LÓÓMI 2 - Kɛ́lɛ Niinaí

Kahá áá Ngalángi gɔ́sɔ mbaalévengɔ wa

¹ Wɛ́i wáá ɣɛ́ wáá faa vɛ́lɛ nungáá vékaitii mbá ngáá tiyá lɔ́ ngáá faa ỹaaní mbélaa ngooh̃ugulá w̃áá fíli aa wú wá, bɔw̃álale, sí wáá ɣɛ́ wáá nungáá vékaitii ngéɣe sú ngáá faa ỹɔ́u yélaa ngi híí lɔ nɔ́ɔ jɔ́ wáá ɣɛ́ wáá kɛ. Kɛ ná ná áá ɣɛ́, kɛ wáá lɔɔ bɔwɔ waaleve ngáá kɛ wáá véleni.

² Sítii táá túvai nátiini mbo Ngalángi ndái lɔ pele w̃a ná áá ti waaléve ngáá taá vélei.

³ Áá lɔ́ wú gi ma ngáá Ngalá ngɛ́i fáá bá ndá wú w̃a sí haáw̃a wáá núngaa vékaa yeɣé sú ngáá faa ỹɔ́u yélaa wáá vá wúwaa ngi híí ɣɛ?

⁴ Ngalángi háá bɔwɔ walaí ɛ́ɣɛ ngí líílɔlɔi ɛ́ɣɛ wú hái áá kúmbo h̃u, ta fíli aa wú yááh̃u ngáá faa fíli. Wáá kɔ́lɔ ngáá aá lɔɔ ná ɣɛ́ nɔ́ɔ ngáá kɛinɔɔ́ í kɛ́ ngáá háwu wú vólu yáfe wú háá ỹɔítii mba?

⁵ Kɛ́ wú wóli h̃u bɔlɔngɔ́ɔ́ lé aáva wú lélenga ngáá wú vóte Ngála mba. Ná vá kɛngɔ́ wá lɔ́ɔ suu ɣɛ́ nɔ́ɔ ỹɔú bɔ́wɔ w̃a ngwala fóloi ná w̃a Ngalangí lííyaw̃al̃a walaí áá vá gúlama kɛ́lɛma. Ná wáá ngáá, ná h̃u Ngalá ngáá vá nuu kpɛ́lɛɛ kɔ́sɔma kahá vó fíli ɛ́i ɣɛ́ mbá.

⁶ Sí fíli pá nuu áá ɣɛ́ suuhíyai, laá lɔ áá pólu háá w̃ááhɔlɔ.

⁷ Ngalá ngáá kúnafɔ lɛ́ɛ́h̃ui hé sítii ngeya taá lɛ́ɛ́h̃ui h̃uuhíya ngáá ndiilɔlɔ́ faa vánda ɣɛ́ndai h̃u, ti gitómai aa ɣɛ ngáá Ngalangí yákpa maanɛɛnɛɛ ngwalaí ɛ́ɣɛ ngi yɛ́lɛhei, ɛ́ɣɛ kúnafɔ lɛ́ɛ́h̃ui.

⁸ Kɛ́ Ngalá tɔɔ vá lúúma sítii ngeyá tí beɣéngɔ nɔ́ɔ ngáá bɔwɔ́ í mɔ́ɔ faa báma wala lá ti w̃a, tiyɛ́i táa léle Ngalángi lɔ́ɔ́ỹai wa, ná vólu, ti liivó fái í ngáá faa ỹɔ́u ɣɛ́ndai.

⁹ Sítii kínɛi tí ngáá nyaama yélaitii Ngalá tɔɔ vá faa báma láma tí w̃a, ti w̃áá í nɔ́w̃ɔ ngá ngwala gíte. Yí ɣɛ́i ngáá Júsu w̃ɔɔ yáá ɣɛ́i ngáá Júsu w̃ɔɔ aa ná ɣɛ́ ngáá í yé ná nɔ́ɔ léi yá lɔ́ ngáá nyaama w̃ɔ́ɔ́.

