LÓÓMI 5 - Kɛ́lɛ Niinaí

Ngalá ngí mú yeɣénga ngáá telembo mbélaa

¹ Ná náá a mu ngáá telembo mbélaa Ngála ngaah̃ú ndangí w̃áá véle w̃a a mú su la, a maá ɣɛ́ náá ndiiheí w̃ááh̃u a maá Ngála a mu Lemɔ́i Jísu Kílisitii w̃áá véle w̃a.

² Jísu Kílisitii i kɛa ngáá háwu Ngalangí háá bɔwɔí í fólo mú w̃a ndangí w̃áá véle w̃a a mú su la lɛ́i náa a máá lɛ́ɛ́h̃ui h̃uuhíya su. Ná ná áá ɣɛ́, a maá góóh̃unɛɛ kitomái hááw̃a í mú yaá ngáá a muỹá lɔɔ vá ɣɛ́ma Ngalángi yákpa maanɛɛnɛɛngí h̃u.

³ Ná vólu mɔ́ɔ́, a maá góóh̃unɛɛ maanɔw̃ɔ́itii su taa lá mú w̃a bɔw̃álale, a mú súúwɔlɔ ngáá maanɔw̃ɔ́i lɔ áá kɛ a mu lii í bá.

⁴ Ná a mu h̃uubangɔ́ áá ɣɛ́ la faa bɔ́lundai yá, na aa kɛ ngáá háwu Ngalá ngí lókohei mu wu. Ngala tókohei mbúi ná vá tɔ áá kɛ ngáá háwu mu gitómaa í ɣɛ́ na.

⁵ Aáva kitómai sí ɛi mu vɛ́lɛ, bɔw̃álale Ngalá ngí kɛa ngáá háwu ngi lóngi yá ngí ɣɛ́ wɔɔlɔ a mu lií h̃u Hɛ́ɛ́ma Ỹínangi w̃áá véle w̃á lɛ́i í ngáá Ngala fémbɛ wɔ́lingi í féngɔ mu yɛ.

⁶ Ná h̃u nɛ́nɛ pele fíli áá ɣɛ́ngɔ mu haá h̃u, naa h̃uu lɔ́ Kílisitii í hái a mu haáw̃a muỹɛ́i mú ngáá faa ỹɔ́u yélaa áá gula Ngala ngí haa bátɛ su.

⁷ Naa bangɔ́ nɔ́ɔ́ ngáá nuu í bɔ́wɔ lɛɛh̃úi gúla kɛlɛ́ma telembo mɔ́ɔ yɛ kíya bɛ́lɛ tɛingaa h̃u nuu áá lúw̃a ma í lɛɛh̃úi gúla kɛlɛ́ma tuva velé vánda w̃ɔɔ haaw̃a.

⁸ Kɛ́ Ngalá ngí ngi lóngi yaah̃ú ɣɛ́ngɔ ngáá mu ye ngwala, ná wáá ngáá, ná h̃ú nɛ́nɛ kpɛ́ a mu ɣɛ́ngɔ ngáá faa ỹɔ́u ɣɛ́ mbélaa, Kílisitii i haaní a mu haáw̃a ngáá saáɣa.

⁹ Ngi hááɣa haí sí w̃áá véle w̃a Ngalá ngí mu yeɣénga ngáá telembo mbélaa, faalɔ, tɔɔỹaá hááw̃a Kílisitii i kɛa ngáá háwu Ngalángi lííyaw̃al̃ai ɛ́ɣɛ ngi háá bamaí tɛí mɔ́ɔ foló mú w̃a.

¹⁰ A mu ɣɛ́ngɔ ngáá Ngalá mbaahílima yélaa. Kɛ́ sái w̃áá véle w̃a ngi H̃íỹɛndou Loí Jísu Kílisitii í mbóni a mu haáw̃a, i mú lówah̃u bátɛnga maá Ngalá. Ná áá ɣéle a mu lówah̃u batɛ́ngɔ maá Ngála, mu wumááwongɔɔ lé kpésekele ndɛɛh̃úi w̃aa véle w̃a Kílisitii í su.

¹¹ Kɛ́ aa gɛɛlɛí nɔ́ɔ́ ná wa, Ngála ngáá kɛ mɔ́ɔ́ ngáá háwu a mu góóh̃unɛɛngɔ wala í ɣɛ́ la a mu Lemɔ́i Jísu Kílisitii w̃áá véle w̃a lɛ́i í kɛ́a ngáá háwu a mu lówah̃u i bátɛa a maá Ngála.

Léélaangi í Ádau lówah̃u taa Jísu Kílisitii

¹² Faa ỹɔ́u ɣɛ́ndai í vááni ngelewu siỹɛndópo yiláa máá véle w̃a. Náá hááw̃a, sái i vái ngeleí sí wu. Ná vá tɔ í kɛ́ngɔ nuu kpɛ́lɛɛ áá sáa w̃ááhɔlɔ bɔw̃álale, mu kpɛ́lɛɛ mú faa ỹɔ́u ɣɛ́nga.

¹³ Seímil̃a p̃ɛ́ɛ́, Ngalá ngɔ́ɔ́ ɣɛ́ í sávai hé Muusé yaá nuu búsaa hááw̃a faa ỹɔ́i i ɣɛi náá ngelewu. Kɛ́ nuu véle lálangɔ ɛi ɣɛ́ la faa ỹɔ́u ɣɛ́ fááw̃a ná sava ɛ́i ɣɛ́ ma.

