LÓÓMI 16 - Kɛ́lɛ Niinaí

Ndaalima wói Ngala fɛli mbélai tí tɔveí ỹɔw̃ɔ́ ỹɔ́w̃ɔ yele

¹ Nyah̃ápoi sí taa ɣɛ́ ma Fiibi í ngáá mu mbála Yalá fɛ́li mɔ́i ta, lɛ́i i mɔ́ɔ ngáá kpɔmba w̃ɔ́ɔ́ Ngala fɛ́li mbélaitii su tí ỹándai mbéi taa náá lóli ngáá Sɛ́kuliya, áá lɔ́ ngáá nuu vánda.

² A lokohéi mbu ngáá pangɔ ngáá kíya nɔ́ɔ kule aa ɣɛ́ Ngalángi vóngaitii ma ti lókohei nuu wu áá ɣɛ́ lái ngáá Ndemɔí Jísu. A bɔ́ mba pele kpɛ́lɛɛ su bɔw̃álale aá lɔ́ ngáá kpɔmba w̃ɔ́ɔ́ vánda nuu bíh̃i bíh̃i faaw̃a kpahangɔ́ nyá gíte ɣele tɔ mba.

³ Ngí há Pilesíla w̃a taá Akúila tiyɛ́i naá tiyéni ni lɔngɔ́ náá yénge Jísu Kílisitii yɛ.

⁴ Tí lɛɛh̃ú gúlani ndɔbɔ nyá fááw̃a. Ngáá sɛ́ɣɛɛ gúla ti w̃a kɛ́ aa gɛɛlɛí nɔ́ɔ ngílaa wa, Ngala fɛ́li mbélai sítii kéle tɔ taa ngáá Júsua sɛ́ɣɛɛ gulama lɔ́ tí liítii su Pilesílani faaw̃a.

⁵ Ngí há sítiini ma taa w̃ɛ́ɛ́ Ngala fɛ́limai Pilesílani ti vɛ́lɛi wú. Ngí há mú mbálai Ɛpanitɔ w̃a lɛ́i í ɣɛ́i ngáá hésendaa w̃ɔɔ Ésiya lataí h̃u í lái ngáá Kílisitii.

⁶ Ngí há Mɛɛloí w̃a lɛ́i í yéngenga ngwala gíte wú hááw̃a.

⁷ Ngí há mu mbála Júsuai sítiini ma taa ɣɛ́ tí w̃a Andulɔ́nikɔ ɛ́ɣɛ Juníya, tiyɛ́i tiyá bɛ́lɛ nɔ ní ɣɛ́i kpindi vɛ́lɛi wu naá tiyéni. Tiyá p̃ɛ́ɛ́ ti ɣɛ́i ngáá Kílisitii volu yelaa nyá ɣéle tɔ ngɔ́ɔ́ ɣɛ́a ɣɛ ngáá Jísu volu w̃ɔɔ aáva ngufema wála lɔ́ Ngalángi géélaitii ngeyá ti haáw̃a.

⁸ Ngí há Amipiliyátɔ w̃a, lɛ́i í ngáá a mu mbála lopó vánda, i mɔɔ ngáá Ndemɔí Jísu vólu w̃ɔ́i ta.

⁹ Ngí há Ɛbanɔ w̃a, lɛ́i a maá tiyéni a maa yénge Kílisitii yɛ. Ngí há mú mbála vandái Sutake w̃a.

¹⁰ Ngí há Apɛ́li w̃a, lɛ́i nga ngí ɣɛ́a kpál̃au ngáá aá lɔ ngáá ngenge mɔ́ɔ́ vánda Kílisitii yɛ. Ngí há Alesitɔ́bulɔ letɔáitii ma.

¹¹ Ngí há Hɛlɔdiyɔ w̃a, lɛ́i ni lɔ́ngɔ ni ngáá Júsua. Ngí há Nasesɔ létɔaitii ma tiyɛ́i tiyá bɛ́lɛ ti langɔ́ ngáá Ndemɔí Jísu.

¹² Ngí há Tilefinɔ w̃a ɛ́ɣɛ Tilefosɔ, tiyɛ́i tíwaa yénge Ndemɔí Jísu yɛ. Ngí há mú mbála vandái Pɛse w̃a lɛ́i laa bɛ́lɛ nɔ í yéngenga ngwala Ndemɔí Jísu yɛ.

¹³ Ngí há Lúfɔ w̃a, lɛ́i áá yénge ngáá suulɔ́vɔngɔ Ndemɔí Jísu yɛ, ná vólu, ngí há ngí njéé w̃a, lɛ́i í njéé laa ɣɛ́a mbɛ́.

¹⁴ Ngí há Asikotɔ w̃a ɛ́ɣɛ Fílɛgɔ ɛ́ɣɛ Hɛ́mi ɛ́ɣɛ Patulɔbɔ ɛ́ɣɛ Hɛ́ma í báha náá mu mbála Yalá fɛ́li mbélaa vekaí sítii mbá tí tí loow̃á.

¹⁵ Ngí há Felɔlɔgɔ w̃a ɛ́ɣɛ Júliya ɛ́ɣɛ Nɛliyɔ ɛ́ɣɛ ngi hééla. Ná vólu, ngí há Ol̃ipɔ w̃a ɛ́ɣɛ Ngalángi vóngaa vekaí sítii kpɛ́lɛɛ náá tí tí loow̃a.