¹⁰ Kɛ́ sítii kínɛi pá táá híya ngáá sí í péle w̃a, Ngalá tɔɔ vá tí w̃ááỹa féma ngáá ngi yákpa maanɛɛnɛɛ ngwalaí ɛ́ɣɛ mbɛlɛhéi ɛ́ɣɛ ndiihéi. Yí ɣɛ́i ngáá Júsu w̃ɔɔ yáá ɣɛ́i ngáá Júsu w̃ɔɔ aa ná ɣɛ́ í yɛ́ ná nɔ́ɔ léi yá lɔɔ híya ngáá sí í péle w̃a.

¹¹ Ngalá ngɛ́i suuwɔ́lɛ mbo ngi gɔ́sɔngi h̃u.

¹² Nungái sítii taá faa wɔ́lɔ kɔwɔ́ato Ngalángi hávai wá, Ngala tɔɔ vá ti betévema wa tí háá ỹɔí sítii fááw̃a taá kɛ́. Sítii kínɛi pá tí fáá wɔ́lɔ kɔwɔ́ato ngi hávaitii mbá, aá lɔɔ vá tí gɔ́sɔma ngi hávai laa wói w̃a tí háá ỹɔí sítii fááw̃a táa kɛ́.

¹³ Aá ngáá Ngalángi hávai ỹɛ́nindaa lɔ áá nuu ɣɛ́ ngáá telembo mɔ́ɔ Ngalá ngaah̃ú kɛ́ nuu hiyalái lá.

¹⁴ Nungái sítii taa ngáá Júsua, Ngala savái áá ti yaá, ná taa híya ngáá Ngala savái ná wáá ngáá, ná taa híya ngáá sí taa ɣɛ kɔ́lɔ ngáá áá lɔ pele w̃a, ná lɔ aa ngákɛ ngáá kɛ tí kɔ́lɔ sí í péle w̃a ɛ́ɣɛ sí áá péle w̃a kíya bɛ́lɛ Ngalá savái ɛ́i ɣɛ́ ti yaá.

¹⁵ Kɛ sí vá tɔ áá ngákɛ kpál̃au ngáá kɛ ti gí mái gúlangɔɔ lé nɔ́ɔ ngáá Ngala sáva pɔnɛngɔ́ áá ɣɛ́ la ti líí h̃u. Sí vá tɔ ngáá tɔɔỹaá sífaa, ná táa faa ɣɛ́ i ɣɛi pele w̃a ɔɔ aa ɣɛ́ pele w̃a, taá ɣɛ́ kɔlɔ́.

¹⁶ Keela wóo vándai sí ngíwaa nde aá lɔ́ɔ ngákɛ kpál̃au ngáá Ngalá tɔɔ vá kɛ́ma ngáá háwu Jísu Kílisitii í nuu kpɛ́lɛɛ kɔ́sɔ folói ná w̃a áá lí í to nuí fíli ngi ndá gí máá haítii mba.

Júsuai ti híyalai ngáá Ngala sávai

¹⁷ Wú lɛ́ingaa wá lɔ́ɔ́ h̃uubákpa ngáá w̃á lɔ́ ngáá Júsua. Wú lókolangɔɔ lé wú híyalai w̃a ngáá Ngala sávai, wáá maayónga tevé ngáá wú wóó lángɔɔ lé ma wáá Ngála.

¹⁸ Ngala sáva galandái wú yɛ́ aá lɔ́ɔ́ kɛ wúwaa ɣɛ́ kɔ́lɔ kíya Ngalá ndóngɔ wú ɣɛ́ wáá lɛɛh̃úi h̃uuhíya, ná vólu, wá lɔɔ hómbo wáá ngátɔ mbá ngáá sí í péle w̃a ngáá wááyaa kɛ.

¹⁹ Wú lángɔɔ lé lá kpál̃au ngáá wá lɔ́ ngáá pele ɣɛ mbélaa ngáá sítii ti gúlangɔ ngáá mbole yeláá ɣɛ́ kíli Ngala fái h̃u, ná vólu, wú ɣɛ́ kíli gúlangɔɔ lé ngáá lámbo fo sítii fááw̃a ti ngáá kpindí h̃úú yélaa.

²⁰ Ná vólu sífaa, kele ɣeléngi ɛ́ɣɛ tɔ́ɔ́ỹai í Ngalángi hávai h̃u í wú yaa, faalɔ, aá lɔ́ wú gí ma ngáá wá lɔ́ ngáá kálambo mbélaa kutɔ́ mbélai ɛ́ɣɛ tɛɛniinángaitii faaw̃a.

