LÓÓMI 12 - Kɛ́lɛ Niinaí

Ngala fɛ́li mbélai ti lɛ́ɛ́h̃ui h̃uuhíya kílii

¹ Mu mbála Yalá fɛ́li mbélai, Ngalángi yááh̃u w̃aaw̃aanuma walaí i folóa mú w̃a, faalɔ, nyá lɔ́ɔ wú w̃áánɛɛnɛ ngáá wú bɔwɔ́ hé mbɛ kíya nɔ́ɔ taá tóŋanii váá ngáá tí kúla ngáá saáɣa Ngalá ngéle, wú ɣɛ́ ngáá ndɛɛh̃u gélei Ngalá ngéya, wú gúlangɔ í ɣɛ́ la kɛlɛ́ma Ngalá mbɛ, wú ɣɛ́ ngáá Ngalá ndíívo mbélaa. Ná lɔ́ í ngáá fɛlingí gíte gítei wáá mbó ngáá Ngalá.

² Wálaa ɣɛ́ ngáá sítii kɛ kíli táa Ngalá faaw̃a ngeleí sí wú, kɛ́ áá ɣéle, a lokohéi mbu ngáá Ngalá ngí wú gísiyaitii kpɛ́lɛɛ máálovi. Ná ná áá ɣɛ́, wáá ɣɛ́ náá kɔlɔ́ sí Ngala ndóngɔ la ná wáá ngáá, kíya wáá fáitii kɛ ngáá pangɔ́ tɔmbéma w̃áá fíli ɛ́i ɣɛ ti wa ngáá taá Ngála ndiilá.

³ Ngálangi háá bɔwɔ walaí w̃áá véle w̃á í ngaah̃ú ɣɛ́a ngáá ngé, ngí ngátɔa mba ngáá ngí ndé wú w̃a ngáá kíya núi fíli áá ɣɛ́ na. Maa w̃ɔ́i gísiya álaa ngandɛ́i, ɔ́ɔ́ ngí háá lɛ́nga ɔ́ɔ́ lɔ́ve kɛ kíli wa. Kɛ́ láá ɣéle, ndangí l̃ɔ́ingi Ngalá ngáá kɛ́ ngáá háwu nuu fíli í mááhɔlɔ, laá lɔ́ áá lókola ma í bɔ́wɔ yéɣe ngáá ele wáá ngáá laá.

⁴ Kíya nɔ́ɔ a mu luwúi sí wáá wɔ́lingaitii ti bih̃íngɔ aáva ngilá ngílangi fíli ngi ndá yénge tokoí i léélaa,

⁵ ngimɔ́ɔ́ nɔ́ɔ a muỹá Ngala fɛ́li mbélaitii a mu bih̃íngɔ, kɛ́ a muỹá lɔ́ nɔ́ɔ ngáá nuu yílaa kpahái wa mu su Kílisitii wá, mú bahángɔɔ lé ỹɔw̃ɔ́ ỹɔ́w̃ɔ wa kíya nɔ́ɔ mú luwúi waa wɔ́lingaitii ti léélaa léélaa kɛ́ ti báhangɔ su.

⁶ Faalɔ, sí fíli Ngalá ngáá kɛ ngáá háwu í ɣɛ́ ngáá í yénge toko, mbo ngáá hɛmbɛ́ fíli kíya nɔ́ɔ Ngalá ngáá ɣɛ naa gúlai kɛ́lɛma í yɛ́. Ná wɔ́lii áá ɣɛ́ naa gúlai kɛ́lɛma í yɛ́ ngáá yí ɣɛ́ yáá ndaa háá lé, kɛ ndendái ɣɛ ngáá hɛmbɛ́ fíli ngáá kíya í lángɔ lá ngáá kule lɔ í w̃á yí kɛ.

⁷ Nuí ngí ndái áá ɣɛ́ ngáá kpɔmba héndaa nungáá yɛ́, ááyaa ná ɣɛ. Nuí ngí ndái áá ɣɛ́ ngáá nungáá gálambondaa, ááyaa ná ɣɛ.

⁸ Nuí ngí ndái áá ɣɛ́ ngáá nungáá liiwúúlɛndaa, ááyaa ti liiwúúlɛ. Nuí vá ngí ndái áá ɣɛ́ ngáá ŋani hendáá nungáá yɛ́, ááyaa fé gíte ngáá ndiiwolé. Nuí ngí ndái áá ɣɛ́ ngáá í ɣɛ́ ngáá ngutuwɔ́ w̃ɔ́ɔ́, kɛ i ná ɣɛ́ ngáá hɛmbɛ́ fíli. Nuí ngí ndái áá ɣɛ́ ngáá tuva velé vánda wóndaa nungáá yɛ́, ááyaa kɛ́ kooh̃unɛ́ɛ́ w̃ááh̃u.