¹⁴ Ná fíli su, sái i loá ngí yákpangi yángengema í síɣe Ádau nda yéteyangi h̃úú w̃a í fólo Muusé ndá yéteyangi h̃úú w̃a. Taá ɣɛ́i yɛɛ́ nuí fíli ɔ́ɔ́ há kɛ Ngala sáva lɔ ɔ́ɔ́ ɣɛ́ nyááni kíya Ádau í kɛ́ni lɛ́i í ɣɛ́i ngáá nuí síí w̃ɔɔ w̃aabalengí í ɣɛ́i áá vá vááma ngélewu.

¹⁵ Kɛ́ ti félengɔ ti léélaa, sífaa, Ngalángi haa bɔwɔ gulasuunumaí aa ngáá kíya Ádau haa ỹɔí gulasuunumaí í na. Nuu bíh̃i bíh̃i ngi haangɔ́ kɔwɔ́ato faa ỹɔ́i sí wá siỹɛ ngílaa kpéngi ná í vái la. Kɛ́ Ngálangi háá bɔwɔí lɔ́vengɔɔ lé Ádau haa ỹɔí gulasuunumaí wa, ná wáá ngáá, Ngalá ngí ndɛɛh̃ú héa nuu bíh̃i bíh̃i ngeyá siỹɛ́ ngílangi sí Jísu Kílisitii háá bɔwɔí w̃áá véle w̃a.

¹⁶ Ngalángi hémbɛ wɔlingí taá gúlai ngáá wee taá fáa ỹɔ́i Ádau í kɛ́ni. Ná h̃ú Ádau í faa ỹɔ́u yílaangi ná ɣɛ́ni, Ngalá ngí mbaalévei ngáá aa veléi. Kɛ́ Ngalá ngí ngi hémbɛ wɔlingaa hengá kíya bɛ́lɛ núngaa tí faá ỹɔu bíh̃i bíh̃i kɛa. Aáva ná i kɛ́a ngáá háwu Ngala ngɛ́i mɔ́ɔ mú velé lála ngáá maa vélei.

¹⁷ Nuu yílaa kpéngi háá ỹɔí i kɛa saa haá í ló nuu kpɛ́lɛɛ mba, kɛ́ sí Jísu Kílisitii í kɛ́ni maa gulasuunumaí lɔ́vengɔɔ lé mbá. Nungái sítii taa Ngalangí háa bɔwɔ h̃uulɔ́vengɔi w̃ááhɔlɔ ɛ́ɣɛ ngi hémbɛ wɔlingí áá kɛ ngáá háwu nuu áá ɣɛ́ ngáá telembo mɔ́ɔ ngááh̃u, maa núngai nátii taa ɣɛ́ náa ngáá masangáá ndɛɛh̃uu gítei h̃u Jísu Kílisitii w̃áá véle w̃a.

¹⁸ Faalɔ, kíya nɔ́ɔ nuu yílaa kpéngi háá ỹɔu vele w̃a nuu kpɛ́lɛɛ péle lálangɔ í ɣɛ́ngɔ náá la Ngalá ngaah̃ú, ngimɔ́ɔ́ nɔ́ɔ nuu vékai sí bɛ́lɛ ngi ndá lélembo pele w̃a í kɛ́a ngáá háwu nuu kpɛ́lɛɛ péle lálangɔ laa lé ɛ́ɣɛ ndɛ́ɛ́h̃u gítei í ná ti haáw̃a.

¹⁹ Aáva múl̃ɔ, kíya nɔ́ɔ nuu búsa yílaangi gólo lálai í kɛ́ngɔ ngáá háwu nuu kpɛ́lɛɛ ti ɣɛ́ ngáá faa ỹɔ́u ɣɛ́ mbélaa, ngimɔ́ɔ́ nɔ́ɔ kolóngi w̃áá vele w̃a nuu vékai sí í mbóngɔ Ngála mbɛ́ í kɛ́nga ngáá háwu nuu bíh̃i bíh̃i táá vá ɣɛ́ma ngáá telembo mbélaa Ngalá ngááh̃u.

²⁰ Ngalá ngí saváitii féni Muusé yaá kɛinɔɔ́ faa ỹɔ́u ɣɛ́ndai ya ngí ɣɛ́ wɔ́ɔ́lɔ. Kɛ́ ná ná í ɣɛ́ni Ngalángi háá bɔwɔí ɣéle ngangí ɣɛ́i wɔ́ɔ́lɔ ngwala.

²¹ Faalɔ, kíya nɔ́ɔ faa ỹɔ́i aa ngí yákpangi yaah̃ú ɣɛ́ sái w̃áá véle w̃á, ngimɔ́ɔ́ nɔ́ɔ Ngalángi haa bɔwɔí áá ngi yákpangi yaah̃ú ɣɛ́ telembongí w̃áá véle w̃a lɛ́i áá kɛ ngáá háwu nuu áá kúnafɔ lɛ́ɛ́h̃ui w̃ááhɔlɔ a mú Lemɔ́i Jísu Kílisitii w̃áá véle w̃a.