mááhɔlɔ kpahaí wá nuu áá ɣɛ́ su a mu Lemɔ́i Jísu Kílisitii wa.