²¹ Kɛ́ ngí ndé wú w̃á gíte ngáá nuu ɛ́i hómbo ɔ́ɔ́ nungáá vékaa galámbo ná áá léle kalambo mááhɔlɔndaa wa. Wáá Ngala ngói le ngáá aa pele w̃a ngáá nuu ɔ́ɔ́ ŋúỹa wó, kɛ́ wá gítei wáá ɣɛ́ wáá ŋúỹai wo.

²² Wáá ndé ngáá nungáá tálaa ɣɛ́ séi h̃u tɔɔ́ kɔlɔsiyá mbó, kɛ́ wá gíte wɔ́i híya ngáá ná. Wáá lói ngáá kɔɔ kɔɔ́ ŋániitii kɔ́ndai nungái taá tí yeɣé ngáá ngalángaa, kɛ́ wáá ɣɛ́ káha hái h̃u ngáá kɛinɔɔ́ wú kɔ́ɔ́ kɔɔ́ ŋáni w̃aa wɔ́lingaa w̃aahɔ́lɔ.

²³ Wáá h̃uubákpa ngáá Ngala sávai lɔ́ wú yáá, kɛ́ wáá híyama lá ná vá tɔ í ngáá nguféma lála wáá fé Ngála mbɛ.

²⁴ Maa hái waa nɔ́ɔ ngáá kíya pɔ́nɛngɔ Ngála Kɔ́lɔi h̃u, sí vá pɔnɛngɔ́ aá wáá ngáá sí, “Wú lúva vélei i kɛ́a ngáá háwu sítii taa ngáá Júsua tíwaa suuhaláta ngooní ndé kɔwɔ́ato Ngalá mbá.”

²⁵ Nuu lɔ́vendai pɛlɛ volu nga tɔ́ nɔ́ɔ léi mbá ná áá híya ngáá Ngala sávai. Kɛ́ ná ɛ́i ɣɛ́ híyani lá, kɛ aa lɔ́vei nuu vékaitii mbá ti lɔ́vengɔ ɛ́i ɣɛ́ lá pɛlɛ́ vólu.

²⁶ Séimil̃a p̃ɛ́ɛ́, sítii taa ngáá Júsua ti lɔ́vengɔ láá le pɛlɛ vólu, ná taa híya ngáá Ngala sávai laa wói, kɛ ná ná áá ɣɛ́, nga tɔ́ tí wa Ngalá ngááh̃u kíya nɔ́ɔ jɔ́ sítii tí ná ti lɔ́vengɔ pɛ́lɛ vólu.

²⁷ Náá hááw̃a, sítii taa híya ngáá Ngala sávai bele pá tí lɔ́vengɔ láa le pɛlɛ́ vólu, taá hómbo ti wú wááleve ngáá wáá vélei wɛ́i wú ngáá Júsuai, bɔw̃álale, kíya bɛ́lɛ wú lɔ́vengɔ pɛ́lɛ vólu aáva Ngala sávai i wú yáá, kɛ́ ná fíli sú, wáá híyama ngáá maa gálambongi.

²⁸ Nuu híya vélei ɔ́ɔ́ bɔ́ɔ́ ɣɛ́ ngáá Júsu w̃ɔɔ hiya velé, ná vólu, í lɔ́vengɔ pɛ́lɛ vólu ná ɛ́i kɛ náá ngáá yɔ́ɔ́ ɣɛ́ ngáá Júsu w̃ɔɔ gíte gíte.

²⁹ Júsu w̃ɔɔ gíte gítei waa ngáá, nuí kí mai áá ɣɛ́ kpál̃au ti lowah̃u táa Ngalá. Nuu lɔ́vendaa pɛ́lɛ vólu ngi gíte gítei waa ngáá sí Hɛ́ɛ́ma Ỹínangi áá kɛ́ ngáá háwu aa ɣɛ́ nuu líí h̃u, aa ngáá sí táá téve nuu lúwui wa. Nuí síí w̃ɔ́i tɛ́ngi áá mááhɔlɔ aa gula Ngalá ngéya, ɛi gúla nuu búsa yáa.