⁹ Wálaa ɣɛ́ nɔ́ɔ wáá kpátɛ ngáá wú lóngɔɔ lé ngáá ỹɔw̃ɔ́ ỹɔ́w̃ɔ kɛ́ ɛi ɣɛ wú líí h̃u. A híli ngáá faa ỹɔ́u ɣɛ́ndai, wú ló ngáá faa vándaitii kɛ́ndaa.

¹⁰ A ló ngáá ỹɔw̃ɔ́ ỹɔ́w̃ɔ kíya nɔ́ɔ wú lóngɔ ngáá wú létɔaitii. Nuí fíli í ɣɛ́ áá wúfe ngi mbálangai ma í lɔ́ve laá gíte wa.

¹¹ Wálaa yɔ́ njɔ́, kɛ́ láá ɣéle, wááyaa yénge ngwala ngáá lií kpɛ́lɛɛ Ndemɔí Ngála mbɛ.

¹² Kitomái í wú yáá ná í kɛ́ ngáá háwu wú góóh̃unɛɛngɔ í ɣɛ́ la. Wu lííbangɔ í ɣɛ́ la táingi fíli má faa báma áá vá wú w̃ááh̃u, ná vólu, wú ɣɛ́ nɔ́ɔ fɔ́ wáá Ngala fɛ́li hɔ́wɔ fíli.

¹³ Ngalángi vóngaitii taa ɣɛ́ kpéɣe su, wááyaa ti waaháá ɣɛ́. Ná vólu, wááyaa lokohéi sótangaa wú wú vɛ́lɛitii mbu.

¹⁴ Nuí fíli áá í h̃úúhou kíli ỹɔu wo, Ngala fɛ́li ngáá Ngalá ngí nɛ́ɛ́ma yéi maa w̃ɔ́i w̃a. Yálaa Ngala fɛ́li ngáá í faa báma lá ma.

¹⁵ Ná núngaa ti góóh̃unɛɛngɔ áá ɣɛ́ la, bahá tí wa maa góóh̃unɛi h̃ú. Ná núngaa ti w̃ááw̃aanungɔ áá ɣɛ́ la, bahá tí wa maa w̃ááw̃aanumai h̃u.

¹⁶ Ɣɛ́ ndiihéi w̃aah̃ú waa nungáá vékaitii. Yálaa lii ɣɛ́ wɔ́ɔ́lɔ, kɛ́ yí ɣɛ́ ngáá mbalalopo sítii fááw̃a taa ngáá ndaahéi mba yélaa. Yálaa bɔ́wɔ yéɣe ngáá í h̃úúgulangɔɔ lé nungáá vékaitii mba.

¹⁷ Ná nuu áá í h̃úúhou kíli ỹɔu wo, yálaa poto kúla ngáá suuhóu kíli ỹɔu wondáá, kɛ́ áá ɣéle, yááyaa sítii kɛ áá ɣɛ́ nuu kpɛ́lɛɛ ngááh̃u ngáá faa vánda.

¹⁸ Aáva kɛ ngáá hɛmbɛ́ fíli ngooláma í ɣɛ́ í lówah̃u wáá nuu kpɛ́lɛɛ.

¹⁹ Mu mbála vándai, a waa ɣɛ́ ngáá poto kulá wó mbélaa. Bɛ́lɛ Ngála ngí ɣɛ́ ngáá poto kulái wo wú yɛ́, sífaa, Ngala Kɔ́lɔi h̃u pɔnɛngɔ́ɔ́ lé ngáá sí Ndemɔí Ngála ngí ndéngɔ, i ɣɛ ta, “Nyá lɔ́ ngí ngáá poto kulá wó mɔ́i. Nyá lɔ́ɔ vá ngí póto kulai wo ti w̃a.”

²⁰ Kɛ́ aá ɣéle, sí ɣɛ́ pɔnɛngɔ́i Ngala Kɔ́lɔi h̃u, sí vá pɔnɛngɔ́ aá wáá ngáá sí, “Ná ndɔlɛ áá ɣɛ́ í wááhilima w̃ɔ́ɔ́ w̃a, kɔ ngáá mɛɛní í mɛ́, ná vólu, ná njɛ́ w̃ɔ́ni áá ɣɛ́ ma kɔ́ ngáá njɛ í kpɔ́le. Sífaa, ná gúlangɔɔ lé nɔ́ɔ ngáá kíya nuu áá ɣɛ́ áá ngɔ́mbu gɛhɛ́ vú nuu wú mba.”

²¹ Yálaa kɛ faa ỹɔ́u ɔ́ɔ́ hómbo í w̃a, kɛ́ áa ɣéle, hómbo faa ỹɔ́i w̃a ngáá faa vánda ɣɛ́ndai í yɛ.