¹⁶ A wáálaa lééw̃a ndiiwolé láálima wondái w̃a ỹɔw̃ɔ́ ỹɔ́w̃ɔ w̃a. Ngala fɛ́li mbélaa vekaí sítii kpɛ́lɛɛ tí mbéi véle Kílisitii hááw̃a, tí hááni wú w̃a.

Ngapúmaa woítii

¹⁷ Mu mbála Yala fɛ́li mbélai, wu w̃áánɛɛnɛngɔ gítee le, a waayaa naa w̃ááh̃u béle gíte ngáá nuí fíli áá ɣɛ́ wú lííwaa ngáá í vá ngáá ndowah̃u kɔlɛ́ háa, ɔ́ɔ́ í kɛ́ ngáá háwu faa í víli Ngala fɛ́lindai h̃u, ná wáá ngáá, sítiini taa léle ngáá ti híya ngáá kalambongítiini wú maahɔ́lɔngɔ, a waa báha kpahá sú wáá ná w̃aa núngai,

¹⁸ sífaa taá yéngema Ndemɔí Jísu Kílisitii hááw̃a, aá ɣéle ti bɛɣéngɔɔ lé nɔ́ɔ ngáá ti laaỹɛ́ɛ́ni haa. Taá woo nɛ́ɛ́ nɛɛ nda sítii mbu tɛ́i ɣɛ́ faa wɔ́lɔ ngwala kɔwɔ́ato nyaama háá wa, tí tí yakpólowa.

¹⁹ Kɛ́ aá lɔ́ ngáá ndíívo fáá ngáá nuu kpɛ́lɛɛ ti faa ỹɛ́ninga kɔwɔ́ato kolóngi wa wú su Ngalángi gééla woo vandái wu. Kɛ́ ná fíli sú, ngáá ɣɛ́ loí gíte wú ɣɛ́ sítii kɔ́lɔ ti ngáá faa vándaitii aáva wáálaa báha kpahá faa fíli mbá ti ngáá faa ỹɔ́u ỹɔ́ungaa.

²⁰ Ná vá kɛngɔ́ Ngalá lɛ́i áá kɛ́ ngáá háwu mú ndííhei w̃aahɔ́lɔ aá lɔ́ɔ vá Setána ɣɛ kíli ỹaani má h̃úmbuwa í ɣɛ́ ngáá wú gɔ́wɔ wú wɔ́li kɛ kíli. Bɛlɛ́ a mu Lemɔ́i Jísu háá bɔ́wɔi í ɣɛ́ wú yɛ.

²¹ Tímoti, lɛ́i náá láá níwaa yénge, i haaní wú w̃a í báha náá mu mbála Júsuai sítiini kele tɔ mba taa ɣɛ́ tí w̃a Lúsɔ ɛ́ɣɛ Jésɔ ɛ́ɣɛ Sosepatɔ.

²² Nyɛ́i ngí ngáá Tɛ́tiyɔ, ngí ngáá wú mbála Yalá fɛ́li mɔ́i ta, nyá lɔ́ ngí kɔ́lɔi sí vɔ́nɛngɔ Pɔ́ɔ yɛ aáva nyá bɛ́lɛ ngí há wú w̃a.

²³ Gééyɔ, lɛ́i Ngala fɛ́li mbélai taa w̃ɛ́ɛ́ ngí vɛ́lɛi wú, í ndááw̃aavɛlɛngɔ nyɛ́i ngí ngáá Pɔ́ɔ, laá bɛ́lɛ í haani wú w̃a. Nuí í ngáá taa walái sí h̃uu gápa ngandɔ́ɔ́lɔ mɔ́i, taa ɣɛ́ ma Ilásitɔ i haaní wú w̃a. Ná vólu, a mu mbála Yalá fɛ́li mɔ́i Kɔwɔtɔ ɣele tɔ i hááni wú w̃a láá bɛ́lɛ. [

²⁴ Bɛlɛ́ a mú Lemɔ́i Jísu Kílisitii haa bɔwɔ́i i ɣɛ́ wú kpɛ́lɛɛ mbɛ́. Amíína.]

Ngapúmaa Yala fɛli ngói Pɔ́ɔ í ndéni

²⁵ A mú Ngála tɛ́ lɛ́i áá kɛ ngáá háwu Ngalángi gééla woo vandaí sí ngíwaa nde kɔwɔ́ato Jísu Kílisitii wa íwaa wú h̃úúba ngi hái h̃u. Wɔ́lɔ kpɔ́lɔɔ tɔɔỹáa gééla wói sí w̃aa lɔ́ɔ́wungɔ i ɣɛngɔ la,

²⁶ kɛ́ ngápumai sí náá i gulaá kɛ́lɛma Ngala ndaa háá lé mbélai ti gɔlɔ vɔnɛngɔ́itii maa véle w̃a. Ngalá lɛ́i í na kúnafɔ i ndéi ngáá tɔɔỹái sí i lé nungáitii kpɛ́lɛɛ ma ti ndɔ́wɔlɔitii kpɛ́lɛɛ sú ngeleí sí wu ngáá kɛinɔɔ́ ti lá lá aáva ti gólo mbɛ.

²⁷ Aáva Jísu Kílisitii w̃aa véle w̃a náá, a mú Ngála tɛ́ lɛ́i ngiláá kpé í ngáá Ngalá kéle ɣeléngi kpɛ́lɛɛ í ngeyá! Amíína.