LÓÓMI 4 - Kɛ́lɛ Niinaí

Lébilah̃au í ɣɛ́i ngáá telembo mɔ́ɔ́ ndangí w̃áá véle w̃a

¹ Bɛɛ́ lɔ a maá nde ngáá a mu káwala Lébilah̃au i ngátɔi mba kɔwɔ́ato faí sí wa a máá yɛ́pɛ mba?

² Kɛ bele Lébilah̃au i ɣɛi ngáá telembo mɔ́ɔ́ Ngalá ngaah̃ú kɛɛ haítii maa véle w̃a í kɛ́ni, faa ɔ́ɔ́ ɣɛ́ ɣɛi ngáá ná ɔ́ɔ́ lókola ma í maayónga tevé. Kɛ́ ɛ́i belé maayónga téve Ngalá kakála,

³ sífaa, sítii pɔnɛngɔ́i Ngalá Kɔ́lɔi h̃u aá wáá ngáá sí, “Lébilah̃au i laní ngáá Ngala aáva ngi lángi ná w̃áá vele w̃a, Ngalá ngí ngeɣéni ngáá telembo mɔ́ɔ́.”

⁴ Ná ngénge mɔ́i áá pávai w̃ááhɔlɔ ngenge míl̃a áá ɣɛ́ mbóni kákpangi náá hááw̃a, ɛi ɣɛ ngáá faa bɔ́wɔ áá ɣɛ́ maahɔ́lɔni.

⁵ Kɛ́ nuu fíli ɛ́i hómbo ɔ́ɔ́ faa ɣɛ́ ngáá áá kɛ ngáá háwu Ngalá ngáá ngeɣé ngáá telembo mɔ́ɔ́ kɔwɔ́ato sí wá áá ɣɛ́ kɛ́ni. Kɛ́ Ngalá ngáá faa ỹɔ́u ɣɛ́ mbélaitii ngéɣe ngáá taa ngáá faa ỹɔ́u ɣɛ mbélaa ngáá sífaa taa lá lá. Sífaa ndangí ná maa w̃ɔ́i áá ɣɛ́ su ngáá Ngalá, áá lɔ́ Ngalá ngáá ló mááh̃u í maa w̃ɔ́i waaléve ngáá aa ngáá faa ỹɔ́u ɣɛ́ mɔ́ɔ́.

⁶ Pɔnɛngɔ́ɔ́ lé Ngala Kɔ́lɔi h̃u ngáá sí Masangí Deevé í ndéni kɔwɔ́ato faa vándai wa áá ɣɛ́ sítiini mbɛ Ngalá ngáá ti yeɣé ngáá telembo mbélaa kíya bɛ́lɛ ɛ́i ɣɛ́ ngáá ti lúva véle vánda haaw̃a Ngalá ngáá ná ɣɛ́ faaw̃a. Sí vá Masangí Deevé í ndéi aá wáá ngáá sí,

⁷ “Aá lɔ́ ngáá faa vánda nungái sítiini fááw̃a Ngalá ngáá ti háá ỹɔítii suuhaaló, í lééw̃a ti w̃á.

⁸ Aá lɔ́ ngáá faa vánda sítii fááw̃a Ndemɔí Ngála ngɛ́i mɔ́ɔ ti velé lála.”

⁹ Faa vándai sítii pa taá ná nɔ́ɔ sítii faaw̃a nɔ́ɔ léikei ti lɔ́vengɔ pɛ́lɛ vólu, kɛ́ aá lɔ́ na sítii bɛ́lɛ fááw̃a ti lɔ́vengɔ láá le pɛ́lɛ vólu. Maa hái waa nɔ́ɔ ngáá kíya ndengɔ́ kílii, “Lébilah̃au i laní ngáá Ngala aáva ngi lángi ná w̃áá véle w̃a, Ngala ngi ngeɣéni ngáá telembo mɔ́ɔ́.”

¹⁰ Aáva Ngalá ngí Lébilah̃au yeɣéni ngáá telembo mɔ́ɔ ná h̃u tɔvengɔ áá ɣɛ́i nɛ́nɛ lá pɛ́lɛ vólu.

