LÓÓMI 13 - Kɛ́lɛ Niinaí

A gólo sítii mbɛ ti wú w̃ááh̃u

¹ A gólo nuu wála wálaitii mbɛ tiyɛ́i ngakpángi tí yaá wú w̃ááh̃u sífaa, Ngalá tɔ áá kɛ ngáá háwu ngakpángi hé nuu fíli ngéya maa w̃ɔ́ɔ́ ɔ́ɔ́ ɣɛ́a maahɔ́lɔ. Laá vá tɔ áá másangaitii séi ti héiw̃aitii bɛ́kpɛ ti w̃ásandaitii su.

² Nungái sítii taa ló másangaitii ndaa wu, kɛ tiyá lɔ́ ti yaah̃ú lóngɔ Ngalángi háá h̃uubatɛngí wa aáva faa báma w̃úl̃a taa ɣɛ́ táá kɔ́li ngáá bɔwɔ́.

³ Masangáitii taa ngáá nduwá mba yélaa nungái sítii fááw̃a ti lúva veléi vangɔ́, kɛ́ tiyá lɔ́ ngáá nduwá mba yélaa sítii fááw̃a ti ngáá faa ỹɔ́u ɣɛ mbélaitii. Kule áá ma nuu ɔ́ɔ́ lúwa masangáitii mba. Sí ɣɛ́ nɔ́ɔ léi í péle w̃a aáva taá ɣɛ́ taa í lɛ́ náá hááw̃a.

⁴ Tiyá lɔ́ ngáá Ngalángi yénge mbelaa aáva, aá lɔ́ ngáá ti ndá yénge ngáá ti bɔ́ í wá. Kɛ́ ná wɔ́lii yáá faa ỹɔ́u ɣɛ, kɛ ná ná áá ɣɛ́, kule lɔ í w̃á yí ɣɛ́ yáá lúwa bɔw̃álale, masangái sítiini tiyá lɔ́ na ngáá tí faa bá nda í w̃á ná yáá faa ỹɔ́u ɣɛ́. Tiyá lɔ́ ngáá Ngalángi yénge mbelaa ngáá tí faa bá ndá faa ỹaaní mbélaitii ma ngáá kɛinɔɔ́ tí ngákɛ ngáá kíya Ngalá ndiiyáw̃al̃angɔ áá ɣɛ́ la faa ỹaaní mbélaitii ma.

⁵ Kɛ́ aáva maa áá ɣɛ́ nɛɛni wú gólo masangáitii mbɛ bɔw̃álale, wú súúwɔlɔ ngáá aá lɔ́ pele w̃a ngáá ná í ɣɛ́. Álaa ɣɛ́ nɔ́ɔ ngáá sífaa Ngalá ndiiyáw̃al̃angɔ áá ɣɛ́ lá wú w̃a ná wɔ́i gólo ti yɛ.

⁶ Ná lɔ́ í kɛ́a kule lɔ́ ma ngáá wú pávaitii fe. Masangáitii tɔ́ ngáá Ngalángi yénge mbelaa aáva aá lɔ́ ngáá ti ndá yénge ngáá ti sítii kpɛ́lɛɛ súúhiya.

⁷ Sí fíli kule áá ɣɛ́ ma nuu í mááhɔlɔ í yáá ná hé ngeyá. Ná áá ɣɛ́ ngáá pava, fe ngeyá, ná mɔ́ɔ́ áá ɣɛ́ ngáá ŋani h̃ɔ́w̃ɔ, ná hé ngeyá, i ɣɛi ngáá ngufema, fe ngeyá, ná áá ɣɛ́a mbɛlɛheí, fe mbɛ.

Ndóngi lɔ i ngáá Ngala sávaitii ngutevéngɔi

⁸ Nuu fíli ngi gúle álaa ló i w̃a, sí nɔ́ɔ léi áá ɣɛ́ í w̃á ngáá kule ɣɛ kíli nungáá vékaitii fááw̃a i ɣɛ nɔ́ɔ ngáá ndongí. Ná yáá ɣɛ́ loí ngáá nungáá vékaitii, kɛ ná ná áá ɣɛ́, sí kínɛi í Ngala sávai h̃u ngáá kule í ma yí kɛ ngutevéngɔi waa ngáá ná.

⁹ Ngala sávaitii í féngɔ ti lɛ́ingaa waa ngáá, “Yálaa kɔ́lɔsiya mbo, yálaa nuu váá, yálaa ŋúỹa wó, nungáá yáá wɔ́li mɔní álaa víli í líí vólu.” Kɛ́ sítii ɛ́ɣɛ pékaitii kpɛ́lɛɛ ngu nda mái waa ngáá sí savá yiláángi sí í ndéngɔ, ná wáá ngáá sí í ɣɛ́ngɔ ta, “Ló ngáá í mbála nuu búsaitii kíya í lóngɔ ngáá bɔwɔ́.”

¹⁰ Nuu fíli áá ná ɔ́ɔ́ ɣɛ́ lóni ngáá nungáá vékaitii ɔ́ɔ́ mɔ́ɔ́ ỹandahéi ti wa. Faalɔ, nuu gólondai sávai wu aa waa ngáá ndongí nuu áá ɣɛ́ su ngáá nungáá vékaitii.

¹¹ Á sí ɣɛ sífaa mú yéteyangi sí mú su wú kɛ́ kíli wɔlɔ́. Sɛmbɛheí hɔ́wɔ lɔ ngáá sí. Táingi ná a mu wumáá áá vá wóma kpɛɛngɔ́ɔ́ lé náá mba í lɔ́ve ná h̃úú wá hése a mu láni ngáá Jísu.

¹² Maa hái gúlangɔɔ lé ngáá kpindíí h̃uu híyangɔɔ lé náá kíli, suu áá mɔ́ɔ́ ngelewondái wa. A mu bé fáitii kɛ́ma ngáá kíya kpéi kpíndi h̃úú yélaa taa ɣɛ́ na, kɛ́ aá ɣéle a mu ɣɛ kíli í ɣɛ́ ngáá nungáá ti w̃ááhei wóngɔ í ɣɛ́ la kɔɔ́ wɔ́ fááw̃a ngelewo sú.

¹³ Faalɔ, wú híya veléitii ti ɣɛ́ péle w̃a kíya nɔ́ɔ nungáá taa ɣɛ́ na taa ɣɛ́ ngelewóngi h̃u. Wálaa ɣɛ́ wáá lí kooh̃unɛ́ɛ́ lááỹɛ mbo máá wala walaítii kɔlɔsiyá faa áá ɣɛ́ ná kɛlaa wɔ́ɔ́ ɣɛ́ ndɔɔ hóu h̃u. Wálaa ɣɛ́ kɔ́lɔsiya su ɔɔ njɔlɔ haáni. Wálaa ɣɛ́ kpɔɔlɔ́ laa wú kɛlaa tolóma h̃u.

¹⁴ Wú w̃aahéi wóngɔ í ɣɛ́ la ngáá Ndemɔí Jísu Kílisitii gɔ́ɔ́ wɔ́ nyaakáitii, ná ná áá ɣɛ́, wɔ́i mɔ́ɔ́ ɣɛ́ nɔ́ɔ wáá faa ỹɔ́i sítii kɛ taa ɣɛ́ ngáá wú líívo fáitii.