¹¹ Laá ɣéle, Lébilah̃au i tɔve pɛlɛ́ vólu w̃aahɔ́lɔni kɛinɔɔ́ í ngákɛ ngáá kɛ Ngalá ngí ngeɣénga ngáá telembo mɔ́ɔ́ ndangí w̃áá véle w̃a í ɣɛ́i su ngáá Ngalá p̃ɛ́ɛ́ ɔ́ɔ́ ɣɛ́a tɔve pɛlɛ́ vólu w̃aahɔ́lɔ. Ná vá tɔ í kɛ́ngɔ Lébilah̃au í ngáá kɛɛɣɛ́ walaí sítii kpɛ́lɛɛ fááw̃a Ngala ngáá ti yeɣé ngáá telembo mbélaa ndangí w̃áá véle w̃a taa ɣɛ́ sú lá, kíya bɛ́lɛ tí lɔ́vengɔ láá lé pɛ́lɛ vólu.

¹² Ná vá tɔ mɔ́ɔ́ í kɛ́ngɔ Lébilah̃au í ngáá sítii kpɛ́lɛɛ ti lɔ́vengɔ áá ɣɛ́ la pɛlɛ́ vólu ti kɛ́ɛ́ɣɛ tiyɛ́i vá ti langɔ́ ngáá Ngalá kíya nɔ́ɔ Lébilah̃au í láni p̃ɛ́ɛ́ ngáá Ngalá ɔ́ɔ́ ɣɛ́a tɔve pɛlɛ́ vólui w̃aahɔ́lɔ.

Ngalángi gúúlongi w̃aa áá hɔ́lɔ ndangí w̃áá véle w̃á nuu áá ɣɛ́ su la

¹³ Ngalá ngí Lébilah̃au guulóni ɛ́ɣɛ ngí láála lengáitiini ngáá aá lɔ́ɔ ngéteyangi lókoleve tí w̃a aáva taá ɣɛ́i koló tɔ́ Lébilah̃au í ɣɛ́i sú Ngala sávaitii mbu ná lɔ́ í kɛ́i Ngála ngí kuulóngi sí wóni lá, kɛ́ sífaa Lébilah̃au í ɣɛ́i ngáá telembo mɔ́ɔ ngi lángi w̃áá véle w̃a.

¹⁴ Kɛ béle nuu áa Ngala kúúlongi sí w̃aahɔ́lɔ koló máá véle w̃a nuu áá ɣɛ́ sú Ngalangí hávaitii mbu, kɛ ná ná áá ɣɛ́, ndangí nuu áá ɣɛ́ su ngáá Ngalá pele fíli ɛ́i belé ɣɛ́ su. Kɛ kuulóngi sí vá pele fíli ɛ́i belé ɣɛ́ su.

¹⁵ Ngalá ndiiyáw̃al̃angɔ aa ɣɛ lá i mɔ́ɔ faa báma lá nuu w̃á ná nuu áá ngí hávai yá nyááni. Kɛ́ núngai sítii sáva ɛ́i ɣɛ́ ti yaá tɛí nyááni.

¹⁶ Maa hái kpɛ́lɛɛ i liingɔ́ nɔ́ɔ í tó ndangí wá nuu áá ɣɛ́ sú ngáá Ngalá ngáá kɛinɔɔ́ í ɣɛ ngáá Ngalángi háá bɔwɔí w̃áá véle w̃á ngí gúúlongi aa hítɛ nga. Aáva kuulóngi sí aa na nɔ́ɔ léikei Lébilah̃au laala lengáitii fááw̃a tiyɛ́i Ngala sávai í tí loow̃a, kɛ́ aá ɣéle, aá lɔ́ na nungái kpɛ́lɛɛ fááw̃a tiyɛ́i taa ɣɛ́ ngáá Lébilah̃au laala lengaa kɔwɔ́ato ndangí wá nɔ́ɔ taa ɣɛ́ su ngáá Ngalá kíya Lébilah̃au í ɣɛ́i na. Ná ná áá ɣɛ, kɛ Lébilah̃au lɔ í ngáá ti kpɛ́lɛɛ tí kɛ́ɛ́ɣɛ.

¹⁷ Maa hái waa nɔ́ɔ kíya pɔnɛngɔ́ Ngala Kɔ́lɔi h̃ú, sí vá pɔnɛngɔ́ aá waa ngáá sí Ngalá ngí ndéni Lébilah̃au w̃a, í ɣɛi ma, “Nyá lɔ́ɔ í ɣɛ́ ngáá kɛɛɣɛ́ nuu bíh̃i bíh̃i faaw̃a ndɔwɔlɔ́itii su ngeleí sí wu.” Kuulóngi sí va Ngalá ngí mbóni ngáá Lébilah̃au sífaa, ndangɔ́ í ɣɛ́i lá ngáá Ngalá lɛ́i áá kɛ́ ngáá háwu saa yelái ti yóóɣe sái h̃u lɛ́i mɔ́ɔ́ áá ŋáni sítii kpátɛ tɛi ɣɛ nɛ́nɛ ngelewu.

¹⁸ Ngalá ngí Lébilah̃au guulóni ngáá kɛ láa Lébilah̃au ɔ́ɔ́ ɣɛ́ ngáá kawala taala lengaa bih̃í bíh̃i faaw̃a. Aáva kíya bɛ́lɛ náá maa hái gúlangɔ í ɣɛ́i lá ngáá kɛ kuulóngi sí hítɛndai nga ɛi va holowomá, ná fíli sú, Lébilah̃au langɔ́ i ɣɛi lá ngáá Ngalá. Faalɔ, i ɣɛa ngáá kɛɛɣɛ́ nuu bíh̃i bíh̃i faaw̃a ndɔwɔlɔ́itii su ngeleí sí wu.

¹⁹ Lébilah̃au langí í ɣɛ́i su ngáá Ngalá ta guló bɛ́lɛ maa áá yéni kíya bɛ́lɛ í ɣɛ́i náá kɛí ngáá fowó hɔ́ndɔ ngílaa vóto ndoú áá nɛ́ɛ́ ɣɛi ngeyá. I ɣɛi suuwɔlɔ́ gíte ngáá kɛ kpokólongɔ wála i ɣɛi lá aáva i ɣɛi náá saa lowá la, ná vólu, ngi ỹáh̃ai Sééla i ɣɛi ngáá kpeeỹɔ́ mɔ́ɔ́.

²⁰ Kɛ́ ná fíli sú, kúúlongi Ngalá ngí mbóni ngáá Lébilah̃au, aa baah̃áani láma la kɛlaa ɔ́ɔ́ mɔ́ɔ́ni píli ki má ngáá baa ɔɔ va yɛ́ɛ́ holowomá. Aáva ngi langí i kɛí ngáá háwu suu í bá nga kpé, í Ngala ndaaw̃áálɛ.

²¹ Lébilah̃au i ɣɛi suuwɔlɔ́ gítei kpál̃au ngáá kɛ Ngalá ngáá hombó í ngi gúúlongi hítɛ ngá.

²² Faalɔ, Ngalá ngí Lébilah̃au yeɣéni ngáá telembo mɔ́ɔ́

²³ kíya nɔ́ɔ pɔnɛngɔ́ a maá kála Ngála Kɔ́lɔi h̃u. Kɛ́ aáva ngoí sítii pɔnɛngɔ́ aa ɣɛi nɔ́ɔ lá Lébilah̃au yilaá kpé fááw̃a.

²⁴ Ti vɔ́nɛngɔ i ɣɛi lá muỹá bɛ́lɛ nɔ a mu haáw̃a ná a muỹá bɛ́lɛ Ngalá ngáá vá mú yeɣéma ngáá telembo mbélaa ndangí w̃áá véle w̃a a mú sú la lɛ́i i mu Lemɔ́i Jísu wúyoɣeni sái h̃u.

²⁵ Ngála ngí Jísu gúlani kɛ́lɛma ngáá kɛinɔɔ́ í há a mu háá ỹɔítii fááw̃a. Aáva i mbuyoɣéni sái h̃u ngáá kɛinɔɔ́ a mu ɣɛ́ ngáá telembo mbélaa laa Ngala ngaah̃ú.